2 Samuel 22 - ŊMALƐ KRƆŊKRƆŊ LƐ

David kunimyeli lala lɛ

¹ Be ni Yehowa jie David yɛ ehenyɛlɔi lɛ fɛɛ kɛ Saul hu dɛŋ lɛ, David la lala nɛɛ:

² Yehowa ji mitɛsaa, kɛ mimɔɔ kɛ miherelɔ.

³ MiNyɔŋmɔ lɛ ji mitɛsaa, mɔ mli ni mibaa abo yɛ. Ebuɔ mihe tamɔ tsɛŋ, ni efãa mihe, ni ehãa mifeɔ shweshweeshwe. Lɛ ji miyiwalaherelɔ ni buɔ mihe, ni hereɔ mi kɛjɛɔ nɔnaa mli.

⁴ Mibo mitsɛ Yehowa, mɔ ni sa yijiemɔ lɛ, ni ehere mi yɛ mihenyɛlɔi adɛŋ. Ajie Yehowa yi!

⁵ Gbele ŋshɔkei bɔle mi kɛkpe, ni fai fɔ̃ji wo mihe gbeyei.

⁶ Gbohiiaje kpãi bɔle mi kɛkpe, ni gbele tsɔ̃ mi tsɔne.

⁷ Mifimɔ lɛ mli lɛ, mibo mitsɛ Yehowa, mibo mitsɛ miNyɔŋmɔ lɛ. Ejɛ eSɔlemɔ we lɛ, ni enu migbee; mibolɔmɔ lɛ yashɛ etoiŋ.

⁸ Kɛkɛ ni shikpɔŋ lɛ hoso; ni ekpokpo, ŋwɛi shishitoi lɛ hu hoso, ni amɛkpokpo ejaakɛ Nyɔŋmɔ mli efu.

⁹ Lasu fã kɛjɛ egugɔ mli, ni la ni kpãtãa nii ahiɛ jɛ edaaŋ; ŋai ni miitsɛ̃ hu jɛ edaaŋ.

¹⁰ Egba ŋwɛi mli, ni ekpeleke shi, Yehowa hã ŋwɛi kpoo enaa shi, ni eyi shikpɔŋ lɛ nɔ, ni duŋ kpii yɛ enaneshi.

¹¹ Eta Kerub nɔ, ni efiliki; ana lɛ ni eta kɔɔyɔɔ fiji anɔ.

¹² Ekɛ duŋ kpii ha ehe, ni atatui kpiikpii ni eyi kɛ nu bɔle ehe kɛkpe.

¹³ Ŋai ni miitso kpɛlɛ la kɛjɛ ehiɛ ni kpɛɔ hɛŋŋ lɛ mli.

¹⁴ Yehowa gbee shi kɛjɛ ŋwɛi; Nyɔŋmɔ Ofe lɛ wo egbeeŋ.

¹⁵ Etsɛ̃rɛ egãii lɛ ekɛgbɛ ehenyɛlɔi lɛ eshwã; ni ekɛ srawa hu wo amɛ foi.

¹⁶ Kɛkɛ ni ana ŋshɔ shishi kã shi, ni agbele je lɛ shishitoo atsɔ̃ɔ faŋŋ, be ni Yehowa kã ehenyɛlɔi lɛ ahiɛ, ni ekɛ mlifu bolɔ ewo amɛ lɛ.

¹⁷ Yehowa jɛ ŋwɛi ekpã enine mli emɔ mimli, ni esha mi kɛjɛ bu kwɔŋkwɔŋ lɛ mli.

¹⁸ Ehere mi yɛ mihenyɛlɔi ni he wa lɛ adɛŋ; kɛ mɛi ni nyɛɔ mi lɛ hu adɛŋ, ejaakɛ amɛhe wa tsɔ̃ fe mi.

¹⁹ Amɛbatua mi yɛ amanehulu be mli, shi Yehowa bu mihe.

²⁰ Ejie mi yɛ osharã mli, ni ehere mi, ejaakɛ eyɛ mihe tsuijurɔ.

²¹ Yehowa duro mi, ejaakɛ mifee nii ni ja; ni ejɔɔ mi, ejaakɛ mifeko efɔŋ ko.

²² Miye Yehowa mlai lɛ fɛɛ anɔ, ni mishiko miNyɔŋmɔ lɛ.

²³ Miye emlai lɛ fɛɛ anɔ, ni mitɔ̃ko ekpɔi lɛ anɔ.

²⁴ Ele akɛ fɔbuu ko bɛ mihe, ni ele akɛ miwi mihe kɛje nɔ fɔŋ he.

²⁵ No hewɔ lɛ, Yehowa fee mi ejurɔ yɛ mijalɛ naa, yɛ fɔbuu ko ni bɛ mihe lɛ naa.

²⁶ Mɛi ni yeɔ bo anɔkwa lɛ bo hu oyeɔ amɛ anɔkwa; ni mɔ ni fɔbuu ko bɛ ehe lɛ naa bo akɛ mɔ ni eye emuu.

²⁷ Mɔ ni he tse lɛ, okɛ ohe tsɔ̃ɔ lɛ akɛ mɔ ni he tse; shi mɔ ni yi wa lɛ, okɛ lɛ yeee.

²⁸ Ohereɔ humii ayiwala, shi henɔwolɔi lɛ obaa amɛ shi.

²⁹ Yehowa, lɛɛlɛŋ bo ji kane, ni miNyɔŋmɔ hãa minaa nii yɛ duŋ mli.

³⁰ Anɔkwa, bo ohewalɛ mikɛyeɔ henyɛlɔi anɔ, ni miNyɔŋmɔ hewalɛ mikɛhuruɔ henyɛlɔ gbogbo.

³¹ Nyɔŋmɔ lɛ, shwamɔ ko bɛ enifeemɔ he; ni ewooo shi ni efee yaka. Etsɔ̃ɔ tamɔ tsɛŋ ehãa mɛi fɛɛ ni baa lɛ abo lɛ.

³² Yehowa pɛ ji Nyɔŋmɔ, ni Nyɔŋmɔ pɛ ji wɔhefãlɔ.

³³ Nyɔŋmɔ lɛ mibobaa mɔɔ ni yɔɔ hewalɛ ji lɛ; ehãa migbɛ jaa hãa mi.

³⁴ Ehãa minajiaŋ waa tamɔ ofrote, ni ebaa miyi yɛ gɔji lɛ anɔ.

³⁵ Etsɔ̃ɔ mi tawuu, koni manyɛ akɔɔble gãi matsɛ̃.

³⁶ Yehowa, obaa miyi, ni ohere mi; oyelikɛbuamɔ ehã mitsɔ̃ mɔ wulu.

³⁷ Ohã mi foijeehei babaoo, ni migbeko shi pɛŋ.

³⁸ Mitiuɔ mihenyɛlɔi lɛ, ni mikpãtãa amɛhiɛ, ni mikpaleee kɛyashi mipleneɔ amɛ.

³⁹ Mitswiaa amɛ nii bɔ ni amɛnyɛɛɛ shi amɛte dɔŋŋ, ni amɛnyɔnyɔi yɛ minaji ashi.

⁴⁰ Ejaakɛ omiaa mi kɛhã tawuu; ohãa mihenyɛlɔi lɛ nyɔnyɔɔ yɛ minaji ashi.

⁴¹ Ohãa mihenyɛlɔi joɔ minaa foi, ni mikpãtãa mɛi ni nyɛɔ mi lɛ ahiɛ.

⁴² Amɛkwɛ gbɛ, shi yiwalaheremɔ ko bɛ; amɛkwɛ Yehowa gbɛ; shi efooo amɛdaaŋ.

⁴³ Mishimɔ amɛ muɛmuɛ tamɔ mlu; minaanaa amɛnɔ tamɔ gbɛteŋ ŋmɔtɔ.

⁴⁴ Ojie mi yɛ mimaŋ maŋsɔi amli, ni obaa miyi akɛ majimaji anɔ maŋtsɛ; ni mɛi kpɔji ni mileee tete ebatsɔ̃ mishishibii agbɛnɛ.

⁴⁵ Maŋsɛɛbii kotoɔ mi, ni kɛ miwie lɛ amɛboɔ mi toi.

⁴⁶ Maŋsɛɛbii lɛ anijiaŋ je wui, ni amɛshi amɛmɔji lɛ amli amɛba kɛ hekpokpomɔ.

⁴⁷ Yehowa hiɛ kã! Ajie mihefãlɔ lɛ yi! Akafo Nyɔŋmɔ mɔ ni ji miyiwalaherelɔ lɛ agbojee.

⁴⁸ Lɛ ji Nyɔŋmɔ ni tɔ mihe owele ni eba maji ashi ewo mishishi,

⁴⁹ asaŋ ni ehere mi yɛ mihenyɛlɔi adɛŋ lɛ. Yehowa, owoɔ mi otaa mihenyɛlɔi lɛ ayiteŋ, ni obaa miyi kɛjɛ yiwalɔi adɛŋ.

⁵⁰ No hewɔ lɛ, majie oyi, Yehowa, matsɔ̃ɔ majimaji lɛ; mala makafo bo.

⁵¹ Ohã maŋtsɛ lɛ eye kunim wuji yɛ majimaji lɛ anɔ, ni osumɔɔ mɔ ni ofɔ lɛ mu owo lɛ maŋtsɛ, ni ji David kɛ eshwiei fɛɛ kɛyaa naanɔ.