2 Mose 33 - ŊMALƐ KRƆŊKRƆŊ LƐ

Israelbii fã kɛjɛ Sinai

¹ Yehowa kɛɛ Mose akɛ, “Yi mli ni oje biɛ, bo kɛ maŋ ni oyajie kɛjɛ Ijipt kɛba lɛ, kɛya shikpɔŋ ni mikã Abraham kɛ Isak kɛ Yakob ehe kitã akɛ, ‘Oshwiei mikɛ shikpɔŋ nɛɛ baahã’ lɛ nɔ.

² Mibatsu mibɔfo kɛnyiɛ ohiɛ, ni mashwie Kanaanbii lɛ kɛ Amorbii lɛ kɛ Hitbii lɛ kɛ Yebusbii kɛ Perizbii lɛ kɛ Hivbii lɛ yɛ nyɛhiɛ.

³ Nyɛmiiya shikpɔŋ ni yɔɔ frɔ̃frɔ̃ ni baa nii nɔ, shi mikɛ nyɛ enyiɛŋ kɛyaŋ, ejaakɛ maŋ ni kuɛŋ ti ji nyɛ, koni moŋ mikayaplene nyɛ yɛ gbɛ lɛ nɔ.”

⁴ Be ni Israelbii lɛ nu nɛkɛ sane fɔŋ nɛɛ lɛ amɛye ŋkɔmɔ, ni no hewɔ lɛ, mɔ fɛɛ mɔ fɔ̃ɔ jwinewoo.

⁵ Ejaakɛ Yehowa kɛɛ Mose akɛ, “Kɛɛmɔ Israelbii lɛ akɛ, ‘Maŋ ni kuɛŋ ti ji nyɛ, ni kɛji mibaye hiŋmɛitswaa kome kɛkɛ yɛ nyɛteŋ lɛ mibaplene nyɛ. No hewɔ lɛ, nyɛkpɔlɔa jwinei lɛ yɛ nyɛhe koni makwɛ nɔ ni mafee yɛ nyɛhe.’ ”

⁶ No hewɔ ni Israelbii lɛ jie amɛhe jwinei fɛɛ, ni amɛkpa woo kɛjɛ be ni amɛshi Horeb, ni ji Sinai Gɔŋ lɛ he lɛ.

Yehowa Kpee Buu lɛ

⁷ Kɛji Israelbii lɛ to shi lɛ Mose kɛ Buu Krɔŋkrɔŋ lɛ yaa ni eyashiɔ yɛ shitoohe lɛ sɛɛ flɛŋŋ. Ewo lɛ gbɛi akɛ Kpee Buu, ni mɔ fɛɛ mɔ ni miitao Yehowa nii ebi lɛ, ejeɔ kpo kɛyaa Kpee Buu lɛ mli yɛ shitoohe lɛ sɛɛ.

⁸ Be fɛɛ be ni Mose aaaje kpo kɛmiiya Buu lɛ he lɛ, maŋbii teteɔ shi, ni mɔ fɛɛ mɔ badamɔɔ ebuu shinaa shi, ni amɛhiɛɔ Mose yisɛɛ kwɛmɔ aahu kɛyashiɔ eboteɔ Buu lɛ mli.

⁹ Kɛji Mose bote Buu lɛ mli lɛ, atatu kutuu lɛ kpelekeɔ shi, ni ebadamɔɔ Buu lɛ shinaa lɛ shi, ni Yehowa kɛ Mose wieɔ.

¹⁰ Kɛ maŋ lɛ na atatu kutuu lɛ yɛ Kpee Buu lɛ shinaa lɛ shi nakai lɛ, maŋ lɛ fɛɛ teɔ shi ni amɛmamɔɔ amɛyi shi, ni amɛjaa, mɔ fɛɛ mɔ yɛ ebuu shinaa shi.

¹¹ Yehowa kɛ Mose wieɔ hiɛ kɛ hiɛ tamɔ mɔ kɛ enaanyo wieɔ. Kɛji Mose ku esɛɛ eba shitoohe lɛ mli lɛ, etsulɔ Yoshua, Nun binuu oblanyo lɛ, lɛ lɛ eshiii Buu lɛ mli.

Yehowa wo shi akɛ ebaahi ewebii ateŋ

¹² Ni Mose kɛɛ Yehowa akɛ, “Naa, bo diɛŋtsɛ okɛɛ mi akɛ, ‘Yaaŋɔ maŋ nɛɛ kɛya’ shi moŋ ohãko male mɔ ni obaatsu ni ekɛ mi aya. Kɛ̃lɛ bo nɔŋŋ okɛɛ akɛ, ‘Mile bo jogbaŋŋ, ni miyɛ ohe miishɛɛ’.

¹³ No hewɔ lɛ, agbɛnɛ miikpa bo fai, kɛji ona he miishɛɛ lɛ, hã male oyiŋtoo (yɛ gbɔmɛi nɛɛ ahe) bɔ ni afee ni male bo, koni masa ohiɛ. Kaimɔ hu akɛ nɛkɛ maŋ nɛɛ omaŋ ni.”

¹⁴ Yehowa kɛɛ Mose akɛ, “Mikɛ nyɛ aaatee ni mahã oye kunim.”

¹⁵ Mose kɛɛ Yehowa akɛ, “Kɛ bo okɛ wɔ eyaaa lɛ, no lɛ kaaloo wɔ kɛmiijɛ biɛ kɛmiiya,

¹⁶ ejaakɛ mɛni aaatsɔ̃ɔ akɛ oyɛ mi kɛ omaŋ nɛɛ he miishɛɛ akɛ ja tee ni okɛ wɔ aaatee lɛ, bɔ ni afee ni ana akɛ soro wɔ, ni ji mi kɛ omaŋ lɛ, yɛ maji fɛɛ ni yɔɔ shikpɔŋ lɛ nɔ lɛ ateŋ.”

¹⁷ Yehowa kɛɛ Mose akɛ, “Nɔ ni okɛɛ nɛɛ hu mafee, ejaakɛ miyɛ ohe miishɛɛ, ni mile bo jogbaŋŋ.”

¹⁸ Mose kɛɛ Yehowa akɛ, “Kɛ nakai ni lɛ hã mana onunyam lɛ.”

¹⁹ Yehowa kɛɛ Mose akɛ, “Mibahã minunyam lɛ abaho yɛ ohiɛ, ni mibatsɛ mi diɛŋtsɛ migbɛi, Yehowa lɛ, yɛ ohiɛ. Mibaduro mɔ ni mibaduro, ni mɔ ni mimusuŋ aaatsɔ̃ mi yɛ ehe lɛ, lɛ ehe mimusuŋ aaatsɔ̃ mi yɛ.

²⁰ Shi moŋ, onyɛŋ mihiɛ ona, ejaakɛ mɔ ko mɔ ko enaŋ mihiɛ ni eyi aaana wala.”

²¹ Yehowa tee nɔ ekɛɛ, “Naa, tɛsaa ko yɛ mimasɛi yɛ gbɛ lɛ nɔ, daamɔ jɛi.

²² Shi be mli ni minunyam lɛ hoɔ lɛ maŋɔ bo mawo tɛsaa lɛ tɛkplo lɛ mli, ni mi kɛ minine aaatsi onɔ kɛyashi mibaho dã.

²³ Kɛkɛ lɛ majie minine lɛ, ni ooona mikotosɛɛ gbɛ, shi mihiɛ lɛ no lɛ anaaa.”