3 Mose 18 - ŊMALƐ KRƆŊKRƆŊ LƐ

Nuu kɛ yoo bɔlɛ ni ahiɔ

¹ Yehowa kɛ Mose wie ni ekɛɛ,

² “Mi ji Yehowa, nyɛNyɔŋmɔ lɛ.

³ Nyɛkabaa nyɛjeŋ tamɔ bɔ ni abaa jeŋ yɛ Ijipt shikpɔŋ lɛ nɔ he ni nyɛhi tsutsu lɛ. Asaŋ nyɛkabaa nyɛjeŋ tamɔ bɔ ni abaa jeŋ yɛ Kanaan shikpɔŋ ni mikɛ nyɛ yaa nɔ nɛɛ lɛ. Amɛkusum lɛ nyɛkafea.

⁴ Nyɛyea mimlai kɛ migbɛjianɔtoi lɛ anɔ be fɛɛ be. Mi ji Yehowa, nyɛNyɔŋmɔ lɛ.

⁵ Nyɛyea migbɛjianɔtoi kɛ mimlai lɛ anɔ; nɔ ni kɛji gbɔmɔ ye nɔ ni enaa wala lɛ. Mi ji Yehowa.

⁶ Nuu ko nuu ko akabɛŋkɛ ewekunyo ni ekɛ lɛ na bɔlɛ. Mi ji Yehowa.

⁷ Okɛ onyɛ akawɔ ni okɛshwie otsɛ hiɛ shi; onyɛ ni, kaahã ehiɛ miishwie shi.

⁸ Okɛ otsɛ ŋa akawɔ; obaashwie otsɛ hiɛ shi.

⁹ Okɛ onyɛmi yoo ni ji otsɛ loo onyɛ bi akawɔ; alɛ lɛ yɛ nyɛshĩa lɛ mli jio, shĩa kroko mli jio, okɛ lɛ akawɔ.

¹⁰ Okɛ obinuu biyoo loo obiyoo biyoo akawɔ. Eji nɔ ko ni baashwie bo diɛŋtsɛ ohiɛ shi.

¹¹ Okɛ otsɛ ŋa biyoo ni otsɛ fɔ lɛ akawɔ. Onyɛmi yoo ni, ni esaaa akɛ ohãa ehiɛ shwieɔ shi.

¹² Okɛ otsɛ nyɛmi yoo akawɔ: otsɛ lá ji lɛ.

¹³ Okɛ onyɛ nyɛmi yoo akawɔ: onyɛ lá ji lɛ.

¹⁴ Kaabɛŋkɛ otsɛ nyɛmi nuu ŋa ni okɛshwie otsɛ hiɛ shi: onyɛkwɛ ni.

¹⁵ Okɛ onyɛmi nuu ŋa akawɔ: ebaahã onyɛmi nuu lɛ hiɛ ashwie shi.

¹⁶ Okɛ onyɛmi nuu ŋa akawɔ ni okɛshwie onyɛmi nuu lɛ hiɛ shi.

¹⁷ Okɛ yoo kɛ ebiyoo fɛɛ akawɔ, ni asaŋ okaŋɔ obinuu biyoo loo ebiyoo lɛ biyoo ni okɛ lɛ yawɔ. Yoo lɛ lá ji amɛ, ni jeŋba ni tamɔ nakai bɛ fɛo.

¹⁸ Kaaŋɔ oŋa nyɛmi yoo ofee oŋa bienyɛ; ni okɛ lɛ na bɔlɛ be mli ni oŋa hiɛ kã lolo.

¹⁹ “Kaaya yoo ŋɔɔ ni okɛ lɛ ayawɔ be mli ni etee tsuiasɛɛ, ejaakɛ ehe tseee.

²⁰ Okɛ onaanyo ŋa akawɔ ni okɛwo ohe muji.

²¹ Kaaŋmɛɛ obii lɛ ateŋ mɔ ko he ohã ni akɛ lɛ ja Molek ni akɛ no wo oNyɔŋmɔ lɛ gbɛi he muji. Mi ji Yehowa.

²² Okɛ nuu akawɔ tamɔ okɛ yoo wɔɔ lɛ; aahi.

²³ Okɛ kooloo ko kooloo ko akawɔ ni okɛwo ohe muji. Nakai nɔŋŋ esaaa akɛ yoo ko kɛ ehe hãa kooloo ko.

²⁴ Nyɛkɛ nii nɛɛ ateŋ eko eko akawoa nyɛhe muji; ejaakɛ enɛɛmɛi fɛɛ jeŋmaji ni mibashwie mahã nyɛ lɛ kɛwoɔ amɛhe muji lɛ.

²⁵ Gbɛ nɔ ni tsɔ̃ ni shikpɔŋ fee shikpɔŋ ni he tseee nɛ. Mibagbala etoii yɛ enishaianii lɛ hewɔ, ni ebaafɛ̃ mɛi ni yɔɔ enɔ lɛ eshwie.

^26-27 Mɛi ni nyiɛ nyɛhiɛ lɛ fee nɛkɛ nibii nɛɛ fɛɛ, ni amɛkɛwo shikpɔŋ lɛ he muji. Shi nyɛ lɛ nyɛkafea nɛkɛ nihii nii nɛɛ ateŋ eko eko. Maŋnyo jio, gbɔ ni ebato gbɔ jio, nyɛyea Yehowa mlai lɛ kɛ akpɔi lɛ anɔ,

²⁸ koni shikpɔŋ lɛ akafɛ̃ nyɛ hu eshwie tamɔ bɔ ni efɛ̃ jeŋmaŋ ni tsɔ nyɛhiɛ lɛ eshwie lɛ.

²⁹ Mɔ fɛɛ mɔ ni feɔ nɛkɛ nihiinii nɛɛ eko lɛ, abuŋ lɛ dɔŋŋ ashiŋ Nyɔŋmɔ mɛi lɛ anɔ.

³⁰ “No hewɔ lɛ, nyɛyea nii ni mifã akɛ nyɛfee lɛ anɔ, ni nyɛkafea kusumi ni ahiɔ ni afeɔ dani nyɛba lɛ, koni nyɛkɛkawo nyɛhe muji. Mi ji Yehowa, nyɛNyɔŋmɔ lɛ.”