2 Mose 8 - ŊMALƐ KRƆŊKRƆŊ LƐ

Kɔkɔdenei ba

¹ Kɛkɛ ni Yehowa kɛɛ Mose akɛ, “Yaa Farao ŋɔɔ koni oyakɛɛ lɛ akɛ, ‘Bɔ ni Yehowa kɛɛ nɛ; hã mimaŋ lɛ aya ni amɛyasɔ̃mɔ mi.

² Shi kɛji okpɛ̃lɛɛɛ ni amɛya lɛ, mikɛ kɔkɔdenei baahao oshikpɔŋ tso muu lɛ fɛɛ.

³ Nilo Faa lɛ baawo kɔkɔdenei nyɛŋɛnyɛŋɛ, ni kɔkɔdenei nɛɛ aaaba owe lɛ kɛ osa nɔ kɛshɛ osɛɛtsuŋ; amɛaaba otsuji ashĩai kɛ omaŋbii lɛ ateŋ kɛ nyɛflɔnɔi kɛ nyɛmã tsesei fɛɛ amli.

⁴ Kɔkɔdenei lɛ aaatumɔ kɛnyiɛ bo diɛŋtsɛ kɛ omaŋbii kɛ otsuji lɛ fɛɛ anɔ tete.’ ”

⁵ Ni Yehowa kɛɛ Mose akɛ, “Kɛɛmɔ Aaron akɛ, ‘Kɔ otso lɛ ni okpã onine mli yɛ fai kɛ nujɔi ni agbala kɛ nu ni buabua shi lɛ anɔ, ni ohã kɔkɔdenei atumɔ kɛba Ijipt shikpɔŋ lɛ nɔ.’ ”

⁶ No hewɔ lɛ, Aaron kpã enine mli yɛ Ijipt nu ni buabua shi lɛ anɔ. Kɛkɛ ni kɔkɔdenei lɛ ba, ni amɛbaha Ijipt shikpɔŋ lɛ nɔ fɛɛ.

⁷ Shi ŋkunyaayelɔi lɛ kɛ amɛkunyaayeli ŋai lɛ fee nakai nɔŋŋ, ni amɛ hu amɛhã kɔkɔdenei ba Ijipt shikpɔŋ lɛ nɔ.

⁸ Kɛkɛ ni Farao fã, ni ayatsɛ Mose kɛ Aaron kɛba, ni ekɛɛ amɛ akɛ, “Nyɛkpaa Yehowa fai koni ejie kɔkɔdenei lɛ yɛ mi kɛ mimaŋbii lɛ anɔ, ni mahã Israelbii lɛ aya koni amɛyashã afɔle amɛhã Yehowa.”

⁹ Mose here Farao nɔ akɛ, “Bo diɛŋtsɛ tsɔ̃ɔmɔ beyinɔ ni mikpa fai mihã bo kɛ otsuji kɛ omaŋbii lɛ koni ajie kɔkɔdenei lɛ yɛ bo kɛ owe lɛ kɛ omaŋbii ashĩai, ni ashwɛ faa lɛ mli nɔ lɛ kɛkɛ.”

¹⁰ Farao jie naa akɛ, “Wɔ”. Mose kɛɛ lɛ akɛ, “Aaafee bɔ ni obi lɛ koni okɛna ole akɛ mɔ ko mɔ ko bɛ ni tamɔ Yehowa wɔNyɔŋmɔ lɛ.

¹¹ Kɔkɔdenei lɛ baaje bo kɛ owe lɛ kɛ otsuji lɛ kɛ omaŋbii lɛ anɔ aya. Nilo Faa lɛ mli nɔ lɛ kɛkɛ aaashwɛ.”

¹² Ni Mose kɛ Aaron gbala amɛhe shi, ni Mose tee eyasɔle etsɛ Yehowa yɛ shi ni ewo Farao yɛ kɔkɔdenei lɛ ahe lɛ hewɔ.

¹³ Yehowa fee bɔ ni Mose bi lɛ lɛ, ni kɔkɔdenei lɛ gboi yɛ shĩai kɛ kpoi anɔ kɛ jwɛiaŋ.

¹⁴ Ni Ijiptbii lɛ buabua kɔkɔdenei gbohii lɛ anaa kuikui, ni shikpɔŋ lɛ nɔ sha.

¹⁵ Shi be ni Farao na akɛ ena mumɔhe fioo lɛ, ekpliŋ etsui, ni ebooo Mose kɛ Aaron toi tamɔ bɔ ni Yehowa ewie eto lɛ.

Tɔ̃ŋtɔ̃ŋ ba

¹⁶ Ni Yehowa kɛɛ Mose akɛ, “Kɛɛmɔ Aaron koni ekpã enine mli ni ekɛ etso lɛ atswa shikpɔŋ lɛ nɔ mlu lɛ koni mlu lɛ atsɔ̃ tɔ̃ŋtɔ̃ŋ yɛ Ijipt shikpɔŋ lɛ nɔ fɛɛ.”

¹⁷ Mose kɛ Aaron fee nakai. Aaron kpã enine mli, ni ekɛ etso lɛ tswa shikpɔŋ mlu lɛ, ni mlu lɛ tsɔ̃ tɔ̃ŋtɔ̃ŋ, ni eku eshwie gbɔmɔ kɛ kooloo fɛɛ nɔ. Shikpɔŋ mlu fɛɛ tsɔ tɔ̃ŋtɔ̃ŋ yɛ Ijipt.

¹⁸ Kɛkɛ ni Ijipt ŋkunyaayelɔi lɛ ka, yɛ amɛkunyaayeli ŋai lɛ anaa koni amɛhã tɔ̃ŋtɔ̃ŋ lɛ eko aba, shi amɛnyɛɛɛ. Tɔ̃ŋtɔ̃ŋ lɛ ha gbɔmɛi kɛ kooloi fɛɛ.

¹⁹ Kɛkɛ ni ŋkunyaayelɔi lɛ kɛɛ Farao akɛ, “Enɛ lɛ Nyɔŋmɔ tsu.” Shi Farao kpliŋ etsui, ni ebooo Mose kɛ Aaron toi tamɔ bɔ ni Yehowa ewie eto lɛ.

Ofɔii ba

²⁰ Agbɛnɛ Yehowa kɛɛ Mose akɛ, “Tee shi leebi maŋkpa ni oyafo Farao be mli ni eyaa faa lɛ naa, koni okɛɛ lɛ akɛ, Yehowa kɛɛ, ‘Hã mimaŋ lɛ aya ni amɛyaja mi.

²¹ Naa, kɛji oŋmɛɛɛ mimaŋ lɛ gbɛ ni amɛya lɛ, mahã ofɔii abaha bo kɛ otsuji kɛ omaŋbii lɛ. Ijiptbii ashĩai amli kɛ shikpɔŋ lɛ nɔ hei ni amɛyɔɔ lɛ hu aaayi tɔ kɛ ofɔii lɛ.

²² Nakai gbi lɛ matɛ̃ Goshen shikpɔŋ lɛ ni mimaŋ lɛ yɔɔ nɔ lɛ mashi, koni ofɔii lɛ akaya jɛi, bɔ ni afee ni ole akɛ mi ji Yehowa yɛ shikpɔŋ lɛ fɛɛ nɔ.

²³ Ni mikɛ tɛ̃ ni matɛ̃ amɛ mashi nɛɛ aaato bo okadi koni okɛna srɔto ni yɔɔ mi mimaŋ lɛ kɛ bo omaŋ lɛ teŋ. Wɔ ni ji wɔ lɛ mato nɛkɛ okadi nɛɛ.’ ”

²⁴ Ni Yehowa fee nakai, ni ofɔii babaoo ba Farao we lɛ kɛ etsuji ashĩai lɛ kɛ Ijipt shikpɔŋ lɛ nɔ fɛɛ. Ni ofɔii lɛ hã shikpɔŋ lɛ hiɛ kpãtã.

²⁵ Kɛkɛ ni Farao fã ni ayatsɛ Mose kɛ Aaron kɛba, ni ekɛɛ amɛ akɛ, “Nyɛyaa nyɛyashãa afɔle lɛ nyɛhãa nyɛNyɔŋmɔ lɛ, shi moŋ nyɛshãa yɛ Ijipt shikpɔŋ nɛɛ nɔ.”

²⁶ Shi Mose kɛɛ Farao akɛ, “Ebahiŋ nakai feemɔ, ejaakɛ Ijiptbii anihiinii wɔkɛbaashã afɔle wɔhã Yehowa, wɔNyɔŋmɔ lɛ. Kɛji wɔkɛ Ijiptbii anihiinii shã afɔle yɛ amɛhiɛ lɛ, ani amɛtswiaŋ wɔ tɛ?

²⁷ Esa ni wɔnyiɛ gbii etɛ̃ gbɛ kɛya ŋa nɔ koni wɔyashã afɔle lɛ wɔhã Yehowa, wɔNyɔŋmɔ lɛ, bɔ ni efã wɔ.”

²⁸ Farao to he ekɛɛ, “Mibaŋmɛ nyɛ gbɛ ni nyɛya koni nyɛyashã afɔle nyɛhã Yehowa, nyɛNyɔŋmɔ lɛ, yɛ ŋa lɛ nɔ, shi shɔŋŋ kɛkɛ ni nyɛkayaa. Nyɛsɔlea nyɛhãa mi.”

²⁹ Mose jie naa akɛ, “Naa, mibashi maya koni mayasɔle mabi Yehowa koni ofɔii lɛ aje Farao kɛ etsuji lɛ kɛ emaŋbii anɔ wɔ. Shi shishiumɔ sane kɛkɛ ni Farao akaye dɔŋŋ, akɛ ehaŋ maŋ lɛ aya ayashã afɔle ahã Yehowa.”

³⁰ Ni Mose gbala ehe shi etee eyasɔle ekpa Yehowa fai.

³¹ Ni Yehowa fee nɔ ni Mose bi lɛ lɛ, ni ejie ofɔii lɛ yɛ Farao kɛ etsuji lɛ kɛ emaŋbii lɛ anɔ. Eshwɛɛɛ ekome folo.

³² Shi Farao kpliŋ etsui ekoŋŋ, ni ehãaa Israelbii lɛ aya.