3 Mose 11 - ŊMALƐ KRƆŊKRƆŊ LƐ

Kooloi ni aaanyɛ aye

¹ Yehowa kɛ Mose kɛ Aaron wie koni amɛkɛ mlai nɛɛ ahã Israelbii lɛ ni amɛye nɔ.

² Yehowa kɛɛ, “Kooloi fɛɛ ni yɔɔ shikpɔŋ lɛ nɔ lɛ ateŋ nii ni nyɛye ji:

³ nii fɛɛ ni yɔɔ koklotoi ni agbala mli aloo aja mli, ni asaŋ amɛgɔiɔ amɛniyenii ni amɛtaa.

^4-6 Shi nyɛkayea yooma kɛ afutuɔkɔ kɛ kpɛŋkplɛ, ejaakɛ amɛhe tseee. Amɛgɔiɔ amɛniyenii, ni amɛtaa moŋ, shi agbalako amɛkoklotoi amli.

⁷ Nyɛkayea kplotoo, ejaakɛ ehe tseee. Eyɛ koklotoi ni agbala mli moŋ, shi egɔiii eniyenii etaaa.

⁸ Nyɛkayea kooloi nɛɛ aloo; nyɛkataa amɛgbohii ahe hu, ejaakɛ amɛhe tseee.

⁹ “Yɛ nu mli loi ateŋ lɛ, nyɛyea nii fɛɛ ni yɔɔ fiji kɛ totoi ni yɔɔ ŋshɔ kɛ fai amli fɛɛ.

¹⁰ Shi nii fɛɛ ni bɛ fiji kɛ totoi ni yɔɔ ŋshɔ mli loo fai amli, bɔɔnii bibii ni ebua amɛhe naa tɔo kɛnyiɛ nu mli jio, bɔɔnii ni yɔɔ nu mli ni dara fe nomɛi jio, nyɛhia amɛ.

¹¹ Nihiinii ji amɛ; nyɛkayea amɛloo, ni nyɛhia amɛgbohii lɛ tete.

¹² Nii fɛɛ ni yɔɔ nu mli ni amɛbɛ fiji loo totoi lɛ, nii ni ahiɔ ni.

¹³ Yɛ loofɔji ateŋ lɛ, nii ni nyɛhia ni nyɛkayea nɛ: okropɔŋ kɛ akpaŋa

¹⁴ kɛ ŋshɔŋ okropɔŋ kɛ laalɔɔ kɛ osansa henɔi srɔtoi lɛ

¹⁵ kɛ kwãakwãalabite henɔi srɔtoi fɛɛ,

¹⁶ kɛ duguma kɛ nyɔɔŋ akroma kɛ faanaa oka, kɛ akroma henɔi srɔtoi lɛ fɛɛ,

¹⁷ kɛ patu kɛ ŋshɔŋ patu, kɛ patu bibioo

¹⁸ kɛ dɔkɔdɔkɔ kɛ kpokukpoku kɛ guŋ

¹⁹ kɛ klitso kɛ ehenɔi srɔtoi lɛ fɛɛ, kɛ obleku kɛ aputupata.

²⁰ “Kooloi bibii fɛɛ ni filikiɔ ni amɛwamɔɔ ni amɛnyiɛɔ yɛ amɛnaji ejwɛjwɛ nɔ lɛ, nyɛkayea.

²¹ Shi kɛ̃lɛ enɛɛmɛi ateŋ nii ni yɔɔ shɔji enyɔɔnyɔ ni tsara amɛnane tokota nɔ ni amɛkɛtumɔɔ lɛ, nyɛyea.

²² Kooloi nɛɛ ji baalabii kɛ amɛhenɔi lɛ, ligɔligɔ kɛ ehenɔi lɛ, kɛ agã kɛ ehenɔi,

²³ filikilɔi krokomɛi fɛɛ ni eshwɛ ni wamɔɔ ni amɛyɔɔ naji ejwɛɛjwɛ lɛ nyɛkayea, ejaakɛ amɛhe tseee.

²⁴ Ni enɛɛmɛi buleɔ nyɛ. Kɛ nyɛye lɛ nyɛkɛbaabule nyɛhe. Mɔ fɛɛ mɔ ni taa kooloi nɛɛ agbohii ahe lɛ, ehe tseee kɛyashi gbɛkɛ.

²⁵ Mɔ fɛɛ mɔ ni aaakɔ kooloi nɛɛ ateŋ eko ni egbo he nɔ ko ehiɛ yɛ edɛ̃ lɛ, efɔ etadei lɛ ahe; ehe tseee kɛyashi gbɛkɛ.

²⁶ Kooloo fɛɛ kooloo ni yɔɔ koklotoi ni agbalako mli, ni asaŋ egɔiii nii ni eye momo lɛ, ehe tseee. Mɔ fɛɛ mɔ ni aaata eko he lɛ, mɔ lɛ he tseee.

²⁷ Kooloi fɛɛ ni kɛ amɛniji nyiɛɔ yɛ kooloi naji ejwɛɛjwɛtsɛmɛi ateŋ lɛ, amɛhe tseee. Mɔ fɛɛ mɔ ni taa eko gbonyo he lɛ, ehe tseee kɛyashi gbɛkɛ.

²⁸ Mɔ ni aaawo kooloi nɛɛ ateŋ eko gbonyo lɛ, efɔ etadei ahe; shi ehe tseee kɛyashi gbɛkɛ. Nyɛbua kooloi nɛɛ akɛ kooloi ni ahe tseee.

²⁹ “Kooloi ni eyi shikpɔŋ lɛ nɔ tɔ lɛ ateŋ lɛ, nii ni he tseee ji obishi kɛ kwakwe kɛ odaaklɔ kɛ ehenɔi,

³⁰ kɛ mampam kɛ odiŋmɔlɔ kɛ tsunyɛ kɛ kɔ̃dɔ̃ kɛ obosumaketeo.

³¹ Nyɛbua enɛɛmɛi akɛ nii ni he tseee yɛ kooloi ni eyi shikpɔŋ lɛ nɔ tɔ lɛ ateŋ. Mɔ fɛɛ mɔ ni taa eko ni egbo he lɛ, ehe tseee kɛyashi gbɛkɛ.

³² Nɔ fɛɛ nɔ ni kooloi nɛɛ ateŋ eko ni egbo aaagbee enɔ lɛ, ehe tseee; nɔ fɛɛ nɔ ni akɛ tso loo mama loo kooloo hewolo fee, loo kpekpe loo nɔ fɛɛ nɔ kɛkɛ ni akɛtsuɔ nii jio, eko fɛɛ eko lɛ akɛwo nu mli. Shi ehe tseee kɛyashi gbɛkɛ. No sɛɛ dani ehe aaatse.

³³ Nɔ fɛɛ nɔ ni akɛ sũ fee ni kooloi nɛɛ ateŋ eko aaagbee mli lɛ, nɔ fɛɛ nɔ ni yɔɔ mli lɛ he tseee. Ajwa sũnɔ ni nii lɛ yɔɔ mli lɛ.

³⁴ Niyenii fɛɛ ni ayeɔ ni aaatsɔ̃ nu ni jɛ sũnɔ nɛɛ mli aaashwie nɔ lɛ, ehe tseee; ni nɔ fɛɛ nɔ ni anuɔ ni yɔɔ nɛkɛ sũnɔ nɛɛ mli lɛ, ehe tseee.

³⁵ Nɔ fɛɛ nɔ ni kooloi nɛɛ ateŋ eko gbonyo aaagbee nɔ lɛ, ehe tseee. Kɛ flɔnɔɔ loo latɛ nɔ egbee lɛ, akumɔ, ejaakɛ ehe tseee, ni nyɛbua lɛ akɛ nɔ ni he tseee.

³⁶ Shi kɛ nu hiŋmɛi loo dudɔ ni akɛ nu toɔ mli ni lɛ, no lɛ ehe tse; shi kɛ eko he aaasa kooloo gbonyo he lɛ, ehe tseee.

³⁷ Kɛji kooloi nɛɛ ateŋ eko gbonyo gbee wu ni abaadu nɔ lɛ, wu lɛ he tse lolo.

³⁸ Shi kɛ aafɔ dumɔnii lɛ yɛ nu mli, ni gbonyo lɛ gbee nɔ lɛ, wu lɛ he tseee.

³⁹ “Kɛ kooloi ni ayeɔ lɛ eko gbo lɛ, mɔ fɛɛ mɔ ni taa egbonyo lɛ he lɛ, ehe tseee kɛyashi gbɛkɛ.

⁴⁰ Mɔ fɛɛ mɔ ni yeɔ kooloo ni egbo lɛ loo lɛ eko lɛ, efɔ etadei ahe; ehe tseee kɛyashi gbɛkɛ. Mɔ ni woɔ kooloo lɛ gbonyo lɛ, efɔ etadei ahe, ehe tseee kɛyashi gbɛkɛ.

⁴¹ “Kooloi bibii fɛɛ ni eyi shikpɔŋ lɛ nɔ tɔ lɛ, nyɛkayea, ejaakɛ nii ni ahiɔ ni.

⁴² Kooloi fɛɛ ni wamɔɔ yɛ amɛmusu nɔ aloo amɛnyiɛɔ yɛ amɛnaji ejwɛ nɔ, aloo amɛyɔɔ naji piipii, kooloi bibii fɛɛ ni eyi shikpɔŋ lɛ nɔ tɔ lɛ, nyɛkayea, ejaakɛ amɛbuleɔ mɔ.

⁴³ Nyɛkayea koni nyɛkɛ no bule nyɛhe ni nyɛkɛwo nyɛhe muji.

⁴⁴ Mi ji Yehowa, nyɛNyɔŋmɔ lɛ. No hewɔ lɛ, nyɛfea nyɛhe krɔŋkrɔŋ; nyɛtoa nyɛhe krɔŋkrɔŋ, ejaakɛ mɔ krɔŋkrɔŋ ji mi. No hewɔ lɛ, nyɛkɛ nibii ni eyi shikpɔŋ lɛ nɔ obɔ̃ lɛ eko eko akabulea nyɛhe.

⁴⁵ Mi ji Yehowa mɔ ni jie nyɛ kɛjɛ Ijipt shikpɔŋ lɛ nɔ, koni matsɔ̃ nyɛNyɔŋmɔ lɛ. No hewɔ lɛ, nyɛfea nyɛhe krɔŋkrɔŋ, ejaakɛ mɔ krɔŋkrɔŋ ji mi.

⁴⁶ “Belɛ enɛ ji mla ni kã shi yɛ kooloi kɛ loofɔji kɛ nɔ fɛɛ nɔ ni hiɔ nu mli kɛ nɔ fɛɛ nɔ ni hiɛ kã ni nyiɛɔ ni eyi shikpɔŋ lɛ nɔ tɔ lɛ he.

⁴⁷ Awo mla lɛ koni akɛna srɔto ni yɔɔ kooloi ni he tse kɛ nii ni he tseee teŋ, kɛ kooloi ni ayeɔ kɛ nii ni ayeee teŋ.”