2 Kronika 29 - ŊMALƐ KRƆŊKRƆŊ LƐ

Yuda Maŋtsɛ Hezekia

¹ Hezekia eye afii nyɔŋmai enyɔ kɛ enumɔ be ni ebɔi maŋtsɛyeli lɛ, ni eye maŋtsɛ afii nyɔŋmai enyɔ kɛ nɛɛhu yɛ Yerusalɛm. Enyɛ ni fɔ lɛ gbɛi ji Abia, Zakaria biyoo lɛ.

² Hezekia ba ejeŋ ekpakpa bɔ ni Yehowa taoɔ tamɔ eseshinyo Maŋtsɛ David fee lɛ pɛpɛɛpɛ.

Sɔlemɔtsu lɛ He tsuumɔ

³ Emaŋtsɛwomɔ lɛ sɛɛ klɛŋklɛŋ afi lɛ mli klɛŋklɛŋ nyɔŋ lɛ nɔ lɛ, Hezekia gbele Yehowa We lɛ naa shinai lɛ, ni asaŋ esaa fɛɛ.

⁴ Etsɛ osɔfoi lɛ kɛ Levibii lɛ, ni ekɛ amɛ kpe yɛ Sɔlemɔtsu lɛ bokãgbɛ kpo teŋ lɛ mli,

⁵ ni ekɛ amɛ wie. Ekɛɛ amɛ akɛ, “Agoo Levibii, agbɛnɛ nyɛtsuua nyɛhe ni nyɛfea nyɛhe krɔŋkrɔŋ, koni nyɛfea Yehowa, nyɛtsɛmɛi aNyɔŋmɔ lɛ, We lɛ hu krɔŋkrɔŋ. Nɔ fɛɛ nɔ ni buleɔ Sɔlemɔtsu lɛ, nyɛjiea yɛ jɛi.

⁶ Wɔtsɛmɛi lɛ eyayeee anɔkwa, ni amɛfeefee nibii ni ejaaa yɛ Yehowa, wɔNyɔŋmɔ lɛ, hiɛ. Amɛkwa lɛ, amɛkɔ amɛnane yɛ biɛ ni ji Yehowa We lɛ, ni amɛtsɔ̃ amɛsɛɛ amɛhã Yehowa.

⁷ Amɛŋamɔ Sɔlemɔtsu lɛ naa shinai lɛ, amɛkwɛ ni Sɔlemɔtsu lɛ mli kanei lɛ gboi, ni tsofakɛŋma ni jio, shãa afɔlei ni jio, amɛbashãaa eko yɛ He Krɔŋkrɔŋ lɛ dɔŋŋ amɛhãaa Israel Nyɔŋmɔ lɛ.

⁸ Yehowa mli fu Yuda kɛ Yerusalɛm naakpa yɛ enɛɛmɛi ahewɔ; ni nɔ ni efee amɛ lɛ nyɛ fɛɛ nyɛna bɔ ni eyɔɔ tsuifãa ehã, asaŋ ni ehãa mɔ he jɔ̃ɔ lɛ.

⁹ Agbegbee wɔtsɛmɛi lɛ yɛ ta mli, ni naa, wɔbihii kɛ wɔbiyei kɛ wɔŋamɛi lɛ aŋɔ amɛ nom kɛtee maŋsɛɛ ni ayaye amɛ nyɔŋ.

¹⁰ “Mito miyiŋ akɛ mi kɛ Yehowa, Israel Nyɔŋmɔ lɛ, baakpãŋ bɔ ni afee ni efo emlifu lɛ sɛɛ ehã wɔ.

¹¹ Mibii, nyɛkafea hejɔ̃ yɛ sane nɛɛ mli ejaakɛ nyɛ, nyɛ ji mɛi ni Yehowa diɛŋtsɛ ehala akɛ nyɛdamɔ ehiɛ nyɛsɔmɔ lɛ, asaŋ ni nyɛshã tsofakɛŋma nyɛhã lɛ.”

¹² Kɛkɛ ni Levibii ni yɔɔ jɛi gbi lɛ te shi damɔ shi, ni mɛi ni yɔɔ jɛi gbi lɛ yɛ Kohat shwiei lɛ agbɛfaŋ ji: Amasai bi Mahat, kɛ Azaria bi Yoel; yɛ Merari shwiei lɛ agbɛfaŋ lɛ, Abdi bi Kish, kɛ Yehalelel bi Azaria; ni yɛ Gershon shwiei lɛ agbɛfaŋ lɛ, Zima bi Yoa, kɛ Yoa bi Eden.

¹³ Yɛ Elizafan shwiei lɛ agbɛfaŋ lɛ, Shimri kɛ Yeuel; ni yɛ Asaf shwiei lɛ agbɛfaŋ lɛ Zakaria kɛ Matania.

¹⁴ Yɛ Heman shwiei lɛ agbɛfaŋ lɛ Yehusel kɛ Shimei, ni yɛ Yedutun shwiei lɛ agbɛfaŋ lɛ Shemaia kɛ Uziel.

¹⁵ Gbɔmɛi nɛɛ tee ni amɛyabua amɛnyɛmimɛi Levibii lɛ anaa, ni amɛtsuu amɛhe kɛfee amɛhe krɔŋkrɔŋ. No sɛɛ lɛ, amɛtee, bɔ ni maŋtsɛ lɛ efã amɛ yɛ Yehowa wiemɔ naa lɛ, koni amɛyatsuu Yehowa We lɛ mli.

¹⁶ Osɔfoi lɛ bote Yehowa We lɛ mli diɛŋtsɛ koni amɛyatsuu jɛi. Amɛloo nibii fɛɛ ni buleɔ Yehowa Sɔlemɔtsu lɛ kɛje kpo kɛba Yehowa We lɛ kpo teŋ lɛ mli; kɛkɛ ni Levibii lɛ hu loo nibii nɛɛ kɛtee amɛkɛyawo Kidron faa lɛ mli.

¹⁷ Amɛbɔi hetsuumɔ nitsumɔ lɛ yɛ klɛŋklɛŋ nyɔŋ lɛ klɛŋklɛŋ gbi lɛ nɔ, ni gbi ni ji kpaanyɔ lɛ, amɛshɛ Yehowa We lɛ koi lɛ shi. Enɛ sɛɛ lɛ, amɛkɛ gbii kpaanyɔ tsuu Yehowa We lɛ he. Amɛgbe nitsumɔ lɛ naa yɛ klɛŋklɛŋ nyɔŋ lɛ gbi ni ji nyɔŋma kɛ ekpaa lɛ nɔ.

Agbele Sɔlemɔtsu lɛ naa ekoŋŋ

¹⁸ Levibii lɛ tee Maŋtsɛ Hezekia ŋɔɔ amɛyabɔ lɛ amaniɛ, ni amɛkɛɛ lɛ akɛ, “Wɔtsuu Yehowa sɔlemɔ shĩatso muu lɛ he wɔgbe naa. Shãa afɔle afɔleshãa latɛ lɛ kɛ ehe nibii lɛ fɛɛ, kɛ okplɔ̃ ni akɛ Yehowa aboloo lɛ maa nɔ lɛ, kɛ ehe nibii lɛ fɛɛ hu wɔtsuu he.

¹⁹ Nibii fɛɛ ni kulɛ akɛjaa shi Maŋtsɛ Ahaz shi amɛ sɛɛ be mli ni ekpa Yehowa jamɔ be ni eyeɔ maŋtsɛ lɛ, wɔkɛ fɛɛ eba, ni wɔtsuu amɛhe. Amrɔ nɛɛ lɛ fɛɛ mamɔ Yehowa afɔleshãa latɛ lɛ hiɛ.”

²⁰ Oya nɔŋŋ kɛkɛ ni Maŋtsɛ Hezekia bua maŋ lɛ mli onukpai lɛ anaa, ni ekɛ amɛ tee Yehowa sɔlemɔ shia lɛ mli.

²¹ Amɛkɛ tsinahii kpawo kɛ ojwɛnii kpawo kɛ toobii kpawo kɛ tookpakpoi hu kpawo ba koni akɛshã afɔle kɛfɔ maŋtsɛyeli lɛ kɛ He Krɔŋkrɔŋ lɛ kɛ Yuda maŋ muu lɛ fɛɛ he muji lɛ. Kɛkɛ ni maŋtsɛ lɛ fã osɔfoi lɛ, ni ji Aaron shwiei lɛ, akɛ amɛkɛ kooloi lɛ ashã afɔle yɛ Yehowa afɔleshãa latɛ lɛ nɔ.

²² No hewɔ lɛ, osɔfoi lɛ gbe tsinai lɛ, ni amɛsɔo lá lɛ, ni amɛkɛ amɛlá lɛ shwã afɔleshãa latɛ lɛ nɔ, ni no sɛɛ lɛ, amɛgbe toobii lɛ. Osɔfoi lɛ sɔo kooloi lɛ ateŋ eko fɛɛ eko lá, ni amɛkɛshwã afɔleshãa latɛ lɛ nɔ.

²³ Kɛkɛ ni agbɛnɛ amɛmɔmɔ too kpakpoi lɛ, ni amɛkɛ amɛ ba maŋtsɛ lɛ kɛ maŋbii ni yɔɔ jɛi lɛ aŋɔɔ, ni amɛkɛ amɛniji shwieshwie kooloi lɛ anɔ.

²⁴ No sɛɛ lɛ, osɔfoi lɛ gbe too kpakpoi lɛ, ni akɛ amɛlã lɛ fee Israel he esha hefaikpamɔ afɔle yɛ afɔleshãa latɛ lɛ nɔ. Ejaakɛ maŋtsɛ lɛ efã akɛ shãa afɔle lɛ kɛ esha he afɔle lɛ ashã fɛɛ ahã Israel akutsei lɛ fɛɛ.

²⁵ Kɛkɛ ni Maŋtsɛ Hezekia hã Levibii lɛ yadamɔ Yehowa We lɛ mli kɛ ŋoŋoi kɛ obentai kɛ saŋkui bɔ ni Yehowa etsɔ̃ maŋtsɛ ninalɔ Gad kɛ agbɛnɛ Gbalɔ Natan nɔ etsɔ̃ɔ Maŋtsɛ David akɛ efee lɛ.

²⁶ Levibii lɛ hiɛhiɛ David yinɔ lámɔ nibii krokomɛi lɛ, ni osɔfoi lɛ hiɛ tɛtɛrɛmantɛrɛ lɛ.

²⁷ Maŋtsɛ Hezekia fã akɛ abɔi shãa afɔle lɛ shãa. Be ni aje afɔle lɛ shãa shishi nɔŋŋ kɛkɛ ni maŋbii lɛ wo lala, ni akɛkafo Yehowa, ni lalatsɛmɛi lɛ hu bɔi David yinɔ obentai lɛ kɛ ŋoŋoi lɛ kɛ saŋkui lɛ tswaa kɛ tɛtɛrɛmantɛrɛ lɛ hu kpãmɔ.

²⁸ Asafo ni yɔɔ jɛi lɛ ja Yehowa. Lalɔi lɛ la, ni tɛtɛrɛmantɛrɛtsɛmɛi lɛ hu tee nɔ amɛkpã bɛji lɛ aahu kɛyashi agbe shãa afɔle lɛ shãa naa.

²⁹ Be ni ashã afɔle lɛ agbe naa lɛ, Maŋtsɛ Hezekia kɛ mɛi fɛɛ ni yɔɔ jɛi lɛ koto shi, ni amɛja Yehowa.

³⁰ No sɛɛ lɛ, Hezekia kɛ maŋ onukpai lɛ bi Levibii lɛ akɛ amɛla lalai ni David folɔ lɛ kɛ nɔ ni Gbalɔ Asaf hu folɔ lɛ amɛkɛjie Yehowa yi. Kɛkɛ ni asafo lɛ koto shi, ni amɛja Nyɔŋmɔ.

³¹ Maŋtsɛ Hezekia kɛɛ maŋ lɛ akɛ, “Agbɛnɛ ni nyɛtsuu nyɛhe nyɛhã Yehowa nɛɛ, nyɛtsia nyɛbɛŋkɛa kɛ nyɛfɔlei lɛ nyɛkɛbadaa Yehowa shi.” Asafo lɛ kɛ afɔlei lɛ ba, ni mɛi fɛɛ ni yɔɔ he tsui lɛ kɛ shãa afɔlei hu ba.

³² Afɔlei ni asafo lɛ bahã akɛ Yehowa shãa afɔle lɛ ji tsinai nyɔŋmai kpawo kɛ ojwɛnii oha, kɛ toobii hu ohai enyɔ.

³³ Ni nibii ni ajɔɔ nɔ akɛ aye lɛ fee tsinai ohai ekpaa kɛ gwantɛŋi akpei etɛ̃.

³⁴ Shi akɛ ni osɔfoi lɛ ayi eyafaaa bɔ ni amɛaanyɛ kooloi ni akɛbaashã shãa afɔle lɛ fɛɛ ahe woji amɛkpɔlɔ hewɔ lɛ, amɛnyɛmimɛi Levibii lɛ wa amɛ kɛyashi agbe nitsumɔ lɛ fɛɛ naa. Nakai be lɛ mli nɔŋŋ lɛ, osɔfoi lɛ ekomɛi yatsuu amɛhe, ni amɛbamɔ nitsumɔ lɛ mli.

³⁵ Bɔ ni shãa afɔle lɛ yafa babaoo diɛŋtsɛ lɛ, nakai nɔŋŋ yeli kɛ shidaa afɔle kooloi lɛ amli fɔi lɛ, kɛ agbɛnɛ shãa afɔle lɛ he dãa afɔle lɛ hu yafa babaoo. Gbɛ nɔ ni tsɔ̃ ni atsuu Yehowa We lɛ he, asaŋ ni agbele naa ekoŋŋ koni aja yɛ mli lɛ nɛ.

³⁶ Maŋtsɛ Hezekia kɛ emaŋbii lɛ fɛɛ nya naakpa yɛ nɔ ni Nyɔŋmɔ etsu ehã amɛ lɛ hewɔ, ejaakɛ nitsumɔ lɛ tee nɔ oya.