3 Mose 20 - ŊMALƐ KRƆŊKRƆŊ LƐ

Toigbele he toigbalamɔ

¹ Yehowa kɛ Mose wie,

² ni ekɛɛ Israelbii lɛ akɛ, “Mɔ fɛɛ mɔ ni ji Israelnyo loo gbɔ ni ebato gbɔ yɛ Israel shikpɔŋ lɛ nɔ ni ekɛ ebii lɛ eko aaahã ni akɛja Molek lɛ, agbe lɛ; shikpɔŋ lɛ nɔ bii lɛ atswia lɛ tɛ.

³ Kɛji mɔ ko kɛ ebii ateŋ mɔ ko hã Molek, ni ekɛwo He Krɔŋkrɔŋ ni ajaa mi yɛŋ lɛ he muji, ni eshwie migbɛi krɔŋkrɔŋ lɛ hiɛ shi lɛ, mi lɛ majie mihiɛ maka lɛ, ni mibuŋ lɛ mishiŋ miwebii lɛ anɔ.

⁴ Shi kɛji mɛi ateŋ ni eyɔɔ lɛ ku amɛhiɛ amɛfɔ̃ nɔ ni efee lɛ nɔ, ni amɛgbeee lɛ lɛ,

⁵ mi lɛ majie mihiɛ maka lɛ kɛ eweku fɛɛ, kɛ mɛi fɛɛ ni nyiɛ esɛɛ ni amɛyeee mi anɔkwa, shi amɛjaa Molek lɛ. Mibuŋ amɛ mishiŋ miwebii anɔ.

⁶ “Kɛji mɔ ko yabi nii yɛ mɛi ni tsɛɔ sisai aŋɔɔ lɛ, mate shi mawo lɛ, ni mibuŋ lɛ mishiŋ miwebii lɛ anɔ dɔŋŋ.

⁷ Nyɛhiɛa nyɛhe krɔŋkrɔŋ, ejaakɛ mi ji Yehowa, nyɛNyɔŋmɔ lɛ.

⁸ Nyɛhiɛ akãa mimlai lɛ ahe ni nyɛyea nɔ; mi ji Yehowa ni feɔ nyɛ krɔŋkrɔŋ lɛ.

⁹ “Mɔ fɛɛ mɔ ni lomɔɔ etsɛ loo enyɛ lɛ, agbe lɛ. Etsɛ kɛ enyɛ elomɔ lɛ; esɔ̃ atere lɛ.

¹⁰ “Kɛji nuu ko kɛ nuu kroko ŋa ku gbãlã mli lɛ, agbe nuu gbãlãŋkulɔ kɛ yoo gbãlãŋkulɔ lɛ fɛɛ.

¹¹ Nuu ni kɛ etsɛ ŋa wɔɔ lɛ eshwie etsɛ hiɛ shi. Gbe agbe lɛ kɛ yoo lɛ fɛɛ; ni amɛsɔ̃ atere amɛ.

¹² Kɛji nuu ko kɛ eshaayoo ni ji ebinuu ŋa wɔ lɛ, agbe lɛ kɛ eshaayoo lɛ fɛɛ; hiɛgbejianii amɛfee lɛ; amɛsɔ̃ atere amɛ.

¹³ Kɛji nuu ko kɛ nuu kroko wɔ tamɔ bɔ ni akɛ yoo wɔɔ lɛ, amɛfee nɔ ni ahiɔ; agbe amɛyi enyɔ lɛ fɛɛ; ni amɛsɔ̃ atere amɛ.

¹⁴ Kɛji nuu ko ŋɔ yoo ko kɛ enyɛ fɛɛ efee eŋãmɛi lɛ, ashã amɛyi etɛ̃ lɛ fɛɛ yɛ musu ni amɛbɔ lɛ hewɔ.

¹⁵ Kɛji nuu ko kɛ kooloo ko wɔ lɛ, agbe lɛ kɛ kooloo lɛ fɛɛ.

¹⁶ Kɛji yoo ko bɛŋkɛ kooloo ko, ni ekãa shi ehãa lɛ, ni ekɛ kooloo lɛ wɔ lɛ, agbe yoo lɛ kɛ kooloo lɛ fɛɛ; amɛmusu atere amɛ.

¹⁷ “Kɛji nuu ko kɛ enyɛmi yoo ni ji etsɛbi loo enyɛbi wɔ lɛ, amɛfee hiɛgbejianii. Atswa amɛnaneshi tu kɛje amɛwekumɛi ateŋ. Nuu lɛ ni kɛ enyɛmi yoo ewɔ lɛ, esɔ̃ atere lɛ.

¹⁸ Kɛji nuu ko kɛ yoo ko ni etee tsuiasɛɛ wɔ lɛ, atswa amɛnaneshi tu kɛje amɛwekumɛi ateŋ.

¹⁹ “Kɛji nuu ko kɛ etsɛ nyɛmi yoo loo enyɛ nyɛmi yoo wɔ lɛ, eshwie mɔ ni ekɛ lɛ hiɛ heloo kome hiɛ shi; amɛsɔ̃ atere amɛ.

²⁰ Kɛji nuu ko kɛ etsɛkwɛ̃ ŋa wɔ lɛ, eshwie etsɛkwɛ̃ lɛ hiɛ shi; ekɛ yoo lɛ fɛɛ, amɛsɔ̃ atere amɛ; amɛteŋ mɔ ko naŋ bi, ni ebaagbo.

²¹ Kɛji nuu ko kɛ enyɛmi nuu ŋa wɔ lɛ, amɛbaagboi ni amɛbɛ bi. Nuu lɛ etsu hiɛgbejianii, ni eshwie enyɛmi lɛ hiɛ shi.

²² “Nyɛyea mimlai lɛ kɛ mikpɔi lɛ fɛɛ nɔ, koni shikpɔŋ ni mikɛ nyɛ yaa ni nyɛyahi nɔ lɛ akafɛ̃ nyɛ eshwie.

²³ Nyɛkakasea shikpɔŋ lɛ nɔ bii lɛ akusumi ni amɛfeɔ lɛ. Miishwie nɛkɛ wɔŋjalɔi nɛɛ bɔ ni afee ni nyɛnyɛ shikpɔŋ lɛ nɔ nyɛya. Amɛkɛ amɛnifɔɔjianii ni amɛfeɔ lɛ ehã minyaŋe amɛ.

²⁴ Shi miwo nyɛ shikpɔŋ kpakpa ni baa nii nɛɛ he shi, ni mikɛbaahã nyɛ akɛ nyɛnɔ. Mi ji Yehowa, nyɛNyɔŋmɔ lɛ. Mijie nyɛ yɛ maji krokomɛi lɛ ateŋ mito afã.

²⁵ No hewɔ lɛ, nyɛfea srɔto yɛ kooloi kɛ loofɔji ni he tse kɛ nii ni he tseee ateŋ. Nyɛkayea kooloi loo loofɔji ni he tseee. Mihã nyɛle akɛ amɛhe tseee; ni kɛ nyɛye lɛ nyɛhe baawo muji.

²⁶ Nyɛhiɛa nyɛhe krɔŋkrɔŋ nyɛhãa mi pɛ, ejaakɛ mi, Yehowa, mihe tse. Mijie nyɛ yɛ maji krokomɛi lɛ ateŋ mito afã koni nyɛfee mi pɛ minɔ.

²⁷ “Nyɛteŋ nuu loo yoo ni aaayabi nii yɛ sisa ŋɔɔ lɛ, atswia lɛ tɛ ni egbo. Mɔ fɛɛ mɔ ni feɔ enɛ lɛ egbele sɔ̃ atere lɛ diɛŋtsɛ.”