2 Kronika 32 - ŊMALƐ KRƆŊKRƆŊ LƐ

Asiriabii ka Yerusalɛm ŋɔɔ

¹ Nii ni Maŋtsɛ Hezekia tsu nɛɛ kɛ anɔkwa ni eye Yehowa sɛɛ lɛ, Sankerib ni ji Asiria maŋtsɛ lɛ fã ta kɛba, ni ebatua Yuda shikpɔŋ lɛ, ni egbagbaa ta ni esa maji ni atswa gbogbo awo amɛhe lɛ ayi. Eto eyiŋ akɛ ebaakumɔ maji lɛ agbogboi lɛ eshwie shi koni eŋɔ maji lɛ.

² Be ni Hezekia na akɛ Sankerib eto eyiŋ doo akɛ ekɛ Yerusalɛm baawu lɛ,

³ lɛ kɛ etsuji lɛ kɛ etabilɔi kãkãlɔi lɛ tee ajina, ni amɛye amɛfua akɛ atsimɔ nuhiŋmɛii ni yɔɔ maŋ lɛ hewɔ lɛ. Gbɔmɛi nɛɛ ye bua Hezekia.

⁴ Amɛbua mɛi babaoo anaa, ni amɛtsimɔ nuhiŋmɛii kɛ fai ni hoɔ yɛ shikpɔŋ lɛ nɔ lɛ fɛɛ ahiŋmɛii bɔ ni afee ni kɛji Asiria maŋtsɛmɛi lɛ ba Yerusalɛm lɛ amɛkana nu amɛnu.

⁵ Kɛkɛ ni Hezekia kɛ hiɛdɔɔ saa Yerusalɛm he gbogbo lɛ hei ni ekumɔ lɛ fɛɛ etswa kɛtee ŋwɛi; asaŋ etswa mɔji yɛ gbogbo lɛ nɔ heihei. Esaa etswa gbogbo kroko hu ewo maŋ lɛ he, ni efee enyɔ. Ewaje Yerusalɛm kpɔ mli ni atsɛɔ jɛi akɛ Milo lɛ. Efee akplɔi kɛ tsɛŋi babaoo diɛŋtsɛ hu.

⁶ Eto tatsɛmɛi ehã maŋ lɛ bii akuikui lɛ, ni ehã amɛ fɛɛ amɛyakpe yɛ maŋ lɛ agbo lɛ naa blohu lɛ mli. Hezekia kɛɛ maŋ lɛ yɛ jɛi kɛ miishɛɛ akɛ,

⁷ “Nyɛtsui akafãa yɛ Asiria maŋtsɛ lɛ kɛ asafo babaoo ni kɛ lɛ nyiɛ lɛ hewɔ! Ejaakɛ mɔ ni kɛ wɔ yɔɔ lɛ da fe mɔ ni kɛ lɛ yɔɔ lɛ.

⁸ Lɛ lɛ adesa hewalɛ kɛ lɛ yɔɔ; shi wɔ lɛ, Yehowa, wɔNyɔŋmɔ lɛ kɛ wɔ yɔɔ, koni eye ebua wɔ, asaŋ koni ewu wɔtai lɛ ehã wɔ.” Maŋbii lɛ na ekãa kɛ hiɛnɔkãmɔ yɛ Yuda Maŋtsɛ Hezekia wiemɔi lɛ ahewɔ.

⁹ Enɛ sɛɛ lɛ Asiria Maŋtsɛ Sankerib tsu kɛba Yerusalɛm. No mli lɛ Sankerib kɛ ta ni eyɔɔ lɛ fɛɛ eyasa Lakish maŋ lɛ yi. Shɛɛ ni ekɛtsu etsuji lɛ kɛbahã Yuda Maŋtsɛ Hezekia kɛ Yudabii fɛɛ ni yɔɔ Yerusalɛm lɛ ji akɛ,

¹⁰ “Mi Sankerib, Asiria maŋtsɛ, miibi nyɛ nɔ ni nɔ ni nyɛhiɛ kã hewɔ ni nyɛtara Yerusalɛm lolo be mli ni asa maŋ lɛ yi?

¹¹ Nyɛnaaa akɛ lakamɔ Hezekia lakaa nyɛ koni ehã hɔmɔ kɛ kumai agbe nyɛ hewɔ ekɛɔ nyɛ akɛ, ‘Yehowa, wɔNyɔŋmɔ lɛ, baahere wɔyiwala yɛ Asiria maŋtsɛ lɛ dɛŋ lɛ?’

¹² Ani jeee Hezekia nɛɛ nɔŋŋ ni efite Yehowa hei grɔŋŋ lɛ kɛ afɔleshãa latɛi srɔtoi lɛ fɛɛ, ni fee sɛɛ lɛ ekɛɛ Yuda kɛ Yerusalɛmbii akɛ amɛja, ni asaŋ amɛshã tsofakɛŋma yɛ afɔleshãa latɛ koome pɛ nɔ lɛ?

¹³ Nyɛleee kwraa nɔ ni mi kɛ Asiria maŋtsɛmɛi ni etsɔ̃ mihiɛ efee shikpɔji krokomɛi anɔ bii lo? Shikpɔji lɛ eko nɔ jemawɔji lɛ eko enyɛ emaŋbii lɛ ayiwala ehere yɛ midɛŋ pɛŋ lo?

¹⁴ Majimaji ni mitsɛmɛi ni etsɔ̃ mihiɛ lɛ fee amɛ musu lɛ ajemawɔji lɛ, te amɛteŋ nɔ ni ehere emaŋbii ayiwala yɛ midɛŋ pɛŋ, hewɔ ni nyɛ lɛ nyɛNyɔŋmɔ lɛ baanyɛ nyɛyiwala ehere yɛ midɛŋ lɛ?

¹⁵ No hewɔ lɛ, nyɛkahãa Hezekia miishishiu nyɛ, ni elakaa nyɛ nɛkɛ; ni asaŋ nyɛkahea lɛ nyɛyea hu. Ejaakɛ maŋ ko maŋ ko loo maŋtsɛ ko maŋtsɛ ko jemawɔŋ nyɛko emaŋbii ayiwala ehere yɛ Asiria maŋtsɛ ko dɛŋ dã, aahu ni nyɛNyɔŋmɔ lɛ. Enyɛŋ nyɛyiwala ehere yɛ mi midɛŋ.”

¹⁶ Asiria maŋtsɛ tsuji lɛ diɛŋtsɛ hu wie ahorabɔɔ wiemɔi pii amɛkɛshi Yehowa Nyɔŋmɔ lɛ kɛ Maŋtsɛ Hezekia, Yehowa tsulɔ lɛ fɛɛ.

¹⁷ Asiria maŋtsɛ lɛ diɛŋtsɛ hu ŋmala woji ekɛbabɔ Yehowa, Israel Nyɔŋmɔ lɛ, ahora. Etswa mpoa yɛ wolo lɛ mli ni ekɛɛ akɛ, “Bɔ ni shikpɔji lɛ anɔ jemawɔji lɛ nyɛko ahere amɛmaŋbii ayiwala yɛ midɛŋ dã lɛ, nakai nɔŋŋ Hezekia Nyɔŋmɔ lɛ nyɛŋ ahere emaŋ lɛ yɛ midɛŋ.”

¹⁸ Asiria maŋtsɛ lɛ tsuji lɛ bolɔ kɛ gbee waa yɛ Yudafoi amaŋ wiemɔ lɛ mli amɛtsɛ Yerusalɛmbii ni yɔɔ maŋ lɛ gbogbo lɛ nɔ lɛ koni amɛwo amɛhe gbeyei, ni amɛhã amɛ jijaa bɔ ni afee ni amɛnyɛ maŋ lɛ amɛŋɔ.

¹⁹ Tsuji nɛɛ wie Yerusalɛm Nyɔŋmɔ lɛ he tamɔ amɛwieɔ shikpɔŋ lɛ nɔ maji krokomɛi anɔ jemawɔji lɛ, ni ji gbɔmɔ adesa ninenaa nitsumɔnii lɛ ahe lɛ pɛpɛɛpɛ.

²⁰ Kɛkɛ ni Maŋtsɛ Hezekia kɛ Gbalɔ Yesaia, Amoz bi lɛ, sɔle ni amɛkpa Nyɔŋmɔ fai akɛ ebaye ebua amɛ.

²¹ Kɛkɛ ni Yehowa tsu bɔfo ko, ni ebagbe tabilɔi kãkãlɔi lɛ kɛ tatsɛmɛi lɛ kɛ asafoiatsɛmɛi lɛ fɛɛ ni yɔɔ Asiria maŋtsɛ lɛ tabilɔi lɛ ateŋ lɛ. No hewɔ lɛ, Asiria maŋtsɛ lɛ ku esɛɛ kɛtee eshikpɔŋ lɛ nɔ kɛ hiɛgbele. Ni be ni etee eyabote ejemawɔŋ lɛ we lɛ mli lɛ, lɛ diɛŋtsɛ emusuŋ bihii bamɔ lɛ klante, ni amɛgbe lɛ.

²² Bɔ ni Yehowa fee ehere Hezekia kɛ Yerusalɛmbii lɛ ayiwala yɛ Asiria Maŋtsɛ Sankerib kɛ mɛi krokomɛi fɛɛ adɛŋ nɛ. Asaŋ ehã amɛ kɛ amɛhewɔ maji fɛɛ hi shi yɛ hejɔlɛ mli.

²³ Mɛi babaoo kɛ afɔlei ba Yerusalɛm, ni amɛkɛbahã Yehowa, ni amɛbake Hezekia hu nibii ni jara wa. Ni kɛjɛ nakai be lɛ Maŋtsɛ Hezekia hiɛ ba nyam yɛ majimaji lɛ fɛɛ ahiɛ.

Hezekia henɔwomɔ kɛ eheyeli

²⁴ Maŋtsɛ Hezekia he baye be nɛɛ mli bɔ ni gbo eheɔ egbo nɛɛ. Shi Hezekia sɔle ekpa Yehowa fai, ni Yehowa bo esɔlemɔ lɛ toi, ni eto Hezekia naakpɛɛ okadi akɛ ehe baawa lɛ.

²⁵ Shi ejurɔ ni Yehowa fee Hezekia lɛ sɛɛ lɛ, ehe nɔ moŋ Hezekia wo, ni ehiii shi bɔ ni sa Yehowa hiɛ. No hewɔ lɛ, Yehowa mli fu Yuda kɛ Yerusalɛm fɛɛ.

²⁶ Shi naagbee mli aahu lɛ Hezekia je ehe sɛɛ, ni lɛ kɛ Yerusalɛm fɛɛ ba amɛhe shi amɛhã Yehowa; ni no hewɔ lɛ, Yehowa gbalaaa amɛtoi yɛ Hezekia yinɔ.

Hezekia ninamɔ kɛ egbojee

²⁷ Maŋtsɛ Hezekia na edɛŋ babaoo diɛŋtsɛ, ni ehiɛ ba nyam kpele. Efee nitoohei ehã nibii ni eyɔɔ lɛ eko fɛɛ eko, ni ji ejwiɛtɛi kɛ eshika kɛ ojarawatɛi kɛ tsofakɛŋma kɛ tsɛŋi kɛ nibii krokomɛi ni ajara wa lɛ fɛɛ.

²⁸ Emamɔ ŋmaa kɛ wain kɛ mu nitoohei hu; ni emamɔ tsui ehã etsinai kɛ etoi hu.

²⁹ Enɛɛmɛi asɛɛ lɛ, Hezekia totoo maji, ni ena toi kɛ tsinai kuikui babaoo diɛŋtsɛ ejaakɛ Nyɔŋmɔ duro lɛ nii jogbaŋŋ.

³⁰ Maŋtsɛ Hezekia nɛɛ nɔŋŋ ji mɔ ni yatsi Gihon Nuhiŋmɛi lɛ naa yɛ yiteŋgbɛ, ni edɔ nu lɛ yi, ni ehã ebatsɔ̃ Yerusalɛm anaigbɛ lɛ. Nɔ fɛɛ nɔ ni Hezekia mɔ etsumɔ mli lɛ eshwere.

³¹ Enɛ hewɔ lɛ, be ni Babilon lumɛi lɛ tsu bɔfoi Hezekia ŋɔɔ koni amɛbabi lɛ naakpɛɛ nii ni etsu yɛ shikpɔŋ lɛ nɔ lɛ he sane lɛ, Nyɔŋmɔ ŋmɛɛ Hezekia he ehã ehe nilee koni ekɛka Hezekia ekwɛ, kɛna nɔ ni yɔɔ etsuiŋ.

Hezekia maŋtsɛyeli lɛ naagbee

³² Nibii krokomɛi fɛɛ ni Maŋtsɛ Hezekia fee kɛ bɔ ni esɔmɔ Yehowa ehã lɛ, aŋmala yɛ Gbalɔ Yesaia, Amoz bi lɛ, Ninaa Wolo lɛ kɛ Yuda kɛ Israel Maŋtsɛmɛi ahe Saji Awolo lɛ hu mli.

³³ Hezekia gbo ni afu lɛ yɛ David shwiei maŋtsɛmɛi afũuhe lɛ mli kɛyaa eyiteŋgbɛ. Yuda kɛ Yerusalɛmbii fɛɛ wo Hezekia hiɛ nyam yɛ egbele mli. Hezekia bi Manase baye maŋtsɛ yɛ esɛɛ.