2 Kronika 35 - ŊMALƐ KRƆŊKRƆŊ LƐ

Yosia ye Hehoo Gbijurɔ lɛ

¹ Maŋtsɛ Yosia ye Hehoo Gbijurɔ lɛ yɛ Yerusalɛm ekɛwo Yehowa hiɛ nyam. Agbe Hehoo toobi lɛ yɛ klɛŋklɛŋ nyɔŋ lɛ nɔ gbi ni ji nyɔŋma kɛ ejwɛ lɛ nɔ.

² Yosia tu osɔfoi lɛ anitsumɔi lɛ ewo amɛdɛŋ ekoŋŋ; asaŋ ewo amɛ hewalɛ akɛ amɛtsu Nyɔŋmɔ We lɛ mli nii lɛ jogbaŋŋ.

³ Ekɛɛ Levibii lɛ ni amɛ ji Israel muu fɛɛ tsɔɔlɔi lɛ, ni asaŋ amɛjɔɔ amɛhe nɔ amɛhã Yehowa sɔɔmɔ lɛ akɛ, “Nyɛkɛ Kpãŋmɔ Adeka lɛ ayamaa Sɔlemɔ we lɛ ni Maŋtsɛ Solomon, Israel Maŋtsɛ David bi lɛ, ma lɛ mli. Ehiaaa akɛ nyɛaatere adeka lɛ kɛya kɛba. Agbɛnɛ nyɛsɔmɔa Yehowa, nyɛNyɔŋmɔ lɛ, kɛ emaŋ Israel.

⁴ Nyɛsaa nyɛhe yɛ nyɛtsɛmɛi awei akuikui lɛ anaa bɔ ni David, Israel maŋtsɛ lɛ, kɛ ebi Solomon to gbɛjianɔ lɛ.

⁵ Nyɛtoa gbɛjianɔ koni be fɛɛ be lɛ ana Levibii awekui komɛi koni amɛwa nyɛnyɛmimɛi ni ji maŋbii lɛ yɛ amɛtsɛmɛi awei anaa yɛ Sɔlemɔ we lɛ.

⁶ Nyɛfea nyɛhe krɔŋkrɔŋ, ni nyɛgbea Hehoo toobi lɛ koni nyɛkɛtsɔ̃ɔ nyɛnyɛmimɛi Israelbii lɛ bɔ ni kɛji amɛfee ni amɛbaaye Yehowa wiemɔi ni ekɛtsɔ̃ Mose nɔ lɛ anɔ.”

⁷ Maŋtsɛ Yosia mɔmɔ lɛ diɛŋtsɛ ekooloi lɛ amli gwantɛŋbii kɛ abotiabii akpei nyɔŋmai etɛ̃ kɛ tsinai hu akpei etɛ̃, ni ekɛhã maŋbii lɛ akɛ akɛ fɛɛ afee Hehoo afɔlei ahã mɔ fɛɛ mɔ ni eba Hehoo Gbijurɔ lɛ yeli.

⁸ Maŋtsɛ lɛ hã maŋ onukpai lɛ hu jɛ tsuijurɔ naa amɛhã maŋbii lɛ kɛ osɔfoi lɛ kɛ Levibii lɛ kooloi. Hilkia kɛ Zakaria kɛ Yehiel, ni ji Nyɔŋmɔ We lɛ nɔkwɛlɔi nukpai lɛ, hã osɔfoi lɛ toi akpei enyɔ kɛ ohai ekpaa kɛ tsinai hu ohai etɛ̃ koni akɛfee Hehoo afɔlei.

⁹ Ni Konania kɛ enyɛmimɛi hii enyɔ, Shemaia kɛ Netanel, kɛ agbɛnɛ Hashabia kɛ Yeiel kɛ Yozabad, ni ji Levibii lɛ anukpai lɛ, hu hã Levibii lɛ toi akpei enumɔ kɛ tsinai ohai enumɔ koni akɛfee Hehoo afɔlei.

¹⁰ Be ni asaa he agbe naa lɛ, osɔfoi lɛ yadamɔ amɛshidaamɔhe lɛ, ni Levibii lɛ hu yadamɔ amɛgbɛhei lɛ yɛ amɛkuikui lɛ anaa bɔ ni maŋtsɛ lɛ efã lɛ.

¹¹ Levibii lɛ gbegbee Hehoo toobii lɛ, ni osɔfoi lɛ he lá lɛ yɛ amɛdɛŋ amɛkɛshwã afɔleshãa latɛ lɛ nɔ. Levibii lɛ kpɔlɔɔ toobii lɛ ahe woji lɛ,

¹² ni amɛ jiejie kooloi lɛ hei ni ashãa lɛ, ni amɛjara amɛhã maŋbii lɛ yɛ amɛtsɛmɛi awei kuikui lɛ anaa koni amɛkɛhã Yehowa tamɔ bɔ ni aŋma yɛ Mose Wolo lɛ mli lɛ. Nakai nɔŋŋ amɛfee tsinai lɛ hu.

¹³ Kɛkɛ ni amɛshã Hehoo toobii lɛ bɔ ni ato afɔ shi lɛ; shi amɛhoo afɔlei krɔŋkrɔŋi lɛ yɛ kukwɛii kɛ dadesɛŋi kɛ tsɛnsii amli, ni amɛkɛhã maŋbii lɛ oya.

¹⁴ No sɛɛ lɛ, Levibii lɛ fee amɛ diɛŋtsɛ amɛnɔ kɛ osɔfoi lɛ hu anɔ, ejaakɛ afɔlei ni ashãa lɛ emuu kɛ kooloi lɛ amli fɔi lɛ hu ni ashãa lɛ ahewɔ lɛ, osɔfoi lɛ ni ji Aaron shwiei lɛ eyanaaa dekã kɛyashi jenamɔ. No hewɔ ni Levibii lɛ fee amɛ diɛŋtsɛ amɛniyenii kɛ osɔfoi lɛ hu anɔ lɛ.

¹⁵ Lalatsɛmɛi ni ji Asafbii lɛ yɛ amɛgbɛhe lɛ tamɔ bɔ ni Maŋtsɛ David kɛ Asaf kɛ Heman kɛ Yedutun, maŋtsɛ ninalɔ lɛ, efã lɛ. Agbonaabulɔi lɛ yɛ amɛgbɛhei yɛ agbo fɛɛ agbo naa, ni akɛni amɛbɛ hegbɛ akɛ amɛshiɔ amɛbuuhei lɛ hewɔ lɛ, amɛnyɛmimɛi Levibii lɛ feɔ amɛgbɛfaŋ Hehoo niyenii lɛ amɛhãa amɛ.

¹⁶ Afee nɔ fɛɛ nɔ nakai gbi lɛ bɔ pɛpɛɛpɛ ni Maŋtsɛ Yosia fã akɛ afee koni akɛja Yehowa yɛ Hehoo lɛ yeli mli, kɛ agbɛnɛ shãa afɔlei lɛ shãa yɛ Yehowa afɔleshãa latɛ lɛ nɔ lɛ hu mli.

¹⁷ Israelbii ni ba gbijurɔ lɛ yeli nakai be lɛ mli lɛ ye Hehoo lɛ kɛ Ma Akpiti Gbijurɔ lɛ hu gbii kpawo.

¹⁸ Ayeko Hehoo Gbijurɔ ko yɛ Israel ni ekɛ enɛ ye egbɔ pɛŋ kɛjɛ Gbalɔ Samuel yinɔ; ni asaŋ Israel maŋtsɛmɛi lɛ eko eko yeko Hehoo ko ni etamɔ nɔ ni Yosia kɛ osɔfoi lɛ kɛ Levibii lɛ kɛ Yuda muu fɛɛ kɛ Israelbii ni ba Yerusalɛm lɛ kɛ Yerusalɛm maŋbii lɛ ye nɛɛ.

¹⁹ Yosia maŋtsɛyeli afi ni ji nyɔŋma kɛ kpaanyɔ lɛ nɔ aye nɛkɛ Hehoo nɛɛ lɛ.

Yosia maŋtsɛyeli lɛ naagbee

²⁰ Be ni Maŋtsɛ Yosia efee nibii nɛɛ fɛɛ ekɛsaa Sɔlemɔ we lɛ sɛɛ lɛ, Ijipt Maŋtsɛ Neko fã ta kɛba koni ekɛ Karkemishbii ni yɔɔ Eufrate Faa lɛ naa lɛ abawu. Kɛkɛ ni Yosia yiŋ etee akɛ ekɛ Neko yaawu.

²¹ Shi Maŋtsɛ Neko tsu bɔfoi kɛba Yosia ŋɔɔ kɛ shɛɛ akɛ, “Yuda Maŋtsɛ, mi kɛ bo bɛ sane ko. Mibaaa ŋmɛnɛ akɛ mikɛ bo miiba abawu. Miba mi kɛ maŋ ni mikɛna ta lɛ abawu; ni Nyɔŋmɔ efã mi akɛ miye mihe oyai. Oote shi ooshi Nyɔŋmɔ mɔ ni yɔɔ misɛɛ lɛ. No hewɔ lɛ, kpa koni ekakpãtã ohiɛ.”

²² Shi Yosia ekpɛlɛɛɛ, shi moŋ efi nɔ akɛ ekɛ Neko baawu ta lɛ. Ebooo wiemɔ ni Nyɔŋmɔ tsɔ̃ Neko nɔ ekɛ lɛ wie lɛ toi; no hewɔ lɛ, etee ni ekɛ Ijipt Maŋtsɛ Neko yawu yɛ Megido ŋa lɛ nɔ.

²³ Be ni awuɔ ta lɛ Ijipt gãitsɛ̃lɔi lɛ agãi mɔ Maŋtsɛ Yosia. Kɛkɛ ni ekɛɛ etsuji lɛ akɛ, “Nyɛkɛ mi ajiea biɛ ejaakɛ mipila abalaŋ.”

²⁴ No hewɔ lɛ, etsuji lɛ wo Yosia yɛ eta shwiili lɛ mli, ni amɛkɛ lɛ wo ta shwiili kroko ni ehiɛ lɛ mli, ni amɛkɛ lɛ ba Yerusalɛm, ni ebanyɔ yɛ jɛi, ni afu lɛ yɛ maŋtsɛmɛi afũuhe lɛ. Yuda kɛ Yerusalɛm fɛɛ fo Yosia.

²⁵ Gbalɔ Yeremia fo yaafo lala, ni ekɛfo Maŋtsɛ Yosia. Kɛjɛ no sɛɛ lɛ, hii kɛ yei lalatsɛmɛi fɛɛ tsĩɔ Yosia tã yɛ amɛyaafo lalai amli kɛ ŋmɛnɛ. Kɛkɛ ni nii nɛɛ tsɔ̃ kusum ni bakã shi kɛbashi ŋmɛnɛ yɛ Israel. Yeremia yaafo lala nɛɛ fata Yaafo Lalai Awolo lɛ mli lalai lɛ ahe.

²⁶ Maŋtsɛ Yosia he saji ni eshwɛ kɛ nibii kpakpai ni efee ekɛye Yehowa mlai lɛ anɔ,

²⁷ kɛ agbɛnɛ ehe saji lɛ kɛjɛ shishijee kɛyagbe naa lɛ, aŋmala fɛɛ yɛ Israel kɛ Yuda Maŋtsɛmɛi Ahe Saji Awolo lɛ mli.