2 Kronika 3 - ŊMALƐ KRƆŊKRƆŊ LƐ

¹ Kɛkɛ ni Maŋtsɛ Solomon bɔi Yehowa Sɔlemɔtsu lɛ maa yɛ Yerusalɛm he tuuŋtu ni etsɛ David esaa eto lɛ, yɛ Moria gɔŋ lɛ nɔ he ni Yehowa jie ehe kpo etsɔ̃ɔ etsɛ David yɛ lɛ, ni ji Ornan, Yebusnyo lɛ ŋmãagbeemɔhe lɛ.

² Eje tsu lɛ maa lɛ shishi yɛ nyɔŋ ni ji enyɔ lɛ nɔ gbi ni ji enyɔ lɛ nɔ yɛ emaŋtsɛyeli afi ni ji ejwɛ lɛ nɔ.

³ Nyɔŋmɔ shĩa lɛ ni Solomon to eshishi lɛ dalɛ nɛ: blema ko susumɔ kpãa naa lɛ, shĩa lɛ kɛlɛ ji ninetalɔi nyɔŋmai ekpaa, ni elɛɛmɔ ji ninetalɔi nyɔŋmai enyɔ.

⁴ Koi ni yɔɔ tsu lɛ hiɛ lɛ kɛlɛ ji ninetalɔi nyɔŋmai enyɔ; ni ekwɔlɛ ji ninetalɔi oha kɛ nyɔŋmai enyɔ. Akɛ shika ŋmiiŋmi ha koi nɛɛ mligbɛ fɛɛ.

⁵ Tsu wulu lɛ diɛŋtsɛ lɛ, akɛ saiprɛs tso ha emli fɛɛ, kɛkɛ ni akɛ shika ŋmiiŋmi ha tso lɛ hu he, ni ayeyee tsɛŋi kɛ kɔsɔŋkɔsɔ asamai yɛ nɔ.

⁶ Ni esaa ekɛ ojarawatɛi ka tsu lɛ mli kɛwula mli. Shika lɛ ashɛ kɛjɛ Parwain kɛba.

⁷ Ekɛ shika ha tsu wulu lɛ mli fɛɛ — gbogboi lɛ kɛ mplaŋi lɛ kɛ shinaatsei lɛ kɛ shinai lɛ fɛɛ ahe. Aye Nyɔŋmɔ bɔfo kerub samai yɛ gbogboi lɛ ahe.

⁸ Kɛkɛ ni agbɛnɛ afee Tsu Krɔŋkrɔŋ Fe Fɛɛ lɛ. Ekɛlɛ ji ninetalɔi nyɔŋmai enyɔ; ni elɛɛmɔ hu ninetalɔi nyɔŋmai enyɔ. Akɛ shika ŋmiiŋmi ni tsiimɔ ji talentai ohai ekpaa ha emli fɛɛ.

⁹ Aŋmɛ shika gramii ohai enumɔ kɛ nyɔŋmai kpawo ni akɛfee plɛkoobii. Akɛ shika ha ŋwɛitsui lɛ hu ahe.

¹⁰ Solomon hã akɛ tso gbɔ kerubim enyɔ, ni akɛ shika ha amɛhe, kɛkɛ ni akɛyamamɔ Tsu Krɔŋkrɔŋ Fe Fɛɛ lɛ mli.

¹¹ Kerubim lɛ afiji lɛ fɛɛ akɛlɛmɔ aaafee ninetalɔi nyɔŋmai enyɔ. Kerub kome fine kome ni ekɛlɛ ji ninetalɔi enumɔ ni eyasaa kerub kome lɛ hu fine kome lɛ ni lɛ hu ekɛlɛ nakai nɔŋŋ lɛ he.

¹² Ni kerub nɛɛ fine kome ni ekɛlɛ ji ninetalɔi enumɔ lɛ yasaa shĩa lɛ gbogbo lɛ he, ni efine kroko lɛ ni lɛ hu ekɛlɛ nakai nɔŋŋ lɛ yasaa klɛŋklɛŋ kerub lɛ fine lɛ he.

¹³ Kerubim nɛɛ afiji ejwɛ lɛ fɛɛ akɛlɛmɔ ji ninetalɔi nyɔŋmai enyɔ. Kerubim lɛ damɔ amɛnaji anɔ, ni amɛhiɛ kwɛɔ Sɔlemɔtsu lɛ mligbɛ.

¹⁴ Akɛ mama bluu kɛ mama afaseo tsuru faa kɛ klala kpakpa fee muhɔɔ, ni alo kerubim awo mli.

Akɔɔble akulashiŋi enyɔ lɛ

¹⁵ Maŋtsɛ Solomon hã afee akulashiŋi enyɔ kɛ amɛyiteiaŋ kpɔbii, ni akɛmamɔ Sɔlemɔtsu lɛ hiɛ. Akulashiŋi lɛ ateŋ eko fɛɛ eko kwɔlɛ ji ninetalɔi nyɔŋmai etɛ̃ kɛ enumɔ, ni kpɔ ni ma eko fɛɛ eko yiteŋ lɛ kwɔlɛ ji ninetalɔi enumɔ.

¹⁶ Asaŋ afee kɔsɔŋkɔsɔi ni akɛwo akulashiŋi lɛ ayiteŋ. Afee kpɔbii kokrobii oha akɛwo kɔsɔŋkɔsɔi lɛ ahe.

¹⁷ Akɛ akulashiŋi lɛ mamɔ Sɔlemɔtsu lɛ agbo lɛ biɛ kɛ biɛ, ekome yɛ kooyigbɛ, ni ekome hu yɛ wuoyigbɛ. Awo wuoyigbɛ akulashiŋ lɛ gbɛi akɛ Yakin, kɛ kooyigbɛ akulashiŋ lɛ akɛ Boaz.