2 Timoteo 3 - ŊMALƐ KRƆŊKRƆŊ LƐ

Naagbee gbii lɛ

¹ Shi na enɛ ole akɛ naagbee gbii lɛ amli lɛ jaramɔ bei baaba.

² Ejaakɛ gbɔmɛi aaatsɔ̃mɔ hesuɔlɔi, shikasuɔlɔi, shwãlɔi, hewolɔi, mɔjɛlɔi, fɔlɔi anɔ toigbolɔi, trumui, mɛi ni he tseee,

³ mɛi ni edɔɔɔ mɔ he, kpãŋmɔmlikulɔi, oshekuyelɔi, mɛi ni nyɛɛɛ amɛkɔnɔ nɔ amɛye, mɛi ni hiɛ yɔɔ la, mɛi ni sumɔɔɔ ekpakpa,

⁴ sɛɛgbɛtsɔ̃ɔlɔi, mɛi ni feɔ nii ni amɛjwɛŋŋ he, henɔwolɔi, mɛi ni sumɔɔ shwɛmɔ kɛ ŋɔɔmɔ fe Nyɔŋmɔ,

⁵ mɛi ni hiɛ Nyɔŋmɔjamɔ kpo nɔ gbɛ su lɛ mli, shi amɛkwa emli hewalɛ lɛ. Tsi ohe kɛjɛ nɛkɛ gbɔmɛi ahe.

⁶ Ejaakɛ mɛnɛɛmɛi ateŋ mɛi komɛi ji mɛi ni juɔ shi boteɔ shĩai ni amɛnine shɛɔ yei ni bɛ yitseiaŋ ni esha edɔdɔɔ amɛ ni akɔnɔi srɔtoi kpalaa amɛ lɛ anɔ.

⁷ Yei ni kaseɔ nii daa, shi kɛ̃lɛ amɛnyɛɛɛ amɛshɛ anɔkwale lɛ he lɛ.

⁸ Shi tamɔ bɔ ni Yane kɛ Yambre ku Mose naa lɛ, nakai nɔŋŋ nɛkɛ mɛi nɛɛ kuɔ anɔkwale lɛ naa; gbɔmɛi ni yitseiaŋ efite, mɛi ni jeee mɛi komɛi yɛ hemɔkɛyeli lɛ gbɛfaŋ.

⁹ Shi amɛyaŋ amɛhiɛ tuutu ko; ejaakɛ amɛkwashiafeemɔ lɛ aaaje kpo fãŋŋ yɛ mɛi fɛɛ ahiɛ, tamɔ bɔ ni mɛi enyɔ lɛ anɔ lɛ hu je kpo lɛ.

Nibii ni baahã Timoteo afi shi

¹⁰ Shi bo lɛ, ole mitsɔ̃ɔmɔ, mijeŋba, miyiŋtoo, mihemɔkɛyeli, mitsuishitoo, misuɔmɔ, mihiɛmiamɔ,

¹¹ miyiwai, mimanehului ni mina yɛ Antiokia kɛ Ikonium kɛ Listra lɛ, nɔ yiwai srɔtoi abɔ ni mina ni Nuŋtsɔ lɛ jie mi kɛjɛ fɛɛ mli lɛ.

¹² Shi mɛi fɛɛ hu ni taoɔ akɛ amɛaahi shi yɛ Nyɔŋmɔ gbeyeishemɔ naa yɛ Kristo Yesu mli lɛ, aaawa amɛyi.

¹³ Shi gbɔmɛi fɔ̃ji kɛ shishiulɔi aaawo wu yɛ efɔŋ mli; amɛlakaa mɛi ni amɛ hu alakaa amɛ.

¹⁴ Shi bo lɛ, hii shi yɛ nii ni okase ni oyɔɔ hewalɛ yɛ nɔ lɛ amli, ejaakɛ ole mɛi anaa ni okase yɛ,

¹⁵ ni ogbekɛbiiashi ojɛ ole Ŋmalɛi Krɔŋkrɔŋi lɛ, ni aaanyɛ ahã ole nii hã yiwalaheremɔ kɛtsɔ̃ Yesu Kristo nɔ hemɔkɛyeli nɔ.

¹⁶ Ŋmalɛ fɛɛ ŋmalɛ lɛ ejɛ Nyɔŋmɔ Mumɔ lɛ mli, ni ehe yɛ sɛɛnamɔ hã nitsɔɔmɔ kɛ hiɛkãmɔ kɛ mɔsaamɔ kɛ tsɔsemɔ ni yɔɔ jalɛ mli lɛ,

¹⁷ koni Nyɔŋmɔ gbɔmɔ lɛ aye emuu, ni asaa lɛ pɛpɛɛpɛ ahã nitsumɔ kpakpa fɛɛ nitsumɔ kpakpa.