2 Kronika 31 - ŊMALƐ KRƆŊKRƆŊ LƐ

Hezekia saa Nyɔŋmɔjamɔ

¹ Be ni agbe gbijurɔ lɛ yeli naa lɛ, Israelbii fɛɛ ni baye gbijurɔ lɛ teetee Yuda kɛ Benyamin maji lɛ amli, ni amɛyakumɔ jemawɔji amãgãi lɛ fɛɛ, ni amɛgba Asherim jemawɔŋ lɛ koi lɛ fɛɛ, ni amɛfitefitee hei grɔŋgrɔŋŋ ni ajaa jemawɔji yɛ lɛ fɛɛ, kɛ afɔleshãa latɛi fɛɛ ni yɔɔ jɛi lɛ hu. Amɛyafite nibii nɛɛ ahenɔi fɛɛ ni yɔɔ Efraim kɛ Manase hu fɛɛ kɛyashi eshwɛɛɛ ekome folo. Kɛkɛ ni Israelbii lɛ fɛɛ hu ku amɛsɛɛ kɛtee amɛkutsei ashikpɔji lɛ anɔ, ni mɔ fɛɛ mɔ tee ewe.

² Maŋtsɛ Hezekia hã akɛ bɔ ni ajara osɔfoi lɛ kɛ Levibii lɛ amli kuikui sa lɛ bɔ̃i nitsumɔ ekoŋŋ bɔ ni ku fɛɛ ku yɛ enitsumɔ krɛdɛɛ lɛ. Mɛi yɛ ni shãa afɔle ni ashãa fɛɛ lɛ, kɛ shidaa afɔlei lɛ; ni mɛi yɛ ni sɔmɔɔ yɛ jamɔ lɛ mli, ni mɛi yɛ ni laa kɛjieɔ Yehowa yi; dani mɛi yɛ ni buɔ Sɔlemɔ we lɛ agboi lɛ anaa.

³ Maŋtsɛ lɛ gbɛfaŋ nii ni etsu ji akɛ emɔɔ lɛ diɛŋtsɛ ekooloi ni eyɔɔ lɛ eko ehãa, ni akɛshãa daa leebi kɛ gbɛkɛ afɔlei lɛ, kɛ agbɛnɛ afɔlei ni ashãa yɛ hejɔɔmɔ gbii lɛ nɔ lɛ kɛ nyɔŋ hei shishijee nɔ, kɛ gbii juji krokomɛi lɛ hu anɔ lɛ tamɔ bɔ ni eyɔɔ Yehowa Mla lɛ mli lɛ.

⁴ Agbɛnɛ Maŋtsɛ Hezekia fã Yerusalɛm maŋ lɛ mli bii lɛ akɛ amɛhã osɔfoi lɛ kɛ Levibii lɛ nii ni ji amɛ, osɔfoi lɛ, kɛ Levibii lɛ, amɛgbɛfaŋ nii lɛ bɔ ni afee ni osɔfoi lɛ kɛ Levibii lɛ kɛ amɛhe fɛɛ ahã kɛsɔmɔ yɛ Yehowa Mla lɛ naa.

⁵ Amrɔ nɔŋŋ ni anu famɔ nɛɛ he lɛ, Israelbii lɛ kɛ klɛŋklɛŋ abele kɛ wain kɛ mu kɛ wo kɛ ŋmɔshinii srɔtoi ni amɛkpa lɛ amli nii babaoo ba. Amɛkɛ nɔ fɛɛ nɔ ni amɛyɔɔ lɛ mlijaa nyɔŋma mli ekomekome babaoo hu ba.

⁶ Kɛkɛ ni Yudabii kɛ Israelbii ni yɔɔ Yuda shikpɔŋ lɛ nɔ maji lɛ amli lɛ hu kɛ toi kɛ tsinai kɛ nii ni amɛjɔɔ nɔ amɛkɛke Yehowa, amɛNyɔŋmɔ lɛ amlijaa nyɔŋma mli ekomekome ba, ni amɛto nibii lɛ kuikui.

⁷ Afi lɛ mli nyɔŋ ni ji etɛ̃ lɛ nɔ akɛ nibii lɛ bɔi baa; ni ahiɛ kɛbaa aahu kɛyashi nyɔŋ ni ji kpawo lɛ nɔ, ni agbe naa.

⁸ Be ni Maŋtsɛ Hezekia kɛ maŋ onukpai lɛ bana nibii kuikui ni maŋbii lɛ kɛbahã lɛ, amɛ jie Yehowa kɛ emaŋ Israel fɛɛ yi.

⁹ Maŋtsɛ Hezekia bi osɔfoi lɛ kɛ Levibii lɛ nibii lɛ ahe sane,

¹⁰ ni Osɔfonukpa Azaria, ni eji Zadok shwie lɛ, kɛɛ maŋtsɛ lɛ akɛ, “Kɛjɛ beyinɔ ni maŋbii lɛ kɛ afɔlei lɛ bɔi Yehowa we lɛ baa nɛɛ lɛ, wɔnaa nii wɔyeɔ wɔtɔrɔɔ aahu ni eshwɛɔ babaoo tete. Ejaakɛ Yehowa ejɔɔ emaŋ lɛ, ni no hewɔ nii ni shwɛɔ lɛ sɔŋŋ ji babaoo nɛɛ.”

¹¹ Kɛkɛ ni Hezekia fã akɛ asaa tsui lɛ yɛ sɔlemɔ shĩa lɛ amli. Asaa tsui lɛ,

¹² kɛkɛ ni aloo nikeenii lɛ kɛ nibii ni ajɔɔ nɔ ake lɛ fɛɛ tswɛm akɛyato tsui nɛɛ amli. Mɔ ni ato lɛ nibii nɛɛ anɔkwɛlɔnukpa ji Konania, Levinyo lɛ; ni enyɛminuu Shimei ji esɛɛmɔ.

¹³ Yɛ Maŋtsɛ Hezekia kɛ Osɔfonukpa Azaria hewalɛ naa lɛ, ahala Levibii nyɔŋma komɛi hu akɛ Konania kɛ enyɛmi Shimei shishibii kɛhã nibii lɛ anɔkwɛmɔ. Gbɔmɛi nɛɛ ji Yehiel kɛ Azazia kɛ Nahat kɛ Asahel kɛ Yerimot kɛ Yozabad kɛ Eliel kɛ Ismakia kɛ Mahat kɛ Benaia.

¹⁴ Kore ni ji Imna, Levinyo onukpa ni kwɛɔ Bokãgbɛ Agbo lɛ nɔ lɛ, bi lɛ ji mɔ ni ato akɛ ehe nibii ni abakeɔ Nyɔŋmɔ yɛ tsuijurɔ naa lɛ; asaŋ ejie nikee nɛɛ mli nii ni ji krɔŋkrɔŋ fe fɛɛ ni ji tuuŋtu gbɛfaŋ nii lɛ yɛ afɔlei lɛ amli eto afã.

¹⁵ Mɛi ni wa Kore kɛtsu nitsumɔ nɛɛ yɛ maji krokomɛi ni osɔfoi yɔɔ amɛmli lɛ ji Eden kɛ Minyamin kɛ Yeshua kɛ Shemia kɛ Amaria kɛ Shekania. Amɛjaa nii lɛ amɛhãa amɛnyɛmimɛi osɔfoi kɛ Levibii lɛ bɔ ni gbekɛ kɛ onukpa fɛɛ na pɛpɛɛpɛ yɛ amɛnitsumɔ kuikui lɛ anaa,

¹⁶ shi jeee yɛ weku kpãa naa. Hii fɛɛ ni eye afii nyɔŋmai etɛ̃ kɛyaa ni amɛyaa Yehowa we lɛ amɛyatsuɔ amɛgbɛnaa nitsumɔ yɛ amɛwekui anaa lɛ, ahãa amɛ amɛgbɛfaŋnii daa gbi.

¹⁷ Osɔfoi lɛ ajara amɛnitsumɔi lɛ ahã amɛ yɛ amɛtsɛmɛi awei lɛ anaa; ni Levibii lɛ ni eye kɛjɛ afii nyɔŋmai enyɔ kɛyaa lɛ hu, ahã amɛ amɛnitsumɔi lɛ yɛ amɛnitsumɔ asafo kui lɛ anaa.

¹⁸ Osɔfoi lɛ aŋmala amɛ kɛ amɛbii bibii kɛ amɛŋamɛi kɛ amɛbihii kɛ amɛbiyei fɛɛ agbɛii, no ji amɛsafoi kuikui lɛ amlibii fɛɛ. Ni amɛyeɔ anɔkwa kɛhiɛɔ amɛhe krɔŋkrɔŋ hu ejaakɛ aakwɛ gbɛ akɛ be fɛɛ be ni aaatsɛ amɛ amɛnitsumɔi krɔŋkrɔŋi lɛ atsumɔ lɛ, amɛyɛ kralo.

¹⁹ Asaŋ Aaron shwiei, ni ji osɔfoi, ni yɔɔ shikpɔji ni yɔɔ maji ni akɛhã Aaron shwiei ahewɔ lɛ anɔ agbɛfaŋ lɛ, hii krɛdɛɛ yɛ ni ato amɛ, ni amɛ amɛjaa nii, yɛ maji srɔtoi lɛ fɛɛ amli; ni amɛkwɛɔ ni amɛhãa osɔfoi lɛ kɛ Levibii lɛ hu ateŋ mɔ fɛɛ mɔ ni aŋma egbɛi egbɛfaŋnii.

²⁰ Nɔ ni Maŋtsɛ Hezekia tsu yɛ Yuda shikpɔŋ lɛ nɔ fɛɛ ji enɛ. Efee nii ni hi kɛ nii ni ja; ni eye anɔkwa hu yɛ Yehowa, eNyɔŋmɔ lɛ hiɛ.

²¹ Nɔ fɛɛ nɔ ni ewo ehe nitsumɔ nɔ lɛ, yɛ Nyɔŋmɔ Sɔlemɔ we lɛ mli jamɔ gbɛfaŋ jio, Mla lɛ gbɛfaŋ jio, eNyɔŋmɔ lɛ sɛɛgbɛ taomɔ jio, etsu kɛ etsui fɛɛ, ni no hewɔ hu lɛ eye omanye.