2 Samuel 8 - ŊMALƐ KRƆŊKRƆŊ LƐ

Tai amli kunim ni David ye lɛ

¹ Enɛ sɛɛ lɛ David kɛ Filistibii lɛ wu, ni eye amɛnɔ kunim, ni eshɔ̃ shikpɔŋ lɛ nɔ hewalɛ lɛ yɛ Filistibii lɛ adɛŋ.

² No sɛɛ lɛ, David ye Moabbii lɛ hu anɔ kunim. Ehã Moabbii ni amɔmɔ lɛ kamɔ shikpɔŋ. Ni kɛji ekɛ susumɔ kpãa susu gbɔmɛi nɛɛ, ni ena kpãi enyɔ lɛ, kɛkɛ lɛ ehã agbe amɛ; kɛkɛ lɛ esusu kpãa kome, kɛkɛ lɛ ehã amɛyi ena wala. Moabbii lɛ tsɔmɔ David tsuji, ni amɛtsu onia amɛhã lɛ.

³ David ye Zoba Maŋtsɛ Hadadezer, Rehob bi lɛ, hu nɔ kunim, be ni Hadadezer yiŋ etee akɛ eyaapele hewalɛ ni eyɔɔ yɛ shikpɔŋ ni kã Eufrate Faa lɛ naa lɛ he lɛ.

⁴ David mɔmɔ Maŋtsɛ Hadadezer hii okpɔŋɔnɔtalɔi akpe kɛ ohai kpawo kɛ tabilɔi nanenɔnyiɛlɔi akpei nyɔŋmai enyɔ. David folɔ okpɔŋɔi ni gbalaa shwiilii lɛ fɛɛ anaji asɛɛ fãi, shi eshi okpɔŋɔi lɛ ateŋ ekomɛi bɔ ni baahi ahã tayaa shwiilii oha.

⁵ Kɛkɛ ni Siriabii ni yɔɔ Damasko lɛ ba koni amɛbawa Zoba maŋtsɛ Hadadezer; shi David gbe Siriabii lɛ ateŋ mɛi akpei nyɔŋmai enyɔ kɛ enyɔ.

⁶ Kɛkɛ ni David shi asraafoi eto Siriabii lɛ ashikpɔŋ lɛ nɔ, ni Siriabii lɛ tsɔmɔ David tsuji, ni etsũ amɛ onia. Yehowa hã David ye kunim yɛ he fɛɛ he.

⁷ David shɔ̃ shika tsɛŋi ni Hadadezer tsuji lɛ hiɛ lɛ, ni ekɛba Yerusalɛm;

⁸ asaŋ eloo akɔɔble babaoo diɛŋtsɛ yɛ Beta kɛ Berotai, maji ni yɔɔ Hadadezer shishi lɛ.

⁹ Be ni Toi, Hamat maŋtsɛ lɛ, nu akɛ David eye Hadadezer ta tso muu lɛ fɛɛ nɔ lɛ,

¹⁰ etsu ebi, Yoram, Maŋtsɛ David ŋɔɔ koni eyaŋa lɛ ni ehã lɛ aekoo ehã lɛ, yɛ Hadadezer nɔ kunim ni eye lɛ hewɔ, ejaakɛ Hadadezer kɛ Toi lɛ amɛkɛ amɛhe wuwuu tai saŋŋ. Yoram hiɛ jwiɛtɛi nibii kɛ shika nibii kɛ akɔɔble nibii ekɛbake David.

¹¹ Maŋtsɛ David jɔɔ nibii nɛɛ hu anɔ eke akɛ akɛsɔmɔ Yehowa tamɔ bɔ ni ejɔɔ jwiɛtɛi kɛ shika ni eshɔ̃ kɛjɛ majimaji ni eye amɛnɔ lɛ amli kɛba lɛ nɔ lɛ.

¹² Maji lɛ ji Edom kɛ Moab kɛ Amon kɛ Filisti kɛ Amalek. Zoba Maŋtsɛ Hadadezer, Rehob bi lɛ, nibii ni ashɔ̃ lɛ ekomɛi hu fata he.

¹³ David gbɛi hehee kɛteke nɔ. Be ni eku esɛɛ kɛjɛ ta lɛ ebaa lɛ, eyagbe Edombii akpei nyɔŋma kɛ kpaanyɔ yɛ Ŋoo Jɔɔ lɛ mli.

¹⁴ No sɛɛ lɛ, David shi asraafoi eto Edom shikpɔŋ lɛ nɔ fɛɛ, ni Edombii fɛɛ tsɔmɔ David tsuji. Yehowa hã David ye kunim yɛ he fɛɛ he.

¹⁵ David ye Israel maŋtsɛ, ni eye jalɛ sane ehã mɔ fɛɛ mɔ.

¹⁶ Yoab, ni atsɛɔ enyɛ akɛ Zeruia lɛ, ji David tatsɛnukpa fe fɛɛ; ni Yehoshafat, Ahilud bi lɛ, ji maŋtsɛ woloŋmalɔ;

¹⁷ ni Zadok, Ahitub bi lɛ, kɛ Ahimelek, Abiatar bi lɛ, amɛ ji osɔfoi; ni Seraia ji maŋtsɛ we woloŋmalɔ.

¹⁸ Ni Benaia, Yehoiada bi lɛ, ji tabilɔi ni buɔ David he tuuŋtu lɛ atsɛ, ni David bihii lɛ miisɔmɔ akɛ osɔfoi.