2 Mose 25 - ŊMALƐ KRƆŊKRƆŊ LƐ

Kpee Buu Krɔŋkrɔŋ lɛ he nikee nii

¹ Ni Yehowa kɛɛ Mose akɛ,

² “Bi Israelbii lɛ koni amɛkɛ nikee nii aba. Mɔ fɛɛ mɔ ni yɔɔ he tsui akɛ ehã lɛ, lɛ edɛŋ nikee nii nyɛhea nyɛhãa mi.

³ Ni nikee nii ni amɛkɛba lɛ nɛ: shika kɛ jwiɛtɛi kɛ akɔɔble,

⁴ kɛ kuŋtu bluu kɛ kuŋtu afaseo kɛ kuŋtu tsuru fɔɔ kɛ klala kɛ abotia he tsɔi,

⁵ kɛ ojwɛni wolo ni awo lɛ tsofa tsuru kɛ nuŋgbee he wolo kɛ tso.

⁶ Ekrokomɛi hu ji mu ni akɛsuɔ kane, kɛ tsofai ni akɛfutuɔ mu ni akɛfɔɔ mɔ mu mli lɛ. Ekomɛi hu ji tsofai ni akɛfeɔ tsofakɛŋma ni ashãa.

⁷ Abake oniketɛi ni akɛbaamamɔ osɔfonukpa lɛ tsitsinɔhaa nii lɛ kɛ ehewulamɔ nii lɛ eko ni atsɛɔ lɛ efod lɛ amli lɛ.

⁸ Ohã Israelbii lɛ afee Kpee Buu Krɔŋkrɔŋ ko amɛhã mi koni mahi amɛteŋ.

⁹ Bɔ ni matsɔ̃ɔ bo Kpee Buu Krɔŋkrɔŋ lɛ su kɛ ehe nibii lɛ fɛɛ hu asu lɛ, nyɛfea lɛ nakai pɛpɛɛpɛ.

Kpãŋmɔ Adeka lɛ

¹⁰ “Ohã amɛkpɛ tso adeka. Ekɛlɛ afee ninetalɔi enyɔ kɛ fã, ni elɛɛmɔ afee ninetalɔ kome kɛ fã, ni ekwɔlɛ afee ninetalɔ kome kɛ fã.

¹¹ Ashwie adeka lɛ mli kɛ ehe fɛɛ shika ŋmiiŋmi, ni akɛ shika abaŋ adeka lɛ naa fɛɛ kɛkpe kpula.

¹² Ashwie shika gai ejwɛ ato adeka lɛ koji ejwɛ lɛ. Gai enyɔ aye afã kome, ni enyɔ hu aye afã kome lɛ.

¹³ Akɛ tso lɛ nɔŋŋ eko agbɔlɔ tsei bloblobii ni ashwie amɛhe shika.

¹⁴ Akɛ tsei nɛɛ ahɔlɔ gai ni yɔɔ adeka lɛ ŋmawuiaŋ biɛ kɛ biɛ lɛ amli koni akɛwo.

¹⁵ Tsei lɛ ahɔlɔ gai lɛ amli, akajie yɛ mli.

¹⁶ Okɛ odaseyeli tɛi lɛ ni mikɛbaahã bo lɛ awo Kpãŋmɔ Adeka lɛ mli.

¹⁷ “Okɛ shika ŋmiiŋmi afee adeka lɛ naanɔ lɛ. Ekɛlɛ afee ninetalɔi enyɔ kɛ fã, ni elɛɛmɔ afee ninetalɔ kome kɛ fã.

¹⁸ Otswia shika, ni okɛfee kerubim enyɔ omamɔ naanɔ lɛ nɔ koji lɛ anɔ.

¹⁹ Kerub kome yɛ koŋ kome kɛ ekome hu yɛ koŋ kome lɛ. Sɔomɔ kerubim nɛɛ okpɛtɛ naanɔ lɛ koji enyɔ lɛ.

²⁰ Kerubim lɛ agbɛ amɛfiji amli kɛya ŋwɛi ni amɛkɛha naanɔ lɛ nɔ, ni kerub kome akwɛ kerub kome hiɛ, asaŋ amɛmamɔ amɛhiɛ shi amɛkwɛ naanɔ lɛ nɔ.

²¹ Okɛ odaseyeli tɛi lɛ ni mikɛbaahã bo lɛ awo Kpãŋmɔ Adeka lɛ mli koni okɛ naanɔ lɛ abu naa.

²² Gbɛ ni kã kerubim enyɔ lɛ ateŋ yɛ Kpãŋmɔ Adeka lɛ naanɔ lɛ nɔ lɛ baatsɔ̃ mi kɛ bo kpeehe, ni jɛi majɛ mi kɛ bo aaawie nibii fɛɛ ni mifã bo akɛ okɛɛ Israelbii lɛ.

Okplɔ̃ ni akɛ Nyɔŋmɔ Aboloo lɛ maa nɔ lɛ

²³ “Okɛ tso lɛ nɔŋŋ eko akpɛ okplɔ̃. Ekɛlɛ afee ninetalɔ kome kɛ fã.

²⁴ Oshwie ehe shika ŋmiiŋmi, ni ekoji lɛ okɛ shika abaŋ naa fɛɛ kpula kɛkpe.

²⁵ Ogbɔ tso blawa ni elɛɛmɔ tamɔ dɛ̃ lɛɛmɔ koni okɛkpɛtɛ okplɔ̃ lɛ toi kɛbɔle lɛ kɛkpe, ni okɛ shika abaŋ tso blawa nɛɛ naa kpula.

²⁶ Feemɔ shika gai ejwɛ okɛwo okplɔ̃ lɛ naji ejwɛ lɛ ahe.

²⁷ Gai nɛɛ aye tso blawa lɛ shishi tuuŋtu, ni nomɛi amli akɛ tsei bloblobii ni akɛbaawo okplɔ̃ lɛ ahɔlɔ.

²⁸ Okɛ tso lɛ nɔŋŋ eko agbɔlɔ tsei nɛɛ, ni oshwie he shika koni akɛwo okplɔ̃ lɛ.

²⁹ Okɛ shika ŋmiiŋmi afee okplɔ̃ lɛ he plɛtei kɛ tsɛnsii ni akɛ tsofakɛŋma baawo amɛmli lɛ, kɛ agbɛnɛ okpolui kɛ kpuji ni akɛbaaye ŋkpai lɛ.

³⁰ Ni okɛ aboloo ni akɛmaa mihiɛ lɛ ama okplɔ̃ lɛ nɔ yɛ mihiɛ daa.

Kanetso lɛ

³¹ “Okɛ shika ŋmiiŋmi ni atswia afee kanetso. Otswia shika ŋmiiŋmi kɛfee eshimaatso lɛ kɛ eshishi nii ni ema nɔ lɛ fɛɛ. Ehe tɔi lɛ kɛ ehe kpɔbii lɛ kɛ ehe fɔfɔi samai lɛ fɛɛ atsa akɛ nɔ muu kome.

³² Kanetso lɛ ahiɛ niji ekpaa, niji etɛ̃ aye afã kome nɛɛ, ni niji etɛ̃ hu aye afã kome nɛɛ.

³³ Afã kome ahiɛ tɔi etɛ̃ ni afee amɛ tamɔ ŋmɛi; tɔ fɛɛ tɔ kɛ ekpɔ kɛ efɔfɔi sama yɛ nine kome he, ni afã kome lɛ hu ahiɛ tɔi etɛ̃ tamɔ ŋmɛi, tɔ fɛɛ tɔ kɛ ekpɔ kɛ efɔfɔi sama yɛ nine kome he. Nakai sɔŋŋ afee niji ekpaa lɛ fɛɛ ni kanetso lɛ egbala lɛ.

³⁴ Kanetso lɛ shimaatso lɛ diɛŋtsɛ lɛ, ena tɔi ejwɛ ni tamɔ ŋmɛi kɛ amɛhe kpɔbii kɛ fɔfɔi samai.

³⁵ Ni kpɔi amãmɔ kanetso lɛ hu niji ntai enyɔnyɔɔnyɔ lɛ ashishi yɛ shimaatso lɛ he, ni tsɔ̃ɔ akɛ niji ekpaa lɛ ateŋ eko fɛɛ eko lɛ kpɔ yɛ eshishi.

³⁶ Amɛhe tɔi lɛ kɛ fɔfɔi samai lɛ kɛ shimaatso lɛ fɛɛ atsa akɛ nɔ muu kome, ni akɛ shika ŋmiiŋmi atswia fɛɛ.

³⁷ Ofee kanei kpawo omamɔ kanetso lɛ nɔ, koni kɛji asu lɛ amɛkpɛ kɛya hiɛgbɛ.

³⁸ Kanetso lɛ he abɛɛlei lɛ kɛ ehe lagbee nii lɛ akɛ shika ŋmiiŋmi afee.

³⁹ Aŋmɛ shika ŋmiiŋmi talenta kome koni akɛfee kanetso lɛ kɛ ehe nibii nɛɛ fɛɛ.

⁴⁰ Kwɛmɔ ni ofee nibii nɛɛ fɛɛ bɔ ni mikɛtsɔ̃ɔ bo yɛ gɔŋ nɛɛ nɔ lɛ pɛpɛɛpɛ.”