2 Kronika 30 - ŊMALƐ KRƆŊKRƆŊ LƐ

Asaa he ato Hehoo Gbijurɔ wulu lɛ yeli

¹ Kɛkɛ ni Maŋtsɛ Hezekia tsu Israelbii fɛɛ kɛ Yudabii fɛɛ hu aŋɔɔ kɛ shɛɛ akɛ eekpee amɛ koni amɛba Yerusalɛm amɛbaye Yehowa, Israel Nyɔŋmɔ lɛ, Hehoo Gbijurɔ lɛ yɛ Yehowa We lɛ mli. Eje gbɛ ni eŋmala woji ekɛmaje Efraimbii kɛ Manasebii ekɛtsɛ amɛ hu gbijurɔ lɛ yeli.

² Maŋtsɛ lɛ kɛ maŋ onukpai lɛ kɛ Yerusalɛmbii fɛɛ tee ajina yɛ Yerusalɛm, ni amɛye amɛfua akɛ aye Hehoo Gbijurɔ lɛ yɛ nyɔŋ ni ji enyɔ lɛ nɔ.

³ Ejaakɛ gbijurɔ lɛ eyahiii yeli be ni ebe lɛ tuuŋtu shɛ lɛ, ejaakɛ nakai be mli lɛ osɔfoi lɛ babaoo tsuuko amɛhe, ni maŋbii lɛ babaoo hu ebashɛko shi yɛ Yerusalɛm.

⁴ Fuamɔ nɛɛ sa maŋtsɛ lɛ kɛ emaŋbii lɛ fɛɛ ahiɛ.

⁵ No hewɔ lɛ, amɛma sane lɛ nɔ mi akɛ ashiɛ ahã Israelbii fɛɛ kɛjɛ Beersheba, yɛ wuoyigbɛ, aahu kɛyashwie Dan, yɛ kooyigbɛ, akɛ mɔ fɛɛ mɔ aba koni abaye Yehowa, Israel Nyɔŋmɔ lɛ, Hehoo Gbijurɔ lɛ yɛ Yerusalɛm ekɛwo Yehowa hiɛ nyam, ejaakɛ nakai be mli lɛ mɛi babaoo baaa gbijurɔ lɛ yeli dɔŋŋ tamɔ bɔ ni aŋma lɛ.

⁶ No hewɔ lɛ, maŋtsɛ lɛ kɛ maŋ onukpai lɛ ŋmala woji, ni amɛkɛtsu bɔfoi kɛtee Israel kɛ Yuda heihei fɛɛ. Maŋtsɛ lɛ shɛɛ lɛ kɛɛ akɛ, “Israelbii, nyɛkpalea nyɛbaa Yehowa, ni ji Abraham kɛ Isak kɛ Israel Nyɔŋmɔ lɛ ŋɔɔ, ni lɛ hu eeebɛŋkɛ nyɛ, nyɛ mɛi ni nyɛhe je mli, ni Asiria maŋtsɛmɛi lɛ anine eyashɛɛɛ nyɛnɔ koni amɛŋɔ nyɛ nom lɛ.

⁷ Nyɛkafea tamɔ nyɛtsɛmɛi lɛ kɛ nyɛnyɛmimɛi lɛ ni eyayeee amɛtsɛmɛi lɛ aNyɔŋmɔ lɛ anɔkwa lɛ fee lɛ; no hewɔ lɛ, Yehowa hã amɛhiɛ kpãtã tamɔ nyɛ diɛŋtsɛ nyɛnaa lɛ.

⁸ Nyɛkafea nyɛhe kuɛŋtilɔi tamɔ nyɛtsɛmɛi lɛ; shi moŋ nyɛbaa nyɛhe shi nyɛhãa Yehowa. Nyɛbaa Sɔlemɔ we lɛ yɛ Yerusalɛm; etsuu he eto kɛmiiya naanɔ koni nyɛbaja Yehowa, nyɛNyɔŋmɔ lɛ, yɛ jɛi koni Yehowa mli ni efu nyɛ lɛ sɛɛ afo.

⁹ Ejaakɛ kɛji nyɛkpale kɛba Yehowa ŋɔɔ lɛ, mɛi ni baŋɔ nyɛnyɛmimɛi lɛ kɛ nyɛbii lɛ hu nom kɛtee maŋsɛɛ lɛ amusuŋ baatsɔ̃ amɛ yɛ amɛhe, ni amɛbaaŋmɛɛ nyɛnyɛmimɛi lɛ kɛ nyɛbii lɛ ahe koni amɛku amɛsɛɛ amɛba shikpɔŋ nɛɛ nɔ ekoŋŋ. Yehowa, nyɛNyɔŋmɔ lɛ, durolɔ kɛ mɔbɔnalɔ ji lɛ; ni kɛji nyɛkpale nyɛba eŋɔɔ lɛ, ebaahere nyɛ atuu.”

¹⁰ Bɔfoi lɛ yakpa maji fɛɛ anɔ yɛ Efraim kɛ Manase hu, ni amɛtee aahu kɛyashɛ Zebulon tɔ̃ɔ. Shi maŋbii lɛ ŋmɔ bɔfoi lɛ, ni amɛye amɛhe fɛo.

¹¹ Shi kɛ̃lɛ mɛi fioo ko jɛ Asher kɛ Manase kɛ Zebulonbii ateŋ ba amɛhe shi amɛbo tsɛmɔ lɛ toi, ni amɛba gbijurɔ lɛ yeli yɛ Yerusalɛm.

¹² Nyɔŋmɔ nine kã Yudabii lɛ ahe, ni ehã amɛ fɛɛ amɛna jwɛŋmɔ kome kɛfee ekome, ni amɛye maŋtsɛ lɛ kɛ maŋ onukpai lɛ agbɛjianɔtoi lɛ anɔ, ni amɛkɛfee Nyɔŋmɔ suɔmɔnaanii.

Aye Hehoo Gbijurɔ lɛ

¹³ Kɛkɛ ni afi lɛ mli nyɔŋ ni ji enyɔ lɛ nɔ lɛ, asafo babaoo diɛŋtsɛ naa bakpe shi yɛ Yerusalɛm koni amɛbaye Ma Akpiti Gbijurɔ lɛ.

¹⁴ Asafo lɛ kumɔ afɔleshãa latɛi kɛ tsofakɛŋmashãa latɛi ni amãmɔ yɛ Yerusalɛm heihei fɛɛ ni amɛloo fɛɛ amɛyatsi amɛshwie Kidron Faa lɛ jɔɔ lɛ mli.

¹⁵ Kɛkɛ ni nyɔŋ ni ji enyɔ lɛ gbi ni ji nyɔŋma kɛ ejwɛ lɛ nɔ lɛ, amɛgbe toobii ni amɛkɛbaaye Hehoo Gbijurɔ lɛ. Osɔfoi lɛ kɛ Levibii lɛ hu ateiaŋ mɛi ni tsuuko amɛhe lɛ ahiɛ gboi bɔ sɔŋŋ ni ehã amɛtee ni amɛyatsuu amɛhe. Kɛkɛ ni amɛbamɔ shãa afɔlei lɛ amli ni ashã yɛ Sɔlemɔ we lɛ.

¹⁶ Mɔ fɛɛ mɔ tee eyadamɔ he ni esɔmɔɔ yɛ bɔ ni Nyɔŋmɔ gbɔmɔ Mose Mla lɛ eto gbɛjianɔ lɛ. Osɔfoi lɛ heɔ lá ni Levibii lɛ sɔoɔ lɛ yɛ amɛdɛŋ, ni amɛkɛshwãa afɔleshãa latɛ lɛ nɔ.

¹⁷ Mɛi pii yɛ asafo lɛ mli ni amɛtsuuko amɛhe. No hewɔ lɛ, Levibii lɛ ji mɛi ni gbe nɛkɛ mɛi nɛɛ aHehoo toobii lɛ hã amɛ bɔ ni afee ni amɛtoobii lɛ ahe atse ahã Yehowa.

¹⁸ Ejaakɛ Efraimbii lɛ kɛ Manasebii lɛ kɛ Isakarbii lɛ kɛ Zebulonbii lɛ ni ba afi lɛ yeli lɛ ateiaŋ mɛi babaoo tsuuko amɛhe bɔ ni ji kusum naa; ni no hewɔ lɛ, amɛmiiye Hehoo Gbijurɔ lɛ bɔ ni esaaa. Maŋtsɛ Hezekia sɔle sɔlemɔ nɛɛ yɛ gbɔmɛi nɛɛ ahewɔ, ni ekɛɛ akɛ,

¹⁹ “Yehowa, wɔtsɛmɛi lɛ aNyɔŋmɔ, yɛ omlihilɛ naa lɛ mɔ fɛɛ mɔ ni miitao osɛɛgbɛ kɛ etsuiŋ fɛɛ lɛ, kɛji etsuuko ehe yɛ Sɔlemɔ we lɛ mlai lɛ anaa tete lɛ okɛ etɔ̃mɔ lɛ afa lɛ.”

²⁰ Yehowa bo Hezekia sɔlemɔ lɛ toi, ni ekɛfa amɛ, ni efɔŋ ko baaa amɛnɔ.

²¹ No hewɔ lɛ, Israelbii ni anaa bakpe shi yɛ Yerusalɛm lɛ ye Ma Akpiti Gbijurɔ lɛ kɛyashi gbii kpawo sɔŋŋ kɛ nyamɔ kpele. Daa gbi lɛ Osɔfoi lɛ kɛ Levibii lɛ laa kɛjieɔ Yehowa yi kɛ amɛnyɛmɔ fɛɛ.

²² Ni Maŋtsɛ Hezekia jie Levibii lɛ ayi pam yɛ bɔ ni amɛhe esa kɛ sɔɔmɔ kɛji aaja Yehowa lɛ hewɔ. Maŋbii lɛ shãshãa shidaa afɔlei, ni amɛyeyee nii kɛyashi gbii kpawo, ni amɛda Yehowa, amɛtsɛmɛi aNyɔŋmɔ lɛ, shi.

Atsa Gbijurɔ lɛ yeli nɔ

²³ Shi gbii kpawo lɛ sɛɛ lɛ, maŋ lɛ fɛɛ ye fua akɛ atsa afiyeli lɛ nɔ gbii kpawo ekoŋŋ. Ni afee nakai kɛ miishɛɛ.

²⁴ Ejaakɛ Yuda Maŋtsɛ Hezekia hã maŋbii lɛ tsinahii akpe kɛ toi hu akpei kpawo koni amɛkɛshã afɔle, ni maŋ onukpai lɛ hu hã tsinahii akpe kɛ toi hu akpei nyɔŋma. Osɔfoi lɛ hu babaoo tsuu amɛhe, ni amɛfee amɛhe krɔŋkrɔŋ.

²⁵ No hewɔ lɛ, Yudabii blublu kɛ amɛsɔfoi lɛ kɛ amɛteŋ Levibii fɛɛ hu, kɛ asafo ni jɛ Israel ba lɛ, kɛ gbɔi hu ni jɛ Israel shikpɔŋ lɛ nɔ lɛ, kɛ gbɔi ni yɔɔ Yuda lɛ fɛɛ na miishɛɛ.

²⁶ Nyamɔ ni anya yɛ Yerusalɛm lɛ jeee hiɛ nɛ, ejaakɛ kɛjɛ Maŋtsɛ David bi Solomon yinɔ lɛ, ayeko afi ni tamɔ nɛkɛ yɛ Yerusalɛm dã.

²⁷ Kɛkɛ ni osɔfoi lɛ kɛ Levibii lɛ ba Nyɔŋmɔ dɛŋ jɔɔmɔ amɛhã maŋbii lɛ. Nyɔŋmɔ nu sɔlemɔ lɛ, ni ebo toi.