2 Petro 3 - ŊMALƐ KRƆŊKRƆŊ LƐ

Nyɔŋmɔ mɔbɔnalɛ hãaa Naagbee Gbi lɛ aba mra

¹ Agbɛnɛ, suɔmɔmɛi, enɛ ji wolo ni ji enyɔ ni miŋmaa nyɛ, ni fɛɛ mli lɛ makai nyɛ ni mikɛhɛle nyɛjwɛŋmɔ krɔŋŋ lɛ shi

² ni nyɛkai gbalɔi krɔŋkrɔŋi lɛ awiemɔi ni amɛwie sa kɛ Nuŋtsɔ kɛ yiwalaherelɔ lɛ kitã ni bɔfoi ni atsu nyɛŋɔɔ lɛ kɛhã nyɛ lɛ.

³ Klɛŋklɛŋ lɛ nyɛle enɛ, akɛ naagbee gbii lɛ anɔ lɛ, hefɛoyelɔi aaaba kɛ hefɛoyeli, ni amɛaanyiɛ yɛ amɛ diɛŋtsɛ amɛkɔnɔi lɛ anaa,

⁴ ni amɛaakɛɛ, “Nɛgbɛ ebaa lɛ he shiwoo lɛ yɔɔ? Ejaakɛ kɛjɛ beyinɔ ni tsɛmɛi lɛ tee yawɔwɔi nɛɛ, bɔ ni nibii fɛɛ yɔɔ kɛjɛ jeŋbɔɔ shishijee mli lɛ, nakai nɔŋŋ amɛyɔɔ nɛɛ.”

⁵ Kwa amɛkwaa amɛ jieɔ amɛhiɛ yɛ enɛ nɔ akɛ ŋwɛi yɛ kɛjɛ blema beebe, ni shikpɔŋ hu jɛ nu mli, ni etsɔ̃ nu mli ebama shi yɛ Nyɔŋmɔ wiemɔ naa;

⁶ no nɔŋŋ nɔ etsɔ̃ ni nu ŋɔ je ni yɔɔ no be lɛ mli lɛ ni ehiɛ kpãtã lɛ.

⁷ Shi ŋwɛi kɛ shikpɔŋ ni yɔɔ amrɔ nɛɛ, nakai wiemɔ lɛ nɔŋŋ nɔ etsɔ̃ ekɛ amɛ to hã là kɛyashi kojomɔ gbi lɛ ni aaakpãtã mɛi ni sheee Nyɔŋmɔ gbeyei lɛ ahiɛ lɛ.

⁸ Shi, suɔmɔmɛi, nyɛhiɛ akakpaa sane kome nɛɛ nɔ, akɛ Nuŋtsɔ lɛ hiɛ lɛ, gbi kome tamɔ afii akpe, ni afii akpe hu tamɔ gbi kome.

⁹ Jeee tsɛ Nuŋtsɔ lɛ hãa eshiwoo lɛ sɛɛ tsɛɔ, tamɔ bɔ ni mɛi komɛi susuɔ akɛ esɛɛ etsɛ lɛ, shi moŋ etsui shi etoɔ ehãa wɔ, ejaakɛ esumɔ̃ɔɔ akɛ mɛi komɛi alaaje, shi moŋ akɛ mɛi fɛɛ atsake amɛtsui.

¹⁰ Shi Nuŋtsɔ lɛ Gbi lɛ baaba tamɔ julɔ, ni no mli lɛ ŋwɛi lɛ aaaho aya kɛ gbɛɛmɔ, ni je nɛɛ mli shishijeenii lɛ aaashã ni amɛaatserɛ, ni shikpɔŋ kɛ emli nii lɛ aaashã.

Nyɛhiɛ akajea jeŋ ni yɔɔ daa lɛ nɔ

¹¹ Agbɛnɛ, akɛni nɛkɛ nibii nɛɛ fɛɛ baafite hewɔ lɛ, mɛɛ gbɔmɛi sa akɛ nyɛtsɔ̃mɔ yɛ jeŋba krɔŋkrɔŋ kɛ Nyɔŋmɔ gbeyeishemɔ mli?

¹² Be mli ni nyɛkwɛɔ gbɛ ni nyɛshweɔ Nyɔŋmɔ Gbi lɛ baa lɛ, nɔ mli ni ŋwɛi aaahere kɛ là ni eeetsere, ni jeŋ shishijeenii hu aaasere yɛ là mli lɛ!

¹³ Shi yɛ eshiwoo lɛ naa lɛ, wɔmiikwɛ ŋwɛi hee kɛ shikpɔŋ hee ni jalɛ hiɔ mli lɛ gbɛ.

¹⁴ No hewɔ lɛ, suɔmɔmɛi, akɛni nyɛkwɛɔ nii nɛɛ agbɛ nɛɛ, nyɛbɔa mɔdɛŋ koni ana nyɛ ni muji loo kpa ko bɛ nyɛhe yɛ ehiɛ yɛ hejɔlɛ mli;

¹⁵ ni nyɛbua wɔNuŋtsɔ lɛ tsuishitoo lɛ akɛ yiwalaheremɔ, tamɔ bɔ nɔŋŋ ni wɔsuɔmɔ nyɛmi Paulo lɛ hu ŋma nyɛ, yɛ nilee ni akɛhã lɛ lɛ naa lɛ,

¹⁶ tamɔ bɔ ni ewieɔ enɛɛmɛi ahe yɛ ewoji lɛ fɛɛ mli lɛ. Woji nɛɛ amli nibii komɛi yɛ ni amɛshishinumɔ wa, ni mɛi ni ekaseko nɔ ko lɛ kɛ mɛi ni nane mɔko shi lɛ tsɔ̃ɔ shishi ekroko, tamɔ bɔ ni amɛfeɔ ŋmalɛi ni eshwɛ lɛ hu kɛkpãtãa amɛ diɛŋtsɛ amɛhiɛ lɛ.

¹⁷ Agbɛnɛ suɔmɔmɛi, akɛni nyɛ lɛ nyɛle momosa hewɔ lɛ, nyɛsaraa, koni akɛ gbɔmɛi fɔ̃ji alakamɔ sane lɛ akashãtã nyɛ hu, ni nyɛjɛ nyɛ diɛŋtsɛ nyɛshifimɔ lɛ mli nyɛgbee shi

¹⁸ Shi nyɛshwerea yɛ wɔNuŋtsɔ kɛ yiwalaherelɔ Yesu Kristo dromɔ kɛ nilee lɛ mli. Lɛ nɔŋŋ aŋɔ anunyam ahã agbɛnɛ kɛ daa. Amen!