2 Mose 10 - ŊMALƐ KRƆŊKRƆŊ LƐ

Baalabii ba

¹ Kɛkɛ ni Yehowa kɛɛ Mose akɛ, “Yaa Farao ŋɔɔ, shi mihã ekpliŋ etsui, ni etsuji lɛ hu ekpliŋ amɛtsui bɔ ni afee ni mafee naakpɛɛ nii nɛɛ fɛɛ matsɔ̃ɔ amɛ,

² koni ogba obii kɛ obii abii nibii ni mifee yɛ Ijipt, kɛ naakpɛɛ okadii ni mifee yɛ amɛteŋ, ni okpã owo amɛtoiiaŋ koni nyɛna nyɛle akɛ mi ji Yehowa.”

³ Kɛkɛ ni Mose kɛ Aaron tee Farao ŋɔɔ, ni amɛyakɛɛ lɛ akɛ, “Bɔ ni Yehowa, Hebribii aNyɔŋmɔ lɛ, kɛɛ nɛ, ‘Mɛɛ beyinɔ po oookpɛ̃lɛ koni oba ohe shi ohã mi? Hã mimaŋ lɛ aya koni amɛyaja mi.

⁴ Shi kɛji okpɛ̃lɛɛɛ ni mimaŋ lɛ aya lɛ, no lɛ naa, wɔ kpaakpa wɔ lɛ, mahã baalabii aba okpokpai lɛ anɔ,

⁵ ni amɛaaha shi bɔ sɔŋŋ ni anaŋ shikpɔŋ lɛ tete, ni amɛaaye nii fɛɛ ni shwɛ hã nyɛ yɛ ŋa nɔ ni nyɔŋmɔŋtɛi lɛ kpãtãaa hiɛ lɛ. Amɛaaye bai fɛɛ ni tsɛ̃rɛɔ yɛ nyɛtsei anɔ yɛ ŋa nɔ lɛ.

⁶ Ni amɛaayimɔ oshĩai kɛ otsuji fɛɛ ashĩai kɛ Ijiptbii fɛɛ ashĩai amli tɔtɔɔtɔ, bɔ ni otsɛmɛi kɛ oniimɛi enako ehenɔ pɛŋ kɛjɛ be ni afɔ amɛ kɛbashi ŋmɛnɛ gbi nɛɛ.’ ” Ni Mose tsɔ̃ ehe, ni eshi Farao.

⁷ Kɛkɛ ni Farao tsuji lɛ kɛɛ lɛ akɛ, “Mɛɛ beyinɔ nɔŋŋ ni nuu nɛɛ aaahao wɔ kɛyashi? Hã Israelbii lɛ aya ni amɛyasɔ̃mɔ Yehowa, amɛNyɔŋmɔ lɛ. Ani oleko lolo akɛ Ijipt hiɛ miikpãtã?”

⁸ No hewɔ lɛ, ayatsɛ Mose kɛ Aaron kɛba Farao hiɛ ekoŋŋ, ni ekɛɛ amɛ akɛ, “Nyɛyaa ni nyɛyasɔ̃mɔ Yehowa, nyɛNyɔŋmɔ lɛ. Shi moŋ, namɛi kɛ namɛi ji mɛi ni baaya lɛ?”

⁹ Mose jie naa ekɛɛ, “Wɔbii bibii lɛ ni jio, wɔnukpai lɛ ni jio, wɔbihii jio, wɔbiyei jio, wɔtoi kɛ wɔtsinai jio wɔkɛ fɛɛ baaya ejaakɛ wɔyaaye gbi jurɔ wɔhã Yehowa.”

¹⁰ Farao kɛɛ amɛ akɛ, “Kɛ miŋmɛ gbɛ ni nyɛ kɛ nyɛbii lɛ tee fĩĩ bɛ Yehowa ejɔɔ nyɛ. Kolɛ jeee yiŋ fɔŋ ko nyɛto nɛɛ?

¹¹ Dabida, nyɛhii lɛ kɛkɛ nyɛyaa nyɛyasɔ̃mɔa Yehowa, ejaakɛ no nɔŋŋ ji nɔ ni nyɛtaoɔ.” Ni ashwie Mose kɛ Aaron kɛje Farao hiɛ.

¹² Kɛkɛ ni Yehowa kɛɛ Mose akɛ, “Kpã onine mli yɛ Ijipt shikpɔŋ lɛ nɔ koni baalabii aba shikpɔŋ lɛ nɔ ni amɛbaye bai fɛɛ kɛ nibii fɛɛ ni nyɔŋmɔŋtɛi lɛ eshi lɛ.”

¹³ Mose wo etso lɛ nɔ, ni Yehowa hã bokã kɔɔyɔɔ ko batswa yɛ shikpɔŋ lɛ nɔ, gbi lɛ shwane kɛ nyɔɔŋ fɛɛ, ni be ni je tsɛreɔ lɛ bokã kɔɔyɔɔ lɛ kɛ baalabii lɛ eba.

¹⁴ Baalabii lɛ bashwie Ijipt shikpɔŋ lɛ nɔ fɛɛ. Amɛha Ijipt kpokpai lɛ anɔ nyɛŋɛnyɛŋɛ. Baalabii bako ni tamɔ amɛ nakai dã, ni amɛsɛɛ hu eko baŋ nakai dɔŋŋ.

¹⁵ Ejaakɛ amɛha shikpɔŋ muu lɛ fɛɛ nɔ, ni shikpɔŋ lɛ nɔ wo duŋ, ni amɛye shikpɔŋ lɛ nɔ bai fɛɛ kɛ tsei ni nyɔŋmɔŋtɛi lɛ shi lɛ anɔ yibii fɛɛ yɛ Ijipt shikpɔŋ lɛ nɔ fɛɛ.

¹⁶ Kɛkɛ ni Farao tsu oya mli, ni ayatsɛ Mose kɛ Aaron kɛba, ni ekɛɛ amɛ akɛ, “Mifee esha mishi Yehowa, nyɛ Nyɔŋmɔ lɛ, ni mifee nyɛ hu esha.

¹⁷ No hewɔ lɛ, agbɛnɛ okɛ mihe esha lɛ afa mi, shi kome nɛɛ kɛkɛ, ni nyɛkpa Yehowa nyɛNyɔŋmɔ lɛ, fai koni ejie nɛkɛ toigbalamɔ ni gbeɔ mɔ nɛɛ kɛkɛ yɛ minɔ.”

¹⁸ Mose shi Farao etee, ni eyakpa Yehowa fai.

¹⁹ Ni Yehowa hã anai kɔɔyɔɔ ni naa wa naakpa batswa, ni eloo baalabii lɛ blublu kɛtee eyashwie Ŋshɔ Tsuru lɛ mli. Baalabii lɛ ateŋ ekome folo nɛkɛ eshwɛɛɛ yɛ Ijipt kpokpai lɛ fɛɛ nɔ.

²⁰ Shi Yehowa hã Farao kpliŋ etsui, ni ehãaa Israelbii lɛ aya.

Duŋ wo

²¹ Agbɛnɛ Yehowa kɛɛ Mose akɛ, “Kpã onine mli kɛya ŋwɛi koni duŋ awo yɛ Ijipt shikpɔŋ lɛ nɔ, duŋ kabitii.”

²² Mose kpã enine mli kɛtee ŋwɛi, kɛkɛ ni duŋ kpii wo yɛ Ijipt shikpɔŋ lɛ nɔ fɛɛ gbii etɛ̃.

²³ Duŋ nɛɛ wo bɔ ni mɔ ko mɔ ko enaaa enaanyo, ni mɔ ko mɔ ko shiii he ni duŋ lɛ banina lɛ yɛ lɛ kɛyashi gbii etɛ̃. Shi jeŋ tse heŋŋ yɛ Israelbii lɛ ashihilɛhei lɛ.

²⁴ Kɛkɛ ni Farao tsɛ Mose ni ekɛɛ lɛ akɛ, “Nyɛyaa koni nyɛyasɔ̃mɔ Yehowa; nyɛbaanyɛ nyɛkɛ nyɛbii lɛ aya, shi nyɛshĩa nyɛtoi kɛ nyɛtsinai lɛ.”

²⁵ Shi Mose kɛɛ Farao akɛ, “Ja ohã wɔna kooloi hu ni akɛshãa gbee afɔle kɛ shãa afɔlei wɔhiɛ wɔdɛ̃ ni wɔkɛyashã afɔle wɔhã Yehowa, wɔNyɔŋmɔ lɛ.

²⁶ Wɔkooloi aku lɛ hu ja wɔkɛtee, ni ashiŋ kooloo kome tete yɛ sɛɛ, ejaakɛ nomɛi eko wɔkɛyaasɔmɔ Yehowa, wɔNyɔŋmɔ lɛ. Wɔ diɛŋtsɛ kwraa wɔleee amɛteiaŋ nii ni wɔkɛyaasɔmɔ Yehowa akɛ ja wɔshɛ jɛi dã.”

²⁷ Shi Yehowa hã Farao kpliŋ etsui, ni ekpɛlɛ̃ɛɛ akɛ Israelbii lɛ aya.

²⁸ Ni Farao bɔ Mose kɔkɔ ekɛɛ, “Jee mihiɛ ni oya. Okwɛ ohe ni ahi koni okaba mihiɛ dɔŋŋ, ejaakɛ gbi nɔ ni ooobapue ekoŋŋ yɛ mihiɛ lɛ gbo ooogbo.”

²⁹ Mose here Farao nɔ ni ekɛɛ, “Ojogbaŋŋ, mibaŋ ohiɛ dɔŋŋ.”