2 Mose 17 - ŊMALƐ KRƆŊKRƆŊ LƐ

Nu jɛ tɛsaa mli

¹ Israelbii lɛ fɛɛ fã kɛjɛ Sin ŋa lɛ nɔ. Amɛtotoo shi yɛ gbɛ teŋ yɛ Yehowa famɔ naa kɛyashi amɛyashɛ Refidim; shi nu bɛ jɛi ni maŋ lɛ baanu.

² No hewɔ lɛ, amɛkɛɛ Mose akɛ, “Hã wɔ nu wɔnu!” Mose here amɛ nɔ, ni ebi amɛ akɛ, “Mɛɛ hewɔ nyɛkɛ mi beɔ? Mɛɛ hewɔ nyɛkaa Yehowa?”

³ Shi kumai ye maŋ lɛ yɛ jɛi, ni amɛwie huhuuhu amɛshi Mose amɛkɛɛ, “Mɛɛ hewɔ obajie wɔ yɛ Ijipt? Koni okɛ kumai abagbe wɔ kɛ wɔbii kɛ wɔkooloi?”

⁴ No hewɔ lɛ, Mose bo etsɛ Yehowa ekɛɛ, “Te mafee maŋ nɛɛ mahã tɛŋŋ? Tɛ amɛheɔ amɛtswia mi nɛɛ!”

⁵ Yehowa kɛɛ Mose akɛ, “Halamɔ Israel onukpai lɛ ateiaŋ mɛi komɛi ofata ohe, ni okɔ otso lɛ ni okɛtswa Nilo Faa lɛ mli lɛ ohiɛ odɛ̃, ni okɛ amɛ atsɔ̃ maŋbii lɛ ahiɛ kɛya.

⁶ Naa, mibadamɔ tɛsaa lɛ nɔ, ni nu baajɛ mli aba koni maŋ lɛ anu.” Ni Mose fee nakai yɛ maŋ onukpai lɛ ahiɛ.

⁷ Ni Mose wo jɛi gbɛi akɛ Masa kɛ Meriba yɛ shwamɔ ni Israelbii lɛ shwa Yehowa lɛ kɛ nɔ ni amɛwie amɛkɛka lɛ akɛ, “Ni Yehowa yɛ wɔteŋ kɛ̃ nɛ?” lɛ hewɔ.

Israelbii kɛ Amalekbii wu ta

⁸ Amalekbii lɛ fã ta kɛbanina Israelbii lɛ yɛ Refidim, ni amɛkɛ amɛ wu.

⁹ Ni Mose fã Yoshua ekɛɛ, “Halamɔ hii ni amɛya amɛkɛ Amalekbii lɛ ayawu ahã maŋ lɛ. Mi lɛ mibadamɔ gɔŋkpɔ lɛ yiteŋ wɔ, ni mahiɛ Nyɔŋmɔ tso lɛ yɛ midɛ̃.”

¹⁰ Yoshua fee bɔ ni Mose fã lɛ lɛ, ni amɛtee amɛkɛ Amalekbii lɛ yawu, ni Mose kɛ Aaron kɛ Hur kwɔ gɔŋkpɔ lɛ kɛtee eyiteŋ.

¹¹ Kɛji Mose wo enine nɔ kɛtee ŋwɛi pɛ, kɛkɛ lɛ Israelbii lɛ anine miitsɔ̃ Amalekbii lɛ anɔ; shi kɛji Mose kɛ enine ba shi pɛ Amalekbii lɛ anine miitsɔ̃ Israelbii lɛ anɔ.

¹² Shi Mose niji bɔ̃i lɛ shɔ̃ɔ, ni no hewɔ lɛ, awo tɛ akɛto Mose shishi ni eho eta nɔ, ni Aaron kɛ Hur hiɛ eniji lɛ amli, mɔ kome yɛ biɛ, ni mɔ kome hu yɛ biɛ, ni eniji lɛ ma shi shiŋŋ kɛyashi hulushinyɔɔ mli.

¹³ Ni Yoshua kpãtã Amalek kɛ emaŋ lɛ hiɛ.

¹⁴ Kɛkɛ ni Yehowa kɛɛ Mose akɛ, “Ŋmaa kunimyeli nɛɛ he sane lɛ owo wolo mli ofɔ̃ shi koni etsɔ̃ kaimɔ nɔ; ni okpã owo Yoshua toiŋ akɛ mibagbe Amalek kwrakwra yɛ shikpɔŋ nɛɛ nɔ.”

¹⁵ Ni Mose ma afɔleshãa latɛ yɛ jɛi, ni ewo lɛ gbɛi akɛ “Yehowa ji miflaŋaa”,

¹⁶ ni ekɛɛ, “Nyɛwoa Yehowa aflaŋaa lɛ nɔ. Yehowa kɛ Amalek baawu kɛjɛ yinɔ kɛyaashi yinɔ.”