3 Mose 2 - ŊMALƐ KRƆŊKRƆŊ LƐ

Niyenii afɔlei

¹ “Kɛji mɔ ko kɛ ŋmãa miiba abashã afɔle ahã Yehowa lɛ, egbɛlɛ ŋmãa lɛ mã. Ekɛ mu ashwie mamu lɛ nɔ, ni ekɛ tsofakɛŋma hu afata he;

² koni ekɛbahã Aaron bihii osɔfoi lɛ. Osɔfo ni yɔɔ nitsumɔ nakai gbi lɛ nɔ lɛ akpiti mã lɛ kɛ mu lɛ ekɔkɔ obɔ̃ kɛ tsofakɛŋma lɛ fɛɛ koni ashã yɛ afɔleshãa latɛ lɛ nɔ akɛ afɔle muu ni akɛbahã Yehowa he odaseyeli nɔ. Eji shãa afɔle, ni ejeɔ ŋma ewoɔ Yehowa.

³ Niyenii afɔle lɛ mli nɔ ni shwɛɔ yɛ nɔ ni ashãa lɛ sɛɛ lɛ Aaron kɛ ebihii lɛ anɔ ni; eji nɔ ni yɔɔ krɔŋkrɔŋ jogbaŋŋ diɛŋtsɛ, ejaakɛ afɔle ni ashãa ahãa Yehowa lɛ eko ni.

⁴ “Kɛji afɔle lɛ yafee ŋmãa nii ni ashã yɛ flɔnɔɔ mli lɛ, nɔ lɛ efee mã akpiti keeki ni akɛ mu wo mli ashã, loo mã akpiti akpãanɔɔ ni akɛ mu ekpa hiɛ.

⁵ “Kɛji afɔle lɛ yafee nii ni ashãa yɛ looshãa dade nɔ lɛ, no lɛ efee nii ni akɛ mã akpiti ni awo mli mu fee niyenii.

⁶ Akumɔ afɔle lɛ mli dukuduku, ni afɔse mu ashwie nɔ. Niyenii afɔle ni.

⁷ “Kɛji afɔle lɛ yafee niyenii ni ashĩ yɛ ŋɛsu mli hu lɛ, afɔle lɛ afee niyenii ni akɛ mã akpiti kɛ mu fee.

⁸ Akɛ niyenii afɔle ni akɛ nibii nɛɛ fee lɛ aba akɛ Yehowa nikeenii, ni akɛbahã osɔfo lɛ, ni ekɛya afɔleshãa latɛ lɛ he.

⁹ Osɔfo lɛ ajie niyenii afɔle lɛ mli eko, ni eshã yɛ afɔleshãa latɛ lɛ nɔ akɛ shãa afɔle muu lɛ ni akɛbahã Yehowa he odaseyeli nɔ.

¹⁰ Niyenii afɔle lɛ mli nɔ ni shwɛɔ yɛ nɔ ni ashã lɛ sɛɛ lɛ Aaron kɛ ebihii lɛ anɔ ni. Eji nɔ ni yɔɔ krɔŋkrɔŋ jogbaŋŋ diɛŋtsɛ, ejaakɛ afɔlei ni ashãa ahãa Yehowa mli eko ni.

¹¹ “Nyɛkɛ niyenii afɔle ko niyenii afɔle ko ni akɛ mã sha fee akabahãa Yehowa, ni nyɛkashãa nɔ ko ni mã sha loo wo yɔɔ mli akɛ shãa afɔle nyɛhãa Yehowa.

¹² Nyɛbaanyɛ nyɛŋɔ nibii nɛɛ amli klɛŋklɛŋ nii lɛ eko nyɛbahã Yehowa. Shi moŋ akashã yɛ afɔleshãa latɛ lɛ nɔ akɛ nii ni jeɔ ŋma.

¹³ Nyɛwoa nyɛniyenii afɔlei lɛ fɛɛ amli ŋoo. Ŋoo ji nii ni yeɔ kpãŋmɔ ni nyɛNyɔŋmɔ lɛ kɛ nyɛ ekpãŋ lɛ he odase lɛ. No hewɔ lɛ, akashi ŋoo sɛɛ yɛ nyɛniyenii afɔle fɛɛ mli. Nyɛkɛ ŋoo afataa nyɛfɔlei fɛɛ ni nyɛkɛbaa he.

¹⁴ Kɛji niyenii afɔle ni akɛbaahã Yehowa fee ŋmɔshi klɛŋklɛŋ nibaanii lɛ mli eko lɛ, no lɛ afɔle lɛ afee abele kpokploku ni ashĩ mamu.

¹⁵ Akɛ mu ashwie nɔ, ni akɛ tsofakɛŋma afɔ̃ nɔ. Niyenii afɔle ni.

¹⁶ Osɔfo lɛ ashã mamu lɛ he ni mu lɛ yɔɔ lɛ kɛ mu lɛ kɛ tsofakɛŋma ni fata he lɛ hu fɛɛ akɛ afɔle ni akɛbahã lɛ he odaseyeli nɔ. Eji afɔle ni ashãa ahãa Yehowa.”