2 Mose 38 - ŊMALƐ KRƆŊKRƆŊ LƐ

Shãa Afɔle latɛ lɛ kpɛɛ

¹ Bezaleel kɛ tso kpɛ afɔleshãa latɛ lɛ. Latɛ lɛ kɛlɛ ninetalɔi enumɔ kɛ elɛɛmɔ hu ninetalɔi enumɔ; ekɛlɛ kɛ elɛɛmɔ ye egbɔ, shi ekwɔlɛ ninetalɔi etɛ̃.

² Efee akloŋtoi emamɔ latɛ lɛ koji ejwɛ lɛ anɔ. Akloŋtoi lɛ kɛ latɛ lɛ fɛɛ fee nɔ muu kome, ni ekɛ akɔɔble ha latɛ muu lɛ fɛɛ he.

³ Efee afɔleshãa latɛ lɛ he nibii lɛ fɛɛ: kukwɛii lɛ kɛ sofii lɛ kɛ okpolui lɛ kɛ fakai lɛ kɛ lajee nii lɛ. Ehe nibii nɛɛ fɛɛ lɛ akɔɔble ekɛfee.

⁴ Efee akɔɔble ntaŋ ni kãa afɔleshãa latɛ lɛ teŋ tuuŋtu lɛ.

⁵ Efee gai ejwɛ ewo akɔɔble ntaŋ nɛɛ koji ejwɛ lɛ koni akɛ tsei bloblobii lɛ ahɔlɔ mli.

⁶ Ni ekɛ tso lɛ eko gbɔ tsei bloblobii nɛɛ, ni ekɛ akɔɔble ha he,

⁷ ni ekɛ tsei bloblobii nɛɛ hɔlɔ gai lɛ amli yɛ afɔleshãa latɛ lɛ biɛ kɛ biɛ koni akɛwo. Ŋmoŋmolo ekɛfee afɔleshãa latɛ lɛ, ni gbɛ kã mli.

Akɔɔble okpolu lɛ feemɔ

⁸ Bezaleel kɛ akɔɔble fee okpolu kɛ ehe akɔɔble nane ni ta shi koni akɛfɔflɔ he lɛ. Akɔɔble ni akɛfee lɛ yei ni sɔ̃mɔɔ yɛ Kpee Buu lɛ shinaa lɛ naa lɛ ashwishwɛi akɛfee.

Kpee Buu Krɔŋkrɔŋ lɛ he kpo lɛ

⁹ Bezaleel fee kpo ewo Kpee Buu Krɔŋkrɔŋ lɛ he. Ewuoyigbɛ lɛ ekɛ klala kpakpa ni ekɛlɛ ji ninetalɔi oha fee muhɔɔ eha jɛi.

¹⁰ Emamɔ muhɔɔ nɛɛ he akulashiŋi nyɔŋmai enyɔ kɛ amɛshishi akɔɔble nibii nyɔŋmai enyɔ ni amɛmamɔ nɔ. Akulashiŋi lɛ ahe gai lɛ kɛ amɛmlibɛlɛmɔ nii lɛ jwiɛtɛi ekɛfee.

¹¹ Kpo lɛ he ni ye kooyigbɛ lɛ hu jɛi muhɔɔ lɛ kɛlɛ ji ninetalɔi oha. Emamɔ akulashiŋi nyɔŋmai enyɔ kɛ amɛshishi nibii ni amɛmamɔ nɔ. Akulashiŋi lɛ ahe gai lɛ kɛ amɛmlibɛlɛmɔ nii lɛ jwiɛtɛi ekɛfee.

¹² Kpo lɛ he ni ye anaigbɛ lɛ jɛi muhɔɔ lɛ kɛlɛ ji ninetalɔi nyɔŋmai enumɔ kɛ ehe akulashiŋi nyɔŋma kɛ amɛshishi nibii nyɔŋma ni amɛmamɔ nɔ. Akulashiŋi lɛ ahe gai lɛ kɛ amɛmliblɛmɔ nii lɛ jwiɛtɛi ekɛfee.

¹³ Kpo lɛ he ni ye bokãgbɛ, ni ji ehiɛ lɛ, jɛi muhɔɔ lɛ kɛlɛ ji ninetalɔi nyɔŋmai enumɔ.

¹⁴ Muhɔɔ ni ekɛlɛ ji ninetalɔi nyɔŋma kɛ enumɔ ha kpo lɛ hiɛgbɛ afã kome, kɛjɛ agbo lɛ he kɛyashi kpo lɛ koŋ. Muhɔɔ nɛɛ he akulashiŋi etɛ̃ kɛ amɛshishi nibii etɛ̃ ni amɛmamɔ nɔ.

¹⁵ Ni kpo lɛ hiɛgbɛ afã kome lɛ hu, jɛi muhɔɔ lɛ kɛlɛ ji ninetalɔi nyɔŋma kɛ enumɔ nakai nɔŋŋ, kɛ ehe akulashiŋi etɛ̃ kɛ amɛshishi nibii etɛ̃.

¹⁶ Muhɔɔ ni bɔle kpo lɛ kpula lɛ klala kpakpa akɛfee.

¹⁷ Kpo lɛ akulashiŋi lɛ ashishi nibii ni amɛmamɔ nɔ lɛ akɔɔble akɛfee, ni akɛ jwiɛtɛi fee akulashiŋi lɛ ahe gai lɛ kɛ amɛmlibɛlɛmɔ nii lɛ, ni amɛyiteŋhaa nii lɛ akɛ jwiɛtɛi fee, ni akɛ jwiɛtɛi nɔŋŋ fee nii ni akɛbele amɛteŋ lɛ.

¹⁸ Kpo lɛ nɔ agbo lɛ naahaa mama lɛ akɛ kpãa bluu kɛ kpãa afaseo kɛ kpãa tsuru fɔɔ kɛ kpãa yɛŋ futaa ni anyɛne lo nii wo mli kɛ abui. Ekɛlɛ ji ninetalɔi nyɔŋmai enyɔ, ni ekwɔlɛ hu ji ninetalɔi enyɔ tamɔ kpo lɛ nɔ muhɔi lɛ fɛɛ.

¹⁹ Agbo lɛ hiɛ akulashiŋi ejwɛ kɛ amɛshishi akɔɔble nibii ejwɛ ni amɛmamɔ nɔ, ni akɛ jwiɛtɛi feefee amɛhe gai lɛ kɛ amɛyitsei ahehaa nii lɛ kɛ amɛmlibɛlɛmɔ nii lɛ.

²⁰ Kpee Buu Krɔŋkrɔŋ lɛ he shiŋmlitsei lɛ kɛ kpo lɛ hu he shiŋmlitsei ni bɔle lɛ kpula lɛ, akɔɔble akɛfee fɛɛ.

Dadei ni akɛma Yehowa Kpee Buu Krɔŋkrɔŋ lɛ

²¹ Naa bɔ ni dadei srɔtoi lɛ fɛɛ ni akɛma Yehowa Kpee Buu Krɔŋkrɔŋ lɛ ni akɛ Kpãŋmɔ Adeka lɛ maa mli lɛ naa yakpa, be ni Mose fã Itamar, ni ji Aaron, osɔfo lɛ binuu lɛ, koni ekwɛ Levibii lɛ anɔ koni amɛbu fɛɛ naa lɛ.

²² Bezaleel, ni ji Hur ni jɛ Yuda akutso lɛ mli lɛ bi Uri bi lɛ, ji mɔ ni fee nibii ni Yehowa fã Mose akɛ atsu lɛ fɛɛ.

²³ Mɔ ni fata ehe ji Ahisamak ni jɛ Dan akutso lɛ mli lɛ bi Oholiab, mɔ ni he esa kɛ ŋaayeli kɛ samajiemɔ lɛ, ni asaŋ ele bɔ ni akɛ kpãa bluu kɛ kpãa afaseo kɛ kpãa tsuru fɔɔ kɛ kpãa yɛŋ futafuta loɔ nii awoɔ mama mli lɛ.

²⁴ Shika ŋmiiŋmi fɛɛ ni akɛtsu nii yɛ Kpee Buu Krɔŋkrɔŋ lɛ maa mli fɛɛ, ni ji shika ni akɛbake Yehowa lɛ, naa yashiɔ talentai nyɔŋmai enyɔ kɛ nɛɛhu kɛ shekel ohai kpawo kɛ nyɔŋmai etɛ̃ yɛ Kpee Buu lɛ nsɛnitɛ naa.

²⁵ Jwiɛtɛi fɛɛ ni maŋbii lɛ ateŋ mɛi ni akane lɛ hã lɛ naa yashiɔ talentai oha kɛ shekel akpe kome ohai kpawo kɛ nyɔŋmai kpawo kɛ enumɔ ni aŋmɛ yɛ Kpee Buu Krɔŋkrɔŋ lɛ nsɛnitɛ naa.

²⁶ Be ni akane mɛi lɛ, ana mɛi akpei ohai ekpaa kɛ etɛ̃ kɛ ohai enumɔ kɛ nyɔŋmai enumɔ ni eye kɛjɛ afii nyɔŋmai enyɔ kɛyaa.

²⁷ Ajie jwiɛtɛi lɛ mli talentai oha ni akɛfee nibii ni Kpee Buu Krɔŋkrɔŋ lɛ akulashiŋi lɛ mamɔ nɔ lɛ, kɛ nibii ni muhɔɔ lɛ hu akulashiŋi lɛ mamɔ nɔ lɛ. Akɛfee nibii nɛɛ oha, ni tsɔ̃ɔ akɛ talenta kome feɔ akulashiŋ kome.

²⁸ Ni akɛ jwiɛtɛi shekel akpe kome ohai kpawo kɛ nyɔŋmai kpawo kɛ enumɔ ni shwɛ lɛ fee akulashiŋi lɛ ahe gai lɛ kɛ amɛyitsei ahehaa nii lɛ kɛ amɛmlibɛlɛmɔ nii lɛ.

²⁹ Akɔɔble fɛɛ ni abake lɛ naa yashiɔ talentai nyɔŋmai kpawo kɛ shekel akpei enyɔ kɛ ohai ejwɛ.

³⁰ Ni no akɛfee nibii ni Kpee Buu lɛ shinaa lɛ akulashiŋi lɛ mamɔ nɔ lɛ, kɛ akɔɔble ntaŋ ni kãa latɛ lɛ teŋ tuuŋtu lɛ, kɛ afɔleshãa latɛ lɛ he nibii lɛ fɛɛ.

³¹ No nɔŋŋ eko akɛfee nibii ni kpo lɛ akulashiŋi lɛ mamɔ nɔ kɛbɔle kpo lɛ kpula lɛ, kɛ nibii ni kpo lɛ nɔ agbo lɛ akulashiŋi lɛ hu mamɔ nɔ lɛ, kɛ shiŋmlitsei fɛɛ ni bɔle Kpee Buu Krɔŋkrɔŋ lɛ, kɛ shiŋmlitsei hu ni bɔle kpo lɛ kɛkpe kpula lɛ.