2 Mose 27 - ŊMALƐ KRƆŊKRƆŊ LƐ

Afɔleshãa latɛ lɛ

¹ “Okɛ tso lɛ eko akpɛ afɔleshãa latɛ lɛ. Ekɛlɛ afee ninetalɔi enumɔ kɛ elɛɛmɔ hu ninetalɔi enumɔ, ekɛlɛ kɛ elɛɛmɔ aye egbɔ; ekwɔlɛ afee ninetalɔi etɛ̃.

² Feemɔ akloŋtoi omamɔ ekoji ejwɛ lɛ anɔ. Akloŋtoi lɛ kɛ latɛ lɛ fɛɛ afee nɔ muu kome, ni okɛ akɔɔble aha latɛ muu lɛ fɛɛ he.

³ Ofee latɛ lɛ he ŋɛsui ni akɛloo elamlu lɛ, asaŋ ofee ehe sofii kɛ ekpolui kɛ fakai kɛ lajee tsɛnsii hu. Okɛ akɔɔble afee nibii nɛɛ fɛɛ.

⁴ Ofee akɔɔble ntaŋ, ni okɛ akɔɔble nɔŋŋ afee gai owo ntaŋ lɛ koji ejwɛ lɛ.

⁵ Okɛ akɔɔble ntaŋ lɛ awo afɔleshãa latɛ lɛ mli ni eyakã latɛ lɛ teŋ tuuŋtu.

⁶ Okɛ tso lɛ eko agbɔlɔ tsei bloblobii, ni oha amɛhe akɔɔble.

⁷ Okɛ tsei nɛɛ ahɔlɔ gai lɛ amli yɛ afɔleshãa latɛ lɛ biɛ kɛ biɛ koni akɛwo.

⁸ Okɛ ŋmoŋmolo akpɛ afɔleshãa latɛ lɛ, ni gbɛ ahi emli. Okpɛ latɛ lɛ bɔ pɛpɛɛpɛ ni ajie atsɔ̃ɔ bo yɛ gɔŋ nɛɛ nɔ lɛ.”

Kpee Buu lɛ he afabaŋ lɛ

⁹ “Ofee kpo owo Kpee Buu Krɔŋkrɔŋ lɛ he. Ewuoyigbɛ lɛ akɛ klala kpakpa ni ekɛlɛ feɔ ninetalɔi oha afee muhɔɔ ahã jɛi.

¹⁰ Amãmɔ muhɔɔ lɛ he akulashiŋi nyɔŋmai enyɔ kɛ amɛshishi akɔɔble nibii nyɔŋmai enyɔ koni amɛmamɔ nɔ. Akulashiŋi lɛ ahe kpoji lɛ kɛ mlibɛlɛmɔ nii lɛ akɛ jwiɛtɛi afee.

¹¹ Ni asaŋ kpo lɛ kɛlɛ nɔ yɛ kooyigbɛ lɛ hu, jɛi muhɔɔ lɛ kɛlɛ afee ninetalɔi oha. Akulashiŋi nyɔŋmai enyɔ nakai nɔŋŋ ahi jɛi kɛ amɛshishi nibii nyɔŋmai enyɔ ni amɛmamɔ nɔ. Shi akulashiŋi lɛ ahe kpoji kɛ mlibɛlɛmɔ nii lɛ akɛ jwiɛtɛi afee.

¹² Kpo lɛ lɛɛmɔ nɔ he ni ye anaigbɛ lɛ jɛi muhɔɔ lɛ kɛlɛ afee ninetalɔi nyɔŋmai enumɔ, ni akulashiŋi nyɔŋma kɛ amɛshishi nibii nyɔŋma ni amɛmamɔ nɔ ahi jɛi.

¹³ Kpo lɛ lɛɛmɔ mli he ni ye bokãgbɛ, ni ji ehiɛ lɛ, jɛi muhɔɔ lɛ kɛlɛ afee ninetalɔi nyɔŋmai enumɔ.

¹⁴ Muhɔɔ ni ekɛlɛ feɔ ninetalɔi nyɔŋma kɛ enumɔ aha kpo lɛ nɔ agbo lɛ afã kome kɛ ehe akulashiŋi etɛ̃ kɛ amɛshishi nibii etɛ̃ ni amɛmamɔ nɔ.

¹⁵ Agbo lɛ afã kome lɛ hu jɛi muhɔɔ lɛ kɛlɛ afee ninetalɔi nyɔŋma kɛ enumɔ kɛ ehe akulashiŋi etɛ̃ kɛ amɛshishi nibii etɛ̃.

¹⁶ Kpo lɛ nɔ agbo lɛ naahaa nii lɛ akɛ mama ni alo kɛ kpãa bluu kɛ kpãa afaseo kɛ kpãa tsuru kɛ kpãa yɛŋ srãsrã ni anyɛne, asaŋ ni akɛ abui elo nii ewo mli afee. Ekɛlɛ afee ninetalɔi nyɔŋmai enyɔ kɛ ehe akulashiŋi ejwɛ kɛ amɛshishi nibii ejwɛ ni amɛmamɔ nɔ.

¹⁷ Akulashiŋi fɛɛ ni bɔle kpo lɛ kpula lɛ, akɛ jwiɛtɛi afee amɛmlibɛlɛmɔ nii kɛ amɛhe kpoji lɛ, ni akɛ akɔɔble afee amɛshishi nibii ni amɛmamɔ nɔ lɛ.

¹⁸ Kpo lɛ kɛlɛ ahiɛ ninetalɔi oha, elɛɛmɔ ahiɛ ninetalɔi nyɔŋmai enumɔ, ni ekwɔlɛ ahiɛ ninetalɔi enumɔ. Akɛ klala kpakpa afee emli muhɔɔ lɛ fɛɛ, ni akɛ akɔɔble afee akulashiŋi lɛ ashishi nibii ni amɛmamɔ nɔ lɛ.

¹⁹ Ni nibii fɛɛ ni akɛbaatsu Kpee Buu Krɔŋkrɔŋ lɛ mli nii kɛ ehe shiŋmlitsei lɛ kɛ kpo lɛ hu shiŋmlitsei lɛ akɛ akɔɔble afee fɛɛ.”

Kanetso lɛ nɔkwɛmɔ

²⁰ “Fã Israelbii lɛ akɛ amɛbahã bo mutso mu ni mli tse krɔŋŋ ni akɛsu kane lɛ koni ahã kane lɛ ama nɔ be fɛɛ be.

²¹ Aaron kɛ ebihii lɛ asu kane lɛ ama muhɔɔ ni etsĩ Kpãŋmɔ Adeka lɛ hiɛ lɛ hiɛ yɛ Kpee Buu Krɔŋkrɔŋ lɛ mli, ni amɛkwɛ koni kane nɛɛ atso kɛjɛ gbɛkɛ kɛyashi leebi yɛ mi, Yehowa, mihiɛ. Enɛ atsɔ̃ akpɔ ni kã shi hã Israelbii ayinɔbii fɛɛ.”