2 Kronika 26 - ŊMALƐ KRƆŊKRƆŊ LƐ

Yuda Maŋtsɛ Uzia

¹ Yudabii fɛɛ hala Amazia binuu ni eye afii nyɔŋma kɛ ekpaa lɛ akɛ eye maŋtsɛ yɛ etsɛ sɛɛ.

² Amazia etsɔ̃ esɛɛ dani Uzia yashɔ Elat maŋ lɛ ehã Yuda shikpɔŋ lɛ, ni etswa gbogbo ewo he.

³ Uzia eye afii nyɔŋma kɛ ekpaa be ni ebɔi maŋtsɛyeli lɛ, ni eye maŋtsɛ afii nyɔŋmai enumɔ kɛ enumɔ yɛ Yerusalɛm. Enyɛ ni fɔ lɛ gbɛi ji Yekolia ni jɛ Yerusalɛm lɛ.

⁴ Eba ejeŋ bɔ ni Yehowa taoɔ tamɔ etsɛ Amazia fee lɛ pɛpɛɛpɛ.

⁵ Zakaria ji mɔ ni wo lɛ ŋaa, ni etsɔ̃ɔ lɛ bɔ ni ehi shi ehã yɛ Nyɔŋmɔ gbɛfaŋ; ni gbɔmɔ nɛɛ wala be mli fɛɛ lɛ Maŋtsɛ Uzia sɔmɔ Nyɔŋmɔ ni bei abɔ fɛɛ ni Uzia sɔmɔ Yehowa lɛ, Nyɔŋmɔ hã eshwere.

⁶ Maŋtsɛ Uzia fã ta ni ekɛ Filistibii lɛ yawu, ni ekumɔ amɛmaji ni ji Gat kɛ Yabine kɛ Ashdod ahe gbogboi lɛ eshwie shi. No sɛɛ lɛ, etotoo maji wuji kɛ amɛhe gbogboi yɛ Ashdod kpokpai anɔ, kɛ agbɛnɛ yɛ Filistibii ashikpɔŋ lɛ nɔ hei krokomɛi hu.

⁷ Nyɔŋmɔ ye ebua lɛ ni eye Filistibii lɛ kɛ Arabiabii ni yɔɔ Gur-Baal lɛ, kɛ agbɛnɛ Meunbii lɛ fɛɛ anɔ kunim.

⁸ Amonbii lɛ tsu too amɛkɛsɔmɔ Uzia; ni Uzia batsɔ̃ gbɔmɔ wulu naakpa, ni egbɛi hehe kɛshɛ Ijipt kpokpai anɔ tɔ̃ɔ.

⁹ Fee sɛɛ lɛ Uzia mamɔ mɔji gojogojoo komɛi, ni ekɛwaje Yerusalɛm maŋ lɛ. Mɔji nɛɛ ekome yɛ Koŋ Agbo lɛ naa, ni ekome yɛ Jɔɔ Agbo lɛ naa, ni ekome hu yɛ Gbogbo Lɔgɔmɔhe lɛ.

¹⁰ Emamɔ mɔji gojogojoo lɛ ekomɛi yɛ ŋa lɛ nɔ hu; ni etsara nubui pii ejaakɛ eyɛ kooloi babaoo diɛŋtsɛ yɛ jɔɔ naa shikpɔŋ lɛ kɛ ŋa lɛ hu nɔ. Akɛni Uzia sumɔɔ humɔ hewɔ lɛ, ehã mɛi hu ŋmɔji, ni amɛfeefee waintromii yɛ gɔji lɛ anɔ kɛ jɔi lɛ amli fɛɛ.

¹¹ Asaŋ Maŋtsɛ Uzia yɛ tabilɔi ni efee kralo hã ta be fɛɛ be. Ajara amɛmli asafoiasafoi, ni Yeiel, woloŋmalɔ lɛ, kɛ maŋtsɛ tsulɔ Maaseia ji mɛi ni buɔ tabilɔi lɛ ayikulɛ he akɔntaa. Ni amɛ hu amɛyɛ Hanania ni ji maŋtsɛ tatsɛmɛi lɛ ateŋ mɔ kome lɛ shishi.

¹² Tsɛmɛi ashĩai lɛ amli hii kakabãŋi, ni ji tabilɔi lɛ asafoiatsɛmɛi lɛ, fɛɛ ayibɔ ji akpei enyɔ kɛ ohai ekpaa.

¹³ Ni tabilɔi ni atsɔse ato koni amɛkɛ maŋtsɛ lɛ henyɛlɔi awu kɛ ekãa lɛ ayikulɛ ji hii akpei ohai etɛ̃ kɛ kpawo kɛ ohai enumɔ.

¹⁴ Uzia fee tsɛŋi kɛ akplɔi kɛ dade faii kɛ dade damai kɛ gãii kɛ akromiai wuji amli tɛi tete ehã Yuda tabilɔi lɛ.

¹⁵ Ŋaalɔi sɔ̃sɔ̃ɔ tsɔnei hã Maŋtsɛ Uzia koni akɛmamɔ mɔji gojogojoo lɛ amli kɛ maŋ lɛ he gbogbo lɛ koji lɛ koni akɛtsɛrɛ̃ gãi, asaŋ ni akɛfɔ̃ tɛi wuji hu. Bɔ ni atsɔ̃ aye abua Maŋtsɛ Uzia ni ena hewalɛ lɛ eyɛ naakpɛɛ; ni ehã egbɛi hehe kɛtee shɔŋŋ diɛŋtsɛ.

Yehowa gbala Uzia toi

¹⁶ Hewalɛ ni Maŋtsɛ Uzia na nɛɛ hã ewo ehe nɔ, ni no kɛ eshigbeemɔ ba. Uzia je Yehowa, eNyɔŋmɔ, lɛ ŋwane, ni etee Sɔlemɔtsu lɛ mli akɛ eyaashã tsofakɛŋma lɛ diɛŋtsɛ yɛ tsofakɛŋmashãa latɛ lɛ nɔ.

¹⁷ Shi Osɔfonukpa Azaria kɛ osɔfoi nyɔŋmai kpaanyɔ ni ji kãkãlɔi komɛi fata ehe kɛnyiɛ Uzia sɛɛ kɛtee Sɔlemɔtsu lɛ mli,

¹⁸ ni amɛyatsi lɛ gbɛ, ni amɛkɛɛ lɛ akɛ, “Maŋtsɛ Uzia, ejeee ogbɛnaa akɛ oshã tsofakɛŋma ohã Yehowa. Osɔfoi, ni ji Aaron shwiei, lɛ pɛ ji mɛi ni ajɔɔ tsofakɛŋmashãa nɔ ahã. Shi He Krɔŋkrɔŋ lɛ ni oya! Otɔ̃ Yehowa nɔ, ni obɛ Yehowa dɛŋ jɔɔmɔ ko ni obaana dɔŋŋ.”

¹⁹ Kɛkɛ ni Uzia mli fu. No mli lɛ ehiɛ tsɛnsi ni ekɛbaashã tsofakɛŋma lɛ. Emli lɛ ni fu osɔfoi lɛ nɔŋŋ kɛkɛ ni hewolo nɔ hela ko ni asheɔ lɛ gbeyei shwie ehiɛnaa kplitsaa yɛ osɔfoi lɛ ahiɛ nɔŋŋ.

²⁰ Be ni Azaria kɛ osɔfoi krokomɛi lɛ na hewolo nɔ hela kplitsaa lɛ ni shwie Uzia hiɛnaa lɛ, amɛtsirɛ eyisɛɛ akɛ eshi Sɔlemɔtsu lɛ mli. Ni lɛ diɛŋtsɛ po ehe fee oya ni eje kpo ejaakɛ Yehowa egbala etoi.

²¹ Maŋtsɛ Uzia ye hewolo nɔ hela nɛɛ kɛtee egbele mli. Hela lɛ hewɔ lɛ atsi lɛ Yehowa We lɛ mli gbɛ, ni ehi shi yɛ shĩa ko mli banee kɛ hela lɛ. Ni fee nakai lɛ, Maŋtsɛ Uzia bi Yotam kwɛ maŋtsɛ we lɛ kɛ shikpɔŋ lɛ fɛɛ nɔ yɛ etsɛ lɛ najiaŋ.

²² Uzia he saji ni eshwɛ lɛ, Amoz bi Gbalɔ Yesaia eŋmala fɛɛ kɛjɛ shishijee kɛyagbe naa.

²³ Uzia tsɔ̃ esɛɛ, ni afu lɛ banee yɛ maŋtsɛmɛi afũuhe lɛ shikpɔŋ lɛ nɔ, ejaakɛ hela lɛ hewɔ lɛ akɛ lɛ futuuu maŋtsɛmɛi agbohii lɛ. Kɛkɛ ni ebi Yotam baye maŋtsɛ yɛ esɛɛ.