2 Kronika 34 - ŊMALƐ KRƆŊKRƆŊ LƐ

Yuda Maŋtsɛ Yosia

¹ Yosia eye afii kpaanyɔ be ni ebɔi maŋtsɛyeli lɛ, ni eye maŋtsɛ afii nyɔŋmai etɛ̃ kɛ ekome yɛ Yerusalɛm.

² Eba ejeŋ jogbaŋŋ bɔ ni Yehowa taoɔ tamɔ bɔ ni eseshinyo Maŋtsɛ David ba ejeŋ lɛ pɛpɛɛpɛ; egbaaa kɛyaa ninejurɔ lɛ egbaaa kɛyaaa abɛku hu.

Yosia te shi ewo wɔŋjamɔ

³ Yosia maŋtsɛyeli afi ni ji kpaanyɔ lɛ nɔ, be ni edako beebe lɛ, ebɔi eseshinyo David Nyɔŋmɔ lɛ jamɔ kɛ esɛɛgbɛ taomɔ. Be ni ena afii nyɔŋma kɛ enyɔ yɛ sɛi lɛ nɔ lɛ, Yosia bɔi jemawɔji ajamɔhei lɛ kɛ Ashera jemawɔŋ lɛ wɔŋ koi lɛ kɛ amãgãi krokomɛi lɛ fɛɛ fitemɔ, koni ekɛtsuu Yuda kɛ Yerusalɛm he.

⁴ Ehã akumɔkumɔɔ Baal jemawɔŋ lɛ afɔleshãa latɛi lɛ yɛ lɛ diɛŋtsɛ ehiɛ; ni amɛyiteŋgbɛ tsofakɛŋmashãa latɛi ni amãmɔ yɛ jɛi lɛ hu, ehã akumɔ fɛɛ. Ehã akumɔ ni ashimɔ Asherim jemawɔŋ lɛ amãgã lɛ kɛ amãgãi krokomɛi lɛ hu fɛɛ mɔnyɔmɔnyɔ, ni akɛshwã mɛi ni be ni amɛyɔɔ wala mli lɛ amɛshã afɔle amɛkɛhã amãgãi nɛɛ asaŋi anɔ.

⁵ Eshã jemawɔji lɛ anaa wulɔmɛi lɛ awui yɛ afɔleshãa latɛi ni amɛshã afɔle yɛ amɛnɔ lɛ anɔ. Ekɛ enɛ feemɔ tsuu Yuda kɛ Yerusalɛm he.

⁶ Kɛkɛ ni Yosia yiŋ ni etee Manase kɛ Efraim kɛ Simeon maji lɛ amli kɛ hei ni etsɔ̃mɔ amaŋfɔ̃i fɛɛ aahu kɛyashwie Naftali tɔ̃ɔ,

⁷ ni eyakumɔ jɛi hu afɔleshãa latɛi lɛ kɛ tsofakɛŋmashãa latɛi lɛ, ni egba wɔŋ koi lɛ, ni eshimɔ Asherim jemawɔŋ lɛ amãgãi lɛ kɛ amãgãi krokomɛi lɛ fɛɛ mɔnyɔmɔnyɔ yɛ Israel shikpɔŋ lɛ fɛɛ nɔ. Kɛkɛ ni eku esɛɛ kɛba Yerusalɛm.

Ayana Mla Wolo lɛ ekoŋŋ

⁸ Yosia maŋtsɛyeli afi ni ji nyɔŋma kɛ kpaanyɔ lɛ nɔ, be ni etsuu shikpɔŋ lɛ kɛ Sɔlemɔtsu lɛ he egbe naa kɛtsɔ̃ jemawɔŋjamɔ ni egu lɛ nɔ lɛ, etsu Shafan, Azalia bi lɛ, kɛ Yerusalɛm maŋ lɛ amralo Maaseia kɛ Yoa, Yoahaz bi lɛ ni ji saji aŋmalalɔ ko lɛ, koni amɛyasaa Yehowa, eNyɔŋmɔ lɛ, We lɛ.

⁹ Gbɔmɛi nɛɛ tee Osɔfonukpa Hilkia ŋɔɔ, ni amɛkɛ shika ni maŋbii lɛ kɛbahã yɛ Nyɔŋmɔ We lɛ he lɛ yahã lɛ. Levibii ni ji agbonaabulɔi ji mɛi ni bua shika lɛ naa kɛjɛ Manasebii kɛ Efraimbii kɛ Israel akutsei ni eshwɛ lɛ fɛɛ amli bii kɛ Yudabii kɛ Yerusalɛm maŋ lɛ mli bii fɛɛ adɛŋ.

¹⁰ Atu shika lɛ awo nitsulɔinukpai ni kwɛɔ Yehowa we lɛ he nitsulɔi lɛ anɔ lɛ dɛŋ; ni amɛ hu amɛkɛhã nitsulɔi ni tsuɔ nii yɛ Yehowa we lɛ koni amɛkɛsaa shia lɛ hei ni ekumɔ lɛ.

¹¹ Amɛkɛ shika lɛ hã kapintafoi lɛ kɛ gbogbotswalɔi lɛ koni akɛhe tɛ ni ako kɛ tsei ni akɛfee mplaŋi kɛ tsuhɛhɛmɔ tsei koni akɛsaasaa tsui lɛ ni Yuda maŋtsɛmɛi lɛ ŋmɛ gbɛ ni no hewɔ lɛ, amɛfitefitee lɛ.

¹² Nitsulɔi lɛ ye anɔkwa kɛtsu nii lɛ. Ato Yahat kɛ Obadia, Levibii ni jɛ Merari shwiei lɛ ateŋ lɛ, kɛ Zakaria kɛ Meshulam, ni jɛ Kohat shwiei lɛ ateŋ lɛ, akɛ nitsulɔi lɛ anɔkwɛlɔi koni amɛhã nitsumɔ lɛ aya nɔ. Asaŋ ahala Levibii lɛ ekomɛi, mɛi ni ahe esa jogbaŋŋ kɛ lala bɛji akpãmɔ,

¹³ ni ahã amɛteŋ mɛi komɛi kwɛ jatsutrelɔi lɛ anɔ, ni mɛi komɛi hu kwɛ ŋai srɔtoi srɔtoi tsulɔi lɛ anɔ. Levibii nɛɛ nɔŋŋ ateŋ mɛi komɛi bu nibii lɛ ahe akɔntaa, ni fabii hu bu agbo naa.

¹⁴ Be ni awoɔ shika ni maŋbii kɛbahã yɛ Yehowa we lɛ he lɛ, Hilkia yana Yehowa Mla Wolo lɛ, ni ji Mla lɛ ni Yehowa tsɔ̃ Mose nɔ ekɛhã lɛ.

¹⁵ Kɛkɛ ni Hilkia wo enaa nɔ, ni ekɛɛ Shafan, woloŋmalɔ lɛ, akɛ, “Miyana Mla Wolo lɛ yɛ Yehowa we lɛ mli.” Kɛkɛ ni ekɛ Wolo lɛ hã Shafan;

¹⁶ ni Shafan kɛ Wolo lɛ bahã maŋtsɛ lɛ, ni ekɛɛ maŋtsɛ lɛ akɛ, “Nibii fɛɛ ni okɛhã otsuji tsumɔ lɛ amɛmiitsu.

¹⁷ Shika ni akɛto Yehowa we lɛ, wɔyaloo ni wɔkɛyahã mɛi ni kwɛɔ nitsumɔi lɛ anɔ lɛ kɛ nitsulɔi lɛ.”

¹⁸ Shafan, woloŋmalɔ lɛ, tee nɔ ni ekɛɛ maŋtsɛ lɛ akɛ, “Osɔfo Hilkia kɛ Wolo nɛɛ hã mi.” Kɛkɛ ni Shafan kane Wolo lɛ etsɔ̃ɔ maŋtsɛ lɛ.

¹⁹ Be ni Maŋtsɛ Yosia nu Mla Wolo lɛ mli sane lɛ, egbala ehe atadei;

²⁰ ni efã Hilkia kɛ Ahikam, Shafan bi lɛ, kɛ Abdon, Mika bi lɛ, kɛ Shafan, woloŋmalɔ lɛ, kɛ Asaia, maŋtsɛ tsulɔi lɛ, ni ekɛɛ akɛ,

²¹ “Nyɛyaa ni nyɛyabia Yehowa nii nyɛhãa mi kɛ Israel kɛ Yudabii fɛɛ ni eshwɛ yɛ wolo ni ayana lɛ mli wiemɔi lɛ ahewɔ; ejaakɛ Yehowa mli ni efu wɔ lɛ naa wa jogbaŋŋ ejaakɛ wɔtsɛmɛi lɛ eyayeee Yehowa wiemɔ nɔ koni amɛfee amɛnii yɛ Wolo nɛɛ mli wiemɔi lɛ anaa.”

²² Maŋtsɛ lɛ famɔ lɛ naa hewɔ lɛ Hilkia kɛ mɛi ni atsu fata ehe lɛ yiŋ amɛtee yoo gbalɔ ni atsɛɔ lɛ Hulda lɛ ŋɔɔ yɛ Yerusalɛm maŋ lɛ akutso ni ji enyɔ lɛ mli. Hasra bi Tokhat bi Shalum, mɔ ni kwɛɔ atadei ni awoɔ akɛsɔmɔɔ yɛ Sɔlemɔ we lɛ mli lɛ anɔ lɛ, ŋa ji Hulda nɛɛ. Be ni bɔfoi lɛ ebɔ Hulda amaniɛ lɛ,

²³ Hulda kɛɛ amɛ akɛ, “Nyɛyakɛa mɔ ni tsu nyɛ miŋɔɔ lɛ akɛ,

²⁴ ‘Mi, Yehowa, mibafee biɛ nɛɛ kɛ emli bii fɛɛ efɔŋ; mahã loomɔi fɛɛ ni aŋmala yɛ wolo ni akane atsɔ̃ɔ Yuda maŋtsɛ lɛ mli lɛ fɛɛ aba mli.

²⁵ Akɛni amɛkwa mi’, ni amɛyashã tsofakɛŋma amɛkɛhã jemawɔji; ni amɛkɛ amɛnifeemɔnii ewo mimli la hewɔ lɛ, mimli efu maŋ nɛɛ naakpa diɛŋtsɛ bɔ ni enaa la gboŋ.

²⁶ Shi Yuda maŋtsɛ lɛ ni tsu nyɛ akɛ nyɛbabi mi nii lɛ, nyɛyakɛa lɛ akɛ, Yehowa, Israel Nyɔŋmɔ lɛ, kɛɛ akɛ, ‘Akɛni be ni onu Wolo lɛ mli wiemɔi lɛ,

²⁷ oje ohe sɛɛ, ni oba ohe shi yɛ Nyɔŋmɔ hiɛ, ni be ni onu nɔ fɔŋ ni baaba Yerusalɛm kɛ Yerusalɛmbii anɔ lɛ hu lɛ oba ohe shi yɛ mihiɛ, ni ogbala ohe atade, ni owo yara ni ofo lɛ hewɔ lɛ, mi hu mibo bo toi.

²⁸ Naa, obaagbo yɛ hejɔlɛ mli; ni nɔ fɔŋ ni mahã aba Yerusalɛm kɛ Yerusalɛmbii anɔ lɛ ohiŋmɛi enaŋ ekome nɛkɛ.’ ” Tsuji lɛ ba ni amɛbabɔ Maŋtsɛ Yosia amaniɛ nɛɛ.

Yosia kã kitã akɛ ebaabo Nuŋtsɔ lɛ toi

²⁹ Maŋtsɛ Yosia tsu ni eyakpee Yuda kɛ Yerusalɛm maŋ onukpai lɛ fɛɛ kɛba.

³⁰ Kɛkɛ ni lɛ kɛ Yuda hii lɛ kɛ Yerusalɛm maŋbii lɛ fɛɛ kɛ osɔfoi lɛ kɛ Levibii lɛ, no ji maŋ muu lɛ fɛɛ kɛjɛ mɔ wulu nɔ kɛyashi mɔ bibioo nɔ, yi mli kɛtee Yehowa we lɛ. Maŋtsɛ Yosia kane Kpãŋmɔ Wolo ni ayana yɛ Yehowa we lɛ mli lɛ mli wiemɔi lɛ fɛɛ yɛ maŋ muu lɛ toiŋ.

³¹ Kɛkɛ ni maŋtsɛ lɛ yadamɔ maŋtsɛ shidaamɔhe lɛ, ni ekã kitã yɛ Yehowa hiɛ akɛ ebaabo Yehowa toi, ni ebaaye ekitãi kɛ ekpɔi lɛ anɔ kɛ etsui fɛɛ, kɛ ehewalɛ fɛɛ bɔ ni afee ni eye wiemɔi ni aŋmala yɛ wolo lɛ mli lɛ anɔ.

³² Ehã mɛi fɛɛ ni yɔɔ Yerusalɛm nakai be lɛ, kɛ Benyaminbii lɛ kɛ Naa Nyɔŋmɔ kpãŋ. No hewɔ lɛ, Yerusalɛmbii lɛ ye kpãŋmɔ ni amɛ kɛ amɛtsɛmɛi aNyɔŋmɔ lɛ kpãŋ lɛ nɔ.

³³ Ni Maŋtsɛ Yosia jie musubɔɔ amãgãi bluublu yɛ he fɛɛ he ni ji Israelbii ashikpɔŋ, ni ehã mɛi fɛɛ ni yɔɔ Israel shikpɔŋ nɔ lɛ sɔmɔ Yehowa, ni ji amɛNyɔŋmɔ lɛ. Ewala be mli fɛɛ lɛ maŋ lɛ sɔmɔ Yehowa, amɛtsɛmɛi aNyɔŋmɔ lɛ, pɛpɛɛpɛ.