3 Mose 17 - ŊMALƐ KRƆŊKRƆŊ LƐ

Krɔŋkrɔŋ nɔ ko ji lá

¹ Yehowa fã Mose,

² koni ekɛ mlai ni abaatsi tã nɛɛ ahã Aaron kɛ ebihii lɛ kɛ Israelbii lɛ fɛɛ.

³ “Israelnyo fɛɛ Israelnyo ni gbeɔ tsina loo gwantɛŋ loo abotia yɛ shitoohe lɛ mli loo shitoohe lɛ sɛɛ,

⁴ ni ekɛbaaa Kpee Buu Krɔŋkrɔŋ lɛ shinaa lɛ naa koni akɛshã afɔle ahã Yehowa yɛ Yehowa Kpee Buu Krɔŋkrɔŋ lɛ hiɛ lɛ, eye lá yi sɔ̃. Lá efɔse eshwie shi lɛ, ni abuŋ lɛ ashiŋ Yehowa bii anɔ dɔŋŋ.

⁵ Mla nɛɛ oti ji akɛ kooloi ni Israelbii lɛ gbeɔ yɛ ŋa lɛ nɔ lɛ, agbɛnɛ amɛkɛba ni amɛkɛbahã osɔfo lɛ yɛ Yehowa Kpee Buu Krɔŋkrɔŋ lɛ shinaa lɛ naa koni amɛgbe amɛkɛshã naanyobɔɔ afɔlei amɛhã Yehowa.

⁶ Osɔfo lɛ atsi lá lɛ eshwie afɔleshãa latɛ lɛ he, yɛ Kpee Buu lɛ shinaa lɛ shi, ni eshã fɔ lɛ koni eje ŋma ni Yehowa sumɔɔ lɛ.

⁷ Israelbii lɛ akafee amɛhe mɛi ni yeee Yehowa anɔkwa ni amɛshãa afɔlei amɛhãa wɔji ni amɛnyiɛɔ amɛsɛɛ. Enɛ atsɔ̃ akpɔ ni yɔɔ ni kã shi hã amɛ kɛ yinɔi fɛɛ ni baaba yɛ amɛsɛɛ kɛmiiya naanɔ.

⁸ “Israelnyo fɛɛ Israelnyo loo gbɔ ni ebato Israelbii lɛ ni shãa shãa afɔle loo

⁹ afɔle kroko ehãa Yehowa yɛ he kroko ni ekɛbaaa Kpee Buu lɛ shinaa lɛ naa lɛ, abuŋ lɛ ashiŋ Nyɔŋmɔ maŋbii lɛ anɔ.

¹⁰ Israelnyo fɛɛ Israelnyo loo gbɔ ni ebato Israelbii akaye loo lɛ mli lá, no lɛ majie mihiɛ maka nakai gbɔmɔ lɛ, ni mi kɛ lɛ baafo takoŋ.

¹¹ Nɔ fɛɛ nɔ ni hiɛ kã lɛ, elá lɛ mli ewala yɔɔ, ni no hewɔ ni Yehowa fã akɛ afɔse lá lɛ fɛɛ ashwie afɔleshãa latɛ lɛ nɔ koni akɛjie maŋ lɛ he eshai lɛ. Ejaakɛ lá ni ji wala lɛ akɛjieɔ eshai yɛ gbɔmɔ he.

¹² No hewɔ ni Yehowa kɛɛ Israelbii lɛ akɛ amɛ jio, gbɔ ni ebato amɛ jio, amɛkaye loo ni lá yɔɔ mli lɛ.

¹³ “Israelnyo fɛɛ Israelnyo kɛ mɔ fɛɛ mɔ ni ebato gbɔ yɛ Israel lɛ, kɛji eyagbɔbi ni egbe kooloo loo loofɔlɔ ni ayeɔ lɛ, efɔse elá lɛ eshwie shi, ni ekɛ sũ atsi nɔ,

¹⁴ ejaakɛ bɔɔ nii fɛɛ ni hiɛ kã lɛ, amɛlá lɛ mli amɛwala yɔɔ; ni no hewɔ ni mikɛɛ Israelbii lɛ akɛ amɛkaye loo ko loo ko lá lɛ. Bɔɔnɔ fɛɛ bɔɔnɔ lɛ elá mli ewala yɔɔ. Mɔ fɛɛ mɔ ni yeɔ lá lɛ abuŋ lɛ ashiŋ Nyɔŋmɔ webii anɔ.

¹⁵ “Mɔ fɛɛ mɔ ni yeɔ kooloo ni egbo lɛ diɛŋtsɛ edɛŋ gbele aloo kooloo ni kooloo awuyelɔ ko tserɛ emli lɛ, Israelnyo ji lɛ jio, gbɔ ni ebato Israel shikpɔŋ lɛ nɔ ji lɛ jio, efɔ etadei ahe ni ekɛnu aju ehe; ebaahi shi kɛyashi gbɛkɛ dani ehe baatse.

¹⁶ Kɛji efɔɔɔ etadei ahe, ni ejuuu ehe lɛ, no lɛ esɔ̃ akã lɛ diɛŋtsɛ enɔ.”