2 Kronika 28 - ŊMALƐ KRƆŊKRƆŊ LƐ

Yuda Maŋtsɛ Ahaz maŋtsɛyeli

¹ Ahaz eye afii nyɔŋmai enyɔ be ni ebɔi maŋtsɛyeli lɛ, ni eye maŋtsɛ afii nyɔŋma kɛ ekpaa yɛ Yerusalɛm.

² Shi moŋ ekɔ Israel maŋtsɛmɛi lɛ ajeŋba lɛ, ni ekɛ dade shwie Baal jemawɔji lɛ amãgãi,

³ ni eshã tsofakɛŋma yɛ Hinom Jɔɔ lɛ mli ekɛja jemawɔji lɛ. Etee nɔ po esha lɛ diɛŋtsɛ emusuŋbii akɛ afɔle ekɛhã jemawɔji lɛ. Gbɔmɛi ni yɔɔ shikpɔŋ lɛ nɔ sa, shi Yehowa shwie amɛ yɛ Israelbii lɛ agbɛ nɔ be ni Israelbii lɛ jɛ Ijipt amɛbaa lɛ akusum ni ehiɔ ji enɛ.

⁴ Maŋtsɛ Ahaz tee hei grɔŋŋi ni ji jemawɔji ajamɔhei ni yɔɔ gɔŋkpɔi lɛ anɔ kɛ agbɛnɛ tsei kusukusuu lɛ ashishi lɛ ni eyashãshãa afɔlei, ni eshãshãa tsofakɛŋma hu yɛ jɛi ekɛja jemawɔji lɛ.

Yuda kɛ Siria kɛ Israel ta

⁵ Ahaz jeŋba nɛɛ hewɔ lɛ, Yehowa, eNyɔŋmɔ lɛ, ŋmɛɛ ehe ehã Siria maŋtsɛ ni ebaye enɔ kunim yɛ ta mli, ni eŋɔ Yudabii babaoo diɛŋtsɛ nom kɛtee Damasko. Nakai nɔŋŋ Israel maŋtsɛ lɛ hu baye Ahaz nɔ kunim, ni ekpãtã Yudabii ahiɛ musúmusú,

⁶ ejaakɛ gbi kometoo nɔ lɛ, Israel Maŋtsɛ Peka, Remalia binuu lɛ, gbe Yuda tabilɔi kãkãlɔi lɛ ateŋ mɛi akpei oha kɛ nyɔŋmai enyɔ sɔŋŋ. Eba lɛ nɛkɛ ejaakɛ Yudabii lɛ ekwa Yehowa, amɛtsɛmɛi aNyɔŋmɔ lɛ.

⁷ Efraimnyo tabilɔ, nuu kakabãŋ ko ni egbɛi ji Zikri lɛ gbe Maŋtsɛ Ahaz binuu Maaseia lɛ kɛ Azrikam, maŋtsɛ we lɛ nɔkwɛlɔ lɛ, kɛ agbɛnɛ Elkana, maŋtsɛ sɛɛmɔ lɛ yɛ ta nɛɛ mli.

⁸ Israel tabilɔi lɛ ŋɔ amɛnyɛmimɛi Yudabii lɛ ateŋ yei kɛ amɛbihii kɛ amɛbiyei akpei ohai enyɔ nom kɛtee Samaria; asaŋ amɛha Yudabii anii babaoo hu kɛtee.

Gbalɔ Obed

⁹ Be nɛɛ mli lɛ gbalɔ ko yɛ Samaria maŋ lɛ mli ni atsɛɔ lɛ Obed. Be ni Israel tabilɔi lɛ pue kɛ Yuda nomii lɛ yɛ Samaria lɛ, etee ni ekɛ amɛ yakpe, ni ekɛɛ Israel tabilɔi lɛ akɛ, “Naa, Yehowa, nyɛtsɛmɛi aNyɔŋmɔ lɛ, mli ni fu Yuda lɛ no hewɔ ehã nyɛye amɛnɔ kunim yɛ ta lɛ mli lɛ. Shi gbe ni nyɛgbe amɛ lɛ yɛ musuŋshãa bɔ ni Yehowa diɛŋtsɛ enu he yɛ ŋwɛi ehã amɛ.

¹⁰ No sɛɛ hu lɛ, nyɛto yiŋ akɛ nyɛbaafee Yuda kɛ Yerusalɛm hii kɛ yei nyɛnyɔji. Aso nyɛ diɛŋtsɛ hu nyɛtɔ̃ko Yehowa, nyɛNyɔŋmɔ lɛ, nɔ nyɛtoko?

¹¹ Nyɛle sane ko? Nyɛhãa nyɛnyɛmimɛi lɛ ni nyɛyaŋɔ amɛ nom lɛ akua amɛsɛɛ ayaa ejaakɛ Yehowa mli ni efu nyɛ lɛ jeee hiɛ nɛ.”

¹² Asaŋ Efraimbii lɛ amaŋ onukpai ejwɛ komɛi hu te shi amɛshi tabilɔi ni jɛ ta amɛbaa shĩa lɛ. Amɛ ji Azaria, Yehohanan bi lɛ, kɛ Berekia, Meshilemot bi lɛ, kɛ Yehizkia, Shalum bi lɛ, kɛ Amasa, Hadlai bi lɛ.

¹³ Amɛkɛɛ tabilɔi lɛ akɛ, “Nyɛkɛ nomii nɛɛ akabaa maŋ nɛɛ mli kɔkɔɔkɔ. Tɔ̃mɔ ni wɔtɔ̃ Yehowa nɔ momo sa lɛ eda, ni eyɛ wɔhe mlifu ni naa wa. Nyɛmiifee nɛkɛ koni nyɛkɛyawo tɔ̃mɔ hee nyɛbashi nɔ ni kã wɔnɔ lɛ nɔ nyɛhã wɔ?”

¹⁴ Wiemɔ nɛɛ hã tabilɔi lɛ shi nomii lɛ kɛ nii ni amɛha lɛ fɛɛ amɛhã maŋ onukpai lɛ kɛ maŋbii ni ewo shi yɛ jɛi lɛ.

¹⁵ Kɛkɛ ni maŋ onukpai ejwɛ lɛ kɔlɔ mamai yɛ haanii lɛ amli amɛhã nomii lɛ ateiaŋ mɛi ni mama bɛ amɛhe ekpakpa ko lɛ. Amɛhã amɛ atadei kɛ tokotai amɛwo; ni ahã nomii lɛ anii amɛye amɛtɔrɔ kɛ nɔ ko hu amɛnu. Mɛi hu ni ena faji lɛ, atotoo nɔ kɛ mu ahã amɛ. Nomii lɛ ateiaŋ mɛi ni egbede ni nyɛɛɛ anyiɛ dɔŋŋ lɛ, akɛ amɛ tara tejii anɔ, kɛkɛ ni maŋ onukpai ejwɛ lɛ kpala nomii lɛ fɛɛ kɛyahã amɛnyɛmimɛi Yudabii ni yɔɔ Yeriko, ni ji tɛŋ maŋ lɛ, kɛkɛ ni amɛku amɛsɛɛ kɛtee Samaria.

Ahaz yabi Asiria dɛŋ yelikɛbuamɔ

¹⁶ Be nɛɛ mli lɛ Maŋtsɛ Ahaz tsu Asiria Maŋtsɛ Tiglat Pileser ŋɔɔ akɛ ekɛ etabilɔi aba koni ebawa lɛ,

¹⁷ ejaakɛ Edombii lɛ ebatua Yuda ekoŋŋ, ni amɛŋɔ mɛi anom kɛtee.

¹⁸ Nakai be lɛ mli nɔŋŋ lɛ Filistibii lɛ ebatua Yuda maji ni yɔɔ Yuda anaigbɛ gɔji lɛ ahiɛshi lɛ kɛ agbɛnɛ ewuoyigbɛ maji lɛ hu. Amɛshɔ̃shɔ̃ɔ̃ maji nɛɛ, Bet-Shemesh kɛ Ayalon kɛ Gederot kɛ Soko kɛ ehe akrowai lɛ, kɛ Timna kɛ ehe akrowai lɛ, kɛ Gimzo hu kɛ ehe akrowai lɛ, ni amɛbahi maji nɛɛ amli kwraa.

¹⁹ Yehowa ba Yuda shi nɛkɛ yɛ Yuda Maŋtsɛ Ahaz hewɔ, ejaakɛ Ahaz bɔ nyɛnyɛŋtswi yɛ Yuda, ni eyayeee Yehowa anɔkwa.

²⁰ Be ni Asiria Maŋtsɛ Tiglat Pileser ba lɛ yɛ nɔ najiaŋ ni eeewa Ahaz kɛwo lɛ hewalɛ lɛ, ebawo Ahaz nɔnaa lɛ mli wu moŋ

²¹ ejaakɛ Ahaz loo Yehowa Sɔlemɔtsu lɛ mli jwetri lɛ kɛ maŋtsɛ we lɛ hu mli nɔ lɛ, kɛ maŋ onukpai lɛ hu ashĩai amli jwetri fɛɛ, ni ekɛhã Tiglat Pileser, Asiria Maŋtsɛ lɛ; shi enɛ tete yeee buaaa Ahaz yɛ gbɛ ko nɔ kwraa.

Maŋtsɛ Ahaz he eshai

²² Shi efimɔ be nɛɛ mli lɛ Maŋtsɛ Ahaz kã he moŋ egbo Yehowa nɔ toi fe tsuutsu lɛ.

²³ Eshã afɔlei ehã Damaskobii ni ye enɔ kunim yɛ ta mli lɛ ajemawɔji lɛ. Ekɛɛmɔ ji akɛ, “Siriabii ajemawɔji lɛ yeɔ buaa Siria maŋtsɛmɛi lɛ, no hewɔ lɛ, kɛji mi hu mishã afɔle mihã amɛ lɛ, amɛaaye amɛbua mi.” Shi enɛ ni efee lɛ moŋ hã Ahaz kɛ Israel fɛɛ hiɛ kpãtã butuu

²⁴ Kɛkɛ ni Ahaz bua Nyɔŋmɔ We lɛ mli tsɛnsii kɛ kpuji kɛ nibii krokomɛi lɛ fɛɛ anaa, ni ejwra amɛ. No sɛɛ lɛ, eŋmɛ Yehowa We lɛ naa shinai lɛ amli; ni etee eyamamɔ afɔleshãa latɛi ehã ehe yɛ Yerusalɛm maŋ lɛ mli akutso fɛɛ akutso mli.

²⁵ Agbɛnɛ efee hei grɔŋŋi koni ashã tsofakɛŋma akɛja jemawɔji yɛ jɛi yɛ Yuda maji wuji fɛɛ amli. Jeŋba nɛɛ hã Yehowa, etsɛmɛi aNyɔŋmɔ lɛ, mli fu lɛ.

²⁶ Maŋtsɛ Ahaz shihilɛ mli saji krokomɛi ni eshwɛ lɛ, aŋmala kɛjɛ shishijee kɛyagbe naa yɛ Yuda kɛ Israel Maŋtsɛmɛi Ahe Saji Awolo lɛ mli.

²⁷ Ahaz gbo ni afu lɛ yɛ Yerusalɛm, shi jeee yɛ maŋtsɛmɛi afũuhe lɛ. Ebinuu Hezekia ji mɔ ni baye maŋtsɛ yɛ esɛɛ.