2 Petro 1 - ŊMALƐ KRƆŊKRƆŊ LƐ

Ŋamɔ

¹ Simon Petro ni ji Yesu Kristo tsulɔ kɛ bɔfo lɛ ŋma yahã mɛi ni nine eshɛ hemɔkɛyeli ni jara wa tamɔ wɔnɔ lɛ nɔŋŋ nɔ kɛtsɔ̃ wɔNyɔŋmɔ kɛ wɔyiwalaherelɔ Yesu Kristo jalɛ lɛ nɔ lɛ.

² Dromɔ kɛ hejɔlɛ afa ahã nyɛ yɛ Nyɔŋmɔ kɛ wɔNuŋtsɔ Yesu he nilee lɛ mli.

Nyɔŋmɔ tsɛɔ ni ehalaa

³ ENyɔŋmɔ hewalɛ lɛ kɛ nii fiaa ni hi hã wala kɛ Nyɔŋmɔ gbeyeishemɔ lɛ eke wɔ yɛ mɔ ni tsɔ̃ lɛ diɛŋtsɛ enunyam kɛ ehewalɛ nɔ etsɛ wɔ lɛ he nilee mli.

⁴ Ni etsɔ̃ nii nɛɛ anɔ hu ekɛ shiwoi kpeleikpelei ni jara wa lɛ eke wɔ, koni nyɛtsɔ̃ nɔ nyɛjo je nɛɛŋ fitemɔ ni yɔɔ akɔnɔ mli lɛ naa foi ni nyɛna Nyɔŋmɔ su lɛ eko.

⁵ Enɛ hewɔ lɛ, nyɛbɔa mɔdɛŋ fɛɛ ni nyɛkɛ nuufeemɔ afataa nyɛhemɔkɛyeli lɛ he; nyɛkɛ nilee afataa nuufeemɔ lɛ he;

⁶ nyɛkɛ henɔyeli afataa nilee lɛ he; nyɛkɛ hiɛmiamɔ afataa henɔyeli lɛ he; nyɛkɛ Nyɔŋmɔ gbeyeishemɔ afataa hiɛmiamɔ lɛ he;

⁷ nyɛkɛ nyɛmimɛi ahedɔɔ afataa Nyɔŋmɔ gbeyeishemɔ lɛ he; ni nyɛkɛ suɔmɔ afataa nyɛmimɛi ahedɔɔ lɛ he.

⁸ Ejaakɛ kɛji nɛkɛ nii nɛɛ yɛ nyɛmli ni efa lɛ, ehãŋ nyɛfee mɛi ni ebɔɔɔ mɔdɛŋ aloo mɛi ni wooo yibii yɛ wɔNuŋtsɔ Yesu Kristo he nilee lɛ gbɛfaŋ.

⁹ Ejaakɛ mɔ ni bɛ nɛkɛ nii nɛɛ lɛ, lɛ lɛ shwilafo ji lɛ, ni enaaa shɔŋŋ nii, ni ehiɛ ekpa ehe ni atsuu kɛjɛ eshai ni efee sa lɛ amli lɛ anɔ.

¹⁰ Belɛ no hewɔ lɛ, anyɛmimɛi, nyɛbɔa mɔdɛŋ ni nyɛtsɛmɔ kɛ nyɛhalamɔ lɛ ama shi shiŋŋ; ejaakɛ, kɛ nyɛfee enɛ lɛ, nyɛtɛrɛŋ gbi ko gbi ko.

¹¹ Ejaakɛ nakai ni aaaŋmɛ nyɛ wɔNuŋtsɔ kɛ yiwalaherelɔ Yesu Kristo naanɔ maŋtsɛyeli lɛ mlibotemɔ gbɛ aahu tsɔ̃.

¹² No hewɔ lɛ, daa nɛɛ majwɛŋ nɔ makai nyɛ nɛkɛ nibii nɛɛ, tsɛ nyɛle momo, ni nyɛnane emɔ shi yɛ anɔkwale ni nyɛnine eshɛ nɔ lɛ mli.

¹³ Shi gbii abɔ ni mihiɛ kã nɛɛ, mibuɔ akɛ eja akɛ mikɛ kaimɔ ahɛle nyɛ shi.

¹⁴ Ejaakɛ mile akɛ migbele lɛ baaba nɔŋŋ tamɔ bɔ ni wɔNuŋtsɔ Yesu Kristo hu ejie kpo etsɔ̃ɔ mi lɛ.

¹⁵ Shi mabɔ he mɔdɛŋ koni mijeŋjee sɛɛ lɛ, nyɛhiɛ ahi nii nɛɛ anɔ be fɛɛ be.

Kristo anunyam lɛ he odasefoi

¹⁶ Ejaakɛ jeee adesai ni afolɔ anɔ wɔdamɔ wɔjaje wɔNuŋtsɔ Yesu Kristo hewalɛ kɛ ebaa lɛ he sane wɔtsɔ̃ɔ nyɛ, shi moŋ wɔji odasefoi ni na enunyam kpeteŋkple lɛ kɛ wɔhiŋmɛii.

¹⁷ Ejaakɛ ena woo kɛ anunyam kɛjɛ Tsɛ Nyɔŋmɔ lɛ ŋɔɔ, be ni nakai gbee lɛ kɛ lɛ wie kɛjɛ anunyam kpeteŋkple lɛ mli akɛ, “Mɔ nɛ ji misuɔmɔ Bi ni mina ehe tsui lɛ.”

¹⁸ Ni nɛkɛ gbee nɛɛ wɔ diɛŋtsɛ wɔnu akɛ ŋwɛi ejɛ, be ni wɔ kɛ lɛ yɔɔ gɔŋ krɔŋkrɔŋ lɛ nɔ lɛ.

¹⁹ Ni ama gbalɛ wiemɔ lɛ nɔ mi ahã wɔ fe tsutsu lɛ, ni kɛji nyɛkɛ nyɛjwɛŋmɔ fɔ̃ no nɔ akɛ là ni tsoɔ yɛ he ko ni woɔ duŋ kɛyashi beyinɔ ni je aaatsɛre ni tooloo lɛ aaate shi yɛ nyɛtsuii amli lɛ, no lɛ nyɛmiifee jogbaŋŋ.

²⁰ Ni nyɛlea enɛ tsutsu akɛ ŋmalɛ lɛ mli gbalɛ fɛɛ gbalɛ lɛ jeee mɔ ko niiashishitsɔ̃ɔmɔ ni.

²¹ Ejaakɛ gbalɛ ko bako yɛ gbɔmɔ suɔmɔ̃naa pɛŋ, shi moŋ Mumɔ Krɔŋkrɔŋ lɛ tsirɛ gbɔmɛi ni amɛwie wiemɔi ni Nyɔŋmɔ kɛhã amɛ lɛ.