2 Petro 2 - ŊMALƐ KRƆŊKRƆŊ LƐ

Amaletsɔ̃ɔlɔi shwereɔ be kukuoo kɛkɛ

¹ Shi amalegbalɔi hu te shi yɛ Israelbii lɛ ateŋ, tamɔ bɔ ni amaletsɔ̃ɔlɔi baaba nyɛ hu nyɛteŋ lɛ. Amɛkɛ hiɛkpãtãmɔ tsɔ̃ɔmɔi aaaba nigii, ni Nuŋtsɔ lɛ ni kpɔ̃ amɛ lɛ po, amɛaakwa lɛ, ni amɛkɛ hiɛkpãtãmɔ ni he yɔɔ oya aaaba amɛ diɛŋtsɛ amɛnɔ.

² Ni mɛi pii aaanyiɛ amɛnyɛnyɛntswibɔɔ lɛ sɛɛ, ni amɛhewɔ lɛ aaawie anɔkwale gbɛ lɛ he musubɔɔ wiemɔi.

³ Ni amɛkɛ hiɛjoomɔ kɛ shishiumɔ wiemɔi aaatao ni amɛna nyɛhe sɛɛ. Shi kojomɔ ni kã shi hã amɛ kɛjɛ blema beebe lɛ aaaba amɛnɔ, ni amɛhiɛkpãtãmɔ lɛ wɔɔɔ!

⁴ Ejaakɛ kɛji Nyɔŋmɔ kɛ bɔfoi ni fee esha lɛ ahe ekeee amɛ, shi moŋ etsi amɛ ewo gbohiiaje bu kɛ emli duŋ lɛ mli, ni eŋɔ amɛ ehã akɛ akɛ amɛ ato ahã kojomɔ,

⁵ ni asaŋ kɛ ekɛ blema je lɛ he ekeee lɛ, shi moŋ Noa ni ji jalɛ shiɛlɔ lɛ, mɔ ni gbe yi fee kpaanyɔ lɛ kɛkɛ yi ebaa, ni ekɛ nu afua lɛ ba mɛi ni sheee Nyɔŋmɔ gbeyei lɛ aje lɛ nɔ,

⁶ ni kɛji Sodom kɛ Gomora maji lɛ hu eshã ni ehã amɛtsɔ̃ lamlu, ni ekɛ butumɔ kojo amɛ ekɛto mɛi ni sheee Nyɔŋmɔ gbeyei lɛ okadi,

⁷ ni kɛji ejie Lot, jalɔ, mɔ ni hao yɛ nɔtɔ̃lɔi lɛ anyɛnyɛntswibɔɔ jeŋba lɛ he lɛ, yɛ mli

⁸ (ejaakɛ amɛmlatɔ̃mɔ nitsumɔi lɛ ni jalɔ lɛ na ni enu be ni eyɔɔ amɛteŋ lɛ piŋ esusuma ni ja lɛ daa gbi) lɛ,

⁹ belɛ Nuŋtsɔ lɛ le bɔ ni efeɔ ejieɔ Nyɔŋmɔ gbeyeishelɔi yɛ kaa mli, kɛ bɔ ni efeɔ etoɔ mɛi fɔ̃ji yɛ piŋmɔ mli kɛyashi kojomɔ gbi lɛ nɔ;

¹⁰ shi titri lɛ mɛi ni nyiɛɔ heloo akɔnɔ ni yɔɔ muji sɛɛ, ni amɛbuuu nɔyeli hewalɛ lɛ, tsuisalɔi kɛ yibulɔi ni kɛji amɛmiiye gbɔmɛi agboi ahe osheku ni amɛhe kpokpooo;

¹¹ tsɛ ŋwɛi bɔfoi tete ni yɔɔ hewalɛ kɛ nyɛmɔ babaoo fe amɛ lɛ, amɛ po amɛwieee amɛhe efɔŋ kɛkojooo amɛ yɛ Nuŋtsɔ lɛ hiɛ.

Amaletsɔ̃ɔlɔi ajeŋba tuuŋtu

¹² Shi nɛkɛ gbɔmɛi nɛɛ tamɔ kooloi ni bɛ jwɛŋmɔ ni afɔ amɛ ahã mɔmɔ kɛ gbee lɛ, amɛwieɔ nii ni amɛleee he nɔ ko lɛ he efɔŋ, ni amɛkɛ amɛ diɛŋtsɛ amɛhiɛkpãtãmɔ lɛ aaakpãtã amɛhiɛ,

¹³ ni aaafee amɛ efɔŋ akɛ efɔŋ ni amɛfee mɛi krokomɛi lɛ he nyɔmɔwoo. Amɛbuɔ shwane fintiŋŋ ahoshwibɔɔ akɛ nii ni ŋɔɔ; mujiatsɛmɛi ni he yɔɔ taŋ ni; amɛmii shɛɔ yɛ amɛshishiumɔi lɛ ahe be ni amɛkɛ nyɛ yeɔ nii lɛ.

¹⁴ Amɛyɛ hiŋmɛii ni eyimɔ obɔ̃bɔ̃ kɛ gbãlãfitemɔ ni kpaaa eshafeemɔ. Amɛlakaa susumai ni nane mɔko shi lɛ. Amɛyɛ tsui ni he esa kɛ hiɛjoomɔ; loomɔbii ni.

¹⁵ Amɛje gbɛ ni ja lɛ nɔ, ni amɛdu gbɛ kɛyanyiɛ Beor bi Bileam, mɔ ni sumɔ nɔshafeemɔ mli nyɔmɔwoo lɛ, gbɛ lɛ nɔ;

¹⁶ shi akã ehiɛ yɛ lɛ diɛŋtsɛ emlatɔ̃mɔ lɛ hewɔ, teji ni leee wiemɔ lɛ kɛ gbɔmɔ gbee wie, ni etsĩ gbalɔ lɛ kwashiafeemɔ lɛ naa.

¹⁷ Mɛnɛɛmɛi ji nubui ni nu bɛ mli, atatui ni ahum loɔ kɛyaa, mɛi ni akɛ duŋ kpii lɛ eto ehã amɛ.

¹⁸ Ejaakɛ akɛni naafuu wiemɔi wuji jeɔ amɛnaa hewɔ lɛ, amɛtsɔ̃ɔ heloo akɔnɔi anɔ amɛkɛ nyɛnyɛŋtswibɔɔ lakaa mɛi ni je mɛi ni baa amɛjeŋ yɛ shishiumɔ mli lɛ adɛŋ etsɛko lɛ;

¹⁹ amɛwoɔ amɛ shi akɛ amɛaaye amɛhe, tsɛ amɛ diɛŋtsɛ lɛ fitemɔ nyɔ̃ji ji amɛ; ejaakɛ mɔ ni aye enɔ lɛ etsɔ̃ nyɔŋ ehã mɔ ni ye enɔ lɛ.

²⁰ Ejaakɛ kɛ amɛtsɔ̃ Nuŋtsɔ kɛ yiwalaherelɔ Yesu Kristo he nilee lɛ nɔ amɛjo je nɛɛ mli mujinii lɛ anaa foi ni asaa adu amɛ yɛ nomɛi amli ni aye amɛnɔ lɛ, amɛnaagbee shihilɛ etsɔ̃ efɔŋ fe amɛtsutsu shihilɛ lɛ.

²¹ Ejaakɛ faŋ nɔ ni amɛnaaa amɛle jalɛ gbɛ lɛ, fe nɔ ni amɛle ni kɛ̃lɛ amɛkpale kɛjɛ kitã krɔŋkrɔŋ ni atu awo amɛdɛŋ lɛ he.

²² Shi anɔkwa abɛ lɛ eba mli yɛ amɛhe akɛ, “Gbee kuɔ esɛɛ kɛyaa lɛ diɛŋtsɛ eshwee he, ni kplotoo ni aju ehe lɛ yakokloɔ ŋmɔtɔ mli.”