3 Mose 15 - ŊMALƐ KRƆŊKRƆŊ LƐ

Gbɔmɔtso mli nu ni he tseee

¹ Yehowa kɛ mlai ni abaatsi tã nɛɛ hã Mose kɛ Aaron

² ni amɛkɛhã Israelbii lɛ. Kɛji nu miiho yɛ nuu ko nuutso mli lɛ, nu ni hoɔ lɛ he tseee.

³ Nu lɛ kã he eeho jio, nuutso lɛ etsi enaa ni ehã ekpa hoo jio, gbɔmɔ lɛ he tseee.

⁴ Saa fɛɛ saa ni mɔ ni he hoɔ nu lɛ kãa nɔ lɛ he tseee, ni nɔ fɛɛ nɔ ni etaa nɔ lɛ he tseee.

⁵ Mɔ fɛɛ mɔ ni taa saa lɛ he lɛ afɔ etadei ahe ni ekɛ nu aju ehe; ehe tseee kɛyashi gbɛkɛ.

⁶ Mɔ ni taa mɔ ni he hoɔ nu lɛ sɛi nɔ lɛ afɔ etadei ahe, ni ekɛ nu aju ehe; ehe tseee kɛyashi gbɛkɛ.

⁷ Mɔ ni taa mɔ ni he hoɔ nu lɛ he lɛ, efɔ etadei ahe, ni ekɛ nu aju ehe; ehe tseee kɛyashi gbɛkɛ.

⁸ Kɛji mɔ ni he hoɔ nu lɛ tsɛ̃ lajɔ̃ eshwie mɔ ni he tse he lɛ, mɔ ni atsɛ̃ lajɔ̃ ashwie ehe lɛ afɔ etadei ahe, ni ekɛ nu aju ehe; ehe tseee kɛyashi gbɛkɛ.

⁹ Sɛi ni mɔ ni he hoɔ nu lɛ taa nɔ yɛ shwiili mli loo kooloo nɔ lɛ he tseee.

¹⁰ Mɔ fɛɛ mɔ ni taa nɔ ko ni mɔ ni he hoɔ nu lɛ eta nɔ lɛ he lɛ, ehe tseee kɛyashi gbɛkɛ. Mɔ fɛɛ mɔ ni woɔ nɔ ko ni tamɔ nakai lɛ, efɔ etadei ahe, ni ekɛ nu aju ehe; ehe tseee kɛyashi gbɛkɛ.

¹¹ Mɔ fɛɛ mɔ ni mɔ ni he hoɔ nu ni efɔko edɛ aaata ehe lɛ, efɔ etadei ahe, ni ekɛ nu aju ehe; ehe tseee kɛyashi gbɛkɛ.

¹² Sũ nii ni mɔ ni he hoɔ nu lɛ aaata he lɛ, ajwa; ni tso nii fɛɛ tso nii ni eeeta he lɛ, akɛ nu afɔ mli.

¹³ Kɛji mɔ ni he hoɔ nu lɛ hela lɛ tã lɛ, emɛ gbii kpawo. Efɔ etadei ahe ni ekɛ nuhiŋmɛi ni hoɔ mli nu aju ehe; kɛkɛ lɛ ehe baatse.

¹⁴ Gbi ni ji kpaanyɔ lɛ nɔ lɛ ekɛ kosɛɛ okpoi enyɔ loo shĩa okpoi enyɔ aya Yehowa hiɛ yɛ Kpee Buu lɛ shinaa lɛ naa ni ekɛyahã osɔfo lɛ.

¹⁵ Osɔfo lɛ kɛ ekome afee esha afɔle ni ekɛ ekome hu afee shãa afɔle, koni ekpãtã ehã lɛ yɛ Yehowa hiɛ yɛ nu ni hoɔ lɛ hewɔ.

¹⁶ Kɛji nuu ko shwie ehe shi lɛ, ekɛ nu aju ehe fɛɛ; ehe tseee kɛyashi gbɛkɛ.

¹⁷ Mama fɛɛ mama kɛ kooloo wolo fɛɛ kooloo wolo ni nu nɛɛ eko aaatee mli lɛ akɛ nu afɔ he; ni ehe tseee kɛyashi gbɛkɛ.

¹⁸ Kɛji nuu ko kɛ yoo ko wɔ, ni nuu lɛ henu je emli lɛ, amɛyi enyɔ lɛ fɛɛ amɛkɛ nu aju amɛhe; amɛhe tseee kɛyashi gbɛkɛ.

¹⁹ Kɛji yoo ko fee yeianii ni ehe miiho lá lɛ, ehe tseee gbii kpawo. Mɔ fɛɛ mɔ ni taa ehe lɛ he tseee kɛyashi gbɛkɛ.

²⁰ Nɔ fɛɛ nɔ ni yoo lɛ ekã nɔ gbii abɔ ni etee tsuiasɛɛ lɛ he tseee; ni nɔ fɛɛ nɔ ni eta nɔ hu he tseee.

²¹ Mɔ fɛɛ mɔ ni taa yoo ni etee tsuiasɛɛ lɛ saa he lɛ, afɔ etadei ahe, ni ekɛ nu aju ehe; ehe tseee kɛyashi gbɛkɛ.

²² Mɔ fɛɛ mɔ ni taa nɔ fɛɛ nɔ ni yoo lɛ eta nɔ lɛ he lɛ afɔ etadei ahe, ni ekɛ nu aju ehe; ehe tseee kɛyashi gbɛkɛ.

²³ Kɛji mɔ ko ta nɔ ko ni yɔɔ yoo lɛ saa nɔ loo nɔ fɛɛ nɔ ni eta nɔ lɛ he lɛ, ehe tseee kɛyashi gbɛkɛ.

²⁴ Kɛji nuu ko kɛ yoo lɛ na bɔlɛ ni lá ni hoɔ yɛ yoo lɛ he lɛ eko tee ehe lɛ, no lɛ ehe tseee gbii kpawo, ni nɔ fɛɛ nɔ ni ekã nɔ lɛ he tseee.

²⁵ Kɛji yoo ko he ho lá gbii pii be ni eshɛko etsuiasɛɛyaa be lɛ, aloo ehe ho lá yɛ etsuiasɛɛyaa be lɛ sɛɛ lɛ, no lɛ gbii abɔ fɛɛ ni ehe hoɔ la lɛ ehe tseee, tamɔ bɔ ni eyɔɔ yɛ etsuiasɛɛyaa gbii lɛ amli lɛ pɛ.

²⁶ Saa fɛɛ saa ni ekã nɔ gbii abɔ ni ehe hoɔ lá lɛ tamɔ etsuiasɛɛyaa saa lɛ pɛ. Nɔ fɛɛ nɔ ni eta nɔ lɛ he tseee tamɔ bɔ ni ehe tseee yɛ etsuiasɛɛyaa be lɛ mli lɛ.

²⁷ Mɔ fɛɛ mɔ ni taa nibii nɛɛ eko he lɛ, ehe tseee. Efɔ etadei ahe, ni ekɛ nu aju ehe; ehe tseee kɛyashi gbɛkɛ.

²⁸ Kɛji lá ni hoɔ yɛ yoo lɛ he lɛ sɛɛ fo lɛ, ekane gbii kpawo ehã ehe; no sɛɛ lɛ ehe aaatse.

²⁹ Gbi ni ji kpawo lɛ nɔ lɛ ekɛ kosɛɛ okpoi enyɔ loo shĩa okpoi bibii enyɔ aba abahã osɔfo lɛ yɛ Kpee Buu lɛ shinaa lɛ naa.

³⁰ Osɔfo lɛ kɛ okpoi lɛ ateŋ ekome afee esha afɔle, ni ekɛ ekome hu afee shãa afɔle ni ekɛkpãtã ehã lɛ yɛ Yehowa hiɛ ni ehe aaatse.

³¹ Yehowa kɛɛ Mose koni ebɔ Israelbii lɛ kɔkɔ yɛ amɛhe ni tseee lɛ hewɔ koni amɛkabule miKpee Buu Krɔŋkrɔŋ lɛ ni yɔɔ amɛteŋ lɛ ni amɛbagboi.

³² Enɛ ji mla ni kã shi hã mɔ ni he hoɔ nu kɛ mɔ ni nu jeɔ emli ni no hãaa ehe atse.

³³ Mla nɛɛ kã shi hã mɔ ni kɛ yoo ni miifee yeianii wɔɔ kɛ nuu ko ni kɛ yoo ni he tseee naa bɔlɛ.