2 Mose 26 - ŊMALƐ KRƆŊKRƆŊ LƐ

Yehowa Kpee Buu Krɔŋkrɔŋ lɛ

¹ “Okɛ mamai nyɔŋma ni alo kɛ klala yɛŋ futaa kɛ kuŋtu bluu kɛ kuŋtu afaseo kɛ kuŋtu tsuru fɔɔ ni anyɛne afee Kpee Buu Krɔŋkrɔŋ lɛ. Alo kerubim awo mli.

² Mama kome kɛlɛ afee ninetalɔi nyɔŋmai enyɔ kɛ kpaanyɔ, ni elɛɛmɔ afee ninetalɔi ejwɛ. Mamai lɛ fɛɛ adaramɔ afee ekome.

³ Okpɛ mamai lɛ enumɔ otsara, eko tsa eko naa, kɛfee mama muu kome, ni okpɛ enumɔ krokomɛi lɛ hu otsara, eko tsa eko naa, nakai nɔŋŋ kɛfee mama muu kome.

⁴ Okɛ kpãa bluu aŋmɔlɔ aflãi owo mama muu kome naa, ni ofee mama muu kroko lɛ hu nakai nɔŋŋ.

⁵ Oŋmɔlɔ aflãi nɛɛ nyɔŋmai enumɔ yɛ mama muu kome naa kɛ aflãi nyɔŋmai enumɔ hu yɛ mama muu kroko lɛ naa.

⁶ Ofee kpoji nyɔŋmai enumɔ koni okɛlala mamai enyɔ lɛ anaabui lɛ otsara Kpee Buu Krɔŋkrɔŋ mama lɛ koni etsɔ̃ nɔ muu kome.

⁷ “Okɛ abotia he tsɔi afee mamai nyɔŋma kɛ ekome okɛha Kpee Buu Krɔŋkrɔŋ lɛ nɔ.

⁸ Mama kome kɛlɛ afee ninetalɔi nyɔŋmai etɛ̃, ni elɛɛmɔ afee ninetalɔi ejwɛ. Mamai nyɔŋma kɛ ekome nɛɛ fɛɛ adaramɔ afee ekome.

⁹ Otsara mamai enumɔ aŋklo kɛ mamai ekpaa hu aŋklo. Mama ni ji ekpaa ni baaye buu lɛ hiɛ lɛ odɔ mli enyɔ.

¹⁰ Oŋmɔlɔ aflãi nyɔŋmai enumɔ yɛ mamai enumɔ ni otsara lɛ aŋklo lɛ naa, kɛ aflãi nyɔŋmai enumɔ hu yɛ mamai ekpaa ni otsara lɛ aŋklo lɛ naa.

¹¹ Ofee akɔɔble kpoji nyɔŋmai enumɔ koni okɛlala aflãi lɛ, ni okɛtsara buu mama lɛ koni efee nɔ muu kome.

¹² Buu mama ni shwɛɔ lɛ, ni ji mama fã lɛ ni dɛŋ nɔ lɛ, odɔ ofɔ̃ nɔ koni ekã nɔ yɛ Kpee Buu Krɔŋkrɔŋ lɛ sɛɛgbɛ.

¹³ Ni buu mamai lɛ akɛlɛ mli ninetalɔ kome ni dɛŋɔ nɔ yɛ afã kome nɛɛ, kɛ ninetalɔ kome hu ni dɛŋɔ nɔ yɛ afã kroko lɛ, ebɔ nɔ koni ekã Kpee Buu Krɔŋkrɔŋ lɛ ŋmawuiaŋ biɛ kɛ biɛ koni eha Buu lɛ he.

¹⁴ “Okɛ ojwɛni wolo ni awo lɛ tsofa tsuru aha buu lɛ nɔ, ni okɛ nuŋgbee wolo aha yiteŋ oto nɔ.

¹⁵ “Okɛ tso afee Kpee Buu Krɔŋkrɔŋ lɛ mplaŋi ni baamamɔ shi lɛ.

¹⁶ Mplaŋ kome kɛlɛ afee ninetalɔi nyɔŋma, ni elɛɛmɔ afee ninetalɔ kome kɛ fã.

¹⁷ Ojie nyanyɔji enyɔ yɛ mplaŋ fɛɛ mplaŋ he koni onyɛ okɛtsa eko kɛ eko. Bɔ ni omamɔ Kpee Buu Krɔŋkrɔŋ lɛ mplaŋi lɛ fɛɛ nɛ:

¹⁸ mplaŋi nyɔŋmai enyɔ aye Kpee Buu Krɔŋkrɔŋ lɛ he ni ye wuoyigbɛ.

¹⁹ Okɛ jwiɛtɛi afee nibii nyɔŋmai ejwɛ owo mplaŋi nyɔŋmai enyɔ lɛ ashishi koni amɛmamɔ nɔ. Mplaŋ fɛɛ mplaŋ ama enyɔ nɔ.

²⁰ Kpee Buu Krɔŋkrɔŋ lɛ he ni ye kooyigbɛ lɛ, mplaŋi nyɔŋmai enyɔ aye jɛi,

²¹ kɛ amɛshishi nibii nyɔŋmai ejwɛ ni enyɔ yɛ mplaŋ fɛɛ mplaŋ shishi.

²² Kpee Buu Krɔŋkrɔŋ lɛ sɛɛgbɛ, he ni ye kɛyaa anaigbɛ lɛ, mplaŋi ekpaa aye jɛi.

²³ Okɛ mplaŋi enyɔɔnyɔ ajie Kpee Buu Krɔŋkrɔŋ lɛ sɛɛgbɛ koji enyɔ lɛ.

²⁴ Okɛ koŋ kome mplaŋi enyɔ lɛ abɔ he kɛkɛ yɛ amɛshishigbɛ; shi otsa amɛ yɛ ŋwɛigbɛ yɛ klɛŋklɛŋ ga lɛ yi. Nɛkɛ ji bɔ ni ofee koji enyɔ lɛ mplaŋi lɛ fɛɛ.

²⁵ No hewɔ lɛ, abaana mplaŋi kpaanyɔ yɛ sɛɛgbɛ nɛɛ kɛ amɛshishi jwiɛtɛi nibii nyɔŋma kɛ ekpaa ni amɛmamɔ nɔ, mplaŋ fɛɛ mplaŋ ama enyɔ nɔ.

²⁶ “Okɛ tso lɛ nɔŋŋ eko afee mlibɛlɛmɔ nii enumɔ ohã mplaŋi ni yɔɔ Kpee Buu Krɔŋkrɔŋ lɛ ŋmawuiaŋ kome,

²⁷ ni mplaŋi ni yɔɔ ŋmawuiaŋ kome lɛ hu ana mlibɛlɛmɔ nii enumɔ; ni sɛɛgbɛ, ni ji anaigbɛ, mplaŋi lɛ ana mlibɛlɛmɔ nii enumɔ nakai nɔŋŋ.

²⁸ Ni mlibɛlɛmɔ nii ni baaye mplaŋi lɛ ateŋ lɛ, ekã shi emuu kɛjɛ koŋ kome kɛyagbe naa yɛ koŋ kome lɛ.

²⁹ Okɛ shika aha mplaŋi lɛ ahe, ni okɛ shika nɔŋŋ afee gai ni akɛ mlibɛlɛmɔ nii lɛ baahɔlɔ mli lɛ; ni mlibɛlɛmɔ nii lɛ hu okɛ shika aha he.

³⁰ Kpee Buu Krɔŋkrɔŋ lɛ bɔ ni ajie atsɔ̃ɔ bo yɛ gɔŋ nɛɛ nɔ lɛ, oma lɛ nakai nɔŋŋ.

³¹ “Okɛ kuŋtu ni alo kɛ kpãa bluu kɛ kpãa afaseo kɛ kpãa tsuru fɔɔ kɛ kpãa yɛŋ futafuta ni anyɛne afee muhɔɔ. Akɛ ŋaa alo kerubim awo muhɔɔ nɛɛ mli.

³² Okɛ muhɔɔ lɛ atsotsoro kpoji anaa yɛ tso akulashiŋi ni aha amɛhe shika lɛ ahe. Akɛ shika afee kpoji lɛ, ni akulashiŋ lɛ amãmɔ jwiɛtɛi nibii ejwɛ anɔ.

³³ Okɛ kpoji lɛ alala muhɔɔ lɛ kɛtsotsoro shi, ni okɛ Kpãŋmɔ Adeka lɛ abama muhɔɔ lɛ sɛɛ koni muhɔɔ lɛ afo He Krɔŋkrɔŋ lɛ kɛ He Krɔŋkrɔŋ Fe Fɛɛ lɛ teŋ ahã nyɛ.

³⁴ Okɛ Kpãŋmɔ Adeka lɛ naanɔ lɛ, ni ji kpãtãmɔ sɛi lɛ, abu naa yɛ He Krɔŋkrɔŋ Fe Fɛɛ lɛ.

³⁵ Okɛ okplɔ̃ lɛ ama muhɔɔ lɛ hiɛ yɛ Kpee Buu Krɔŋkrɔŋ lɛ mli kooyigbɛ, ni kanetso lɛ aye Kpee Buu Krɔŋkrɔŋ lɛ mli wuoyigbɛ koni ekwɛ okplɔ̃ lɛ hiɛ.

³⁶ “Ni buu lɛ naa shinaa lɛ, okɛ mama ni akɛ kpãa bluu kɛ kpãa afaseo kɛ kpãa tsuru fɔɔ kɛ kpãa yɛŋ futafuta ni anyɛne elo, asaŋ ni akɛ abui elo nii awo mli afee.

³⁷ Ni okɛ tso lɛ nɔŋŋ eko afee akulashiŋi enumɔ ohã shinaa lɛ naa mama lɛ. Okɛ shika aha tsei nɛɛ ahe, ni owo amɛhe shika kpoji kɛ amɛshishi akɔɔble nibii ni amɛmamɔ nɔ.”