3 Mose 19 - ŊMALƐ KRƆŊKRƆŊ LƐ

Krɔŋkrɔŋfeemɔ kɛ jalɛ he mlai

¹ Yehowa kɛɛ Mose,

² ni ekɛɛ Israelbii lɛ akɛ, “Nyɛfea nyɛhe krɔŋkrɔŋ, ejaakɛ mi, Yehowa, nyɛNyɔŋmɔ lɛ, mɔ krɔŋkrɔŋ ji mi.

³ Mɔ fɛɛ mɔ ashe enyɛ kɛ etsɛ gbeyei, ni nyɛyea mihejɔɔmɔ gbi lɛ; mi ji Yehowa, nyɛNyɔŋmɔ lɛ.

⁴ “Nyɛkayanyiɛa yakayaka wɔji asɛɛ, ni nyɛkafea dade wɔji hu ni ashwie nyɛhã nyɛhe; mi ji Yehowa, nyɛNyɔŋmɔ lɛ.

⁵ “Kɛji nyɛgbe kooloo nyɛkɛmiishã naanyobɔɔ afɔle lɛ, nyɛfea lɛ yɛ mlai ni awo yɛ he lɛ naa koni esa mihiɛ ni mahere.

⁶ Aye loo lɛ gbi ni ashã afɔle lɛ nɔŋŋ, kɛ enɔ jetsɛremɔ; shi nɔ ni baashwɛ kɛyaashi gbi ni ji etɛ̃ lɛ nɔ lɛ, akɛ la ashã, ejaakɛ ehe tseee;

⁷ ni kɛ aye gbi ni ji etɛ̃ lɛ nɔ loo lɛ eko lɛ, minaŋ afɔle lɛ he tsui.

⁸ Mɔ fɛɛ mɔ ni yeɔ lɛ, etere musu, ejaakɛ ewo keenɔ krɔŋkrɔŋ ni akɛmiihã Yehowa he muji, ni abuŋ lɛ ashiŋ mimɛi lɛ anɔ dɔŋŋ.

⁹ “Kɛji nyɛmiikpa nyɛŋmɔshinii lɛ, nyɛkakpaa nii ni yɔɔ nyɛŋmɔji lɛ anaanaa lɛ kɛmɔ shi kwraa.

¹⁰ Ni nyɛkakpaa wain tsei lɛ ayibii hu fɛɛ kɛmɔɔ shi; ni wain yibii ni aaashwie shi lɛ hu nyɛkakɔlɔa. Nyɛshĩa nyɛhãa ohiafoi kɛ gbɔi lɛ koni amɛbaye lɛ kpɛkpɛo. Mi ji Yehowa, nyɛNyɔŋmɔ lɛ.

¹¹ “Kaaju; kaashishiu onaanyo gbɔmɔ, kaalaka lɛ.

¹² Kaakã kitã yɛ migbɛi mli ni okɛshishiu mɔ ko ni okɛwo oNyɔŋmɔ lɛ gbɛi he muji. Mi ji Yehowa, oNyɔŋmɔ lɛ.

¹³ “Kaaye onaanyo gbɔmɔ amim, ni kaatswa lɛ ojo. Kaahã je miitsɛre apaafonyo nyɔmɔwoo nɔ.

¹⁴ Kaalomɔ toimulɔ, ni okɛ pampi akama shwilafo gbɛ nɔ ni eyatɛ; shi she oNyɔŋmɔ lɛ gbeyei. Mi ji Yehowa, oNyɔŋmɔ lɛ.

¹⁵ “Kaatsɔ̃ jalɛ sane hiɛ obu shi ni oye ohã ohiafo aloo ohiɛ shwie gbɔmɔ wulu hiɛ. Kojomɔ onaanyo gbɔmɔ yɛ jalɛ naa.

¹⁶ Kaanyiɛ kɛmiiya kɛmiiba ni ooye osheku yɛ omaŋ lɛ mli; ni kaate shi oshi onaanyo gbɔmɔ ni okɛ gbɔmɔgbee sane fɔ̃ enɔ; mi ji Yehowa.

¹⁷ “Kaanyɛ onyɛmi gbɔmɔ yɛ otsui mli; shi kã lɛ blɛoo yɛ etɔ̃mɔ he koni okatere sɔ̃ ko bo diɛŋtsɛ hu.

¹⁸ Kaatɔ ohe owele, ni kaabɛ omaŋbii lɛ eko owo omli, shi suɔmɔ onaanyo gbɔmɔ tamɔ bɔ ni osumɔɔ bo diɛŋtsɛ ohe lɛ. Mi ji Yehowa.

¹⁹ “Nyɛyea mikpɔi lɛ anɔ. Kaahã oshĩa kooloi srɔtoi miifutu amɛmiikwɔ. Oŋmɔ mli hu kaafutu wui srɔtoi odu. Ni kaawo atade ni akɛ klala kɛ kuŋtu futu lo.

²⁰ “Kɛji nuu ko kɛ nyɔŋyoo ko wɔ, ni nyɔŋyoo lɛ atsɛ ehe baa ahã nuu kroko, shi nuu nɛɛ woko eyi nyɔmɔ koni yoo lɛ aye ehe lɛ, no lɛ abote sane lɛ mli. Agbala yoo lɛ nuŋtsɔ lɛ kɛ yoo lɛ toi, shi akagbe amɛ, ejaakɛ ahãko yoo lɛ aye ehe.

²¹ Shi nuu lɛ kɛ ojwɛni aba abahã Yehowa yɛ Kpee Buu lɛ shinaa lɛ naa.

²² Osɔfo lɛ kɛ ojwɛni ni ji sɔ̃ afɔle lɛ akpãtã ahã nuu lɛ yɛ Yehowa hiɛ yɛ esha ni efee lɛ hewɔ, ni akɛaafa lɛ.

²³ “Kɛji nyɛyashɛ Kanaan shikpɔŋ lɛ nɔ lɛ, yeli tso fɛɛ yeli tso ni nyɛaatɛo ni ayeɔ lɛ, nyɛbua eyibii lɛ akɛ nɔ ko ni ehe tseee kɛyashi afii etɛ̃; akaye eyibii lɛ.

²⁴ Shi afi ni ji ejwɛ lɛ nɔ lɛ afee tso yibii lɛ fɛɛ krɔŋkrɔŋ akɛ afɔle ni aashã ahã mi, Yehowa, kɛda mi shi.

²⁵ Shi afi ni ji enumɔ lɛ nɔ lɛ, nyɛyea yibii lɛ, koni nibaa nii afa babaoo ahã nyɛ. Mi ji Yehowa, nyɛNyɔŋmɔ lɛ.

²⁶ “Nyɛkayea loo ni lá yɔɔ mli. Nyɛkaklaa, ni nyɛkayea ŋkunyaa.

²⁷ Nyɛkashɛa nyɛyitsei ahe, ni nyɛkakua nyɛtsɛŋ nɔ.

²⁸ Nyɛkabamɔa nyɛhewolo nɔ gbɛ̃i kɛyea gbonyo ko he ŋkɔmɔ; ni nyɛkayea sãmãi yɛ nyɛhewolo nɔ. Mi ji Yehowa.

²⁹ “Okɛ obiyoo akawɔ ni ohã etsɔ̃ yoo ajwamãŋ ni shikpɔŋ lɛ nɔ bayi tɔ kɛ ajwamãŋbɔɔ.

³⁰ Nyɛyea mihejɔɔmɔ gbi lɛ, ni nyɛshea he ni ajaa mi yɛ lɛ gbeyei; mi ji Yehowa.

³¹ “Nyɛkanyiɛa okɔmfoi kɛ mɛi ni tsɛɔ sisai anɔ, koni nyɛkawo nyɛhe muji. Mi ji Yehowa, nyɛNyɔŋmɔ lɛ.

³² “Ohiɛ asɔ mɛi ni egbɔlɔ, ni owo amɛ. She Nyɔŋmɔ gbeyei. Mi ji Yehowa.

³³ “Kɛ gbɔ ko bato gbɔ yɛ nyɛshikpɔŋ lɛ nɔ lɛ, nyɛkawaa lɛ yi.

³⁴ Nyɛhiɛa lɛ tamɔ bɔ ni nyɛbaahiɛ nyɛnyɛmi Israelnyo nɔŋŋ, ni nyɛsumɔa lɛ tamɔ bɔ ni nyɛsumɔɔ nyɛ diɛŋtsɛ nyɛhe lɛ; ejaakɛ nyɛ hu nyɛyato gbɔ pɛŋ yɛ Ijipt shikpɔŋ lɛ nɔ. Mi ji Yehowa, nyɛNyɔŋmɔ lɛ.

³⁵ “Nyɛkayea sane ni ejaaa yɛ nisusumɔ kɛ niŋmɛɛ kɛ nikaa mli.

³⁶ Nyɛhiɛa nsɛnii kpakpai kɛ niŋmɛɛ tɛi kpakpai kɛ nisusumɔ nii kpakpai. Mi ji Yehowa ni jie nyɛ kɛjɛ Ijipt shikpɔŋ lɛ nɔ lɛ.

³⁷ No hewɔ lɛ, nyɛhiɛ akãa mimlai kɛ mikpɔi lɛ fɛɛ anɔ ni nyɛyea fɛɛ nɔ. Mi ji Yehowa.”