2 Mose 3 - ŊMALƐ KRƆŊKRƆŊ LƐ

Nyɔŋmɔ tsɛ Mose

¹ Mose miikwɛ eshaanuu Yetro, Midian osɔfo lɛ, toi. Gbi ko lɛ ekpala toi lɛ kɛtee ŋa lɛ nɔ anaigbɛ, ni eyaje Horeb, Yehowa Gɔŋ lɛ he.

² Kɛkɛ ni Yehowa bɔfo bajie ehe kpo etsɔ̃ɔ lɛ akɛ lalilɛi, yɛ ŋmeitso ko mli. Mose kwɛ ŋmeitso lɛ gãa ejaakɛ eetso nɛ, shi eshãaa.

³ Kɛkɛ ni Mose kɛɛ ehe akɛ, “Enɛ lɛ matsi mabɛŋkɛ ni mayakwɛ naakpɛɛ nii nɛɛ, nɔ hewɔ ni ŋmeitso lɛ eshãaa lɛ.”

⁴ Be ni Yehowa na akɛ Mose miibɛŋkɛ ni eyakwɛ lɛ, ejɛ ŋmeitso lɛ teŋ etsɛ lɛ ekɛɛ, “Mose, Mose!” Mose here nɔ akɛ, “Ofainɛ, naa mi!”

⁵ Nyɔŋmɔ kɛɛ lɛ akɛ, “Kaatsi oba dɔŋŋ! Jiemɔ otokotai lɛ, shi he ni odamɔ lɛ shikpɔŋ krɔŋkrɔŋ ni.”

⁶ Esaa ekɛɛ akɛ, “Mi ji otsɛmɛi aNyɔŋmɔ lɛ, Abraham Nyɔŋmɔ kɛ Isak Nyɔŋmɔ kɛ Yakob Nyɔŋmɔ lɛ.” Kɛkɛ ni Mose tsĩ ehiɛ, ejaakɛ eeshe gbeyei akɛ eeekwɛ Nyɔŋmɔ.

⁷ Yehowa kɛɛ akɛ, “Naa, mina amanehulu mli ni miwebii lɛ yɔɔ yɛ Ijipt lɛ, ni minu ŋkɔmɔ blɔmɔ ni amɛbolɔɔ koni abahere amɛ yɛ amɛkpalalɔi lɛ adɛŋ lɛ hu. Amɛnidɔɔ nii lɛ kã mitsui nɔ pam.

⁸ Naa, mikpeleke shi miba amɛ jiemɔ yɛ Ijiptbii lɛ adɛŋ, koni makpala amɛ kɛshi Ijipt kɛya shikpɔŋ kpakpa ni da, ni yɔɔ frɔ̃frɔ̃ ni niyenii pii yɔɔ nɔ lɛ nɔ, he ni Kanaanbii kɛ Hitbii kɛ Amorbii kɛ Perizbii kɛ Hivbii kɛ Yebusbii yɔɔ lɛ.

⁹ Israelbii lɛ akɔmɔyeli lɛ jwere mitoiŋ, ni mihiɛ tua bɔ ni Ijiptbii haoɔ amɛ lɛ.

¹⁰ No hewɔ lɛ, ba ni matsu bo Farao ŋɔɔ koni oyajie mimaŋ Israel kɛje Ijipt.”

¹¹ Shi Mose kɛɛ Nyɔŋmɔ akɛ, “Namɔ ji mi, ni matee Farao ŋɔɔ ni mayajie Israelbii lɛ kɛje Ijipt?”

¹² Nyɔŋmɔ to he akɛ, “Mi kɛ bo ni yaa lɛ, ni enɛ ji nɔ ni aaaye he odase akɛ mi mitsu bo lɛ. Kɛji oyajie Israelbii lɛ kɛje Ijipt kɛba lɛ, nyɛbaa gɔŋ krɔŋkrɔŋ nɛɛ he nyɛbajaa mi.”

¹³ Ni Mose here nɔ akɛ, “Kɛji mitee Israelbii lɛ aŋɔɔ miyakɛɛ amɛ akɛ, ‘Nyɛtsɛmɛi aNyɔŋmɔ lɛ tsu mi nyɛŋɔɔ nɛɛ’, ni amɛaabi mi akɛ, ‘Te egbɛi hu?’ lɛ, te mikɛɛ amɛ tɛŋŋ?”

¹⁴ Ni Nyɔŋmɔ kɛɛ Mose akɛ, “Mi ji mɔ ni mi ji. Kɛɛmɔ Israelbii lɛ akɛ, ‘Mi ji mɔ ni mi ji tsu mi nyɛŋɔɔ nɛɛ.’ ”

¹⁵ Asaŋ Nyɔŋmɔ kɛɛ, “Okɛɛ Israelbii lɛ akɛ, ‘Yehowa, nyɛtsɛmɛi aNyɔŋmɔ lɛ, ni ji Abraham Nyɔŋmɔ kɛ Isak Nyɔŋmɔ kɛ Yakob Nyɔŋmɔ lɛ, ji mɔ ni tsu mi nyɛŋɔɔ nɛɛ. Migbɛi kwraa nɛ kɛmiiya naanɔ, ni no yinɔi fɛɛ kɛtsɛ mi.’

¹⁶ Yaa ni oyabua Israel onukpai lɛ anaa, ni okɛɛ amɛ akɛ, Yehowa, nyɛtsɛmɛi aNyɔŋmɔ lɛ, ni ji Abraham Nyɔŋmɔ kɛ Isak Nyɔŋmɔ kɛ Yakob Nyɔŋmɔ lɛ, ejie ehe kpo etsɔ̃ɔ mi, ni ekɛɛ, Mikwɛ, ni mina nyɛ kɛ nɔ ni afeɔ nyɛ yɛ Ijipt lɛ,

¹⁷ ni miiwo shi akɛ majie nyɛ kɛje Ijipt amanehulu lɛ mli kɛya Kanaanbii kɛ Hitbii kɛ Amorbii kɛ Perizbii kɛ Hivbii kɛ Yebusbii lɛ ashikpɔŋ kpakpa ni yɔɔ frɔ̃frɔ̃ lɛ nɔ.

¹⁸ “Israel onukpai lɛ aaabo bo toi, ni okɛ amɛ aya Ijipt Maŋtsɛ lɛ ŋɔɔ ni oyakɛɛ lɛ akɛ, ‘Yehowa, Hebribii aNyɔŋmɔ lɛ, ejie ehe kpo etsɔ̃ɔ wɔ. No hewɔ lɛ, wɔmiikpa bo fai, ŋmɛɛ wɔ gbɛ ni wɔya gbii etɛ̃ gbɛ nyiɛmɔ koni wɔyashã afɔle wɔhã Yehowa, wɔNyɔŋmɔ lɛ.’

¹⁹ Shi mi lɛ mile akɛ Ijipt Maŋtsɛ lɛ eŋmɛŋ gbɛ ni nyɛya, ja anyɛ enɔ.

²⁰ No hewɔ lɛ, majie mihewalɛ kpo matsɔ̃ɔ Ijipt, ni mikɛ naakpɛɛ nii ni mafee yɛ jɛi lɛ aaagbala Ijipt toi, ni no sɛɛ dani eeehã nyɛya.

²¹ “Ni mahã Ijiptbii ahiɛ asɔ nyɛ bɔ sɔŋŋ ni be ni nyɛaatee lɛ, nyɛyaŋ lɛ efolo.

²² Yoo fɛɛ yoo amala shika nii kɛ jwiɛtɛi kɛ mamai yɛ Ijiptyoo ni ji ehe gbɔmɔ kɛ eshiaŋyoo dɛŋ, ni nyɛkɛwowoo nyɛbihii kɛ biyei. No nɔ baatsɔ̃ ni nyɛaakpakpaa Ijiptbii lɛ ahe nii kɛaatee.”