2 Kronika 33 - ŊMALƐ KRƆŊKRƆŊ LƐ

Yuda Maŋtsɛ Manase

¹ Manase eye afii nyɔŋma kɛ enyɔ be ni ebɔi maŋtsɛyeli lɛ, ni eye maŋtsɛ afii nyɔŋmai enumɔ kɛ nɛɛhu yɛ Yerusalɛm.

² Eyanyiɛ nibii gbohii ni majimaji lɛ ni Yehowa shwie yɛ Israelbii lɛ ahiɛ, be mli ni amɛjɛ Ijipt amɛbaa lɛ, feɔ lɛ sɛɛ, ni efee efɔŋ yɛ Yehowa hiɛ.

³ Ejaakɛ jemawɔji ajamɔhei ni etsɛ Hezekia kumɔ lɛ, Manase saa emamɔ ni emamɔ afɔleshãa latɛi hu ehã Baal jemawɔji lɛ; ni asaŋ efee amãgã ehã jemawɔŋ yoo Ashera lɛ, ni eja ŋwɛi nibii srɔtoi ni yɔɔ lɛ, ni esɔmɔ amɛ hu.

⁴ Manase mamɔ jemawɔji afɔleshãa latɛi yɛ Yehowa we lɛ; tsɛbelɛ Yehowa ekɛɛ yɛ Sɔlemɔ we lɛ he akɛ jɛi aja lɛ yɛ kɛya naanɔ.

⁵ Eku sɛɛ ekoŋŋ emamɔ afɔleshãa latɛi yɛ Yehowa we lɛ kpoi enyɔ lɛ anɔ koni akɛja nibii ni yɔɔ ŋwɛi lɛ.

⁶ Asaŋ Manase shã ebihii akɛ afɔle yɛ Hinom Jɔɔ lɛ mli, ni eyeɔ ŋkunyaa, ni ekalaa, ni efeɔ ashwãi, ni eto sisatsɛlɔi kɛ ayɛi fɛɛ. Etɔ̃ Nyɔŋmɔ nɔ babaoo diɛŋtsɛ, ni ekɛwo Nyɔŋmɔ mli la.

⁷ Ewo jemawɔŋ ko amãgã ni efee lɛ, ni ekɛyama Nyɔŋmɔ We lɛ mli diɛŋtsɛ, he ni Nyɔŋmɔ kɛ David kɛ ebi Solomon wie he, ni ekɛɛ amɛ akɛ, “Sɔlemɔtsu nɛɛ, yɛ Yerusalɛm maŋ nɛɛ mli, mikɔ yɛ Israel akutsei lɛ fɛɛ ateŋ akɛ he ni abaaja mi yɛ kɛya naanɔ.

⁸ Ni kɛji Israelbii aaajwɛŋ nɔ, ni amɛaaye kitãi kɛ akpɔi kɛ mlai ni mitsɔ̃ Mose nɔ ni miwo amɛ lɛ fɛɛ nɔ lɛ, no lɛ mihaŋ Israelbii afã amɛnane kɛshi shikpɔŋ ni mikɛhã amɛtsɛmɛi lɛ nɔ dɔŋŋ.”

⁹ Shi Manase laka Yudabii kɛ Yerusalɛmbii lɛ, ni amɛtɔ̃ tɔ̃mɔi ni fe tɔ̃mɔi ni majimaji lɛ ni Yehowa kpãtã amɛhiɛ yɛ Israelbii ahiɛ lɛ tete tɔ̃tɔ̃ɔ lɛ.

Manase je ehe sɛɛ

¹⁰ Yehowa kɛ Manase kɛ emaŋbii lɛ wie, ni ebɔ amɛ kɔkɔ; shi amɛbooo toi.

¹¹ No hewɔ lɛ, Yehowa hã Asiria maŋtsɛ tatsɛmɛi lɛ fã ta kɛba, ni amɛbatua Yuda. Amɛmɔ Manase, ni amɛkɛ kpoŋ lala lɛ, ni amɛwo lɛ akɔɔble gboklɛ, ni amɛkpala lɛ kɛtee Babilon.

¹² Be ni Manase yɔɔ hejaramɔ nɛɛ mli lɛ, eba ehe shi jogbaŋŋ ehã etsɛmɛi aNyɔŋmɔ lɛ, ni ekpa Yehowa, eNyɔŋmɔ, lɛ, fai akɛ ena lɛ mɔbɔ.

¹³ Nyɔŋmɔ bo Manase faikpamɔ lɛ toi, ni etsu he nii ehã lɛ. Ehã Manase ku esɛɛ kɛba Yerusalɛm ni ebatsa emaŋtsɛyeli lɛ nɔ. Enɛ hã Manase na nɔmimaa akɛ Yehowa lɛ ji Nyɔŋmɔ lɛɛlɛŋ.

¹⁴ Sane nɛɛ sɛɛ lɛ Manase tswa gbogbo hee ebɔle David Maŋ lɛ he gbogbo momo lɛ he, kɛjɛ Gihon Nuhiŋmɛi lɛ anaigbɛ, yɛ jɔɔ lɛ mli, aahu kɛho Loo Agbo lɛ he kɛbɔle maŋ lɛ fã ko ni atsɛɔ jɛi akɛ Ofel lɛ. Ehã gbogbo nɛɛ kwɔ fe gbogbo momo lɛ. Asaŋ eto tatsɛmɛi ehã tabilɔi ni yɔɔ Yuda maji fɛɛ ni atswa gbogbo awo amɛhe lɛ amli.

¹⁵ Ejie maŋsɛɛ jemawɔji lɛ kɛ amãgãi fɛɛ yɛ Yehowa We lɛ mli, ni ejie jemawɔji afɔleshãa latɛi ni emamɔ yɛ Yehowa We lɛ gɔŋ lɛ nɔ lɛ hu, ni ejie afɔleshãa latɛi ni yɔɔ Yerusalɛm hei krokomɛi lɛ fɛɛ hu, ni eloo kɛtee Yerusalɛm maŋ lɛ ŋmaŋmasha, ni eyasherɛ eshwie ŋmaŋmasha lɛ.

¹⁶ Ni esaa ema afɔleshãa latɛ lɛ nɔ ni akɛjaa Yehowa lɛ, ni eshã shidaa afɔlei kɛ yijiemɔ afɔlei hu yɛ nɔ; ni efã Yudabii fɛɛ akɛ amɛsɔmɔ Yehowa, Israel Nyɔŋmɔ, lɛ.

¹⁷ Kɛ̃lɛ maŋbii lɛ kã he amɛmiishã afɔle yɛ jamɔhei grɔŋŋi lɛ, shi amɛyiŋtoo ji akɛ amɛmiishã afɔlei lɛ amɛkɛmiihã Yehowa, amɛNyɔŋmɔ, lɛ.

Manase maŋtsɛyeli lɛ naagbee

¹⁸ Nibii krokomɛi fɛɛ ni Manase fee lɛ, kɛ sɔlemɔ ni esɔle ekɛkpa Nyɔŋmɔ fai lɛ, kɛ wiemɔi ni ninalɔi kɛ lɛ wie yɛ Yehowa, Israel Nyɔŋmɔ lɛ, gbɛi mli lɛ, aŋmala yɛ Israel Maŋtsɛmɛi Ahe Saji Awolo lɛ mli.

¹⁹ Manase faikpamɔ lɛ kɛ bɔ ni Nyɔŋmɔ bo lɛ toi ehã lɛ, kɛ hei grɔŋŋi ni emamɔ jemawɔji ajamɔhei yɛ lɛ, kɛ wɔŋ koi kɛ amãgãi ni efeefee fɛɛ dani eje ehe sɛɛ, ni eba ehe shi ehã Yehowa lɛ, aŋmala yɛ Gbalɔi Ahe Saji Awolo lɛ mli.

²⁰ Manase tsɔ̃ esɛɛ, ni afu lɛ yɛ maŋtsɛ we lɛ mli, ni ebinuu Amon baye maŋtsɛ yɛ esɛɛ.

Yuda Maŋtsɛ Amon

²¹ Amon eye afii nyɔŋmai enyɔ kɛ enyɔ be ni ebɔi maŋtsɛyeli lɛ, ni eye maŋtsɛ afii enyɔ yɛ Yerusalɛm.

²² Etɔ̃ Yehowa nɔ tamɔ etsɛ Manase fee lɛ, ni eshã afɔlei ekɛhã amãgãi fɛɛ ni etsɛ fee yɛ eyinɔ lɛ, ni esɔmɔɔ amɛ.

²³ Amon eyabaaa ehe shi kwraa ehãaa Yehowa tamɔ etsɛ Manase ba ehe shi lɛ, shi moŋ etɔ̃ tɔ̃mɔi babaoo.

²⁴ Kɛkɛ ni Amon tsuji lɛ tee eyinɔ apam, ni amɛgbe lɛ yɛ lɛ diɛŋtsɛ emaŋtsɛ we lɛ mli.

²⁵ Shi Yudabii lɛ gbe mɛi fɛɛ ni tee Maŋtsɛ Amon yinɔ apam lɛ, kɛkɛ ni awo ebi Yosia maŋtsɛ yɛ esɛɛ.