3 Mose 16 - ŊMALƐ KRƆŊKRƆŊ LƐ

Najiaŋtoo gbi

¹ Yehowa kɛ Mose wie yɛ Aaron bihii enyɔ ni kɛ la ni bɛ krɔŋkrɔŋ tee Yehowa hiɛ ni amɛgboi lɛ agbele lɛ sɛɛ, ni ekɛɛ,

² “Okɛ onyɛmi Aaron awie koni ekabote He Krɔŋkrɔŋ lɛ mli kɛmiiya muhɔɔ lɛ sɛɛ, yɛ mɔbɔnalɛ sɛi ni bu Kpãŋmɔ Adeka lɛ nɔ lɛ hiɛ lɛ, be fɛɛ be kɛkɛ, koni ekagbo, ejaakɛ mapue yɛ atatu mli yɛ naanɔ ni bu Adeka lɛ nɔ lɛ nɔ.

³ Nii ni Aaron kɛbote He Krɔŋkrɔŋ lɛ nɛ: tsinanuu oblanyo ni akɛfee esha afɔle kɛ ojwɛni ni akɛfee shãa afɔle.

⁴ “Aaron kɛ nu aju ehe, ni ewo klala flaka krɔŋkrɔŋ lɛ kɛ klala tswakotoi lɛ. Ekɛ klala mlifiinii lɛ afi emli, ni ekɛ klala tɔɔbaŋ afi eyitso. Atadei ni yɔɔ krɔŋkrɔŋ nɛ.

⁵ Israel asafo ku lɛ ahã Aaron too kpakpoi enyɔ ni akɛbaashã esha afɔle, kɛ ojwɛni kome ni akɛbaafee eshãa afɔle.

⁶ Aaron kɛ tsinanuu ni ji lɛ diɛŋtsɛ enɔ lɛ abashã esha afɔle kɛjie lɛ diɛŋtsɛ ehe eshai kɛ ewe lɛ he eshai.

⁷ Agbɛnɛ ekɛ too kpakpoi enyɔ lɛ abadamɔ Yehowa hiɛ yɛ Kpee Buu lɛ shinaa lɛ naa.

⁸ Efɔ̃ amɛnɔ oshiki; oshiki kome hã Yehowa kɛ oshiki kome hã Azazel.

⁹ Aaron kɛ too kpakpo ni Yehowa oshiki lɛ gbee enɔ lɛ aba ni ekɛbashã esha afɔle.

¹⁰ Shi too kpakpo ni Azazel oshiki lɛ gbee enɔ lɛ, ekɛ lɛ abadamɔ Yehowa hiɛ ni kooloo lɛ hiɛ kã. Eŋmɛɛ kooloo lɛ he ehã Azazel yɛ ŋa kplanaa lɛ nɔ koni ewo maŋ lɛ he eshai lɛ kɛya.

¹¹ “Aaron kɛ etsinanuu lɛ aba akɛ esha afɔle ahã lɛ diɛŋtsɛ ehe kɛ ewe lɛ, ni egbe.

¹² Eloo ŋai kɛ la ŋɛsu obɔ̃ yɛ afɔleshãa latɛ lɛ nɔ, yɛ Yehowa hiɛ, kɛ tsofakɛŋma ni ashi bɔdɔbɔdɔ ekɔkɔi obɔbɔi enyɔ, ni ekɛbote muhɔɔ lɛ sɛɛ.

¹³ Ekɛ ohɛ lɛ ashwie la lɛ nɔ yɛ Yehowa hiɛ yɛ jɛi, ni ohɛ lɛ he lasu kumɔŋŋ lɛ baaha mɔbɔnalɛ sɛi lɛ ni bu Kpãŋmɔ Adeka lɛ nɔ lɛ he, koni Aaron akana ni egbo.

¹⁴ Ekɛ ewao atsɔ tsinanuu lɛ lá lɛ eko koni ekɛshwã mɔbɔnalɛ sɛi lɛ hiɛgbɛ; ni ekɛ ewao atsɔ lá lɛ eko hu ni ekɛshwã Kpãŋmɔ Adeka lɛ hiɛ shii kpawo.

¹⁵ “No sɛɛ lɛ, egbe too kpakpo ni ji maŋ lɛ nɔ ni akɛbaashã esha afɔle lɛ. Ekɛ lá lɛ abote He Krɔŋkrɔŋ fe fɛɛ lɛ mli, ni etsɔ eko eshwã mɔbɔnalɛ sɛi lɛ hiɛgbɛ kɛ Kpãŋmɔ Adeka lɛ hiɛgbɛ tamɔ bɔ ni ekɛ tsina lá lɛ fee lɛ.

¹⁶ Ni akɛjwira He Krɔŋkrɔŋ lɛ yɛ Israelbii lɛ ahe ni tseee kɛ amɛtũatsemɔi kɛ amɛhe eshai lɛ fɛɛ ahewɔ. Aaron afee nakai nɔŋŋ ehã Kpee Buu lɛ ni yɔɔ amɛteŋ lɛ; efee yɛ amɛmuji nii lɛ ahewɔ.

¹⁷ Be ni Aaron boteɔ Kpee Buu lɛ mli koni eyakpãtã ehã maŋ lɛ, mɔ ko mɔ ko akahi jɛi kɛyashi beyinɔ ni eeeje kpo. Aaron akpãtã ahã lɛ diɛŋtsɛ ehe kɛ ewe lɛ kɛ Israel maŋ muu lɛ fɛɛ.

¹⁸ No sɛɛ lɛ, eje kpo kɛya afɔleshãa latɛ ni ma Yehowa hiɛ lɛ he, ni etsuu he. Ekɛ tsinanuu lɛ lá lɛ eko kɛ too kpakpo lɛ lá lɛ eko asra koji ni yɔɔ afɔleshãa latɛ lɛ he lɛ ahe kɛkpe.

¹⁹ Ekɛ ewao atsɔ lá lɛ eko eshwã afɔleshãa latɛ lɛ nɔ shii kpawo koni ekɛtsuu he efee lɛ krɔŋkrɔŋ yɛ Israelbii lɛ ahe eshai lɛ ahewɔ.

²⁰ “Kɛ Aaron egbe He Krɔŋkrɔŋ lɛ kɛ Kpee Buu lɛ kɛ afɔleshãa latɛ lɛ jwiramɔ lɛ naa lɛ, ekɛ too kpakpo ni hiɛ kã lɛ aba.

²¹ Ekɛ eniji enyɔ lɛ fɛɛ ashwie too kpakpo ni hiɛ kã lɛ yiteŋ, ni ejaje Israelbii lɛ atɔ̃mɔi kɛ amɛmla tɔ̃mɔi ni ji amɛhe eshai lɛ fɛɛ eshwie too kpakpo lɛ yiteŋ. Etu lɛ ewo nuu ko ni mɛɔ yɛ jɛi lɛ dɛŋ koni eyaŋmɛɛ ehe ni eya ŋa lɛ nɔ.

²² Too kpakpo lɛ baatere amɛtɔ̃mɔi lɛ fɛɛ kɛya ŋa nɔ he ko kplanaa ni mɔ ko mɔ ko bɛ, ni jɛi nuu lɛ aŋmɛɛ ehe yɛ.

²³ Agbɛnɛ Aaron abote Kpee Buu lɛ mli ekoŋŋ. Ejie klala atadei ni ewo be ni ebote He Krɔŋkrɔŋ lɛŋ lɛ, ni eshi yɛ jɛi.

²⁴ Eju ehe kɛ nu yɛ He Krɔŋkrɔŋ lɛ, ni ekɔlɔ lɛ diɛŋtsɛ etadei lɛ. Eje kpo ni eyashã lɛ diɛŋtsɛ eshãa afɔle lɛ kɛ maŋ lɛ shãa afɔle kooloo lɛ koni ekɛkpãtã ehã lɛ diɛŋtsɛ ehe kɛ maŋ lɛ hu.

²⁵ Eshã fɔ ni yɔɔ esha afɔle lɛ he lɛ yɛ afɔleshãa latɛ lɛ nɔ.

²⁶ Agbɛnɛ mɔ ni kɛ too kpakpo lɛ tee eya ŋmɛɛ ehe ehã Azazel lɛ afɔ etadei ahe, ni ekɛ nu aju ehe dani eba nsra lɛ mli.

²⁷ Akɛ tsinanuu lɛ kɛ too kpakpo lɛ ni akɛshã esha afɔle lɛ ni akɛ amɛlá lɛ tee He Krɔŋkrɔŋ lɛ mli ni akɛyakpãtã lɛ, aje nsra lɛ mli ni akɛ la ayashã. Ashã amɛloo kɛ amɛhewoji kɛ amɛwamɔ lɛ fɛɛ.

²⁸ Mɔ ni yashã lɛ afɔ etadei ahe, ni ekɛ nu aju ehe; no sɛɛ fɛɛ dani eba shitoohe lɛ mli.”

Kpãtãmɔ gbi wulu lɛ

²⁹ “Enɛ afee akpɔ ahã nyɛ kɛmiiya naanɔ. Nyɔɔŋ ni ji kpawo lɛ nɔ gbi ni ji nyɔŋma lɛ nɔ lɛ, nyɛgbea nyɛhe hɔmɔ. Nyɛkatsua nitsumɔ ko, nyɛmaŋ lɛ mli bii jio, gbɔ ni ebato nyɛ jio.

³⁰ Ejaakɛ nakai gbi lɛ abaakpãtã ahã nyɛ koni akɛtsuu nyɛhe ni akɛhã nyɛhe atse yɛ Yehowa hiɛ.

³¹ Hejɔɔmɔ gbi wulu ni hã nyɛ. Nyɛgbea nyɛhe hɔmɔ. Akpɔ ni yɔɔ kɛmiiya naanɔ nɛ.

³² Kusum ni abaafee kɛkpãtã lɛ, mɔ ni afɔ lɛ mu ni awo lɛ osɔfo koni eye etsɛ sɛɛ lɛ, ewo klala atadei ni ji atadei ni yɔɔ krɔŋkrɔŋ lɛ ni efee.

³³ Ejwra He Krɔŋkrɔŋ fe fɛɛ lɛ kɛ Kpee Buu lɛ kɛ afɔleshãa latɛ lɛ, ni ekpãtã ehã osɔfoi lɛ kɛ maŋ muu lɛ fɛɛ.

³⁴ Enɛ atsɔ̃ akpɔ ni kã shi hã nyɛ kɛmiiya naanɔ, koni akɛkpãtã ahã Israelbii lɛ daa afi shi kome yɛ amɛhe eshai lɛ fɛɛ hewɔ.” Mose fee bɔ ni Yehowa wo lɛ kitã lɛ.