3 Mose 14 - ŊMALƐ KRƆŊKRƆŊ LƐ

Mɔ ni eye hewolo nɔ hela hetsuumɔ

¹ Yehowa kɛ Mose wie ni ekɛ mlai ni abaatsi tã nɛɛ hã lɛ.

² Mlai nɛɛ kã shi hã mɔ ni eye kpiti ni ehe etã hetsuumɔ. Gbi nɔ ni aaakɛɛ akɛ ehe etse lɛ, akɛ lɛ aba osɔfo lɛ ŋɔɔ.

³ Osɔfo lɛ kɛ lɛ aje kpo kɛya nsra lɛ sɛɛ ni eyakwɛ lɛ. Kɛji kpiti ni shwie helatsɛ lɛ etã yɛ ehe lɛ,

⁴ osɔfo lɛ afã mɔ ni abaatsuu ehe lɛ koni ekɛ loofɔji hiɛkãalɔi enyɔ ni he tse kɛ tsenedru tso kɛ kpãa tsuru kɛ hisopo aba.

⁵ Osɔfo lɛ afã ni agbe loofɔji lɛ ateŋ ekome yɛ kã ni nu ŋmɔŋ yɔɔ mli nɔ.

⁶ Osɔfo lɛ amɔ loofɔlɔ ni hiɛ kã lɛ. Ekɛ tsenedru tso lɛ kɛ kpãa tsuru lɛ kɛ hisopo lɛ afata he ni ekɛ fɛɛ atsɔ loofɔlɔ ni agbe lɛ yɛ kã ni nu yɔɔ mli lɛ lá lɛ mli.

⁷ Etsɔ la lɛ eshwã kpitiyelɔ ni abaatsuu ehe lɛ nɔ shii kpawo koni ekɛtsuu ehe. Eŋmɛɛ loofɔlɔ ni hiɛ kã lɛ he ni eya ŋa lɛ nɔ.

⁸ Mɔ ni atsuɔ ehe lɛ afɔ etadei lɛ ahe. Eshɛ eyiteŋ tsɔi fɛɛ, ni ekɛ nu aju ehe koni ehe atse. No sɛɛ lɛ, eba shitoohe lɛ mli, shi ekabote ebuu lɛ mli gbii kpawo.

⁹ Gbi ni ji kpawo lɛ esaa eshɛ eyiteŋ tsɔi ekoŋŋ kɛ etsɛŋ kɛ ehiŋmɛi sɛɛ tsɔi kɛ ehe tsɔi fɛɛ. Efɔ etadei ahe, ni ekɛ nu aju ehe; kɛkɛ lɛ ehe baatse.

¹⁰ Gbi ni ji kpaanyɔ lɛ nɔ lɛ mɔ ni atsuɔ ehe lɛ kɛ gwantɛŋbii enyɔ ni kpa ko bɛ amɛhe kɛ gwantɛŋ yoo kome ni eye afi ni kpa ko bɛ ehe kɛ ŋmãa mamu kiloi etɛ̃ ni akɛ mu ewo mli kɛ mu lita mlijai etɛ̃ mli ekome aba.

¹¹ Osɔfo ni tsuuɔ gbɔmɔ lɛ he lɛ aŋɔ lɛ kɛ nibii nɛɛ fɛɛ kɛba Yehowa hiɛ yɛ Kpee Buu shinaa lɛ naa.

¹² Emɔ gwantɛŋbii lɛ ateŋ ekome ekɛbahã akɛ sɔ̃ afɔle kɛ mu lita mlijai etɛ̃ mli ekome lɛ hu, koni ekɛba Yehowa hiɛ akɛ keenii titri ko.

¹³ Egbe gwantɛŋbi lɛ yɛ he ni agbeɔ esha afɔle kɛ shãa afɔle lɛ yɛ lɛ, yɛ He Krɔŋkrɔŋ lɛ, ejaakɛ sɔ̃ afɔle lɛ jio, esha afɔle lɛ jio, fɛɛ lɛ osɔfo lɛ nɔ ni; eji nɔ ko krɔŋkrɔŋ naakpa.

¹⁴ Agbɛnɛ osɔfo lɛ kɛ sɔ̃ afɔle lɛ lá lɛ eko asa mɔ ni atsuɔ ehe lɛ ninejurɔ toi naa kɛ eninejurɔ gɔnti naa, kɛ enanejurɔ gɔnti naa.

¹⁵ Kɛkɛ lɛ osɔfo lɛ awo mu lɛ ni efo eko ewo lɛ diɛŋtsɛ enine abɛku kɔkɔ mli.

¹⁶ Ekɛ eninejurɔ wao atsɔ mu ni yɔɔ ebɛku lɛ mli lɛ eko eshwã shii kpawo yɛ Yehowa hiɛ.

¹⁷ Osɔfo lɛ kɛ mu ni eshwɛ yɛ edɛŋ lɛ eko asa mɔ ni atsuɔ ehe lɛ ninejurɔ toi naa kɛ eninejurɔ gɔnti naa kɛ enanejurɔ gɔnti naa he ni akɛ sɔ̃ afɔle lɛ lá lɛ sa lɛ.

¹⁸ Mu ni eshwɛ yɛ osɔfo lɛ dɛŋ lɛ, efɔse eshwie mɔ ni atsuuɔ ehe lɛ yiteŋ koni osɔfo lɛ akpãtã ahã lɛ yɛ Yehowa hiɛ.

¹⁹ Kɛkɛ lɛ osɔfo lɛ ashã esha afɔle lɛ koni ekɛjie mɔ ni atsuuɔ ehe lɛ he muji lɛ. No sɛɛ lɛ, osɔfo lɛ agbe too ni akɛ baashã shãa afɔle lɛ;

²⁰ no sɛɛ lɛ osɔfo lɛ ashã shãa afɔle kɛ niyenii afɔle lɛ yɛ afɔleshãa latɛ lɛ nɔ, koni ekɛtsuu mɔ lɛ he; kɛkɛ lɛ ehe baatse.

²¹ Shi kɛ eji ohiafo ni enaaa enɛɛmɛi lɛ, no lɛ ekɛ gwantɛŋbi kome aba akɛ sɔ̃ afɔle, keenii titri ko ni akɛkpãtã ahã lɛ ni. Ekɛ ŋmãa mamu kilo kome ni awo mli mu hu aba akɛ niyenii afɔle, kɛ mu lita mlijai etɛ̃ mli ekome.

²² Asaŋ ekɛ kosɛɛ okpoi enyɔ loo shĩa okpoi bibii enyɔ aba; emli eko fɛɛ eko ni enine aaashɛ nɔ. Akɛ ekome afee esha afɔle, ni akɛ ekome hu afee shãa afɔle.

²³ Ehetsuumɔ gbi ni ji kpaanyɔ lɛ nɔ lɛ, ekɛ nibii nɛɛ aba abahã osɔfo lɛ yɛ Kpee Buu lɛ shinaa lɛ naa yɛ Yehowa hiɛ.

²⁴ Osɔfo lɛ aŋɔ gwantɛŋbi lɛ ni akɛshãa sɔ̃ afɔle lɛ kɛ mu lita mlijai etɛ̃ mli ekome lɛ ni ekɛba Yehowa hiɛ akɛ keenii titri ko.

²⁵ Osɔfo lɛ agbe gwantɛŋbi ni akɛshãa sɔ̃ afɔle lɛ. Ekɛ toobi lɛ lá lɛ eko asa mɔ ni atsuuɔ ehe lɛ ninejurɔ toi naa kɛ eninejurɔ gɔnti naa kɛ enanejurɔ gɔnti naa.

²⁶ Osɔfo lɛ afo mu lɛ eko awo enine abɛku kɔkɔ mli.

²⁷ Ekɛ eninejurɔ wao atsɔ mu ni yɔɔ ebɛku lɛ eko eshwã shii kpawo yɛ Yehowa hiɛ.

²⁸ Osɔfo lɛ kɛ mu ni yɔɔ edɛŋ lɛ eko asa mɔ ni atsuuɔ ehe lɛ ninejurɔ toi naa, kɛ eninejurɔ gɔnti naa, kɛ enanejurɔ gɔnti naa, eko fɛɛ eko lɛ akɛsa he ni lá ni akɛshã sɔ̃ afɔle lɛ yɔɔ lɛ.

²⁹ Mu ni eshwɛ yɛ osɔfo lɛ dɛŋ lɛ, efɔse eshwie mɔ ni atsuuɔ ehe lɛ yiteŋ, koni ekɛkpãtã ehã lɛ yɛ Yehowa hiɛ.

³⁰ Enɛ sɛɛ lɛ, okpoi lɛ ateŋ eko fɛɛ eko nɔ, ni enine aaashɛ, kosɛɛ okpoi jio, shĩa okpoi jio,

³¹ osɔfo lɛ kɛ ekome afee esha afɔle, ni ekɛ ekome hu afee shãa afɔle efata niyenii afɔle lɛ he. Efee enɛ ni ekɛkpãtã ehã mɔ ni atsuuɔ ehe lɛ yɛ Yehowa hiɛ.

³² Enɛ ji mla ni kã shi hã mɔ ni yeɔ kpiti ni enine shɛɛɛ nii ni akɛbaatsuu ehe lɛ fɛɛ nɔ lɛ.

Kpiti yɛ shĩai amli

³³ Yehowa kɛ mlai ni abaatsi tã nɛɛ hã Mose kɛ Aaron.

³⁴ Kɛ nyɛshɛ Kanaan shikpɔŋ lɛ ni mi diɛŋtsɛ mikɛhã nyɛ ni nyɛye nɔ lɛ nɔ, ni mihã kpiti shwie shĩa ko he yɛ nyɛshikpɔŋ lɛ nɔ lɛ,

³⁵ no lɛ nakai shĩa lɛ tsɛ lɛ aya ni eyakɛɛ osɔfo lɛ akɛ etamɔ nɔ ni nɔ ko tamɔ kpiti eshwie eshĩa lɛ he.

³⁶ Osɔfo lɛ afã ni ajie shĩa lɛ mli nii kɛje kpo dani osɔfo lɛ abote shĩa lɛ mli ni eyakwɛ nɔ ni eshwie he lɛ. Kɛji afeee nakai lɛ, no lɛ shĩa lɛ mli nii fɛɛ baatsɔ̃ nii ni he tseee.

³⁷ Kɛ osɔfo lɛ yakwɛ, ni ena akɛ nɔ ni eshwie shĩa lɛ gbogboi lɛ ahe lɛ, fɔji ŋɔlii kɛ etsuji ni, ni amɛmiikpe kɛmiibote gbogboi lɛ amli lɛ,

³⁸ no lɛ eje kpo ni eŋmɛ agbo lɛ mli kɛyashi gbii kpawo.

³⁹ Gbi ni ji kpawo lɛ osɔfo lɛ aba ekoŋŋ. Kɛji ekwɛ, ni ena akɛ fɔji lɛ elɛɛlɛɛ yɛ gbogboi lɛ ahe lɛ,

⁴⁰ no lɛ efã ni ajie tɛi ni hela lɛ eshwie he lɛ koni ashɛrɛ ashwie maŋ lɛ sɛɛ he ko ni tseee.

⁴¹ No sɛɛ lɛ, aŋmala shĩa lɛ mligbɛ gbogboi lɛ fɛɛ he kɛ kpe, ni akɛ su ni aŋmala lɛ ayashwie maŋ lɛ sɛɛ yɛ he ko ni tseee.

⁴² Akɛ tɛi krokomɛi ahɔlɔ tɛi ni afamɔ lɛ anajiaŋ, ni akɛ su hee ama gbogboi lɛ ahe.

⁴³ Kɛji hela lɛ ku sɛɛ eshwie gbogboi lɛ ahe ekoŋŋ, ni eje shi faŋŋ yɛ he ni afamɔ tɛi lɛ ni aŋmala gbogboi lɛ ahe ni ama he yɛ lɛ sɛɛ lɛ,

⁴⁴ osɔfo lɛ aya ni eyakwɛ. Kɛji ena akɛ nɔ ni eshwie shĩa lɛ he lɛ miilɛɛ yɛ gbogboi lɛ ahe ekoŋŋ lɛ, belɛ hela ko ni tamɔ kpiti ni fiteɔ nii yɛ shĩa lɛ; shĩa lɛ he tseee.

⁴⁵ Akumɔ shĩa lɛ ashwie shi, etɛi lɛ kɛ mplaŋi lɛ kɛ shĩa lɛ sũ lɛ fɛɛ, ni aloo kɛje maŋ lɛ mli kɛyashwie he ko ni tseee.

⁴⁶ Mɔ fɛɛ mɔ ni boteɔ shĩa lɛ mli be mli ni ala agbo lɛ mli lɛ, ehe tseee kɛyashi gbɛkɛ;

⁴⁷ ni mɔ fɛɛ mɔ ni aaawɔ shĩa lɛ afɔ etadei ahe; ni mɔ ni aaaye nii yɛ shĩa lɛ afɔ etadei ahe.

⁴⁸ Shi kɛji osɔfo lɛ ba shĩa lɛ ni ebakwɛ, ni ena akɛ nɔ ni shwie he lɛ ekuko esɛɛ eshwieko shĩa lɛ he kɛjɛ be ni ama shĩa lɛ he ekoŋŋ nɛɛ lɛ, no lɛ ekɛɛ akɛ, shĩa lɛ he tse, ejaakɛ nɔ ni shwie he lɛ etã kwraa.

⁴⁹ Osɔfo lɛ kɛ loofɔji enyɔ kɛ tsenedru tso kɛ kpãa tsuru kɛ hisopo ashã esha afɔle kɛjwira shĩa lɛ.

⁵⁰ Egbe loofɔji lɛ ateŋ ekome yɛ kã ni nuhiŋmɛi ni hoɔ mli nu yɔɔ mli lɛ nɔ.

⁵¹ Ekɛ tsenedru tso lɛ kɛ hisopo lɛ kɛ kpãa tsuru lɛ kɛ loofɔlɔ ni hiɛ kã lɛ fɛɛ atsɔ loofɔlɔ ni agbe lɛ lá lɛ kɛ nuhiŋmɛi ni hoɔ mli nu ni yɔɔ kã lɛ mli lɛ mli koni ekɛshwã shĩa lɛ shii kpawo.

⁵² Kɛ efee nɛkɛ lɛ, belɛ ekɛ loofɔlɔ lɛ lá lɛ kɛ nuhiŋmɛi ni hoɔ lɛ mli nu lɛ kɛ loofɔlɔ ni hiɛ kã lɛ kɛ tsenedru tso lɛ kɛ hisopo lɛ kɛ kpãa tsuru lɛ ejwra shĩa lɛ.

⁵³ Agbɛnɛ eŋmɛɛ loofɔlɔ ni hiɛ kã lɛ he, yɛ maŋ lɛ agbo lɛ naa, koni efiliki kɛya ŋa lɛ nɔ. Gbɛ nɔ ni osɔfo lɛ atsɔ kɛkpãtã ehã shĩa lɛ nɛ, koni shĩa lɛ he atse.

⁵⁴ Enɛ ji mla ni kã shi hã hewolo nɔ helai srɔtoi ni tamɔ kpiti henɔ:

^55-56 fala, fafale, loosule, gbɛ̃, fuumɔ kɛ kɔɔyɔɔ mli muji ni kaa mama mli kɛ gbogbo he mla.

⁵⁷ Eji mla ni akɛnaa nɔ ni he tseee kɛ nɔ ni he tse; hela ni tamɔ kpiti kɛ ehenɔi ahe mla nɛ.