2 Mose 31 - ŊMALƐ KRƆŊKRƆŊ LƐ

Ŋaalɔi ni baama Kpee Buu lɛ

¹ Yehowa kɛɛ Mose akɛ,

² “Naa, mije gbɛ mitsɛ Bezaleel, ni ji Hur bi Uri binuu lɛ ni jɛ Yuda akutso lɛŋ lɛ,

³ ni mikɛ Nyɔŋmɔ mumɔ ewo emli obɔ̃, ni miduro lɛ jwɛŋmɔ kɛ nilee ni akɛnyɛɔ ŋaa nitsumɔi srɔtoi fɛɛ atsuɔ,

⁴ koni ekɛye sama, ni ekɛŋa shika kɛ jwiɛtɛi kɛ akɔɔble ŋaa,

⁵ ni ekɛfolɔ tɛi ni akɛtaraa nibii amli, ni ekɛkpɛ tso ni akɛtsuɔ ŋaa nitsumɔi srɔtoi srɔtoi fɛɛ.

⁶ Ni naa, mi nɔŋŋ miŋɔ Ahisamak binuu Oholiab ni jɛ Dan akutso lɛŋ lɛ mifata Bezaleel he. Mɛnɛɛmɛi asɛɛ lɛ, mɛi fɛɛ ni ŋaa yɔɔ amɛhiŋmɛiŋ lɛ, miduro amɛ ŋaa koni amɛnyɛ nibii fɛɛ ni miwo bo he kitã nɛɛ amɛtsu:

⁷ Kpee Buu lɛ kɛ Kpãŋmɔ Adeka lɛ kɛ enaanɔ ni buɔ naa lɛ, kɛ Buu lɛ he nii lɛ,

⁸ kɛ okplɔ̃ lɛ kɛ ehe tsɛnsii lɛ, kɛ kanetso ni akɛ shika ŋmiiŋmi fee lɛ kɛ ehenii lɛ fɛɛ, kɛ tsofakɛŋmashãa latɛ lɛ,

⁹ kɛ afɔleshãa latɛ lɛ kɛ ehenii lɛ fɛɛ, kɛ akɔɔble okpolu lɛ.

¹⁰ Ni asaŋ amɛfee wulamɔ nibii fɛɛfɛji lɛ ni ji Aaron, Osɔfo lɛ, hewulamɔ nii krɔŋkrɔŋi lɛ, kɛ ebihii lɛ hu ahewulamɔ nii ni amɛkɛsɔ̃mɔ yɛ osɔfo nitsumɔ lɛ mli lɛ.

¹¹ Amɛfee mu ni akɛfɔɔ mɔ mu lɛ, kɛ tsofakɛŋma ni abaashã yɛ He Krɔŋkrɔŋ lɛŋ lɛ. Amɛfee nibii nɛɛ fɛɛ bɔ ni mi mifã bo lɛ.”

Hejɔɔmɔ gbi lɛ

¹² Ni Yehowa kɛɛ Mose akɛ,

¹³ “Kɛɛmɔ Israelbii lɛ akɛ, ‘Asaŋ mihejɔɔmɔ gbi lɛ nyɛyea, ejaakɛ eji okadi yɛ mi kɛ nyɛ teŋ kɛmiiya nyɛyinɔi fɛɛ koni nyɛkɛna nyɛle akɛ mi, Yehowa, mi mifeɔ nyɛ krɔŋkrɔŋ.

¹⁴ No hewɔ lɛ, nyɛyea hejɔɔmɔ gbi lɛ, ejaakɛ eyɛ krɔŋkrɔŋ hã nyɛ. Mɔ fɛɛ mɔ ni aaabule gbi nɛɛ lɛ gbe aaagbe lɛ, ni mɔ fɛɛ mɔ ni aaatsu nii yɛ gbi lɛ nɔ lɛ aaatswa enaneshi tu.

¹⁵ Atsu nii gbii ekpaa, shi gbi ni ji kpawo lɛ, hejɔɔmɔ gbi kɛ gbi krɔŋkrɔŋ ni hã mi, Yehowa. Mɔ fɛɛ mɔ ni aaatsu nii yɛ hejɔɔmɔ gbi lɛ nɔ lɛ gbe aaagbe lɛ.

¹⁶ No hewɔ lɛ, Israelbii lɛ aye hejɔɔmɔ gbi lɛ, amɛye yɛ amɛyinɔi fɛɛ mli akɛ naanɔ kpãŋmɔ.

¹⁷ Mi kɛ Israelbii lɛ ateŋ okadi ji no kɛmiiya naanɔ; ejaakɛ gbii ekpaa, mi, Yehowa, mikɛbɔ ŋwɛi kɛ shikpɔŋ, ni gbi ni ji kpawo lɛ mijɔɔ mihe, ni miwo mitsui.’ ”

¹⁸ Be ni Yehowa kɛ Mose ewie egbe naa yɛ Sinai Gɔŋ lɛ nɔ lɛ, ekɛ tɛi enyɔ ni ji tɛi tɛtɛrɛbii ni lɛ Nyɔŋmɔ lɛ diɛŋtsɛ kɛ ewao eŋma nii yɛ nɔ lɛ hã Mose.