2 Kronika 9 - ŊMALƐ KRƆŊKRƆŊ LƐ

Sheba Maŋnyɛ lɛ basara Maŋtsɛ Solomon

¹ Sheba Maŋnyɛ lɛ nu Maŋtsɛ Solomon gbɛi ni ehehe yɛ Nyɔŋmɔ henii ni ele lɛ hewɔ. Kɛkɛ ni eyiŋ eba Yerusalɛm koni ebabi Solomon saji ni wawai koni ekɛka Solomon nilee lɛ naawalɛ ekwɛ. Sheba Maŋnyɛ nɛɛ ba kɛ esɛɛbii babaoo diɛŋtsɛ kɛ yoomai hu ni tereteree tsofakɛŋmai kɛ shika babaoo diɛŋtsɛ kɛ ojarawatɛi hu. Be ni maŋnyɛ lɛ kɛ Solomon kpe hiɛ kɛ hiɛ lɛ, ebi Solomon saji blublu ni eto yɛ eyiŋ.

² Solomon hã lɛ saji ni ebibii lɛ lɛ fɛɛ hetoo; ekoeko kwraa bɛ mli ni Solomon nyɛɛɛ lɛ naa atsɔ̃ɔ.

³ Sheba Maŋnyɛ lɛ na Solomon nilee lɛ mlikwɔlɛ, ni ena mɔɔ lɛ hu ni ema akɛ maŋtsɛ we lɛ.

⁴ Ena niyenii ni akɛbamamɔ Solomon niyeniiashi lɛ, kɛ etsuji lɛ ashitaramɔ yɛ okplɔ̃ he. Ena bɔ ni ato nitsumɔi ni yɔɔ maŋtsɛ we lɛ mli lɛ ahe gbɛjianɔ ahã sɔ̃ɔlɔi lɛ kɛ sɔ̃ɔlɔi lɛ atadei, kɛ bɔ ni niyeniiashi daawolɔi lɛ ewula amɛhã. Agbɛnɛ ena afɔlei ni ashãa fɛɛ ni Solomon shãa yɛ Yehowa Sɔlemɔ we lɛ hu; kɛkɛ ni maŋnyɛ lɛ he jɔ̃ ehe naakpa.

⁵ Ni ekɛɛ Maŋtsɛ Solomon akɛ, “Ohe saji kɛ onilee ni minu yɛ mi diɛŋtsɛ mishikpɔŋ lɛ nɔ lɛ anɔkwale ni.

⁶ Tsɛbelɛ miheee saji ni minu lɛ miyeee kɛyashi mibashɛ biɛ. Shi agbɛnɛ mibana kɛ mihiŋmɛitsei enyɔ nɛɛ. Moaŋ saji ni agbagbaa mi lɛ shɛɛɛ onilee lɛ mlijaa fã tete. Nibii ni agba mi lɛ baaa he kwraa.

⁷ Ajɔɔ owebii. Otsuji ni sɔmɔɔ bo, ni no hewɔ lɛ, amɛbɛŋkɛ bo be fɛɛ be ni amɛnaa hegbɛ amɛboɔ onaa nilee toi lɛ, amɛto aahu kpele.

⁸ Ajie Yehowa, oNyɔŋmɔ lɛ, yi akɛ esa ehiɛ ni ekɛ bo ta emaŋtsɛ sɛi lɛ nɔ koni oye maŋtsɛ yɛ biɛ. Akɛni oNyɔŋmɔ lɛ miidɔ Israel he ni eeesumɔ akɛ ebaa amɛyi kɛya naanɔ lɛ, no hewɔ eto bo Israel maŋtsɛ lɛ koni okojo ni oye jalɛ sane yɛ amɛteŋ.”

⁹ Sheba Maŋnyɛ lɛ ke maŋtsɛ Solomon shika ŋmiiŋmi ni tsiimɔ ji talentai oha kɛ nyɔŋmai enyɔ kɛ tsofakɛŋma pii diɛŋtsɛ kɛ ojarawatɛi hu. Anako tsofakɛŋma ni tamɔ nɔ ni Sheba Maŋnyɛ lɛ kɛbake Maŋtsɛ Solomon lɛ eko dã.

¹⁰ Maŋtsɛ Huram tsuji lɛ kɛ Solomon hu tsuji lɛ ni yaa Ofir amɛyaŋɔɔ shika kɛbaa lɛ, loɔ tso kpakpa titri ko hu kɛbaa kɛ ojarawatɛi hu.

¹¹ Ni Maŋtsɛ Solomon kɛ tso lɛ fee atrakpoi yɛ Yehowa Sɔlemɔtsu lɛ mli kɛ maŋtsɛ we lɛ hu mli. Akɛ eko hu fee saŋkui kɛ obentai akɛhã lalɔi lɛ. Anako nibii nɛɛ ahenɔ yɛ Yuda shikpɔŋ lɛ nɔ dã.

¹² Maŋtsɛ Solomon hã Sheba Maŋnyɛ lɛ nibii fɛɛ ni maŋnyɛ lɛ diɛŋtsɛ je gbɛ ebi, dani soro nii ni Solomon diɛŋtsɛ hu ke maŋnyɛ lɛ. Kɛkɛ ni Sheba Maŋnyɛ lɛ ku esɛɛ, ni ekɛ etsuji yiŋ tee Sheba shikpɔŋ lɛ nɔ.

Nii ni Maŋtsɛ Solomon na

¹³ Shika ŋmiiŋmi ni ba Maŋtsɛ Solomon dɛŋ yɛ afi mli lɛ tsiimɔ ji talentai ohai ekpaa kɛ nyɔŋmai ekpaa kɛ ekpaa;

¹⁴ dani soro shika ni jarayelɔi lɛ kɛ guɔyelɔi lɛ hu kɛbaa lɛ. Arabia maŋtsɛmɛi fɛɛ kɛ amralofoi ni kwɛɔ Israel shikpɔŋ lɛ nɔ kpokpai lɛ anɔ lɛ hu bahãa Maŋtsɛ Solomon shika kɛ jwiɛtɛi.

¹⁵ Maŋtsɛ Solomon hã atswia shika ni akɛfee tsɛŋi agboi ohai enyɔ. Tsɛŋi nɛɛ ekome ye shika ni tsiimɔ ji kiloi kpawo.

¹⁶ Afee tsɛŋi bibii ohai etɛ̃ hu ni ekome yeɔ shika kiloi etɛ̃. Maŋtsɛ Solomon kɛ tsɛŋi nɛɛ yato Lebanon Kooŋ Tsu lɛ mli.

¹⁷ Maŋtsɛ Solomon hã akɛ shuɔ wu fee maŋtsɛ sɛi kpeteŋkple ko, ni akɛ shika ŋmiiŋmi ha he.

¹⁸ Akwɔɔ atrakpoi ekpaa dani ashɛɔ maŋtsɛ sɛi nɛɛ he; ni nane shi maŋoo ni akɛ shika eha he hu ma maŋtsɛ sɛi lɛ hiɛ. Nine yɛ maŋtsɛ sɛi lɛ he biɛ kɛ biɛ, ni jata ni ashɔ̃ kome damɔ sɛi lɛ nine lɛ masɛi.

¹⁹ Ato jatai ni ashɔ̃ nyɔŋma kɛ enyɔ amãmɔ atrakpoi ekpaa lɛ fɛɛ anɔ. Atrakpoi lɛ ateŋ eko fɛɛ eko naabu yɛ ekoŋgbɛ lɛ, jata kome ma jɛi. Afeko nii nɛɛ henɔ pɛŋ yɛ maŋtsɛ ko maŋtsɛ ko yinɔ.

²⁰ Maŋtsɛ Solomon kpuji fɛɛ ni ekɛnuɔ nii lɛ shika akɛfee. Tsɛnsii kɛ amɛhenɔi nibii fɛɛ hu ni yɔɔ Lebanon Kooŋ Tsu lɛ mli lɛ shika ŋmiiŋmi nɔŋŋ akɛfee. Solomon yinɔ lɛ abuuu jwiɛtɛi ahãaa fɛifɛi.

²¹ Ejaakɛ eyɛ lɛji ni fata Maŋtsɛ Huram lɛji lɛ ahe kɛyaa Tarshish kɛbaa. Daa afii etɛ̃ lɛ Solomon lɛji lɛ jɛɔ Tarshish baa ni amɛhiɛ shika kɛ jwiɛtɛi kɛ shuɔwu kɛ ofoi kɛ aŋfraŋi.

²² Shikpɔŋ lɛ nɔ fɛɛ lɛ maŋtsɛ ko maŋtsɛ ko kɛ Solomon yeee egbɔ yɛ ninamɔ kɛ nilee gbɛfaŋ.

²³ Maŋtsɛmɛi ni yɔɔ shikpɔŋ lɛ nɔ fɛɛ tao akɛ amɛ kɛ Solomon akpe hiɛ kɛ hiɛ kɛbo enilee ni Nyɔŋmɔ kɛduro lɛ lɛ toi.

²⁴ Maŋtsɛmɛi nɛɛ ateŋ mɔ fɛɛ mɔ hiɛɔ edɛŋ nikee kɛbaa: jwiɛtɛi nibii kɛ shika nibii kɛ atadei kɛ tawuunii kɛ tsofakɛŋma kɛ okpɔŋɔi kɛ tejiokpɔŋɔi; ni nɛkɛ akɛ nibii nɛɛ yaa ni abaa daa afi.

²⁵ Agbɛnɛ Maŋtsɛ Solomon yɛ tayaa shwiilii okpɔŋɔi atsui akpei ejwɛ, dani eyɛ tabilɔi okpɔŋɔnɔtalɔi hu akpei nyɔŋma kɛ enyɔ. Eto amɛteŋ mɛi komɛi yɛ ehe yɛ Yerusalɛm, ni fãbii ni shwɛ lɛ ejara amɛ ewo maji krokomɛi amli.

²⁶ Maŋtsɛmɛi fɛɛ yɛ Solomon shishi kɛjɛ Eufrate Faa lɛ naa kɛyashi Filistibii ashikpɔŋ lɛ kɛ Ijipt husui lɛ anɔ.

²⁷ Maŋtsɛ Solomon hã jwiɛtɛi bu tamɔ tɛ yɛ Yerusalɛm, ni ehã tsenedru tsei tsɔ̃mɔ tamɔ sikamore tsei ni yɔɔ Israel gɔji ajɔiaŋ shikpɔji anɔ lɛ.

²⁸ Maŋtsɛ Solomon shɛɔ okpɔŋɔi kɛjɛɔ Ijipt kɛ maŋsɛɛ majimaji fɛɛ anɔ kɛbaa.

Maŋtsɛ Solomon he sane lɛ naamuu

²⁹ Maŋtsɛ Solomon he saji ni eshwɛ lɛ, aŋmala kɛjɛ shishijee kɛyata enaagbee yɛ woji ni agbɛii baa nɛɛ amli: Natan he Saji Awolo lɛ, kɛ Ahia, Shilonyo Gbalɔ lɛ, kɛ Gbalɔ Ido Ninaa lɛ ni ji wolo lɛ ni wieɔ Nebat bi Yeroboam Maŋtsɛyeli lɛ hu he lɛ.

³⁰ Solomon ye Israel fɛɛ maŋtsɛ yɛ Yerusalɛm afii nyɔŋmai ejwɛ.

³¹ Solomon tsɔ̃ esɛɛ, ni afu lɛ yɛ etsɛ David maŋ lɛ mli, kɛkɛ ni ebi Rehoboam baye maŋtsɛ yɛ esɛɛ.