2 Kronika 8 - ŊMALƐ KRƆŊKRƆŊ LƐ

Nibii wuji ni Solomon fee

¹ Afii nyɔŋmai enyɔ ni Solomon kɛma Yehowa Sɔlemɔtsu lɛ kɛ lɛ diɛŋtsɛ hu emaŋtsɛ we lɛ sɛɛ lɛ,

² esaa maji ni Maŋtsɛ Hiram hã lɛ lɛ, ni ehã Israelbii yahi jɛi.

³ Solomon fã ta kɛtee ni eyaŋɔ Hamat-Zoba shikpɔŋ lɛ,

⁴ ni ewaje Palmpra (Tabor), ni ji shiaŋa lɛ mli maŋ lɛ.

⁵ Maji krokomɛi hu ni Solomon saa ji Gɔŋ nɔ gbɛ Bet-Horon maŋ lɛ kɛ Jɔɔŋgbɛ Bet-Horon maŋ lɛ hu, ni ji maji ni atswa gbogbo awo amɛhe kɛ amɛnaa agboi kɛ amɛsɛɛ adabaŋi hu lɛ.

⁶ Esaa Baalat kɛ maji fɛɛ ni, lɛ Solomon lɛ, eyɔɔ ni atoɔ niyenii yɛ amɛmli lɛ, kɛ hei ni atoɔ etayaa shwiilii yɛ lɛ, kɛ hei hu ni ekpɔŋɔtalɔi lɛ yɔɔ lɛ. Ni nɔ fɛɛ nɔ ni Solomon to eyiŋ akɛ ebaama yɛ Yerusalɛm kɛ Lebanon kɛ agbɛnɛ shikpɔŋ tso muu lɛ ni eyeɔ nɔ lɛ nɔ lɛ, efee.

⁷ Hitbii kɛ Amorbii kɛ Perizbii kɛ Hivbii kɛ Yebusbii lɛ ateŋ mɛi fɛɛ ni shwɛ yɛ Kanaan shikpɔŋ lɛ nɔ, ni jeee Israelbii ji amɛ lɛ,

⁸ Solomon nyɛ amɛshwiei ni Israelbii lɛ egbeee lɛ anɔ, ni amɛtsu nii amɛhã lɛ. Ni aaye amɛ nɛkɛ nyɔŋ nɛɛ kɛbashi ŋmɛnɛ.

⁹ Shi Israelbii lɛ, Solomon kɛ amɛteŋ mɔ ko mɔ ko efeee nyɔŋ koni etsu nii ehã lɛ, Amɛ amɛ ji etabilɔi kɛ esafoiatsɛmɛi kɛ etayaa shwiiliiatsɛmɛi anɔ onukpai kɛ ekpɔŋɔnɔtalɔi lɛ anɔkwɛlɔi.

¹⁰ Ni Maŋtsɛ Solomon to tsujinukpai ohai enyɔ kɛ nyɔŋmai enumɔ, ni amɛ amɛkwɛɔ nitsumɔi srɔtoi lɛ anɔ yɛ majimaji fɛɛ amli.

¹¹ Solomon yakpala eŋa Ijipt maŋtsɛ biyoo lɛ kɛjɛ David Maŋ lɛ mli kɛba shĩa ni eje gbɛ ema ehã lɛ lɛ mli ejaakɛ Solomon kɛɛ akɛ, “Ebɛ akɛ miŋa lɛ hiɔ Israel Maŋtsɛ David we lɛ mli, ejaakɛ he fɛɛ he ni ato Yehowa Kpãŋmɔ Adeka lɛ yɛ lɛ he krɔŋkrɔŋ ni.”

¹² Solomon shã shãa afɔlei ekɛhã Yehowa yɛ Yehowa afɔleshãa latɛ ni ema ema Sɔlemɔtsu lɛ koi lɛ hiɛ lɛ nɔ.

¹³ Gbi fɛɛ gbi kɛ enɔ afɔle ni ashãa bɔ ni Mose wo he kitã akɛ ashã lɛ. Solomon shã Hejɔɔmɔgbii afɔlei lɛ, kɛ nyɔji hei ashishijee afɔlei lɛ kɛ afi mli gbii juji etɛ̃ lɛ hu anɔ afɔlei lɛ, nomɛi ji Ma Akpiti Gbijurɔ lɛ kɛ Otsii Agbijurɔ lɛ kɛ Asesei Agbijurɔ lɛ.

¹⁴ Solomon ye akpɔi ni etsɛ David ewo lɛ hu anɔ pɛpɛɛpɛ ekɛto daa gbi sɔɔmɔ nitsumɔi lɛ ahe gbɛjianɔ ehã osɔfoi lɛ akui lɛ kɛ Levibii lɛ hu ni waa osɔfoi lɛ kɛ lalai alamɔ kɛ nitsumɔi hu lɛ, Eto gbɛjianɔ hu ni Sɔlemɔtsu lɛ hebulɔi lɛ yaa kuikui daa gbi amɛyabuɔ Sɔlemɔtsu lɛ agboi lɛ anaa bɔ ni David, Nyɔŋmɔ gbɔmɔ lɛ, wo he akpɔi lɛ pɛpɛɛpɛ.

¹⁵ Ni akpɔi hu ni Maŋtsɛ David ewo osɔfoi kɛ Levibii lɛ yɛ nitoohei lɛ ahe kɛ saji krokomɛi fɛɛ ahe lɛ, aye fɛɛ nɔ pɛpɛɛpɛ.

¹⁶ Belɛ nii fɛɛ ni Solomon wo amɛtsumɔ nɔ kɛjɛ gbi nɔ ni ato Yehowa Sɔlemɔtsu lɛ shishi aahu kɛyashi agbe naa ni Yehowa Sɔlemɔtsu lɛ ye emuu lɛ, atsu kɛgbe naa kɛ omanye.

¹⁷ Kɛkɛ ni Solomon yiŋ etee lɛji amaamɔhei enyɔ ni ji Ezion-Geber kɛ Elat yɛ Edom shikpɔŋ lɛ ŋshɔnaa.

¹⁸ Maŋtsɛ Hiram wo lɛ diɛŋtsɛ esɛrɛfoi ni ahe esa gbɛ kɛ lɛji kɛba eŋɔɔ, ni Solomon tsuji bafata asrɛfoi lɛ ahe ni amɛyiŋ amɛtee Ofir amɛyaloo shika ŋmiiŋmi ni tsiimɔ ji talentai ohai ejwɛ kɛ nyɔŋmai enumɔ amɛbahã Maŋtsɛ Solomon.