3 Mose 12 - ŊMALƐ KRƆŊKRƆŊ LƐ

Yei ahetsuumɔ yɛ bifɔmɔ sɛɛ

¹ Yehowa kɛ Mose wie

² koni ekɛɛ Israelbii lɛ akɛ, “Kɛji yoo ko na musu, ni efɔ binuu lɛ, ehe tseee gbii kpawo, tamɔ bɔ ni ehe tseee yɛ eyei aniifeemɔ be mli lɛ.

³ Gbi ni ji kpaanyɔ lɛ nɔ lɛ, afo gbekɛ lɛ ketia.

⁴ Yoo lɛ aŋɔ gbii nyɔŋmai etɛ̃ kɛ etɛ̃ ni ekɛtsuu ehe, ni ekɛjie ehe lá muji lɛ. Nɛkɛ be nɛɛ mli lɛ ekata nɔ ko ni yɔɔ krɔŋkrɔŋ he, ni ekaya Kpee Buu krɔŋkrɔŋ lɛ mli kɛyashi gbi ni eeegbe ehetsuumɔ lɛ naa.

⁵ “Kɛ yoo ko fɔ biyoo lɛ, ehe tseee otsii enyɔ, tamɔ be ni efee yeianii lɛ. Eŋɔ gbii nyɔŋmai ekpaa kɛ ekpaa sɔŋŋ ni ekɛtsuu ehe, ni ekɛjie ehe lá muji lɛ.

⁶ “Kɛji gbii ni ekɛtsuɔ ehe lɛ, yɛ binuu loo biyoo hewɔ lɛ ho lɛ, ekɛ too gwantɛŋ bi ni eye afi aba abahã ni akɛshã shãa afɔle, kɛ shĩa okpo loo kosɛɛ okpo ni akɛshã esha afɔle. Ekɛba Kpee Buu lɛ shinaa lɛ naa ekɛbahã osɔfo lɛ.

⁷ Osɔfo lɛ kɛ afɔle lɛ aba Nyɔŋmɔ hiɛ ni ekpãtã ehã yoo lɛ, koni ehe atse yɛ lá ni hoɔ lɛ lɛ gbɛfaŋ. Enɛ ji mla ni kã shi hã yoo ni fɔɔ nuu loo yoo lɛ.

⁸ “Shi kɛji yoo lɛ naaa too gwantɛŋbi yinii lɛ, no lɛ ekɛ kosɛɛ okpoi enyɔ loo shĩa okpoi enyɔ aba. Akɛ ekome ashã shãa afɔle, koni akɛ ekome hu ashã esha afɔle. Osɔfo lɛ akpãtã ahã lɛ, ni ehe aaatse yɛ lá ni hoɔ lɛ gbɛfaŋ.”