2 Samuel 10 - ŊMALƐ KRƆŊKRƆŊ LƐ

David ye Amonbii lɛ kɛ Siriabii lɛ anɔ kunim

¹ Sane nɛɛ sɛɛ lɛ Amonbii amaŋtsɛ Nahash gbo, ni ebi Hanun baye esɛɛ.

² Kɛkɛ ni David to eyiŋ akɛ ebaajie mlihilɛ kpo etsɔ̃ɔ Hanun tamɔ bɔ ni Hanun tsɛ Nahash mli hi hã lɛ lɛ. Kɛkɛ ni David tsu etsuji akɛ amɛyahã Hanun kpoo amɛhã lɛ, yɛ etsɛ gbele lɛ hewɔ. Be ni David tsuji lɛ yashɛ Amonbii lɛ ashikpɔŋ lɛ nɔ lɛ,

³ Amonbii alumɛi lɛ wo amɛnuŋtsɔ Hanun yiŋ akɛ, “Naa, tsumɔ ni David etsu kɛba ni abahã bo kpoo nɛɛ lɛ, kaasusu akɛ ekɛmiiwo otsɛ hiɛ nyam. Maŋ lɛ saramɔ kɛ eshikpamɔ moŋ hewɔ ni David tsu bɔfoi kɛba nɛɛ bɔ ni afee ni enyɛ maŋ lɛ ebaŋɔ.”

⁴ No hewɔ lɛ, Hanun mɔmɔ David bɔfoi lɛ, ni eshɛshɛɛ amɛtsɛŋi fãfãafãi, ni no sɛɛ lɛ efolɔ amɛtadei lɛ anɔ yɛ teŋ tuuŋtu kɛbata amɛjoŋkui anɔ. Kɛkɛ ni ejie bɔfoi lɛ agbɛ amɛtee.

⁵ Be ni David nu nɔ ni eba lɛ, etsu ni akɛ bɔfoi lɛ yakpe yɛ gbɛteŋ, ejaakɛ abɔ amɛ ahora fe nine. Ekɛ shɛɛ maje yahã amɛ akɛ amɛwa Yeriko kɛyashi beyinɔ ni amɛtsɛŋi lɛ aaatsa dani amɛba shĩa.

⁶ Amonbii lɛ na akɛ amɛyata David he. No hewɔ lɛ, amɛtsu kɛtee ni ayabɔ Siriabii tabilɔi ni nyiɛɔ nane akpei nyɔŋmai enyɔ apaa kɛjɛ Bet-Rehob kɛ Zoba. Amɛyabɔ Maaka maŋtsɛ lɛ kɛ etabilɔi akpe kɛ Tob tabilɔi hu akpei nyɔŋma kɛ enyɔ apaa.

⁷ Be ni David nu lɛ, ewo Yoab kɛ hii kãkãlɔi lɛ ata lɛ fɛɛ gbɛ kɛtee koni amɛkɛ Amonbii lɛ ayawu.

⁸ Amonbii lɛ je kpo, ni amɛbagba ta yɛ amɛmaŋ, Raba, agbo lɛ naa. Shi Siriabii lɛ ni jɛ Zoba kɛ Rehob lɛ kɛ Tob hii lɛ kɛ Maaka hii lɛ sɔŋŋ tse amɛhe, ni amɛgba amɛta lɛ yɛ ŋa lɛ nɔ.

⁹ Be ni Yoab na akɛ agba ta awo lɛ yɛ esɛɛ kɛ ehiɛ fɛɛ lɛ, ehala Israel tabilɔi kãkãlɔi lɛ ekomɛi, ni ehã amɛgba ta koni amɛkɛ Siriabii lɛ akpe.

¹⁰ No sɛɛ lɛ, etu etabilɔi ni shwɛ lɛ ewo enyɛmi Abishai dɛŋ, ni ekɛ amɛ gba ta koni amɛ lɛ amɛkɛ Amonbii lɛ akpe.

¹¹ Ekɛɛ Abishai akɛ, “Kɛ ona akɛ Siriabii lɛ anine miitsɔ̃ minɔ lɛ koni oba ni obaye obua mi; ni mi hu kɛji mina akɛ Amonbii lɛ anine miitsɔ onɔ lɛ, mibaba mibaye mabua bo.

¹² Feemɔ ekãa, ni hã wɔ fɛɛ wɔfee nuu yɛ wɔmaŋbii kɛ wɔNyɔŋmɔ lɛ maji lɛ ahewɔ, ni Yehowa aaahã nɔ ni lɛ esumɔɔ lɛ aba mli.”

¹³ Kɛkɛ ni Yoab kɛ tabilɔi ni fata ehe lɛ tsɛ̃ kɛyanina Siriabii lɛ, shi Siriabii lɛ jo foi yɛ amɛhiɛ.

¹⁴ Be ni Amonbii lɛ na akɛ Siriabii lɛ ejo foi lɛ, amɛ hu amɛjo Abishai naa foi, ni amɛyabote maŋ lɛ mli. Kɛkɛ ni Yoab ku esɛɛ ni efɔ̃ɔ Amonbii lɛ kɛ ta lɛ wuumɔ, ni eba Yerusalɛm.

¹⁵ Be ni Siriabii lɛ na akɛ Israelbii lɛ eye amɛnɔ lɛ, amɛbua amɛtabilɔi lɛ anaa kɛkpe.

¹⁶ Maŋtsɛ Hadadezer tsu kɛtee koni ayaŋɔ Siriabii lɛ ni yɔɔ Eufrate Faa lɛ bokãgbɛ lɛ kɛba. Ni amɛba Helam ni Maŋtsɛ Hadadezer tatsɛ Shobak lɛ nyiɛ amɛhiɛ.

¹⁷ Be ni David na ele lɛ, ebua Israel tabilɔi lɛ fɛɛ anaa, ni ekɛ amɛ fo Yordan Faa lɛ, ni etee Helam. Siriabii lɛ gba ta wo David, ni amɛkɛ lɛ wu.

¹⁸ Siriabii lɛ jo foi yɛ Israelbii lɛ ahiɛ, shi David gbe Siriabii atayaa shwiiliiatsɛmɛi ohai kpawo kɛ okpɔŋɔianɔtralɔi akpei nyɔŋmai ejwɛ. David pila Shobak, Siriabii atatsɛ lɛ, ni enyɔ yɛ ta lɛ naa.

¹⁹ Be ni maŋtsɛmɛi fɛɛ ni yɔɔ Hadadezer shishi lɛ na akɛ Israel eye amɛnɔ lɛ, amɛ kɛ Israel bakpãtã, ni amɛsɔmɔ Israel. Kɛjɛ no sɛɛ lɛ Siriabii lɛ she gbeyei akɛ amɛaate shi amɛyaye amɛbua Amonbii lɛ.