2 Kronika 5 - ŊMALƐ KRƆŊKRƆŊ LƐ

¹ Be ni Solomon ekwɛ ni agbe nibii fɛɛ ni atsuɔ yɛ Yehowa Sɔlemɔtsu lɛ he naa lɛ, eloo jwiɛtɛi kɛ shika kɛ nibiinibii lɛ fɛɛ ni etsɛ David ejɔɔ nɔ eke Yehowa lɛ kɛba, ni ekɛbato Sɔlemɔtsu lɛ nitoohe lɛ.

Akɛ Kpãŋmɔ Adeka lɛ ba Sɔlemɔtsu lɛ mli

² Agbɛnɛ Maŋtsɛ Solomon tsɛ Israel onukpai lɛ kɛ akutsei lɛ kɛ Israelbii atsɛmɛi awei lɛ amli onukpai lɛ fɛɛ kɛbakpe. Akpe yɛ Yerusalɛm koni ayawo Yehowa Kpãŋmɔ Adeka lɛ yɛ David maŋ, ni ji Zion, lɛ kɛba Sɔlemɔtsu lɛ mli.

³ Israel hii lɛ fɛɛ anaa bakpe shi yɛ Asesei Agbijurɔ, ni ayeɔ yɛ nyɔŋ ni ji kpawo lɛ nɔ lɛ nɔ.

⁴ Be ni Israelbii hii lɛ fɛɛ eshɛ shi lɛ, Levibii lɛ wo Kpãŋmɔ Adeka lɛ.

⁵ No hewɔ lɛ, osɔfoi lɛ kɛ Levibii lɛ fã Kpee Buu lɛ hu, ni amɛhole nibii krɔŋkrɔŋi fɛɛ ni yɔɔ emli lɛ hu kɛba.

⁶ Maŋtsɛ Solomon kɛ Israel asafo muu lɛ fɛɛ ni naa ekpe shi lɛ yabua shi yɛ Kpãŋmɔ Adeka lɛ hiɛ kɛbote Sɔlemɔtsu lɛ mli.

⁷ Osɔfoi lɛ wo Yehowa Kpãŋmɔ Adeka lɛ kɛtee ni amɛkɛyama egbɛhe lɛ yɛ Sɔlemɔtsu lɛ sɛɛtsu lɛ ni ji He Krɔŋkrɔŋ Fe Fɛɛ lɛ mli, yɛ kerubim lɛ afiji lɛ ashishi.

⁸ Ejaakɛ kerubim lɛ elɛɛ amɛfiji lɛ amli kɛha Kpãŋmɔ Adeka lɛ maahe lɛ nɔ. Ni kerubim lɛ diɛŋtsɛ lɛ, amɛkete adeka lɛ kɛ ehe tsei lɛ anɔ yɛ amɛŋwɛigbɛ.

⁹ Tsei nɛɛ kwɔlɔ, ni anaa amɛnaabui kɛji adamɔ He Krɔŋkrɔŋ Fe Fɛɛ lɛ hiɛ yɛ sɛɛtsu lɛ mli; shi moŋ anaaa yɛ kpo lɛ nɔ he ko he ko. Tsei nɛɛ yɛ jɛi kɛbashi ŋmɛnɛ.

¹⁰ Nɔ ko nɔ ko bɛ Kpãŋmɔ Adeka lɛ mli ja tɛi tɛtɛrɛbii enyɔ lɛ ni Mose kɛto mli yɛ Horeb, ni ji Sinai Gɔŋ, he ni Yehowa kɛ Israelbii kpãŋ yɛ be mli ni amɛjɛ Ijipt amɛbaa lɛ.

Yehowa Anunyam lɛ

¹¹ Nɛkɛ be nɛɛ mli lɛ osɔfoi akui srɔtoi lɛ amli bii fɛɛ etsuu amɛhe kɛfee amɛhe krɔŋkrɔŋ amɛto; mɔ ko emɛɛɛ akɛ eshɛ be ni ekɛ sɔmɔɔ dã;

¹² asaŋ Levibii lalatsɛmɛi, ni ji Asaf kɛ Heman kɛ Yedutun kɛ amɛshishibii lɛ kɛ amɛwekumɛi lɛ ewula kɛ klala atadei fɛɛfɛji, ni amɛhiɛhiɛ ŋmɛji kɛ bɛji kɛ saŋkui kɛdamɔ afɔleshãa latɛ lɛ bokãgbɛ. Osɔfoi oha kɛ nyɔŋmai enyɔ ni ji tɛtɛrɛmantɛrɛkpãlɔi fata lalɔi lɛ ahe.

¹³ Tɛtɛrɛmantɛrɛkpãlɔi nɛɛ kɛ lalatsɛmɛi lɛ anitsumɔ ji akɛ amɛla kɛjie Yehowa yi, asaŋ kɛda lɛ shi hu. Be ni osɔfoi lɛ je kpo nɔŋŋ yɛ He Krɔŋkrɔŋ Fe Fɛɛ lɛ, kɛkɛ ni Levibii lɛ wo lala nɔ kɛ tɛtɛrɛmantɛrɛi kɛ ŋmɛji kɛ saŋkui srɔtoi, ni amɛ jie Yehowa yi amɛkɛɛ, “Yehowa hi, ejaakɛ emɔbɔnalɛ sɛɛ efooo, emɔbɔnalɛ lɛ yɛ kɛmiiya naanɔ.” Kɛkɛ ni atatu bayi Yehowa Sɔlemɔtsu lɛŋ obɔ̃;

¹⁴ ni atatu lɛ hewɔ lɛ osɔfoi lɛ nyɛɛɛ shi amɛdamɔ kɛsɔmɔ dɔŋŋ ejaakɛ Yehowa anunyam ni kpɛlɛɔ nyramnyram lɛ eyi Sɔlemɔtsu lɛ obɔ.