2 Kronika 27 - ŊMALƐ KRƆŊKRƆŊ LƐ

Yuda Maŋtsɛ Yotam maŋtsɛyeli lɛ

¹ Yotam eye afii nyɔŋmai enyɔ kɛ enumɔ be ni ebɔi maŋtsɛyeli lɛ, ni eye maŋtsɛ afii nyɔŋma kɛ ekpaa yɛ Yerusalɛm. Enyɛ ni fɔ lɛ gbɛi ji Yerusha, ni Zadok biyoo ji lɛ.

² Yotam ba ejeŋ bɔ ni Yehowa taoɔ tamɔ bɔ ni etsɛ Uzia fee lɛ pɛpɛɛpɛ, fe akɛ lɛ lɛ ekaaa akɛ ekɛ ehe aaawo sɔ̃ɔmɔ ni asɔmɔɔ yɛ Yehowa Sɔlemɔtsu lɛ mli lɛ mli. Shi maŋbii lɛ tee nɔ amɛja jemawɔji komɛi.

³ Maŋtsɛ Yotam ji mɔ ni tswa Kooyi Agbo lɛ ni akɛboteɔ Yehowa We lɛ kpo lɛ nɔ lɛ; ni etswa Ofel Gbogbo lɛ hu nɔ kɛtee ŋwɛi saŋŋ.

⁴ No sɛɛ hu lɛ eto maji ejwɛ yɛ Yuda gɔji ashikpɔji lɛ anɔ; ni emamɔ mɔji kɛ mɔji gromogromoo fɛɛ yɛ koi asɛɛ shikpɔji lɛ hu anɔ.

⁵ Ekɛ Amonbii amaŋtsɛ lɛ wu ta, ni eye lɛ kɛ eta lɛ nɔ kunim. No hewɔ lɛ, Yotam hã Amonbii lɛ bahã lɛ jwiɛtɛi ni tsiimɔ ji talentai oha, kɛ ŋmaa nsɛnitɛ wulu lɛ akpe kome, kɛ abele hu nakai falɛ nɔŋŋ yɛ nakai afi lɛ nɔ amɛkɛsɔmɔ lɛ. Amonbii lɛ basɔmɔ lɛ kɛ nibii nɛɛ falɛ nakai nɔŋŋ pɛpɛɛpɛ yɛ afi ni ji enyɔ lɛ kɛ nɔ ni ji etɛ̃ lɛ hu nɔ.

⁶ Yotam baje agbo ejaakɛ eshihilɛ mli lɛ ebo Yehowa, eNyɔŋmɔ lɛ, toi.

⁷ Yotam he saji krokomɛi ni eshwɛ lɛ kɛ tai ni ewu lɛ, kɛ emaŋtsɛyeli lɛ mli nibii ni etsu lɛ aŋmala fɛɛ yɛ Israel kɛ Yuda Maŋtsɛmɛi Ahe Saji Awolo lɛ mli.

⁸ Yotam eye afii nyɔŋmai enyɔ kɛ enumɔ be ni ebɔi maŋtsɛyeli, ni eye maŋtsɛ afii nyɔŋma kɛ ekpaa yɛ Yerusalɛm;

⁹ ni egbo, ni afu lɛ yɛ David Maŋ lɛ mli. Kɛkɛ ni ebinuu Ahaz baye maŋtsɛ yɛ esɛɛ.