2 Mose 37 - ŊMALƐ KRƆŊKRƆŊ LƐ

Kpãŋmɔ Adeka lɛ kpɛɛ

¹ Bezaleel kɛ tso kpɛ Kpãŋmɔ Adeka lɛ. Ekɛlɛ ji ninetalɔi enyɔ kɛ fã, elɛɛmɔ ji ninetalɔ kome kɛ fã, ni ekwɔlɛ hu ji ninetalɔ kome kɛ fã.

² Eshwie adeka lɛ mli kɛ ehe fɛɛ shika ŋmiiŋmi, ni ekɛ shika baŋ adeka lɛ naa fɛɛ kpula kɛkpe.

³ Efee shika gai ejwɛ eto adeka lɛ koji ejwɛ lɛ. Gai enyɔ ye afã kome, ni gai enyɔ hu ye afã kome lɛ.

⁴ Ekɛ tso lɛ nɔŋŋ eko gbɔlɔ tsei bloblobii, ni eshwie amɛhe shika;

⁵ ekɛ tsei nɛɛ hɔlɔ gai ni yɔɔ adeka lɛ ŋmawuiaŋ biɛ kɛ biɛ lɛ amli koni akɛwo.

⁶ Ekɛ shika ŋmiiŋmi fee adeka lɛ naanɔ lɛ. Ekɛlɛ ji ninetalɔi enyɔ kɛ fã, ni elɛɛmɔ ji ninetalɔ kome kɛ fã.

⁷ Etswia shika ekɛfee kerubim enyɔ emamɔ naanɔ lɛ koji enyɔ lɛ anɔ.

⁸ Kerub kome yɛ koŋ kome, ni ekome hu yɛ koŋ kome lɛ. Esɔo kerubim nɛɛ ekpɛtɛ naanɔ lɛ koji enyɔ lɛ.

⁹ Kerubim lɛ egbɛ amɛfiji amli kɛtee ŋwɛi, ni amɛkɛha naanɔ lɛ nɔ, ni kerub kome miikwɛ ekome hiɛ, asaŋ amɛmamɔ amɛhiɛ shi kɛmiikwɛ naanɔ lɛ.

Okplɔ̃ ni akɛ Nyɔŋmɔ Aboloo lɛ maa nɔ lɛ kpɛɛ

¹⁰ Bezaleel kɛ tso lɛ eko kpɛ okplɔ̃ lɛ. Ekɛlɛ ji ninetalɔi enyɔ, elɛɛmɔ ji ninetalɔ kome, ni ekwɔlɛ ji ninetalɔ kome kɛ fã.

¹¹ Eshwie he shika ŋmiiŋmi, ni ekɛ shika baŋ naa fɛɛ kpula kɛkpe.

¹² Asaŋ egbɔ tso blawa ni lɛɛmɔ tamɔ dɛ̃ lɛɛmɔ, ni ekɛkpɛtɛ okplɔ̃ lɛ toi kɛbɔle lɛ kɛkpe.

¹³ Efee shika gai ejwɛ ewo okplɔ̃ lɛ naji ejwɛ lɛ ahe.

¹⁴ Gai nɛɛ ye tso blawa lɛ shishi tuuŋtu, ni nomɛi amli akɛ tsei bloblobii ni akɛbaawo okplɔ̃ lɛ hɔlɔ.

¹⁵ Ekɛ tso lɛ eko nɔŋŋ gbɔlɔ tsei nɛɛ ni akɛbaawo okplɔ̃ lɛ, ni eshwie tsei lɛ ahe shika.

¹⁶ Ekɛ shika ŋmiiŋmi fee okplɔ̃ lɛ he nibii ni ji plɛtei kɛ kpuji ni akɛbaashã wain afɔle lɛ.

Kanetso lɛ feemɔ

¹⁷ Bezaleel kɛ shika ŋmiiŋmi ni atswia fee kanetso lɛ. Etswia shika ŋmiiŋmi ekɛfee eshimaa tso lɛ kɛ eshishi nii ni emaa nɔ lɛ fɛɛ, ni ehe tɔi lɛ kɛ ehe kpɔbii kɛ ehe fɔfɔi samai lɛ fɛɛ tsa akɛ nɔ muu kome.

¹⁸ Kanetso lɛ yɛ niji ekpaa: niji etɛ̃ ye afã kome nɛɛ, ni etɛ hu ye afã kroko lɛ.

¹⁹ Afã kome hiɛ tɔi etɛ̃ ni afee amɛ tamɔ ŋmɛi, tɔ fɛɛ tɔ kɛ ekpɔ kɛ efɔfɔi sama yɛ nine kome he. Nakai sɔŋŋ afee niji ekpaa lɛ fɛɛ ni kanetso lɛ egbala lɛ.

²⁰ Kanetso lɛ shimaatso lɛ diɛŋtsɛ lɛ eyɛ tɔi ejwɛ ni afee amɛ tamɔ ŋmɛi kɛ amɛhe kpɔbii kɛ fɔfɔi samai.

²¹ Ni kpɔi mamɔ kanetso lɛ he, ni tsɔ̃ɔ akɛ niji ekpaa lɛ ateŋ eko fɛɛ eko lɛ kpɔ yɛ eshishi.

²² Tɔi lɛ kɛ fɔfɔi samai lɛ kɛ kpɔbii lɛ kɛ niji lɛ kɛ kanetso lɛ shimaatso lɛ fɛɛ tsa akɛ shika ŋmiiŋmi ni atswia afee nɔ muu kome.

²³ Ekɛ shika ŋmiiŋmi nɔŋŋ fee kanetso lɛ he kanei kpawo lɛ kɛ ehe abɛɛlei lɛ kɛ ehe lagbee nii lɛ kɛ kanetso lɛ he aklotɛi bibii lɛ fɛɛ.

²⁴ Ekɛ shika ŋmiiŋmi talenta kome fee kanetso lɛ kɛ ehe nibii nɛɛ fɛɛ.

Tsofakɛŋmashãa latɛ lɛ kpɛɛ

²⁵ Bezaleel kɛ akasia tso kpɛ tsofakɛŋmashãa latɛ lɛ. Ekɛlɛ ninetalɔ kome kɛ elɛɛmɔ hu ninetalɔ kome; ekɛlɛ kɛ elɛɛmɔ ye egbɔ, shi ekwɔlɛ ninetalɔi enyɔ. Ehe akloŋtoi lɛ kɛ latɛ lɛ fɛɛ tsa akɛ nɔ muu kome.

²⁶ Ekɛ shika ŋmiiŋmi shwie latɛ lɛ he, eyiteŋ kɛ ehe fɛɛ kɛkpe kpula.

²⁷ Efee shika gai enyɔnyɔ ewo latɛ lɛ ŋmawuiaŋ biɛ kɛ biɛ, yɛ shika ni akɛbaŋ naa lɛ shishi, koni akɛ tsei ahɔlɔ mli ni akɛwo latɛ lɛ.

²⁸ Ekɛ tso gbɔlɔ tsei nɛɛ, ni ekɛ shika shwie he.

Mufɔɔ mu lɛ kɛ tsofakɛŋma lɛ feemɔ

²⁹ Ekɛ ŋaa ni akɛfeɔ ojeŋma fee mu krɔŋkrɔŋ ni akɛfɔɔ mɔ mu lɛ kɛ tsofakɛŋma ni ashãa lɛ.