2 Kronika 4 - ŊMALƐ KRƆŊKRƆŊ LƐ

Sɔlemɔtsu lɛ mli saamɔ nibii

¹ Maŋtsɛ Solomon hã afee akɔɔble afɔleshãa latɛ ni ekɛlɛ ji ninetalɔi nyɔŋmai enyɔ, elɛɛmɔ hu ninetalɔi nyɔŋmai enyɔ kɛ ekwɔlɛ ninetalɔi nyɔŋma.

² Agbɛnɛ ehã afee akɔɔble botoku agbo koni akɛto nu. Ehiɛ lɛɛmɔ kɛjɛ etoi biɛ kɛ biɛ lɛ feɔ ninetalɔi nyɔŋma; emlikwɔlɛ ji ninetalɔi enumɔ, ni kpãa ni bɔle enaabu lɛ kɛlɛ ji ninetalɔi nyɔŋmai etɛ̃.

³ Be ni afee akɔɔble botoku lɛ, aye tsina samai yɛ botoku lɛ toishi srɛnɛɛ shii enyɔ kɛbɔle ehe kɛkpe kpula, ekome ye ekome ŋwɛigbɛ.

⁴ Botoku nɛɛ ma tsinai nyɔŋma kɛ enyɔ akotosɛɛ. Tsinai lɛ etɛ̃ ahiɛ miikwɛ kooyigbɛ, etɛ̃ ahiɛ miikwɛ anaigbɛ, etɛ̃ ahiɛ miikwɛ wuoyigbɛ, ni etɛ̃ hu ahiɛ miikwɛ bokãgbɛ. Botoku nɛɛ ma tsinai nɛɛ anɔ, ni amɛsɛɛgbɛ fɛɛ yɛ botoku lɛ shishi.

⁵ Botoku lɛ tilɛ aaashɛ dɛ̃lɛɛmɔ, ni akpa botoku lɛ toi oookɛɛ akpaa kɔɔpoo toi tamɔ fɔfɔi ni egba lɛ. Botoku nɛɛ yeɔ nu gbudugbaŋi ohai etɛ̃.

⁶ Agbɛnɛ hu afee okpolui agboi nyɔŋma koni akɛmamɔ Sɔlemɔtsu lɛ wuoyigbɛ, ni akɛ enumɔ hu amãmɔ kooyigbɛ. Akɛ okpolui nɛɛ baafɔ loo ni akɛba akɛbaashã afɔle ni ashãa fɛɛ lɛ he. Akɔɔble botoku lɛ mli nu lɛ eyɛ hã osɔfoi lɛ ahejuu.

⁷ Asaŋ afee shika kanetsei nyɔŋma tamɔ bɔ ni atsɔ̃ɔ akɛ afee amɛ lɛ, ni akɛmamɔ Sɔlemɔtsu lɛ mli, enumɔ yɛ wuoyigbɛ, ni enumɔ hu yɛ kooyigbɛ.

⁸ No sɛɛ lɛ, afee okpɔlɔi nyɔŋma, ni akɛmamɔ Sɔlemɔtsu lɛ mli, enumɔ yɛ wuoyigbɛ, ni enumɔ yɛ kooyigbɛ. Afee okpolui bibiibii hu oha.

⁹ Afo shĩaŋgbɛ kpo akɛ osɔfoi lɛ akpo, ni afo kpo nɔ gbɛ kpo wulu hu, ni afee shinai awo kpoi enyɔ lɛ ateŋ, ni aha shinai nɛɛ ahe kɛ akɔɔble.

¹⁰ Akɛ nutoo botoku lɛ ma Sɔlemɔtsu lɛ mli yɛ wuoyi bokãgbɛ.

¹¹ Huram fee tsɛnsii kɛ sofii kɛ okpolui hu. Ena egbe nibii fɛɛ ni eba tsumɔ ehã Maŋtsɛ Solomon yɛ Yehowa Sɔlemɔtsu lɛ he lɛ naa. Nibii lɛ ji

¹² akulashiŋi enyɔ lɛ kɛ kpɔbii kuturukui enyɔ lɛ ni mamɔ akulashiŋi enyɔ lɛ ayiteiaŋ tamɔ oduku lɛ, kɛ akɔɔble ntaŋi enyɔ lɛ ni akɛhaa akulashiŋi lɛ ayiteiaŋ kpɔbii enyɔ lɛ ahe lɛ,

¹³ kɛ ntaŋi enyɔ lɛ ahe akɔɔble kpɔbii kokrobii ohai ejwɛ lɛ. Atsɛ̃rɛ akɔɔble kpɔbii kokrobii nɛɛ srɛnɛɛ shii enyɔ kɛho awo ntaŋi enyɔ lɛ eko fɛɛ eko he.

¹⁴ Huram nɔŋŋ ni fee naji ni okpolui lɛ mamɔɔ amɛnɔ lɛ, kɛ okpolui lɛ diɛŋtsɛ hu.

¹⁵ Efee nu botoku kpeteŋkple lɛ kɛ tsinai lɛ hu ni botoku lɛ ma amɛnɔ lɛ.

¹⁶ Tsɛnsii lɛ kɛ sofii lɛ kɛ nibii krokomɛi fɛɛ ni fata amɛhe lɛ, Huram, mitsɛ gbɔmɔ ŋaalɔ kpanaa lɛ, ji mɔ ni kɛ akɔɔble ni kpɛlɛɔ nyramnyram fee ehã Maŋtsɛ Solomon koni akɛtsu Yehowa Sɔlemɔtsu lɛ mli nii.

¹⁷ Maŋtsɛ Solomon hã ashwie nibii nɛɛ fɛɛ yɛ magbɛ shikpɔŋ ni kã Sukot kɛ Zereda teŋ lɛ nɔ yɛ Yordan Jɔɔ lɛ mli.

¹⁸ Maŋtsɛ fee nibii nɛɛ babaoo bɔ sɔŋŋ ni no hewɔ lɛ, aleee akɔɔble tsiimɔ ni akɛtsu nii lɛ naa.

¹⁹ Maŋtsɛ Solomon hã afee shika nibii hu awo Yehowa we lɛ mli. Ekomɛi ji shika afɔleshãa latɛ lɛ kɛ okpɔlɔi ni akɛ aboloo ni akɛmaa Nyɔŋmɔ hiɛ lɛ maa nɔ lɛ.

²⁰ Ekomɛi hu ji kanetsei lɛ kɛ amɛhe kanei lɛ ni akɛ shika ŋmiiŋmi fee ni asuɔ amaa He Krɔŋkrɔŋ Fe Fɛɛ lɛ hiɛ tamɔ bɔ ni ato afɔ shi lɛ.

²¹ Shika nibii lɛ ekrokomɛi hu ji fɔfɔii asamai lɛ kɛ kanei lɛ kɛ abɛɛlei lɛ,

²² kɛ lagbee tsɛnsii lɛ kɛ okpolui lɛ kɛ tsofakɛŋma tsɛnsii lɛ kɛ lajee tsɛnsii lɛ. Ni Sɔlemɔtsu lɛ naa agboi lɛ fɛɛ ni yɔɔ koi lɛ shishi lɛ kɛ shinai ni yɔɔ mligbɛ ni akɛboteɔ He Krɔŋkrɔŋ Fe Fɛɛ lɛ hu shika ŋmiiŋmi akɛfee fɛɛ.