2 Kronika 36 - ŊMALƐ KRƆŊKRƆŊ LƐ

Yuda Maŋtsɛ Yoahaz

¹ Yudabii kɔ Yosia binuu Yoahaz, ni amɛwo lɛ maŋtsɛ yɛ etsɛ sɛɛ, yɛ Yerusalɛm.

² Yoahaz eye afii nyɔŋmai enyɔ kɛ etɛ̃ be ni ebata sɛi lɛ nɔ lɛ, ni eye maŋtsɛ nyɔji etɛ̃ yɛ Yerusalɛm.

³ Kɛkɛ ni Ijipt Maŋtsɛ Neko ba, ni ebakpa Yoahaz akɛ Yerusalɛm maŋtsɛ, ni asaŋ ehe Yudabii lɛ jwiɛtɛi ni tsiimɔ ji talentai oha kɛ shika ŋmiiŋmi ni tsiimɔ ji talenta kome.

⁴ Ijipt maŋtsɛ lɛ to Yoahaz nyɛminuu Eliakim akɛ Yuda kɛ Yerusalɛm maŋtsɛ; shi etsake Eliakim gbɛi, ni ewo lɛ Yehoiakim; ni ekpala Yoahaz kɛtee Ijipt.

Yuda Maŋtsɛ Yehoiakim

⁵ Yehoiakim eye afii nyɔŋmai enyɔ kɛ enumɔ be ni ebɔi maŋtsɛyeli lɛ, ni eye maŋtsɛ afii nyɔŋma kɛ ekome yɛ Yerusalɛm. Eyabaaa ejeŋ bɔ ni Yehowa eNyɔŋmɔ lɛ taoɔ.

⁶ Babilon Maŋtsɛ Nebukadnezar fã ta kɛba ni ebatua Yuda, ni emɔ Yehoiakim ni ewo lɛ gboklɛ ni ekɛ lɛ tee Babilon.

⁷ Ni Nebukadnezar loo Yehowa we lɛ mli nibii lɛ ekomɛi kɛtee, ni ekɛyawo emaŋtsɛ we lɛ mli yɛ Babilon.

⁸ Yehoiakim he saji fɛɛ ni eshwɛ lɛ kɛ nibii gbohii ni efee, kɛ agbɛnɛ saji ni awie ashi ejeŋba lɛ, aŋmala fɛɛ yɛ Israel kɛ Yuda Maŋtsɛmɛi Ahe Saji Awolo lɛ mli. Yehoiakim binuu Yehoiakin baye maŋtsɛ yɛ esɛɛ.

Yuda Maŋtsɛ Yehoiakin

⁹ Yehoiakin eye afii nyɔŋma kɛ kpaanyɔ be ni ebata sɛi lɛ nɔ lɛ, ni eye maŋtsɛ nyɔji etɛ̃ kɛ gbii nyɔŋma yɛ Yerusalɛm. Lɛ hu eyabaaa ejeŋ bɔ ni Yehowa taoɔ.

¹⁰ Afi lɛ shishijee mli lɛ, Maŋtsɛ Nebukadnezar wo tsuji gbɛ, ni amɛbamɔ Yehoiakin kɛtee Babilon, asaŋ aloo Yehowa we lɛ mli ojarawa nibii lɛ ekomɛi afata ehe kɛtee Babilon lɛ. Kɛkɛ ni Nebukadnezar to Yehoiakin nyɛminuu Zedekia akɛ Yuda kɛ Yerusalɛm maŋtsɛ.

Yuda Maŋtsɛ Zedekia

¹¹ Zedekia eye afii nyɔŋmai enyɔ kɛ ekome be ni ebata sɛi lɛ nɔ lɛ, ni eye maŋtsɛ afii nyɔŋma kɛ ekome yɛ Yerusalɛm.

¹² Eyabaaa ejeŋ bɔ ni Yehowa, eNyɔŋmɔ lɛ, taoɔ. Eyabaaa ehe shi ehãaa Gbalɔ Yeremia mɔ ni Yehowa kɛ ewiemɔi lɛ tsɔ̃ enɔ lɛ.

Afite Yerusalɛm maŋ lɛ

¹³ Zedekia hu tse Maŋtsɛ Nebukadnezar hiɛ atua be mli ni Nebukadnezar ehã Zedekia kɛ Nyɔŋmɔ ekã lɛ, Nebukadnezar lɛ, kitã. Zedekia kuɛŋ yati, ni ekpliŋ etsui, ni emiii akɛ ejeɔ ehe sɛɛ ni eboɔ Yehowa, Israel Nyɔŋmɔ lɛ, toi.

¹⁴ Asaŋ osɔfoi lɛ ateiaŋ onukpai lɛ fɛɛ kɛ maŋbii lɛ hu yanyiɛ maji ni bɔle amɛ lɛ ajeŋba gbohii lɛ asɛɛ, ni amɛkɛtɔ̃ Nyɔŋmɔ nɔ babaoo, ni amɛbule Yehowa we lɛ ni Yehowa diɛŋtsɛ etsuu he, ni efee lɛ krɔŋkrɔŋ yɛ Yerusalɛm lɛ.

¹⁵ Shi Yehowa, ni ji Yudabii lɛ atsɛmɛi lɛ aNyɔŋmɔ lɛ, kã he etsuɔ bɔfoi kɛbaa amɛŋɔɔ ejaakɛ emusuŋ tsɔ̃ɔ lɛ yɛ emaŋ lɛ kɛ Sɔlemɔ we lɛ hewɔ.

¹⁶ Shi Yudabii lɛ, Nyɔŋmɔ bɔfoi lɛ, he fɛo moŋ amɛyeyee, ni amɛgbe amɛwiemɔi lɛ ahe guɔ, ni amɛliɔ gbalɔi lɛ. Amɛfee nɛkɛ aahu kɛyashi beyinɔ ni Yehowa mli fu emaŋ lɛ kɛteke nɔ bɔ ni ehiii he nɔ ko feemɔ dɔŋŋ.

¹⁷ Enɛ hewɔ lɛ, Yehowa yakpala Babilon maŋtsɛ lɛ kɛba, ni ebatua Yudabii lɛ, ni egbe Yuda oblahii lɛ kɛnyiɛ Sɔlemɔ we lɛ mli tete po. Eyanaaa mɔ ko mɔ ko mɔbɔ, oblanyo jio, oblayoo jio, nuumo jio, yoomo jio, gbɔmɔ kpiŋtiŋkpliŋŋ jio, helatsɛ jio, egbe fɛɛ.

¹⁸ Kɛkɛ ni eloo Sɔlemɔ we lɛ mli jwetrii wuji kɛ bibii fɛɛ ni yɔɔ nitoohei lɛ, kɛ maŋtsɛ lɛ diɛŋtsɛ kɛ enukpai lɛ hu ajwetrii fɛɛ tswɛm, ni ekɛtee Babilon.

¹⁹ Ema Sɔlemɔ we lɛ naa la ni eshã lɛ, ni ekumɔ Yerusalɛm he gbogbo lɛ eshwie shi. No sɛɛ lɛ, ema maŋ muu lɛ naa la ni eshã lɛ kɛ emli mɔji fɛɛfɛji lɛ kɛ jwetrii fɛɛ.

²⁰ Mɛi ni je gbele mli lɛ eŋɔ amɛ nom kɛtee Babilon, ni amɛyasɔmɔ lɛ kɛ eshwiei kɛyashi Persia maŋtsɛyeli lɛ baye nɔ.

²¹ No hewɔ lɛ, Yehowa wiemɔ ni ekɛtsɔ̃ Gbalɔ Yeremia nɔ lɛ ba mli akɛ, “Shikpɔŋ lɛ baakã shi akɛ amaŋfɔ̃ afii nyɔŋmai kpawo koni ehe ni kulɛ esa akɛ ejɔɔ ni enaaa ejɔɔ lɛ ena ejɔɔ.” Ejaakɛ gbii abɔ fɛɛ ni shikpɔŋ lɛ kã shi amaŋfɔ̃ ni ahuuu nɔ lɛ, eeeye hejɔɔmɔ gbii lɛ kɛyaashi afii nyɔŋmai kpawo lɛ aaashɛ.

Maŋtsɛ Koresh ŋmɛɛ Yudabii ahe

²² Maŋtsɛ Koresh, Persia maŋtsɛ lɛ, yinɔ klɛŋklɛŋ afi lɛ nɔ lɛ, Yehowa hã nɔ ni etsɔ̃ Gbalɔ Yeremia nɔ ewie lɛ ba mli. Yehowa tsi Maŋtsɛ Koresh ni ehã efã, asaŋ eŋma famɔ lɛ ewo wolo nɔ, ni ayashiɛ yɛ shikpɔji ni yɔɔ eshishi fɛɛ anɔ akɛɛ akɛ,

²³ “Koresh, Persia Maŋtsɛ, famɔ nɛ, ‘Yehowa ni ji Ŋwɛi Nyɔŋmɔ lɛ, ehã mitsɔ̃ je lɛ fɛɛ maŋtsɛ. Efã mi akɛ miyama Sɔlemɔ we mihã lɛ yɛ Yerusalɛm yɛ Yuda shikpɔŋ lɛ nɔ. Naa, nyɛ mɛi fɛɛ ni ji Nyɔŋmɔ webii lɛ, nyɛyaa Yuda; ni Yehowa, ni ji Yuda Nyɔŋmɔ lɛ aaabu nyɛhe, ni ekɛ nyɛ aaahi shi.’ ”