2 Mose 36 - ŊMALƐ KRƆŊKRƆŊ LƐ

¹ Mose tee nɔ ekɛɛ Israelbii lɛ akɛ, “Bezaleel kɛ Oholiab kɛ nuu fɛɛ nuu ni Yehowa eduro lɛ ŋaa kɛ jwɛŋmɔ, ni no hewɔ lɛ, amɛbaanyɛ nibii srɔtoi lɛ fɛɛ ni akɛbaama Kpee Buu Krɔŋkrɔŋ lɛ amɛfee lɛ, baatsu nibii nɛɛ bɔ ni Yehowa efã lɛ pɛpɛɛpɛ.”

Maŋbii lɛ bake nibii babaoo

² Kɛkɛ ni Mose tsɛ Bezaleel kɛ Oholiab kɛ nuu fɛɛ nuu ni Yehowa eduro lɛ ŋaa, asaŋ ni eyɔɔ he tsui akɛ etsu nii lɛ eko lɛ kɛba,

³ ni ekɛ nibii lɛ fɛɛ ni Israelbii lɛ kɛbake Yehowa, yɛ tsuijurɔ naa, koni akɛtsu Kpee Buu Krɔŋkrɔŋ lɛ he nii lɛ hã amɛ. Maŋbii lɛ kã he amɛkɛ tsuijurɔ naa nibii lɛ miiba amɛkɛmiike daa leebi.

⁴ Enɛ hã ŋaalɔi lɛ ni tsuɔ Kpee Buu Krɔŋkrɔŋ lɛ he nibii srɔtoi lɛ ateŋ mɔ fɛɛ mɔ shi enitsumɔ ni etsuɔ,

⁵ ni amɛba amɛbakɛɛ Mose akɛ, “Maŋbii lɛ kɛ nibii ni fa fe nitsumɔ ni Yehowa efã ni atsu lɛ miiba.”

⁶ No hewɔ lɛ, Mose fã akɛ ashiɛ yɛ maŋbii lɛ ashitoohe lɛ mli fɛɛ akɛ, “Nuu jio, yoo jio, mɔ ko mɔ ko kɛ nɔ ko akaba dɔŋŋ hã Kpee Buu Krɔŋkrɔŋ lɛ he nitsumɔ lɛ.” Kɛkɛ ni maŋbii lɛ fɔ̃ɔ kɛbaa,

⁷ ejaakɛ nibii ni ana lɛ fa aahu fe bɔ ni he ehia hã nitsumɔ lɛ fɛɛ.

Kpee Buu Krɔŋkrɔŋ lɛ maa

⁸ Mɛi ni tsuɔ Kpee Buu Krɔŋkrɔŋ lɛ he nii lɛ ateŋ mɛi ni ŋaa yɔɔ amɛhiŋmɛiiaŋ lɛ ŋɔ mamai nyɔŋma amɛkɛfee Kpee Buu Krɔŋkrɔŋ lɛ. Amɛkɛ klala yɛŋ futaa kɛ kuŋtu bluu kɛ kuŋtu afaseo kɛ kuŋtu tsuru fɔɔ fee buu mamai nɛɛ, ni amɛkɛ ŋaa ni mli wa ye kerubim samai amɛwo mli.

⁹ Mamai lɛ eko fɛɛ eko kɛlɛ ninetalɔi nyɔŋmai enyɔ kɛ kpaanyɔ, ni elɛɛmɔ hu ninetalɔi ejwɛ. Mamai nɛɛ fɛɛ adaramɔ kome.

¹⁰ Amɛkpɛ mamai lɛ enumɔ amɛtsara, eko tsa eko naa, kɛfee mama muu kome, ni amɛkpɛ mamai enumɔ krokomɛi lɛ hu amɛtsara, eko tsa eko naa kɛfee mama muu kome nakai nɔŋŋ.

¹¹ Amɛkɛ kpãa bluu ŋmɔlɔ aflãi yɛ mama muu kome naa, ni amɛfee nakai nɔŋŋ yɛ mama muu kome lɛ hu naa.

¹² Amɛŋmɔlɔ aflãi nɛɛ nyɔŋmai enumɔ yɛ mama muu kome naa, kɛ aflãi nyɔŋmai enumɔ yɛ mama muu kome lɛ hu naa. Biɛ kɛ biɛ aflãi nɛɛ eko kɛ eko yɛ ŋlɛnɔ pɛpɛɛpɛ.

¹³ Kɛkɛ ni amɛkɛ shika fee kpoji nyɔŋmai enumɔ, ni amɛkɛ kpoji lɛ lala mamai muji enyɔ lɛ amɛtsa, ni buu mama lɛ tsɔ̃ nɔ muu kome.

¹⁴ Ni amɛkɛ abotia he tsɔi fee mamai nyɔŋma kɛ ekome akɛha Kpee Buu Krɔŋkrɔŋ lɛ nɔ.

¹⁵ Mamai lɛ ekome kɛlɛ ji ninetalɔi nyɔŋmai etɛ̃, ni elɛɛmɔ ji ninetalɔi ejwɛ. Mamai nyɔŋma kɛ ekome lɛ fɛɛ adaramɔ kome.

¹⁶ Kɛkɛ ni amɛtsara mamai enumɔ aŋklo kɛ mamai ekpaa hu aŋklo.

¹⁷ Amɛŋmɔlɔ aflãi nyɔŋmai enumɔ yɛ mamai enumɔ ni atsara afee emuu kome lɛ naa, ni amɛŋmɔlɔ aflãi nyɔŋmai enumɔ yɛ mama muu kome lɛ hu naa.

¹⁸ Amɛfee akɔɔble kpoji nyɔŋmai enumɔ koni akɛlala aflãi lɛ atsara koni buu mama lɛ afee nɔ muu kome.

¹⁹ Amɛkɛ too ojwɛni wolo ni awo lɛ tsofa tsuru fee nɔhaanɔ koni akɛha Kpee Buu Krɔŋkrɔŋ lɛ nɔ, ni amɛkɛ nuŋgbee wolo hu fee nɔhaanɔ kroko koni akɛha nɔ ato nɔ.

²⁰ Amɛkɛ tso lɛ eko fee Kpee Buu Krɔŋkrɔŋ lɛ mplaŋi ni mamɔ shi lɛ.

²¹ Mplaŋ kome kɛlɛ ji ninetalɔi nyɔŋma, ni elɛɛmɔ ji ninetalɔ kome kɛ fã.

²² Mplaŋ fɛɛ mplaŋ yɛ nyanyɔji enyɔ koni anyɛ akɛtsa eko kɛ eko. Nɛkɛ amɛfee Kpee Buu Krɔŋkrɔŋ mplaŋi lɛ fɛɛ.

²³ Bɔ ni amɛmamɔ mplaŋi lɛ amɛhã nɛ: Mplaŋi nyɔŋmai enyɔ yɛ he ni ye wuoyigbɛ lɛ,

²⁴ ni amɛkɛ jwiɛtɛi fee nibii nyɔŋmai ejwɛ amɛwo mplaŋi nyɔŋmai enyɔ lɛ ashishi ni amɛmamɔ nɔ, mplaŋ fɛɛ mplaŋ nɔ enyɔ.

²⁵ Kpee Buu Krɔŋkrɔŋ lɛ he ni ye kooyigbɛ lɛ, mplaŋi nyɔŋmai enyɔ ye jɛi,

²⁶ kɛ amɛshishi jwiɛtɛi nibii nyɔŋmai ejwɛ ni amɛmamɔ nɔ, mplaŋ fɛɛ mplaŋ ma enyɔ nɔ.

²⁷ Ni Kpee Buu Krɔŋkrɔŋ lɛ sɛɛgbɛ, he ni ye anaigbɛ, lɛ mplaŋi ekpaa ye jɛi.

²⁸ Amɛkɛ mplaŋi enyɔɔnyɔ jie Kpee Buu Krɔŋkrɔŋ lɛ koji enyɔ lɛ ni yɔɔ sɛɛgbɛ lɛ.

²⁹ Amɛhã koŋ kome mplaŋi enyɔ lɛ bɔ he kɛkɛ yɛ amɛshishigbɛ, shi atsa amɛ yɛ ŋwɛigbɛ klɛŋklɛŋ ga lɛ yi. Nɛkɛ ji bɔ ni afee koji enyɔ lɛ mplaŋi lɛ fɛɛ.

³⁰ No hewɔ lɛ, ana mplaŋi kpaanyɔ yɛ sɛɛgbɛ nɛɛ kɛ amɛshishi jwiɛtɛi nibii ni amɛmamɔ nɔ nyɔŋma kɛ ekpaa, mplaŋ fɛɛ mplaŋ ma shishi nibii enyɔ anɔ.

³¹ Ni amɛkɛ tso lɛ nɔŋŋ eko fee mlibɛlɛmɔnii enumɔ amɛhã mplaŋi ni yɔɔ Kpee Buu Krɔŋkrɔŋ lɛ ŋmawuiaŋ kome,

³² ni mplaŋi ni yɔɔ ŋmawuiaŋ kome lɛ hu na mlibɛlɛmɔnii enumɔ nakai nɔŋŋ.

³³ Amɛhã mlibɛlɛmɔnii ni ye mplaŋi lɛ ateŋ lɛ kã shi emuu kɛjɛ koŋ kome kɛyagbe naa yɛ koŋ kome lɛ.

³⁴ Amɛkɛ shika shwie mplaŋi lɛ ahe, ni amɛkɛ shika nɔŋŋ fee amɛhe gai ni akɛ mlibɛlɛmɔnii baahɔlɔ mli lɛ, ni mlibɛlɛmɔnii lɛ hu amɛkɛ shika shwie he.

³⁵ Amɛkɛ kuŋtu ni alo kɛ kpãa bluu kɛ kpãa afaseo kɛ kpãa tsuru fɔɔ kɛ kpãa yɛŋ futafuta ni anyɛne fee muhɔɔ, ni akɛ ŋaa ni mli wa lo kerubim samai amɛwo mli.

³⁶ Amɛkɛ tso lɛ eko fee akulashiŋi ejwɛ amɛto muhɔɔ lɛ he; amɛshwie akulashiŋi nɛɛ ahe shika, ni amɛkɛ shika nɔŋŋ fee akulashiŋi lɛ ahe kpoji lɛ, ni amɛkɛ jwiɛtɛi fee nibii ejwɛ amɛwo akulashiŋi lɛ ashishi ni amɛmamɔ nɔ.

³⁷ Amɛkɛ kuŋtu ni alo kɛ kpãa bluu kɛ kpãa afaseo kɛ kpãa tsuru fɔɔ kɛ kpãa yɛŋ futafuta ni anyɛne, asaŋ ni akɛ abui elo nii ewo mli fee Kpee Buu lɛ shinaa lɛ naahaa mama lɛ.

³⁸ Amɛmamɔ akulashiŋi enumɔ kɛ amɛhe kpoji amɛhã shinaa lɛ naahaa mama lɛ. Amɛkɛ shika shwie akulashiŋi lɛ ayitsei lɛ kɛ amɛmlibɛlɛmɔ nii lɛ hu ahe, shi akɛ akɔɔble fee nibii ni akulashiŋi lɛ mamɔ nɔ lɛ.