2 Samuel 12 - ŊMALƐ KRƆŊKRƆŊ LƐ

Natan wiemɔ hã David shwa ehe

¹ Kɛkɛ ni Yehowa tsu Natan David ŋɔɔ; ni Natan ba ni ebakɛɛ David akɛ, “Hii enyɔ komɛi hi maŋ ko nɔ be ko. Amɛteŋ mɔ kome lɛ niiatsɛ ni, ni mɔ kome lɛ ohiafo ni.

² Niiatsɛ lɛ yɛ toi kɛ tsinai babaoo diɛŋtsɛ,

³ shi ohiafo lɛ bɛ nɔ ko nɔ ko fe gwantɛŋbi yoo bibioo kome pɛ ni eyahe. Elɛ ekooloo nɛɛ ni ekɛ eshĩaŋ gbekɛbii lɛ fɛɛ badara. Niyenii ni eyeɔ lɛ, no eko ehãa toobi lɛ, ni ekɛ toobi lɛ nuɔ kpulu kome naa nu; ni kɛfee lɛ ewoɔ lɛ eŋmɛɔ ekpɔkɔiaŋ. Toobi lɛ tamɔ biyoo hã lɛ.

⁴ Be ko lɛ gbɔ ko bato nuu niiatsɛ lɛ; shi akɛ ni esumɔɔɔ akɛ emɔ lɛ diɛŋtsɛ etoo loo etsinai lɛ eko ni egbe ehã egbɔ lɛ hewɔ lɛ, eshi ekooloi lɛ asɛɛ, ni eyamɔ ohiafo lɛ gwantɛŋbi lɛ moŋ, ni egbe ehã egbɔ ni ebato lɛ lɛ.”

⁵ David mli fu niiatsɛ lɛ naakpa, ni ekɛɛ Natan akɛ, “Mina Yehowa akɛ, nuu ni ye nɛkɛ sane nɛɛ lɛ esa gbele,

⁶ ni esa akɛ eto toobi lɛ najiaŋ toi ejwɛ, akɛni enyɛ eye ohiafo lɛ nɛkɛ sane, ni enaaa lɛ mɔbɔ lɛ.”

⁷ Kɛkɛ ni Natan kɛɛ David akɛ, “Bo ji nakai nuu lɛ. Ni naa nɔ ni Yehowa, Israel Nyɔŋmɔ lɛ, kɛɛ, ‘Miwo bo Israel maŋtsɛ, ni mihere oyiwala yɛ Saul dɛŋ;

⁸ asaŋ ni mikɛ emaŋtsɛyeli lɛ kɛ eŋãmɛi lɛ hã bo, ni mihã otsɔ̃ Israel kɛ Yuda fɛɛ maŋtsɛ. Eji enɛɛmɛi faaa kulɛ mafata he mahã bo.

⁹ Mɛni hewɔ mɔ ni oku, mi Yehowa, migbee nɔ, ni ofee efɔŋ nɛɛ? Ogbe Uria, Hitnyo lɛ. Ohã Amonbii lɛ gbe lɛ, kɛkɛ ni oŋɔ eŋa lɛ ofee oŋa.

¹⁰ Enɛ hewɔ lɛ, bo hu kɛjɛ kɛyaa nɛɛ lɛ klante naa gbele kpãŋ yɛ oshwiei ateŋ, ejaakɛ obuuu mi, ni oŋɔ Uria Hitnyo lɛ ŋa lɛ ofee oŋa.

¹¹ Miiwo bo shi! Mahã gbɔmɔ ajɛ bo nɔŋŋ owe lɛ mli ate shi awo bo; ni ohiɛ tua ookwɛ nɛkɛ nɔŋŋ ni mashɔ oŋamɛi lɛ mahã owekunyo, ni ekɛ oŋamɛi lɛ baawɔ shwane fintiŋŋ.

¹² Bo lɛ otee ohe, ni ofee esha lɛ, shi mi lɛ mibafee nɔ ni mikɛɛ lɛ yɛ Israel fɛɛ hiɛ shwane fintiŋŋ?’ ”

¹³ Kɛkɛ ni David kɛɛ Natan akɛ, “Mifee Yehowa shishi esha,” Natan to he ni ekɛɛ David akɛ, “Yehowa hu kɛ esha ni ofee lɛ efa bo, ni ogboŋ.

¹⁴ Shi kɛ̃lɛ akɛ obuuu Yehowa yɛ nɔ ni ofee lɛ hewɔ lɛ, bi lɛ ni abaafɔ ahã bo lɛ yi naŋ wala; gbo eeegbo.”

¹⁵ Kɛkɛ ni Natan shi David ni etee ewe. Yehowa hã hela shi bi lɛ ni Uria ŋa lɛ kɛ David fɔ lɛ nɔ, ni gbekɛ lɛ he ye waa naakpa.

Batsheba bi gbo

¹⁶ David sɔle ekpa Nyɔŋmɔ fai ehã gbekɛ lɛ koni ehe awa lɛ; David hi ŋmaa, ni eho ekã shikpɔŋ yɛ etsu lɛ mli nyɔɔŋnyɔɔŋ fɛɛ.

¹⁷ Kɛkɛ ni ewe lɛ mli onukpai lɛ tee koni amɛyawo enɔ yɛ shikpɔŋ, shi David ekpɛlɛ̃ɛɛ, ni nii hu emiii akɛ eye.

¹⁸ Gbi ni hela lɛ na otsi lɛ, gbekɛ lɛ gbo; shi David tsuji lɛ she gbeyei akɛ amɛaakɛɛ lɛ gbekɛ lɛ gbele lɛ ejaakɛ amɛkɛɛ akɛ, “Be ni gbekɛ lɛ hiɛ kã lolo po lɛ, wɔkɛ lɛ wie lɛ ebooo wɔ toi. Te wɔɔɔfee tɛŋŋ wɔkɛɛ lɛ akɛ gbekɛ lɛ egbo hu? Kɛji akwɛɛɛ ni ahi lɛ eeefee ehe efɔŋ ko.”

¹⁹ Shi be ni David na bɔ ni etsuji lɛ wieɔ ablɛbi lɛ pɛ, kɛkɛ ni eyoo sɛɛ akɛ gbekɛ lɛ egbo. No hewɔ lɛ, David bi etsuji lɛ akɛ, “Gbekɛ lɛ egbo, bɛɛ?” Amɛhere lɛ nɔ akɛ, “Egbo”.

²⁰ Kɛkɛ ni David te shi yɛ shikpɔŋ lɛ, ni eju ehe, ni ekpa mu, ni eshwã eyi; kɛkɛ ni etsake etadei lɛ, ni eyiŋ etee Yehowa we lɛ, ni eyasɔle. No sɛɛ lɛ, David ba lɛ diɛŋtsɛ ewe lɛ mli; ni be ni ebi niyenii shi ni akɛ eko bama ehiɛ lɛ, eye.

²¹ David tsuji lɛ kɛɛ lɛ akɛ, “Wɔnuuu bo shishi! Ejaakɛ be ni gbekɛ lɛ hiɛ kã lɛ, ohi ŋmaa, ni ofo ohã lɛ; shi ni egbo moŋ lɛ ni oyeɔ nii nɛɛ?”

²² David kɛɛ amɛ akɛ, “Be ni gbekɛ lɛ hiɛ kã lolo lɛ, mihi ŋmãa ni mifo, ejaakɛ misusumɔ ji akɛ eko lɛ Yehowa aaana mi mɔbɔ, ni eeehã gbekɛ lɛ yi ana wala;

²³ shi agbɛnɛ ni ena egbo lɛ, mɛni mahi ŋmãa mafee? Manyɛ mahã eba wala mli ekoŋŋ? Mi moŋ maya he ni eyɔɔ lɛ; shi lɛ lɛ ekpaleŋ ebaŋ miŋɔɔ dɔŋŋ.”

²⁴ David shɛje eŋa Batsheba mii; ni fee sɛɛ lɛ, ekɛ lɛ na bɔlɛ ni Batsheba fɔ binuu, ni David wo lɛ gbɛi akɛ Solomon. Yehowa na gbekɛ lɛ he tsui,

²⁵ ni etsu Natan gbalɔ lɛ kɛtee ni eyawo gbekɛ lɛ gbɛi “Yedidia” ehã Yehowa.

David yaŋɔ Raba maŋ lɛ

²⁶ Ni Yoab fã ta kɛyatua Amonbii amaŋ wulu ni atsɛɔ lɛ Raba lɛ, ni ekɛ amɛwu; ni eshwɛ fioo ni ebaaŋɔ maŋ lɛ.

²⁷ Kɛkɛ ni Yoab tsu bɔfoi David ŋɔɔ kɛ wiemɔ nɛɛ: “Miyatua Rababii, ni miŋɔ maŋ lɛ he ni amɛnaa nu kɛjɛɔ lɛ.

²⁸ No hewɔ lɛ, agbɛnɛ buamɔ maŋ lɛ tabilɔi ni eshwɛ lɛ anaa, koni okɛ amɛ abatua amɛmaŋ wulu lɛ diɛŋtsɛ ni oŋɔ, bɔ ni afee ni mi mikayaŋɔ ni akɛ migbɛi wo maŋ lɛ.”

²⁹ Enɛ hã David bua etabilɔi ni eshwɛ lɛ fɛɛ anaa. Kɛkɛ ni ekɛ amɛ fã kɛtee eyatua Raba ni eŋɔ maŋ lɛ.

³⁰ Kɛkɛ ni David jie shika maŋtsɛ fai ni akɛbu Amonbii ajemawɔŋ Molek lɛ shiu lɛ, ni ekɛbu lɛ diɛŋtsɛ eyitso. Maŋtsɛ fai nɛɛ tsiimɔ aaafee talenta kome, ni ojarawatɛ ko hɔ mli. No sɛɛ lɛ, eloo maŋ lɛ mli nibii babaoo diɛŋtsɛ.

³¹ Maŋbii ni yɔɔ maŋ lɛ mli lɛ, ehã amɛ nitsumɔ ni amɛkɛ saalai kɛ kɔi kɛ lema atsu; asaŋ enyɛ amɛnɔ hu ni amɛfo ntayaa amɛhã lɛ. Nɛkɛ ji bɔ ni ekɛ Amonbii amaji lɛ fɛɛ ye ehã. Kɛkɛ ni David kɛ etabilɔi lɛ fɛɛ ku amɛsɛɛ kɛba Yerusalɛm.