2 Mose 22 - ŊMALƐ KRƆŊKRƆŊ LƐ

Niianajiaŋtoo he mlai

¹ “Kɛji mɔ ko yaju tsina loo too, ni eyagbe aloo eyahɔ̃ɔ lɛ, ekɛ tsinai enumɔ ato tsina kome najiaŋ, ni ekɛ toi ejwɛ ato too kome najiaŋ. Shi kɛ ebɛ nɔ ko lɛ, no lɛ ahɔ̃ɔ lɛ koni akɛtse nii ni eju lɛ.

² Kɛji ana kooloo ni eyaju lɛ hiɛkãalɔ yɛ edɛŋ lɛ, tsina ni jio, teji ni jio, too ni jio, eku ebɔ he toi enyɔ eto najiaŋ.

³ “Kɛji ana julɔ nyɔɔŋ ni eejwa mɔ ko shinaa ni ebote mli, ni atswa lɛ nɔ ni egbo lɛ, mɔ ni tswa lɛ nɔ lɛ yeee ela yi sɔ̃.

⁴ Shi kɛji shwane agbe lɛ lɛ, no lɛ mɔ ni tswa lɛ nɔ lɛ yeɔ ela yi sɔ̃.

⁵ “Kɛji mɔ ko ŋmɛɛ ekooloo he, ni eyaye ŋmɔ loo waintrom ko mli nii, aloo mɔ ko kwɛɛɛ ekooloo lɛ nɔ, ni ekooloo lɛ yaye mɔ kroko ko ŋmɔshinii lɛ, koolootsɛ lɛ kɛ lɛ diɛŋtsɛ eŋmɔshi loo waintrom mli nii ni hi fe fɛɛ ato nii ni afite lɛ najiaŋ.

⁶ “Kɛji mɔ ko wo la, ni etso kɛyamɔ ŋmeii, ni eshã abele kɛ aboŋo, loo abele ni akuko, loo ŋmɔ lɛ, mɔ ni wo la lɛ ato nii ni hiɛ kpãtã lɛ najiaŋ shishiishi.

⁷ “Kɛji mɔ ko kɛ shika loo nibii hã enaanyo shitoo, ni aju nii lɛ yɛ mɔ lɛ we lɛ, ni amɔ julɔ lɛ, julɔ lɛ kɛ nii ni eju lɛ toi enyɔ ato najiaŋ.

⁸ Shi kɛji anaaa julɔ lɛ, no lɛ shĩatsɛ lɛ aba Nyɔŋmɔ hiɛ ni ebatsɔɔ akɛ enine etako enaanyo lɛ nii lɛ he.

⁹ “Niiaheplemɔ fɛɛ ni aaate shi lɛ, tsina he ejɛ jio, teji he jio, too he jio, atade he jio, nɔ fɛɛ nɔ ni eji ni aaapele he ni mɔ ko aaakɛɛ akɛ enɔ ni lɛ, akɛ sane lɛ aba Nyɔŋmɔ hiɛ. Mɔ ni Nyɔŋmɔ aaabu lɛ fɔ lɛ, ekɛ nɔ lɛ toi enyɔ ato enaanyo lɛ nii lɛ najiaŋ.

¹⁰ “Kɛji mɔ ko kɛ eteji loo tsina loo too loo kooloo fɛɛ kooloo hã enaanyo shitoo, ni kooloo lɛ gbo, aloo aye lɛ awui, aloo ofɔ̃yelɔi bamɔ lɛ kɛtee, shi anaaa mɔ ko aye he odase lɛ,

¹¹ mɔ ni akɛ nɔ lɛ hã shitoo lɛ ayakã Yehowa kitã akɛ enine etako enaanyo lɛ nii lɛ he. Nɔtsɛ lɛ akpɛlɛ̃ nɔ, ni mɔ ni akɛ nii lɛ hã shitoo etoŋ nɔtsɛ lɛ najiaŋ.

¹² Shi kɛji ju aju nii lɛ yɛ edɛŋ lɛ eto nɔtsɛ lɛ najiaŋ.

¹³ Kɛji kooloo kakawua ko ni tserɛ kooloo lɛ, ekɛ kooloo gbonyo lɛ abaye odase koni ekato najiaŋ.

¹⁴ “Kɛji mɔ ko yama kooloo ko yɛ enaanyo dɛŋ, ni eye kooloo lɛ awui, aloo egbo be mli ni nɔtsɛ lɛ bɛ jɛi lɛ, mɔ ni yama kooloo lɛ ato najiaŋ shishiishi;

¹⁵ shi kɛji nɔtsɛ lɛ yɛ jɛi lɛ, no lɛ akato najiaŋ. Kɛji apaayeli akɛ kooloo lɛ ba lɛ, no lɛ akato najiaŋ ejaakɛ epaayeli nyɔmɔ ni awo hewɔ eba.”

Jeŋba he mlai

¹⁶ “Kɛji nuu ko yalaka oblayoo foro ni atsɛko ehe baa, ni ekɛ lɛ wɔ lɛ, nuu lɛ ahã yoo lɛ yinii koni etsɔ̃ eŋa.

¹⁷ Shi kɛji yoo lɛ tsɛ ekpɛlɛ̃ɛɛ yoo lɛ kɛ nuu lɛ hãmɔ kwraa lɛ, nuu lɛ ahã bɔ ni ji oblayoo foro yinii kɛ̃.

¹⁸ “Akaŋmɛ yoo ŋkunyaayelɔ gbɛ ni ehi jeŋ.

¹⁹ “Mɔ fɛɛ mɔ ni kɛ kooloo aaawɔ lɛ esa akɛ agbe lɛ.

²⁰ “Mɔ fɛɛ mɔ ni aaashi Yehowa sɛɛ ni eeeyashã afɔle ehã nyɔŋmɔ kroko ko yɛ Yehowa sɛɛ lɛ akpãtã ehiɛ butubutu.

²¹ “Akaye gbɔ sane ni ejaaa, ni akawa lɛ yi ejaakɛ nyɛ hu nyɛyatsɔ̃mɔ gbɔi yɛ Ijipt dã.

²² Akawa yoo okulafo loo awusa yi.

²³ Kɛji awa amɛ yi, ni amɛfo amɛtsɛ mi lɛ, ja mibo amɛyaafo toi.

²⁴ Mimlifu naa aaawa naakpa, ni magbe nyɛ yɛ ta mli, ni nyɛŋamɛi aaatsɔ̃mɔ okulafoi, ni nyɛbii aaatsɔ̃mɔ awusai.

²⁵ “Kɛji ofa mimaŋbii ni kɛ bo yɔɔ lɛ ateŋ ohiafo ko shika lɛ, kaaye lɛ wie, ni kaahe hekpa hu.

²⁶ Kɛji eeeba lɛ po akɛ onaanyo kɛ ehebo aaato bo awaba lɛ, okɛ ehebo lɛ aku sɛɛ ohã lɛ dani hulu ayanyɔ shi,

²⁷ ejaakɛ no pɛ ji nɔ ni ekɛhaa ehe, ehewolo nɔ mama ni. Mɛni eha kɛwɔ? Kɛji efo etsɛ mi lɛ mabo lɛ toi ejaakɛ mɔbɔnalɔ ji mi.

²⁸ “Kaawie oshi Nyɔŋmɔ, ni kaalomɔ maŋ onukpa.

²⁹ “Kɛji oŋmɔshi nii ba, ni kɛ oŋa owain kɛ omu lɛ, kaashashao shi ni okɛ Nyɔŋmɔ nɔ lɛ abahã lɛ. Jɔɔmɔ obihii ateŋ kromɔ lɛ nɔ ohã mi.

³⁰ Nakai nɔŋŋ hu ofee otsinai kɛ toi. Kooloo kromɔ nuu lɛ ehi enyɛ masɛi gbii kpawo, ni gbi ni ji kpaanyɔ lɛ ojɔɔ enɔ ohã mi.

³¹ “Nyɛaatsɔ̃ mɛi krɔŋkrɔŋ nyɛhã mi. No hewɔ lɛ, loo ni ŋaŋ kooloo etserɛ lɛ lɛ nyɛkayea, ashɛrɛ ashwie ahã gbei.