2 Kronika 25 - ŊMALƐ KRƆŊKRƆŊ LƐ

Yuda Maŋtsɛ Amazia

¹ Amazia eye afii nyɔŋmai enyɔ kɛ enumɔ be ni ebɔi maŋtsɛyeli lɛ; ni eye maŋtsɛ afii nyɔŋmai enyɔ kɛ nɛɛhu yɛ Yerusalɛm.

² Eba ejeŋ bɔ ni Yehowa taoɔ, shi jeee kɛ etsuiŋ fɛɛ.

³ Maŋtsɛyeli lɛ mli hewalɛ lɛ shɛ Amazia dɛŋ gbe naa, yeee be ko kwraa ni egbe tsuji lɛ ni gbe etsɛ Maŋtsɛ Yoash lɛ.

⁴ Shi moŋ egbeee amɛbii koni ekɛye kitã ni Yehowa ewo yɛ Mose Mla Wolo lɛ mli lɛ nɔ. No ji akɛ, “Tsɛmɛi akagbo amɛbii atɔ̃mɔi ahe gbele, ni bii hu akagbo amɛtsɛmɛi atɔ̃mɔi ahe gbele; shi moŋ mɔ fɛɛ mɔ lɛ egbo lɛ diɛŋtsɛ etɔ̃mɔ he gbele.”

Yuda kɛ Edom wu ta

⁵ Maŋtsɛ Amazia bua Yuda akutsei lɛ kɛ Benyamin hu akutsei lɛ amli hii lɛ fɛɛ anaa kuikui yɛ amɛtsɛmɛi awei lɛ anaa. Kɛkɛ ni eto asafoiatsɛmɛi ehã hii oha akui lɛ kɛ hii akpei akui lɛ hu. Hii ni eye afii nyɔŋmai enyɔ kɛ esɛɛ sɔŋŋ ni yɔɔ kui lɛ amli; ni be ni akpa amɛnaa lɛ ana hii akpei ohai etɛ̃, ni ji mɛi ni aje gbɛ atsɔse ahã tawuu, ni asaŋ amɛhe esa jogbaŋŋ yɛ akplɔ kɛ tsɛŋ kɛ nɔmɔ mli.

⁶ No sɛɛ lɛ, etse jwiɛtɛi ni tsiimɔ aaafee talentai oha, ni akɛtee akɛyabɔ hii tabilɔi kãkãlɔi akpei oha apaa yɛ Israel.

⁷ Shi gbalɔ ko ba Maŋtsɛ Amazia ŋɔɔ, ni ebakɛɛ lɛ akɛ, “Nii, okɛ Israel tabilɔi nɛɛ akaya ta lɛ, ejaakɛ Yehowa bɛ Efraimbii nɛɛ asɛɛ.

⁸ Kɛji efee bo akɛ kɛji amɛfata ohe lɛ obaana hewalɛ kɛwu ta lɛ, no lɛ Nyɔŋmɔ baatswa bo shi yɛ henyɛlɔi lɛ ahiɛ, ejaakɛ Nyɔŋmɔ ji mɔ ni yɔɔ hewalɛ ni ehãa mɔ yeɔ kunim ni eyɛ hewalɛ ni ehãa mɔ gbeɔ shi.”

⁹ Amazia bi gbalɔ lɛ akɛ, “Te wɔfee tɛŋŋ mɔ yɛ jwiɛtɛi ni tsiimɔ ji talentai oha ni mikɛbɔ Israel tabilɔi lɛ apaa lɛ gbɛfaŋ hu?” Gbalɔ lɛ to he akɛ, “Yehowa baanyɛ eto bo najiaŋ kɛteke nɔ.”

¹⁰ No hewɔ lɛ, Amazia wo Israel tabilɔi ni ba lɛ wamɔ lɛ agbɛ akɛ amɛkpale amɛya amɛmaŋ. Efraim tabilɔi lɛ ku amɛsɛɛ ni amɛmli ewo la ewo Yudabii lɛ waa diɛŋtsɛ. Amɛyashɛ shĩa kɛ mlifu gbeyeigbeyei.

¹¹ Amazia fee nuu, ni enyiɛ tabilɔi lɛ ahiɛ kɛtee Ŋoo Jɔɔ lɛ mli, ni amɛ kɛ Edombii lɛ yatswa ta ko yɛ jɛi. Yudabii lɛ gbe Edom tabilɔi akpei nyɔŋma yɛ jɛi,

¹² ni amɛmɔmɔ tabilɔi akpei nyɔŋma hu. Kɛkɛ ni amɛkpala Edom tabilɔi lɛ kɛtee tɛsaa ko nɔ yɛ Sela maŋ lɛ masɛi, ni amɛjɛ tɛsaa lɛ nɔ amɛfɔ̃fɔ̃ɔ Edombii lɛ amɛtswia tɛsaa lɛ nɔ, ni amɛmli tserɛ dukuduku.

¹³ Be nɛɛ mli nɔŋŋ lɛ Israel tabilɔi lɛ ni Amazia hã amɛku amɛsɛɛ ni ekɛ amɛ eyaaa lɛ tee ni amɛyatua Yuda maji lɛ kɛjɛ Samaria aahu kɛyashwie Bet-Horon. Amɛgbe maji lɛ amli gbɔmɛi akpei etɛ̃, ni amɛha nii hu babaoo kɛtee.

¹⁴ Be ni Amazia yaye Edombii lɛ anɔ kunim ni eku esɛɛ ebaa lɛ, etere Edombii ajemawɔji lɛ kɛba. Ebamamɔ jemawɔji lɛ akɛ lɛ ejemawɔji, ni eja amɛ, ni eshã afɔlei hu ekɛhã amɛ.

¹⁵ Yehowa na Amazia mlifu yɛ sane nɛɛ hewɔ. No hewɔ lɛ, etsu gbalɔ ko Amazia ŋɔɔ, ni ebabi lɛ akɛ, “Te fee tɛŋŋ ni ojaa mɛi komɛi ajemawɔŋ ni eyanyɛɛɛ nɔtsɛmɛi lɛ tete ehere yɛ bo odɛ̃ŋ lɛ hu?”

¹⁶ Shi Maŋtsɛ Amazia fo gbalɔ lɛ wiemɔ lɛ mli, ni ekɛɛ lɛ akɛ, “Mɛɛbe wɔwo bo maŋtsɛ ŋaawolɔ? Mɔ onaabu mli koni mikahã agbe bo!” Kɛkɛ ni gbalɔ lɛ kpa wiemɔ lɛ; shi etsɔ̃ hiɛ ni ekɛɛ Amazia akɛ, “Nɔ ni ofee lɛ kɛ agbɛnɛ miŋaawoo toi ni obooo nɛɛ ehã mina mile akɛ Yehowa eto eyiŋ akɛ ebaakpãtã ohiɛ.”

Yuda kɛ Israel wu ta

¹⁷ Yuda Maŋtsɛ Amazia kɛ eŋaawolɔi tee ajina. Kɛkɛ ni etsu ni ayakɛɛ Yehoash ni ji Yehu bi Yehoahaz bi lɛ, ni ji Israel maŋtsɛ lɛ, akɛ eetsɛ lɛ ŋa nɔ.

¹⁸ Shɛɛ nɛɛ hetoo ni Yehoash bahã Yuda Maŋtsɛ Amazia ji akɛ, “Be ko lɛ Lebanon ŋmei tso tsu ni ayakɛɛ Lebanon tsenedrutso akɛ, ‘Kɛ obiyoo lɛ ahã mibinuu lɛ gbãlã.’ Shi ŋaŋ kooloo ko ni miiho yɛ jɛi ni nu shɛɛ lɛ tee ni eyanaanaa ŋmei tso lɛ nɔ.

¹⁹ Ooshwã akɛ, ‘Bɛ oona akɛ miye Edombii anɔ kunim?’ Oyitso efuu. Ole sane ko? Taomɔ ohe ko ota yɛ oshĩateŋ kpoo. Mɛɛba oyatao sane ni baahã bo kɛ Yuda fɛɛ hiɛ akpãtã nɛɛ?”

²⁰ Shi Amazia eyabuuu shɛɛ lɛ, ejaakɛ Nyɔŋmɔ yiŋtoo ji akɛ ebaahã aye Amazia nɔ kunim yɛ Edombii ajemawɔji ni eja lɛ ahewɔ.

²¹ No hewɔ lɛ, Israel Maŋtsɛ Yehoash fã ta kɛbanina Yuda Maŋtsɛ Amazia yɛ Yuda shikpɔŋ lɛ nɔ. Yudabii lɛ kɛ Israelbii lɛ damɔ shi hiɛ kɛ hiɛ yɛ Bet-Shemesh.

²² Israelbii lɛ ye Yudabii lɛ anɔ kunim, ni Yudabii lɛ jojoo foi kɛtee amɛshĩaiaŋ.

²³ Israel Maŋtsɛ Yehoash mɔ Yuda Maŋtsɛ Amazia, ni ji Ahazia bi Yoash bi lɛ, yɛ Bet-Shemesh, ni ekɛ lɛ ba Yerusalɛm. Yehoash bakumɔ Yerusalɛm maŋ lɛ he gbogbo lɛ eshwie shi kɛjɛ Efraim Agbo lɛ naa aahu kɛyashi Koŋ Agbo lɛ naa. Gbɛ ni kã agboi enyɔ nɛɛ ateŋ lɛ jɛkɛmɔ ji ninetalɔi ohai ejwɛ.

²⁴ Eloo Nyɔŋmɔ We lɛ mli shika kɛ jwiɛtɛi kɛ tsɛnsii kɛ kpuji fɛɛ ni ana lɛ, ni emɔmɔ Obed-Edom shwiei ni buɔ nibii nɛɛ ahe lɛ efata nibii lɛ ahe. Eku sɛɛ eloo maŋtsɛ we lɛŋ hu jwetri fɛɛ, ni emɔmɔ nomii babaoo hu ofɔ̃ kɛku esɛɛ kɛtee Samaria.

²⁵ Israel Maŋtsɛ Yehoash tsɔ̃ hiɛ egbo afii nyɔŋma kɛ enumɔ dani Maŋtsɛ Amazia gbo.

²⁶ Amazia wala he saji ni eshwɛ lɛ aŋmala fɛɛ kɛjɛ shishijee kɛyata naagbee yɛ Yuda kɛ Israel Maŋtsɛmɛi Ahe Saji Awolo lɛ mli.

²⁷ Abɔi Amazia yinɔ apamtoo yɛ Yerusalɛm kɛjɛ beyinɔ ni ekwa Yehowajamɔ beebe. Enɛ hewɔ lɛ, naagbee mli aahu lɛ Amazia jo foi kɛtee Lakish. Shi atiu lɛ kɛtee Lakish lɛ, ni ayagbe lɛ yɛ jɛi.

²⁸ Awo egbonyo lɛ afɔ okpɔŋɔ nɔ kɛba Yerusalɛm, ni abafu lɛ yɛ maŋtsɛmɛi afũuhe lɛ yɛ David Maŋ lɛ mli.