2 Mose 29 - ŊMALƐ KRƆŊKRƆŊ LƐ

Awo Aaron kɛ ebii lɛ osɔfo

¹ “Nɔ ni ofee okɛtsuu Aaron kɛ ebihii lɛ ahe koni amɛye osɔfo amɛhã mi nɛ: Mɔ tsina oblanyo kome kɛ toi ojwɛnii enyɔ ni kpa bɛ amɛhe.

² Ŋɔɔ aboloo ni akɛ mã akpiti shã kɛ mã akpiti keeki ni awo mli fɔ, kɛ mã akpiti akpãanɔɔ ni akpa hiɛ fɔ. Akɛ ŋmaa ma afee fɛɛ.

³ Okɛ nibii nɛɛ awo kɛntɛŋ kome mli, ni amɛhi kɛntɛŋ lɛ mli nɔŋŋ ni okɛba; tsina lɛ kɛ toi enyɔ lɛ afata he.

⁴ “Ŋɔɔ Aaron kɛ ebihii lɛ kɛba Kpee Buu lɛ shinaa lɛ naa, ni okɛ nu aju amɛhe.

⁵ No sɛɛ lɛ, okɛ wulamɔ nibii lɛ awula Aaron: flaka lɛ kɛ efod lɛ shishi atade yuu lɛ, kɛ efod lɛ diɛŋtsɛ kɛ tsitsinɔhaanii lɛ; naagbee lɛ okɛ efod lɛ mlifiinii lɛ afi emliteŋ.

⁶ Okɛ fai lɛ abu lɛ, ni okɛ shika ni atswia fɛtɛfɛtɛ krɔŋkrɔŋ lɛ ata fai lɛ hiɛ.

⁷ Agbɛnɛ owo mu ni akɛfɔɔ mɔ mu lɛ koni ofɔse oshwie Aaron yiteŋ ni okɛfɔ lɛ mu.

⁸ “Enɛ sɛɛ lɛ oŋɔ Aaron bihii lɛ kɛba ni owo amɛ flakai,

⁹ ni okɛ mlifiinii lɛ afimɔ amɛmli, ni obumɔ amɛ faii lɛ. Bɔ ni owo Aaron kɛ ebihii lɛ osɔfo nɛ koni osɔfo nitsumɔ lɛ afee amɛnɔ ni kã shi akɛ naanɔ akpɔ.

¹⁰ “Ohã akɛ tsinanuu lɛ aba Kpee Buu lɛ shinaa lɛ naa, ni Aaron kɛ ebihii lɛ kɛ amɛniji ashwie tsina lɛ yiteŋ,

¹¹ ni ogbe tsina lɛ yɛ Yehowa hiɛ yɛ Kpee Buu lɛ shinaa lɛ naa.

¹² Oŋɔ tsina lá lɛ eko koni okɛ owao atsɔ eko okpa afɔleshãa latɛ lɛ he akloŋtoi lɛ ahe, ni ofɔse lá ni eshwɛ lɛ fɛɛ oshwie afɔleshãa latɛ lɛ shishi.

¹³ Jiemɔ fɔ fɛɛ ni ha tsina lɛ mlinii lɛ ahe lɛ, kɛ mlɛbo lɛ fã ko kɛ sabai enyɔ lɛ hu, kɛ fɔ ni yɔɔ amɛhe lɛ, ni oshã yɛ afɔleshãa latɛ lɛ nɔ.

¹⁴ Shi tsina lɛ loo lɛ kɛ ehe wolo lɛ kɛ ewamɔ lɛ, ayashã fɛɛ yɛ shitoohe lɛ sɛɛ. Osɔfoi lɛ ahe esha afɔle ni.

¹⁵ “Asaŋ oŋɔ toi ojwɛnii lɛ ateŋ ekome, ni Aaron kɛ ebihii lɛ kɛ amɛniji ashwie eyiteŋ,

¹⁶ ni ogbe too lɛ, ni okɛ elá lɛ ashwã afɔleshãa latɛ lɛ he fɛɛ kɛkpe.

¹⁷ Folɔmɔ too lɛ mli kukuji, ni ofɔ mlinii lɛ kɛ eshuɔji lɛ ahe, ni okɛfata loo kukuji lɛ kɛ yitso lɛ he,

¹⁸ ni oma too ojwɛni muu lɛ fɛɛ naa la yɛ afɔleshãa latɛ lɛ nɔ. Eji afɔle ni akɛ la shãa ahãa mi, Yehowa; ni misumɔɔ eŋma lɛ.

¹⁹ “Omɔ too ojwɛni kome lɛ hu agbɛnɛ, ni Aaron kɛ ebihii lɛ kɛ amɛniji ashwie eyiteŋ,

²⁰ ni ogbe too lɛ, ni okɛ too lá lɛ eko asa Aaron ninejurɔ toi naa kɛ ebihii lɛ hu aninejurɔ toii anaa kɛ amɛninejurɔ kɛ nanejurɔ gɔŋtii anaa, ni okɛ lá ni eshwɛ lɛ ashwã afɔleshãa latɛ lɛ he fɛɛ kɛkpe.

²¹ Agbɛnɛ ŋɔɔ lá ni yɔɔ afɔleshãa latɛ lɛ nɔ lɛ eko kɛ mɔmufɔɔ mu lɛ hu eko ni okɛshwã Aaron kɛ ehewulamɔ nibii lɛ fɛɛ nɔ; ni okɛshwã Aaron bihii lɛ hu kɛ amɛhewulamɔ nibii lɛ fɛɛ anɔ, koni okɛfee Aaron kɛ ehewulamɔ nibii lɛ kɛ ebihii lɛ hu kɛ amɛhewulamɔ nibii lɛ fɛɛ krɔŋkrɔŋ.

²² “Jiemɔ too ojwɛni lɛ fɔ lɛ kɛ elei ni ewo fɔ lɛ kɛ emlinii ahe fɔ lɛ, kɛ nɔ ni tsotsoro mlɛbo lɛ he, kɛ sabai enyɔ lɛ, kɛ fɔ ni yɔɔ amɛhe lɛ hu, kɛ too lɛ ninejurɔ shuɔ (ejaakɛ osɔfowoo afɔle too ojwɛni ni),

²³ ni oŋɔ aboloo akwaabɔ kome kɛ mã akpiti keeki ni awo mli fɔ kome, yɛ aboloo ni akɛ mã akpiti shã kafu ni maa mi, Yehowa, mihiɛ lɛ mli,

²⁴ ni okɛwo Aaron kɛ ebihii lɛ adɛŋ koni amɛfɔ̃ niyenii nɛɛ amɛtsɔ̃ɔ mi akɛ afɔle ni amɛkɛhãa mi, Yehowa.

²⁵ Enɛ sɛɛ lɛ ohe nibii lɛ yɛ amɛdɛ̃ ni oma fɛɛ naa la yɛ afɔleshãa latɛ lɛ nɔ, ni oshã ofata shãa afɔle lɛ he akɛ afɔle ni akɛ la shãa ahãa mi, Yehowa; ni misumɔɔ eŋma lɛ.

²⁶ “Too ojwɛni lɛ ni akɛshã Aaron osɔfowoo afɔle lɛ, jiemɔ etsitsi lɛ koni ofɔ̃ otsɔ̃ɔ mi akɛ afɔle ni ajɔɔ nɔ ahã mi Yehowa ni. Tsitsi nɛɛ afee ogbɛfaŋ nɔ.

²⁷ “Agbɛnɛ too tsitsi lɛ kɛ shuɔ lɛ ni afɔ̃ɔ akɛ afɔle ni afɔ̃ɔ lɛ, ni ji loo ni ajie yɛ too ojwɛni ni akɛshã Aaron kɛ ebihii lɛ osɔfowoo afɔle lɛ, feemɔ amɛ krɔŋkrɔŋ.

²⁸ Enɛ atsɔ̃ gbɛnaanii ni akã shi daa ni sa akɛ Israelbii lɛ atuu ahã Aaron kɛ ebihii lɛ. Ejaakɛ eji osɔfo gbɛnaanii ni yɔɔ nii ni Israelbii lɛ kɛbaashã Yehowa toiŋjɔlɛ afɔle lɛ mli.

²⁹ “Aaron hewulamɔ nibii krɔŋkrɔŋi lɛ atsɔ̃ ebihii lɛ anii yɛ egbele sɛɛ, ni no amɛwo kɛji aafɔ amɛ mu koni atuu osɔfoyeli lɛ awo amɛdɛŋ.

³⁰ Ni Aaron binuu, mɔ ni baaye enajiaŋ akɛ osɔfonukpa, lɛ, ewo nibii nɛɛ gbii kpawo kɛji eeba Kpee Buu lɛ mli ebasɔ̃mɔ yɛ He Krɔŋkrɔŋ lɛ.

³¹ “Oŋɔ osɔfowoo too ojwɛni lɛ loo lɛ koni ohoo yɛ he ko ni yɔɔ krɔŋkrɔŋ.

³² Aaron kɛ ebihii lɛ kɛ loo lɛ aye aboloo lɛ ni yɔɔ kɛntɛŋ lɛ mli lɛ yɛ Kpee Buu lɛ shinaa lɛ naa.

³³ Amɛye nii ni akɛkpãtãa ni akɛwo amɛ osɔfo, ni asaŋ akɛfee amɛ krɔŋkrɔŋ lɛ. Mɔ folo ko akaye nii nɛɛ eko ejaakɛ nɔ krɔŋkrɔŋ ni.

³⁴ Kɛji osɔfowoo afɔle loo aboloo lɛ eko shwɛ ni je tsɛre nɔ lɛ, no lɛ akɛ la ashã; akaye ejaakɛ nɔ krɔŋkrɔŋ ni.

³⁵ “Bɔ ni mifã bo nɛɛ, feemɔ Aaron kɛ ebihii lɛ nakai. Gbii kpawo okɛwo amɛ osɔfo lɛ.

³⁶ Gbi fɛɛ gbi lɛ omɔ tsina kome koni okɛshã afɔle ni okɛkpãtã Nyɔŋmɔ yɛ esha ni afee hewɔ, ni okɛ kpãtãmɔ ni obaakpãtã nɛɛ nɔŋŋ akpala afɔleshãa latɛ lɛ he esha, ni ofɔ latɛ lɛ mu koni okɛfee lɛ krɔŋkrɔŋ.

³⁷ Okɛ gbii kpawo akpãtã Nyɔŋmɔ yɛ afɔleshãa latɛ lɛ he esha hewɔ koni okɛfee lɛ krɔŋkrɔŋ jogbaŋŋ kɛwula shi, bɔ ni nɔ fɛɛ nɔ ni aaasa afɔleshãa latɛ lɛ he lɛ afee krɔŋkrɔŋ.”

Daa gbi afɔle

³⁸ “Agbɛnɛ afɔle ni oshã yɛ afɔleshãa latɛ lɛ nɔ nɛ: Daa gbi lɛ toobii enyɔ ni eko fɛɛ eko eye afi.

³⁹ Okɛ toobi kome ashã afɔle leebi, ni okɛ ekome hu ashã afɔle gbɛkɛ.

⁴⁰ Klɛŋklɛŋ toobi lɛ okɛ ŋmaa mamu yiteremɔ kilo mlijaa nyɔŋma mli ekome, ni akɛ fɔ ni ashi mli lita mlijaa ejwɛ mli ekome akpɔtɔ afata he, kɛ wain lita mlijaa ejwɛ mli ekome ni akɛshã afɔle lɛ.

⁴¹ Ni toobi kome lɛ hu okɛshã afɔle gbɛkɛ. Okɛ niyenii kɛ dãa, tamɔ leebi nibii lɛ afalɛ nakai nɔŋŋ, afata he ni oshã, ni ahã eje ŋma. Eji afɔle ni akɛ la shãa ahãa mi, Yehowa, ni misumɔɔ eŋma lɛ.

⁴² Etsɔ̃ afɔle ni ashãa daa yɛ nyɛyinɔi fɛɛ amli, yɛ mi Yehowa, mihiɛ yɛ Kpee Buu lɛ shinaa lɛ shi. Jɛi mikɛ nyɛ aaakpe yɛ, ni mikɛ bo awie yɛ.

⁴³ Ni jɛi mikɛ Israelbii lɛ aaakpe yɛ, ni jɛi aaatsɔ̃ he krɔŋkrɔŋ yɛ minunyam lɛ hewɔ.

⁴⁴ Mahã Kpee Buu lɛ kɛ afɔleshãa latɛ lɛ afee krɔŋkrɔŋ, ni asaŋ mafee Aaron kɛ ebihii lɛ fɛɛ krɔŋkrɔŋ koni amɛye osɔfo amɛhã mi.

⁴⁵ Ni mahi Israelbii lɛ ateŋ, ni matsɔ̃ amɛNyɔŋmɔ.

⁴⁶ Ni amɛaana amɛle akɛ mi ji Yehowa, amɛNyɔŋmɔ lɛ, mɔ ni jie amɛ kɛje Ijipt shikpɔŋ lɛ nɔ koni mahi amɛteŋ lɛ; mi Yehowa, amɛNyɔŋmɔ lɛ.”