2 Samuel 6 - ŊMALƐ KRƆŊKRƆŊ LƐ

Akɛ Kpãŋmɔ Adeka lɛ ba Yerusalɛm

¹ David bua Israel hii kãkãlɔi fɛɛ anaa kɛkpe ekoŋŋ. Ena gbɔmɛi akpei nyɔŋmai etɛ̃.

² Kɛkɛ ni David kɛ gbɔmɛi nɛɛ yiŋ kɛtee Baala maŋ lɛ mli yɛ Yuda shikpɔŋ lɛ nɔ, koni amɛyawo Nyɔŋmɔ Kpãŋmɔ Adeka lɛ. Akɛ Yehowa Ofe ni elumɔyeli sɛi lɛ ma kerubim lɛ anɔ lɛ gbɛi ewo adeka lɛ.

³ Amɛyawo Kpãŋmɔ Adeka lɛ yɛ Abinadab we lɛ ni yɔɔ gɔŋ lɛ nɔ lɛ mli, ni amɛkɛma shwiili hee ko nɔ. Abinadab bihii, Uza kɛ Ahio, kudɔ shwiili hee ni adeka lɛ ma nɔ lɛ.

⁴ Ni Ahio nyiɛ Kpãŋmɔ Adeka lɛ hiɛ.

⁵ David kɛ Israel maŋ muu lɛ fɛɛ nya kɛ lalai kɛ saŋkui kɛ obentai kɛ fabii kɛ miji kɛ ŋoŋoi amɛkɛwo Yehowa hiɛ nyam kɛ amɛnyɛmɔ fɛɛ.

⁶ Be ni ashɛ Nakon ŋmãagbeemɔhe lɛ, tsinai lɛ tɛ ni Kpãŋmɔ Adeka lɛ kpa ni eyaagbee shi. No hewɔ lɛ, Uza kpã enine mli ni ekɛmɔ Kpãŋmɔ Adeka lɛ mli.

⁷ Yehowa mli wo Uza la, ni etswa lɛ nɔ amrɔ lɛ nɔŋŋ yɛ enine ni ekɛta Kpãŋmɔ Adeka lɛ he lɛ hewɔ, ni Uza gbo yɛ enajiaŋ yɛ Kpãŋmɔ Adeka lɛ masɛi.

⁸ No hewɔ lɛ, atsɛ jɛi Perez-Uza kɛbashi ŋmɛnɛ. Sane lɛ dɔ David akɛ Yehowa kɛ Uza ye kɛ joomɔ nakai.

⁹ David she Yehowa gbeyei nakai gbi lɛ, ni ekɛɛ akɛ, “Te mafee tɛŋŋ mato Yehowa Kpãŋmɔ Adeka lɛ hu?”

¹⁰ Enɛ hewɔ lɛ, David sumɔɔɔ akɛ ekɛ Kpãŋmɔ Adeka lɛ yaa Yerusalɛm. No hewɔ lɛ, David wo Kpãŋmɔ Adeka lɛ kɛgba afã kɛtee Obed-Edom, Gitnyo lɛ, we lɛ.

¹¹ Ato Yehowa Kpãŋmɔ Adeka lɛ yɛ Obed-Edom, Gitnyo lɛ, we lɛ mli nyɔji etɛ̃, ni Yehowa jɔɔ Obed-Edom kɛ ewe lɛ fɛɛ.

¹² Abagba Maŋtsɛ David akɛ, “Yehowa ejɔɔ Obed-Edom we lɛ kɛ nɔ fɛɛ nɔ ni eyɔɔ yɛ Kpãŋmɔ Adeka lɛ hewɔ.” No hewɔ lɛ, David tee, ni eyawo Kpãŋmɔ Adeka lɛ yɛ Obed-Edom we lɛ kɛba Yerusalɛm kɛ nyamɔ.

¹³ Kɛji mɛi ni tere Kpãŋmɔ Adeka lɛ famɔ amɛnaji shii ekpaa lɛ, David gbeɔ tsina kɛ too ni ewo fɔ ekɛshãa afɔle.

¹⁴ David jo kɛ ehewalɛ fɛɛ ekɛwo Yehowa hiɛ nyam, ni emia kɛ klala efod pɛ.

¹⁵ Lɛ kɛ Israel maŋ muu fɛɛ kɛ oshebɔɔ kɛ tɛtɛrɛmantɛrɛ yawo Kpãŋmɔ Adeka lɛ.

¹⁶ Be ni akɛ Kpãŋmɔ Adeka lɛ shɛ Yerusalɛm lɛ, Mikal, Saul biyoo lɛ, bu samflɛ naa, ni ena Maŋtsɛ David ni eehuru ni eejo kɛmiiwo Yehowa hiɛ nyam, ni David he fee Mikal hiɛgbele.

¹⁷ Ni akɛ Kpãŋmɔ Adeka lɛ ba, ni akɛyama gbɛhe ni ato ahã lɛ yɛ buu ni David eshi ehã lɛ lɛ mli. No sɛɛ lɛ, David shã afɔlei kɛ shidaa afɔlei ehã Yehowa.

¹⁸ Be ni David egbe shãa afɔlei lɛ kɛ shidaa afɔlei lɛ ashãa naa lɛ, ejɔɔ maŋbii lɛ yɛ Yehowa Ofe lɛ gbɛi mli,

¹⁹ ni eja maŋ lɛ fɛɛ, ni ji Israel asafo muu lɛ mli hii kɛ yei fɛɛ, niyenii. Ehã mɔ fɛɛ mɔ aboloo akwaabɔ kome kɛ loo kukuli kome kɛ wainyibii ni aka ni egbi akwaabɔ kome. Ni no sɛɛ lɛ maŋ lɛ fɛɛ gbɛ mli, ni mɔ fɛɛ mɔ tee ewe.

²⁰ Ni be ni David yiŋ etee ewe lɛ ni eyahã sɛɛ fɛɛ lɛ, Mikal, Saul biyoo lɛ, je kpo ekɛ lɛ bakpe, ni ekɛɛ lɛ akɛ, “Aso nyam pi Israel maŋtsɛ lɛ wo ehiɛ ŋmɛnɛ nɛɛ kɛ ehe bo ni ejie yɛ etsuji kɛ eweyei ahiɛ tamɔ mɛi ni ahiɛgble tɔ ejwa feɔ lɛ!”

²¹ Shi David hã Mikal hetoo, ni ekɛɛ lɛ akɛ, “Naa, Yehowa, mɔ ni shi otsɛ kɛ ewe lɛ fɛɛ sɛɛ ni ebaŋɔ mi, ni ewo mi Israel, ni ji lɛ diɛŋtsɛ emaŋ lɛ, nɔ lumɔ lɛ, lɛ ehiɛ nyam mijo mikɛwo lɛ; ni majo ŋmɛnɛ, ni majo wɔ mikɛwo ehiɛ nyam.

²² Maya nɔ moŋ mawo mihe hiɛgbele fe tsutsu lɛ yɛ bo ohiɛ; shi weyei lɛ ni otsɔ̃ɔ lɛ, amɛ lɛ nyam moŋ mihiɛ aaaba yɛ amɛhiɛ.”

²³ Mikal, Saul biyoo lɛ, naaa bi kɛyashi egbo.